Amsal 27 - Eipomek

¹ Nara, ‘Ambusum arye or yanamal talak ara, aning nirya ati dipkoprob winipnamane,’ nyabuka, kanye deipmunce, maknya kintinildan yupu kum nyanamlulume. Ara, ‘Orsum ara, aning winipnamale’ tenen, moubuka kum kel kipmanto atia. ‘Aning winipnamale’ tenen, kum kel kipmamincuk, ‘Orsum ara, aning winipnamale,’ nyana kume nyapkine.

² An babye upminye ning atibuk, ‘Se, nara pia teleb ninguk wininune,’ tenelyame. “Nara weik mambulnye,” nyabuka, an siuk erelina kume. Teleb ning ara, yuk nang arye, an winiminye ning ati, “E, anye bira dipkoprob pia teleb ubuka ulule. Elda teleb piluk dolulnye,” nyabuka, an siuk kel kibikirye, anti kanye delinamake. Ati, an bidamnye aryuk an si erelana meme.

³ Keil ap, keil wininga ap, sik ikin ara dipkoprob ikin bukni, moubuka tenen ning kum teneplirye, walwal kanye uk bobuka ululnye birye, elce yuk ninye ati, malye ulilamle ning ara, pia ikin weik uliba, talima noutamak pia weik arye uk dilule. Ati keil ap, keil wenengna ap ara, kanamto ulul bukni, walwalnye birye malye ulilamle ning ara, pia weik ikin ulule.

⁴ Tulum weik upsiliba, malye yupu weik arye nyabibiba, yuk nang kekebikirye, talima uk dilule. Tonda obuka bataklobikirye, yan tamnanyake. Tonda, winipmanto ara, weik mek oplirye, aning-aning nirya dobuka bobaliba, ninye arye, ‘Se, aning ara mambul weik,’ tenebikirye, engenyake. Talima uk dilamsil ning ap, mek oplirye nun ning bobalamsil ning ap ara, mitik ikin ulul bukni, aminyan talak aning nirya ati, “Dauplye,” tenebibirye, tuba tamubuka teleb kanye bobuka unyabe. Bukni ninye tonoknye birye yuk nang ati, ‘Sik talinyak ning ara, naryuk taliptinye’ tenen, el talima uk dilamliba tenelinye bira, yata nang arye el ap neika upting do? Kume, atenenyak ninye arye, malye weik kilisikiba, ikin pia weik usulula anya arye, ninye nirya arye ato nang ati, ‘Nun like,’ tenenyake. Kume, aning ara, ikin pia weik anya arye, aning ara malye weik ulisulule.

⁵ Teleb ning ara, malye ubibya babye, yuk nang kekenmakak aryuk, yupu nyabuka wenena ara teleb uka. Bukni, tonoknye birye, yuk ninye ati bico tenelul bukni, laka kum nyaplirye, kunusa doplyopura, ara ikine. Dungnubuka talima noutamak aryuk, tenena ning ara, weik malye ati nyapsine.

⁶ Malye winibibyeba, nun kayapu nang arye, “Amio, anda dipkoprob pia malye upmalum ning ara, lakak arye ani-ani,” nyabuka wenepsicopura, ‘Ayupu ara na kwit koprop arye nyapmanila ati, aning ara, teleb uka,’ tenetibye. Bukni, nun oldan nang arye, nunti, anggun talima noutam ara, ‘Anang ati tuba optibye,’ tenesinyak bukni, yuk nang kekenak ara, ‘E, na kwit koproba, na kanye deipkine,’ nyaptingce mutupsiting babye, anang ati dib kum tenenamlulume. Ayupu ara, tenebuka aryuk nyanyaka anya arye, sik talima noutamak aryuk, ‘Aninye malye kipdeiptinye,’ tenelulnye bira, ninye onanye atonun ulule.

⁷ Din ning weik arye dibipyeura, boupmasilye talak ara, pia min-min lelul ning, ‘Madu mong mek diptibye’ tenen, kum patasulule. Tonda din dina pia kumce, patapsilye talak ara, “Sik lelul dina auplule,” nyabuka batakanyak ning babye, kanye deibuka talye mangkau kibuka diptibye. Ara, din ning weik arye patana atia.

⁸ Winipmanto ara, maka ulamle yo taruk arye erepdaka, yukak lakuka balirye, yuk yo taruk deice malbalamle taruk ara, ilil weik ulule. Aning atonun, yatanye do nirya, el mutuku koprop noutamak, el ulamlye aik arye batakuka, yuk pera mutuku balulnye bira, mambul kanye bobuka ilil unamle.

⁹ Winipmanto ara, yata ning do, nun nong deice nintong teleb nyana ati, teleb minyak mek arye likmakiba nintong teleb nyasiliba, nun kayapu nang arye kekebuka kanye delisinyake. Aning atonun, nun malye winibibyeba, nun kayapu koprop arye nunti, ‘Na kwit el talima ap, el winilul ning ap, telebuk unamle’ tenen, wenepsutua babye, nunce, ‘Aning ara teleb uka,’ tenenyabe.

¹⁰ Tonda, anggun kayapu nang koprop ap, anggun ni yapu, sik kayapu nang ap ati, pia luba kum kinamlulume. Anang ara, pia kum batakanamlulume. Deiyok ara ani. Aminyan talak anggun patapsilye ning kum upliba, ikin weik upsilyopura, anggunce anggun kwit capu silip koprop ati, “Se, anggunce melipsutume,” nyabuka, kum moronamlume. Ikin upsilye talak ara, nun du weit pera mutuku ulamicopura, sik damak morolbitibye bukni, pia teleb ning ara, nun ap neika mining damak ulamice nang ati, moroldanamabe. Teleb ning ara ani. Ati ara, anggunce utenenamlululme. ‘Nun babye mining damak unyak nang ara weik mambule. Nun kwit capu silip koprop ara, mambul bukni, sikda pera mutuku unyak ninye anya arye, sik damak kum morolbinamabe,’ tenenamlulume.

¹¹ Na mio, anda weik kel bikna deiyok ning weik arye kel bikminyopura, narye anti weik arye kanye delinamkine. Yuk nang arye nati, “El malye ulule, tonda elda pia malinye uka,” nyapnitinga babye, an na mi koprop anya arye, pia kanye delinamne.

¹² Teleb ubuka tenilamlanye bira, ‘Aminyan talak yata wiripnamnil do? Awinipnaman ning ara teleb do, malye do?’ tenen, moubuka teninauk ulule. Winilula ati, ‘El opnamne,’ tenepmalye ning, dungnupmalye babye, lakak uk eliname. Bukni, kanye moubuka tenena kum anye birye, malye-malyeuk winilula anya arye, anye bira walwal uk upnin banamle. Elda, ‘Aminyan talak yata wiripnamnil do? Awinipnaman ning ara teleb do, malye do?’ tenen, moubuka teninauk, pia kum ulule. Mangkau kanye bobuka mangkau arye balule anya arye, weik pirilen ning el damak yanamle ning ara, kum leipropnamle. Ati ikin ning weik el damak yanganamle.

¹³ Yata nang do nirya, sik kum kel bikamikce nang bukni, anang arye, “Kume, anang ara nun ning tia ati bona dopropmaca ani, aminyan talak tamubuka punupnamsiyake. Ati atalak noutamak ara, sik tia ati dopropnamaka ning, nirya tamubuka kum arepsicopura, naryuk punupnamne,” nyanyak nang ara, kanye moupnamlulume. Ayupu nyaptinga babye, sik kum kel bikamikce nang arye tia ati dopdopnamake pununa ati, ‘Dipkoprop punupnamsiyake,’ tenen, dekna weik ning ton dobuka, ‘Naʼ tenen, delinamlume. Sikce talye nyaltaklamak yupu uk dib kum tenenamlulume. Aning atonun, ninye asik nang yakirye, ‘Sik ning tia ati dopropmaca ani, aminyan talak tamubuka arepnamsiyabe’ tenen, “Nunce tia ati dopropmaca ani, aminyan talak tamubuka aning arepnamsiyabe,” nyabikcopura, sik mining damak unyak nang arye, “Yo, telebe, aninye asik nang arye, aning tamubuka kum arepsicopura, nuncuk punupnamabe,” nyaptinga babye, anggunce anang sik dekna weik ning ton dobuka ‘Naʼ tenen, delinamlume. Ara, talye ati kume. Anggun kum kel kiamlum nang do, ninye asik nang do, bataksikirye tamubuka yanuka aning kum punubicopura, adekna weik ning, ‘Naʼ tenen, deiamunye ning ara, dopropmunce, kum danamle ning ara, punupnamlume.

¹⁴ Tonda, yata nang do nirya, mapmaca ani, bukrobikirye, beren tam buklobuka, sik mining damak ninye ati, “Telebe,” nyabuka weik yupu deice arye yukubicopura, sik mining damak unyak ninye ara, ‘Se, anye bira, weik yupu deice arye nyapmasil yupu ara, kekena nun like. Anye bira ayupu nyana batakmasuturye, mitik yupu arye nyapmasetue,’ tenenamake.

¹⁵ Tonok kil arye weik yupu nyaliba, el akanye ati pia tuba-tuba derelul kil ara, weik mok celye talak lelim weik arye tuba-tuba lelamle tonun ulule. El akanye birye, ‘Se, ayupu tuba nyalye ning ara, bataktue’ tenen, malye kanye bonamle.

¹⁶ Ara, anyanmatu ning ati, yatanye birye, “Anda tunim aplyame,” nyaptopura, akil adiparyuk tunim nyaptu do? Kume aning ara, kum winipmanto. Winipmanto ara, kumanya mikip arye dolye talak ara, ninye arye, “Kumanya tunim aplyame,” nyaptingba, kum tunim nyaptue. Tonda, sik taruk tatang deice minyak mek weik palipsilyopura, yuk ning nirya babye, kum talepmanto usulule. Aning atonun, yupu weik arye nyalul kil ati ara, el akanye birye, “Se, na ka kilo, an anyanmalam yupu ara, tunim aplyame,” nyaptu babye, akil kum tunim nyapnamle.

¹⁷ Sal arye, ‘Parang ya do, kapak ya do, kat ning arye memenuyabe,’ tenebikirye, kat ninguk doprobikirye, parang ap, kapak ya ap memenyake. Aning atonun, sal arye sik kayapu nang ati, “Teleb un ning ara ani, malye ning ara ani,” nyabuka, neika yupu talipmakirye, teleb ubuka kel bikikirye, sikce sik tibuk teleb ulilanyake.

¹⁸ Yata ninye do nirya, sik deiyok nang arye ara, yo kouamikiba, sik amu tam nang arye ayo melibuka kalikin makirye, moubuka pil dolamikirye, dola kwelamica ani, yo duk si, Ara, yo duk mouplyopura, ayo duk moupmaliba, apil dona nang arye, yo duk dakuka dinyake. Aning atonun, yata pil dona nang do nirya, sik deiyoknye birye, el dekna weik ning dobuka, ‘Naʼ tenen, deipliba, sikce aning melibuka kaliklamica ani, tabakuka weik kipnin balyopura, adeiyoknye birye, el amu tam pil dona nang ati, dekna ning ton dobuka sikti, “Telebe,” nyabuka, el dekna ning bokuka, anang ati arenamle.

¹⁹ Winipmanto ning ara, mekwen deice dinmaki bukni, mekwen deice kanya balamle atonun, sik urasin laka ulule. Winilamle atonun, ninye talima noutamak ulul ning ara, ninye urasin deice arye, lakak upliba elinyabe.

²⁰ Tukwak mutuku noutamak, ninye dibinyak ninye nirya, wekelbanyak sukum ara, lo tuba aulule. Ninye kum nukmanto dibikirye, dibinyak ninye wekelbanyakak wekica babye, amutuku ara kum langdiptue. Tonda, ninye dipna deiyok ning pia aupnamle. Ninye weik dibinamaka babye, aminyan talak ninye tonap tabakuka dipnamake. Aning atonun, ninye tukwak ninye arye, ‘Se, aning doproptibirye winiptibye’ tenen, patapliba, talima uk dilamle ning ara, pia unamle. Ninye patana deiyok ning ara, ‘Akunuma asukumuk deipne,’ kum tenepmanto. Patalul ning ara, pia aunamle.

²¹ Ninye arye tuku palibikirye, kat ning atuku pum bisik noutamak ara, ‘Emas ap, perak ap, pia teleb ning aupmal do?’ tenen, atuku dobuka uku dabicopura, uku dadinmalya ani, uku arye malye ning nirya diproplirye, pia teleb ning emas ap, perak ap, batakalule. Auku ara, winildena atonun ning ulule. Aning atonun, ninye arye yuk nang ati, sik si erepnikirye, anang ati kibicopura, dipkoprob anang sik talima noutamak ulul ning, lakak upliba, eibuka kel kipnamabe.

²² Tonda ninye nirya arye, duk ning el si ara gandum, el bol nirya ara, wilibikirye, aninye sikce agandum duk dobuka, kat keil tonok lokiyamice pum dongobuka tikikiba, el bama yuk, duk yuk kilule. Bukni, sikce kanye moubuka tenena kumce, walwal uk unyak ninye dopropmunce, kat keil deice deibuka, aninye sik nong teikuka, atu kiploptuma babye, sik walwal ubuka unyak ning nirya ati, anggunce pia kum wilibuka bokeiptume. Ara, kum winipmanto atia. Sik awal-wal uk unyak ninye ara, pia malyeuk upnin banamake.

²³ Tonda domba basam ap, kambing basam ap, basam sirika ap weina deiyok nang arye, anggun weimunye ning ayala-yala nirya ati ara, ‘Sik una urasin ara yata wiribuka unyak do?’ tenen, pia moubuka dinamlume. Moubuka kel bikmunyopura, aning nirya pia pi dobuka, teleb ubuka umunce weinamlume.

²⁴ Ayupu ara, talye ati kum nyapsine. Dekna weik ning ara, pia ati kum unamle. Atalak ara, bona weik talin ning taliplum bukni, ‘Aminyan talak ara, aning nirya tuba aunamle do, kum do?’ tenen, kum kel kiptume. Tonda, sik ninye deiyok Raja nang arye talinyak ning ap, talinyak mutuku ap ara, atalak aupmal bukni, ‘Aminyan talak ara, aning-aning nirya kum upnin banamle do, kum do?’ tenen, kum kel biknamabe. Ati ara, anggun wini talak talilulum ning nirya ara, teleb ubuka kalikinamlulume. Moubuka talepmunce, teleb ubuka pil donamlulume. ‘Aning nirya talibuka unirye, talye kanye bobuka, pia wininamne,’ tenelulum ning babye, pia kum unamle. Aning nirya ara, tia ninguk ulule.

²⁵ Aning atonun, wa win dam do, bai tam mutuku do, talye palamle mutmuta nirya sekuka bululinyake. Ara, ninye weilamak ning sik din dina atia. Tonda tia ati, ya arye tuplopmace ning, tuba tamubuka yuk ning palule. Aning nirya ara, tia ninguk ulule.

²⁶ Ati anggunce domba basam pia teleb kibuka weilamunyeura, aminyan talak adomba basam el potong kobuka, adomba potong arye baju wibuka deibicopura, baju ongonamlulume. Tonda, domba basam nong dobuka yuk nang ati dekropminyopura, anang arye yo bok deice dekikirye, ayo bok dopropminyopura, aminyan talak weik pala tuku ton deknamlame.

²⁷ Aning atonun, anggun kambing basam teleb ubuka weilamunya ani, aminyan talak ara, moum yung weik arepsikiba, anggun ap, anggun kilapu ap, anggun mapu ap, anggun aik unyak ninye nirya ap arye, dinamlume. Ati ara, anggun talilulum ning ayala-yala nirya ara, pia pi dobuka teleb ubuka kalikinamlulume.