Amsal 29 - Eipomek

¹ Yatanye do, malye uplye talak ara, ninye deiyok nang arye, “An malye unmalam ning ara, bataklyame, winina meme,” nyabuka wenenyak bukni, el mandipna kanye uplirye, ‘Kume, sik deiyok nang arye nyaninyak yupu ara, pia kum kekenamne’ tenen, sik yupu yaniltalulnye bira, aminyan ara Allah arye elti, tonok talak aryuk wenepliba, kum upra deipnamle. Akunum weneplirye, kum kipdeiplyopura, anye bira, yata wiribuka lipsisikuka deiptingba, tamubuka teleb uptu do? Ara, pia kum winipmanto.

² Teleb uk ukirye, talima darapdongobuka pia diksukumuk ulamice ninye arye, ninye deiyok nang ukirye, sik talibuka unamak mutuku ara, diksukumuk ubuka, ninye yupu lipsisikuka bokolinamak talak noutamak nirya ara, sik amu tam unyak ninye nirya arye, kanye deibuka unamake. Bukni, malye winin ninguk talibuka ulamice nang arye, tonok mutuku nirya talibikirye, ninye deiyok nang kibuka unamak talak ara, sik amu tam unamak ninye nirya arye, ‘Se, ikin ning nun damak yanganamsil ning ara, nun like’ tenen, imun kanye bobuka engenamake.

³ Yatanye do, weik kel bikna ning atibuk, pataliba pia teninauk ululnye bira, el li birye elti, kanye delilule. Bukni, yatanye do nirya, talye yoltanyak kilapu, sik tam kildolulnye bira, el talilul yo bok nirya ara, kum kipdeiplirye ititildalule. Winibuka kum dalyopura, ikin weik unamle.

⁴ Tonda, ninye deiyok talibuka ulul Raja arye, teleb ubuka taliplirye, ninye yupu bokolin talak, diksukum yupu uk nyaplyopura, el talinamle mutuku nirya ara, pia telebuk unamle. Bukni, amutuku moubuka talina kumce, malye winina deiyok nang arye, sik amu tam ninye ati, “Yo bok weik arye arenamsilame,” nyabuka, aning weik arye dolonyaka deiyok nang ara, sik talinamak mutuku ap, sikce talinamak ninye nirya ap ara, ikin pia weik upnin banamle.

⁵ Yatanye do, el kayapu nang, sik neika unamak ninye ati malye ubiceura, wenena kumce, ‘Yo dauplye’ tenen, teleb yupu uk nyalulnye bira, dipkoprob el kayapu nang, sik nong youna ati, elce tapu wena atonun webuka kintinililule. Elce wenena yupu ap, lipsisikuka nyana yupu ap, kum nyaplyopura, el kayapu nang arye, tuba malyeuk upnin balamica ani, aminyan talak ara, ikin weik upnamle.

⁶ Ninye ton malye winin ninguk talibuka ulirye, malyeuk ululnye bira, el bidamnye aryuk wena welildalule. Bukni, talima diksukum ululnye bira, teleb ninguk talibuka ulula anya arye, elda kanye deibuka pia telebuk unamle. El ap, sik yuk diksukum unyak ninye ap, kanye deibikirye, mot sebuka unamake.

⁷ Teleb ubuka ukirye, dipkoprob ninguk talibuka diksukumuk unyak nang ara, mikip pia kum ninye ap, bona utotoa talina kum ninye ap ati, ‘Diksukumuk ubuka ubirye, aninye ati teleb kilin ning ara, ani-ani,’ tenebuka, moubuka kel bikinyake. Bukni, malye ninguk talibuka unyak nang ara, bona utotoa talina kum ninye ap, mikip pia kum ubuka ulamice ninye ap ara, sik patalamle ning ati, pia kum tenenyake.

⁸ ‘Malye winin ninguk uptibye’ tenen, patalye nang ara, teleb un ning nirya ati, nilik-nilik abikirye, akutunyake. Wininyaka deice arye, aning-aning nirya, pia weik arye ulul mutuku, kota noutamak unyak ninye nirya ati, malye kilinyake. Sik malye yupu nyanyaka deice arye, amutuku ninye nirya ara, yupu waldana ap, olana ap, unyake. Bukni, teleb winin ninguk talibuka unyak nang ara, weik kel bikna deiyok ning kel kiyamica ati, yuk ninye yu upliba, waldana uk unmace talak ara, “Kume nun kayapu, aning ara bataklulume. Tunimabuka unamlume. Teleb ubuka neika unamabe,” nyabuka, namin yupu nyanyaka deice arye, yu un ning nirya ara, kum kilinyake.

⁹ Tonda, weik kel bikinanye ap, walwal uk ululnye ap, waldanmarice talak ara, ‘Winira ninye yupu lipsisikuka bokolina deiyok nang dam binimnyeba, sikce ayupu bokeipnamsiyake’ tenen, anyaik bitiringa babye, awal-walnye bira, el talima noutamak malye yupu welepliba, surikuka akutununa ap, weik yupu deice malye yupu nyana ap, pia nyanamle. Wininmalyopura, sik nyaldanmarice ning ati, ‘Deiyok ara ani,’ tenebuka, sirya kum daknamdake. Ikin un ning ap, dereldan ning ap, awamli bukni, yupu bokolina aik arye, batakuka bindopnamdake.

¹⁰ Yu kanye bobuka unyak nang arye, ‘Ninye ton optibye,’ tenena uk unyake. Pia yu weik nang unyaka anya arye, kanye talima diksukumuk unyak ninye ati, ‘Nun like,’ tenenyake. Tonda, sik talima yu weik unyak nang arye, ‘Se, sik teleb ninguk talibuka unyak ninye ara, nunda talye lukparabuka oltakana uk uptibye,’ tenekirye, patalule.

¹¹ Pia walwalnye birye, ninye ati derenamlye talak ara, tenilena kumce, talye lukparabuka mikip arye, lakak yu yupu nyaltakalule. Bukni, weik kelnye bira, el talima noutamak yu upmalya babye, yupu nyapnulyeura, nimalye arye tenebuka, yupu nyapnin banmalya ani, namin yupu uk nyalule.

¹² Tonda, ninye deiyok talibuka, pemerintah deiyok nang arye, minina yupu ap, tilila yupu ap talye lukparabuka nyanyak nang arye nyanyak yupu kekebikirye, “E, na kayapu nang ati telebe,” nyabikirye, atilila yupu nyanyak nang ati, kinamakura, sik amu tam pil don nang pegawai nang nirya babye, atonun tilila yupu nyalakirye, malyeuk ubuka unamake.

¹³ Bona utotoa talina kum ninye ara, sik deice tam talibuka ukirye, ikin ning bobuka, sik bona utotoa talina kum ninye, sik nong deice delinyak ninye deiyok nang ap, nirya arye, sik tenebice ninguk wininyake. Ara, abitinye yala ninye ati, Allah el si Yahweh arye, sik asing lapdeiplirye, el dirina arepliba, sik asing arye aning nirya elinyake.

¹⁴ Weik ninye deiyoknye birye, mikip pia kum ninye ap, aning-aning nirya kum talinyakce, pia bona utotoa talina kum daunyak ninye ap ati, teleb ubuka yupu bokeiplyopura, elce amutuku ninye ap, amutuku ap talinamle talak ara, lo pia weik upnin banamle. El ti minopce kum punupnamake.

¹⁵ Sik mitik mapu ara, mangkau arye malye ubicopura, ‘Dauplye’ tenen, luba kum kipnamlume. Sik ni yapu ap, sik nin yapu ap arye, adiparyuk peterena ap, wenena ap ubica deice arye, weik kel bikna deiyok ning yangalule. Bukni, sik ni yapu ap, sik nin yapu ap arye, sik mapu ati kum wenebikiba, sik talye kanye bobuka daulamica ani, aminyan talak ara, sik pia malye-malyeuk unamaka anya arye, winibuka malye unamaka deice arye, sik nin yapu ati, alye dakalinamake.

¹⁶ Malye winin ninguk talibuka ulamice nang arye, tonok mutuku nirya talibikirye, ninye deiyok nang kibuka unamak talak ara, sik amu tam unamak nang nirya babye, malye winin ninguk talibuka ukirye, malye weik upnin banamake. Bukni, yuk mutuku nang arye, amalye ubuka ulul ninye deiyoknye biti, obuka daknamak talak ara, amutuku noutamak, sik diksukumuk unyak ninye arye, moubuka dinamake.

¹⁷ Tonda, anggun mapu nirya ati, teleb ubuka peterepmunya deice arye, teleb ubuka kel bikicopura, aminyan talak telebuk upnin balamikiba, eipmunce, kanye deibuka unamlume. Anggun mapu arye, teleb ninguk talibuka ulamicopura, sik ni yapu ap, sik nin yapu ap arye, ‘Se, nun mapu ara, yatato ninguk unamak do? Malye unamak do, teleb unamak do?’ tenen, ilil kum unamake. Kanye deibuka sik nirya telebuk unamake.

¹⁸ Allah arye, “Aning ara wininamlulume, aning ara pia kum wininamlulume,” nyapdeiamsuk yupu ap, atalak noutamak ara nun talima noutamak nyasilye yupu nirya ap, ‘Ayupu nun kum kekepnuyabe,’ tenebikirye, yaniptabicopura, pia malye winin ninguk unyake. ‘Aning ara teleb do, malye do?’ tenena kumce, sikce tenenyak ninguk, talye lukparabuka malye upnin banyake. Bukni, yata nang do nirya, Allah arye, “Aning ara wininamlulume, aning ara pia kum wininamlulume,” nyapdeiamsuk yupu kekebuka, mitang asa arye umunyopura, kanye deibuka telebuk unamlume.

¹⁹ Ninye ton, anggun amu tam pil melibuka don nang arye, malye ubicopura, sik wenena ati, yupu nimalye arye lipsisikuka kum wenenamlulume. Yupu deice aryuk wenepmunyopura, apil dona ati melin nang arye, moubuka kum kekenamake. Sik deiyok nang arye nyanamak yupu, ‘Deiyok ani,’ tenen, moubuka tenepnamak bukni, sik deiyok nang arye, “Winipnamlume,” nyabuka wenenamak yupu ara, kekebuka pia kum dobolbanamake. Sik anang ara, sik deiyok nang nyace yupu batakalongona uk unamaka anya arye, sik pil melina nang ara, mikip arye wenenamlulume.

²⁰ Aning atonun, anggun ton tenipdelulume. ‘Anyapnusin yupu ara, dib do, tilila do? Tonda, anyapnusin yupu ara, teleb ning do, malye ning do?’ tenen, moubuka tenina kumce, talye luparabuka malye yupu uk nyaltakalulnye bira, teleb ning ara lipsisikuka kum petereptume. Lipsisikuka laka nyaptuma babye, anye birye, anggun yupu pia moubuka kum kekenamle. Walwal ululnye bira, moubuka peterepmunyeba, kel kipnamle bukni, moubuka tenena kumce, talye luparabuka minopce yupu nyaltakalulnye bira, kum lipsisikuka petereptume. Anye biti ara, ‘Dauplye’ tenen, batakanamlulume.

²¹ Sik amu tamukirye, sik pil melibuka don nang ara, mitikop dorapce dipdongobuka nepnin balamlya ani, akunum neplyopura, atalak noutamak nirya, el patalamle ning nirya ap, el morolamlye ning nirya ap, talye lukparabuka arepmunyopura, aminyan talak weik arye akunum neplyopura, mandipna kanye weik upnin balirye, anggun nyapmunye yupu nirya yaniptaplirye, pia kum kekenamsile. Elda, ‘Na deiyok nang arye, nyaninyak yupu ara, kum kekenamne, na like,’ tenenamle.

²² Ninye ton minopce yu welepliba, yuk nang ati walamlanye bira, el yu weik ulya deice arye, el ap yuk nang ap, oldanyake deice arye, oldana weik arye oldanyake. Atonye bira, yu weik ulya deice arye, malye un ning pia weik arye talibuka ulule.

²³ Teleb kanye bobuka, talima darapdogobuka ululnye bira, namin asa arye ulamlya ani, yuk ninye arye anye biti, eibuka kel kibicopura, ‘Elda teleb ubuka ulule’ tenen, ereibikirye, elti, kanye deibuka kinyake. Bukni, sikce sik bidamnye ati, talima erepdakirye, maknya kiknipdanuka unyak nang ara, yuk nang arye sik wininyak ning, kel kibicopura, anang sik amu tamuk deipnamake. Anang ati, kanye deibuka kum kinyake. Mangkau kilongona uk unamake.

²⁴ Ninye ton ubula bolamlinye ap, sik neika melibuka ululnye bira, el bidamnye ati malye kililule. Tonda, wenenak anyuk daulirye, “Na ap, anye ap, nunce ubula dopropnumu,” nyabuka, akunum laka nyaplyopura, wenebikirye, ikin ning pia weik arye delinyake. Bukni, ubula dolulnye ap, sik neika melibuka ululnye birye, aning nirya laka kum nyaplirye, tunim abuka uplyopura, aminyan talak Allah arye, anye biti weik arye wenepnamle.

²⁵ Ninye ati ilil tenebuka unyak nang ara, ikin kanye bobuka unyake. Tonda, sikce atalak-atalak nirya ara, ‘Se, yata wiripnamak do?’ tenen, ilil asa ukirye, dungnuldanyake. Bukni, yata nang do nirya, Allah Yahweh atibuk, ‘El bidamnye aryuk melibuka kalikinamnile’ tenen, el tibuk dib tenebuka ululum nang ara, anggun damak ausilirye melisiliba, kanye deibuka umunce, pia telebuk unamlume. Tuba ilil kum unamsile.

²⁶ Tonda, ninye nirya pia weik arye, ‘Aninye deiyok nang arye ton melipsitinge’ tenen, tukwak mutuku talibuka ninye deiyok nang, pemerintah nang sik urasin ati pataliba enyake. Anang sik damuk morolbanyake. Bukni, dipkoprop, ‘Pia telebuk unamne’ tenen, pataliba ululnye bira, ‘Na ni koprop Allah Yahweh, elcuk melinamnile’ tenen, Allah el damuk ulirye, el tibuk pia moronamle. Allah aryuk anye biti, teleb ulinamle. Teleb ubuka una deiyok ning ara Allah Yahweh elcuk aresulule.

²⁷ Talima teleb ululnye bira, diksukumuk ulula anya arye, sik malye ning talibuka, malyeuk unyak nang arye, anye biti, ‘Nun like,’ tenenyake. El ti telebe tenebuka kanye kum delinyake. Aning atonun pia diksukumuk unyak ninye arye, sik malye unyak ninye ati, telebe tenebuka kanye kum delinyake. Pia teleb unyak ninye babye, malye unyak ninye babye, sik nirya ara, ‘Nun like’ teneldanyake.