Amsal 21 - Eipomek

Tukwak mutuku ninye arye unyak ning ap, wininyak ning ap, nyanyak yupu ap ati, sekuk yupu

¹ Allah Yahweh arye, mek kwepdeiamukce, “Na tenepnye touk, teleb kibuka banamlyame,” nyapdeiamukba, wini talak abisikuk balule. Aning atonun, pia ninye deiyok talibuka unyak nang, sik Raja nang babye, Allah Yahweh arye sik kanye talima talilule. Ati ara, Allah arye, ‘Aning winipnamle, aning kum wininamle. Aninye talibuka wininamle’ tenen, kanye deibuka tenelye touk, Raja nang sik kanye talima talibuka tamupdeipliba pil donyake.

² Ninye nirya arye, sik yuk-yuk unyak ning nirya ati ara, ‘Kume, nunda teleb ubuka unyap,’ tenenyake. Bukni, ninye arye sik talima pum tam arye, ‘Adeiyok ati apil donamne, adeiyok ati ayupu nyanamne,’ tenebikirye, ulamak ning nirya ara, lakak kum ulul bukni, ninye tukwak ninye, sik talima pum tam ara, Allah Yahweh arye kel kisulule. Ati, ‘Sik talima teleb do, malye do?’ tenen, asibuka winilasulule.

³ Dipkoprop winin ning ap, diksukum ubuka ninye yupu lipsisikuka bokolina ap ara, teleb kibuka ubibyopura, Allah Yahweh kanye delisulule. Awinina ati ara, pia weik arye kanye delisulule. Bukni, ninye arye, ‘Nun malye unyap ning namin kipnamsil’ tenen, kam ning obuka uku danyaka deice arye, mitik tonun aryuk kanye delisulule. Allah arye, ‘Aning ara pia weik mambule,’ tenesulula ara, diksukum unauka.

⁴ Ninye ton sik asing dilakirye, kwalinyak nang ara, sikce, sik mining kanye talima erelanyake. Winibuka unyaka deice arye, pia malyeuk unyake. Sik kanye talima pia malyeuk unyak ninye arye, aning nirya unyake.

⁵ Ninye ton, ‘Na winipnamne ning ara ani,’ tenelul touk, pia pi dobuka pil teleb kibuka dolulnye bira, el tenelul ninguk, dipkoprob el dam yanamle. El pil donamle ning nirya nong upnamle. Bukni, yuk nang arye, ‘Kume, aning ton winiptibye,’ tenenyak ning nirya ara, nong kum upnamle. Deiyok ara, sik kanye moubuka tenena kumce, ‘Polasa aryuk apil erebirye, sirya daknamabe,’ tenekirye, teleb kibuka pil kum donyaka anya arye, sik talinyak ning nirya kum upra banamle.

⁶ Tonda talye bon-bona atibuk, ‘Aning dobukapnerye, bona utotoa talinanye kipnamne,’ nyabuka tilila yupu nyalulnye bira, aning-aning weika arye dololul bukni, el dololul ning nirya ara, kum kipnin banamle. Winipmanto ara, tuku mikip keting buppu arye weleplirye, minopce kum balamle touk, tilila yupu deice dololamle ning babye, kum kipnin danamle. Tonda, ninye arye wena tapu wemikiba, bai tam kam ulul ning mangkau arye banmalebuk, youbuka olamle atonun, tilila yupu nyanyakce, bon ning dolonyaka deice arye, dipna dam bisikuk banyake.

⁷ Ninye ton, tuba-tuba malye winin ninguk winikirye, yu ubuka unyak nang ara, ninye deiyok nang arye nyanyak yupu, ilil ubuka kum unyak ati ara, sikce, ‘Teleb ubuka unamabe,’ kum tenenyake. Malye ninguk talibuka wininyaka ati ara, sik malye wininyaka deice arye, ikin ning weik sik nong deice yanganamla deice arye, dibinamake. Sikda, olan ninye atonun unyake. Winipmanto ara, sikce malye wininyaka deice arye, sikce sik bidamang ati, olilanyake.

⁸ Malye winin ninguk ati, pia tuba tenebuka unyak ninye arye, dipkoprob malye unyaka ati ara, sikda kwanim bisikuk banyake. Sikce, yuk ninye ati, talye yupu uk nyaltakanyake. Bukni, pia diksukumuk ubuka unyakce, pung bisikuk banyanyak ninye ara, pia telebuk unyake. Sikce wininyak ning ati, ‘Malye ning ani,’ kum nyaptibye.

⁹ Sal ap, sik kilapu ap, pia urasin teleb weik aik neika unmating bukni, anang sik kilapu arye, sik akanye yapu nyanmace yupu kum kekebikirye, bisibuka malye yupu uk nyabicopura, yupu deice arye walana uk unyake. Winibicopura, anang ara utenenyake. ‘Kume pia teleb ning ara, urasin teleb aik batakipyopura, alip aik umunyak damuk, nun yuk-yuk unamabe. Im alip aik kup-kup tam, malye sukum bukni, nun yuk-yuk utibyopura, kanye deibuka unamabe,’ tenenyake.

¹⁰ Sal ton tuba-tuba malye winin ninguk ululnye bira, amalye winin ninguk tuba tenelirye, el kanye talima pum tam arye, ‘Malye winin ning atibuk winipre banamne,’ tenelirye patalule. El kwit capu koproba, el ap neika unyak nang ati ara, bico tenebuka pia kum melilule. Sik ikin ning noutamak uptua babye, amalyenye birye, sikti, pia kum melinamle.

¹¹ Teleb winin ning ati, yep-yep abuka malye yupu nyanyak ninye ati, ninye deiyok nang arye, anang ati wenebicopura, yuk nang ton moubuka bita kel kum kinyak nang, eibice deice arye, mitik tonun arye kel kinyake. Bukni, pia weik kelnye bira, teleb ubuka ulamlinye binyak, lipsisikuka peterenyaba deice arye, adiparyuk teleb kibuka kel bikilule. Mangkau arye malye upliba, sik deiyok nang arye, “Winipnamlyame,” nyabuka weneplyopura, ayupu kekelya deice arye, teleb kibuka kel bikilule.

¹² Allah elda, tonok malye winin ninguk, bobuka kum ulule. Elda pia diksukum una deiyoknye ulule. Winibuka ulirye, sik malye winin ninguk, talibuka unyak kili sal ati, ‘Yata malye ning ton unamak do?’ tenen, Allah arye sik unyak aik ati, moubuka kalikilule. Teleb kibuka dinamle. Winibuka dilamlye ani, amalye winin ninguk tuba winipda bacopura, adeice arye akilisal ati, weneplirye oltakalule.

¹³ Yata ninye do nirya, mitangnye birye el patalamle ning ati, ‘Se, na melipnululume,’ nyabuka, malye nyabuka morolamle ning ati, moubuka kum kekebicopura, amul kunukdongobikirye aminyan talak ara, sikce pia imun kanye bobuka, tuba malye nyanmatinga babye, yuk ninye arye sikti, pia kum melinamake. Batakalongona uk unamake.

¹⁴ Ninye ton yu kanye bopmalinye biti, yuk nang arye dinmacak kum bukni, anye biti teleb arin ning duknubuka arepmunyopura, ila tuba tamubuka kanye talima nimalyap asa uplirye, el yu tenelye ning bataklirye, anggun ap neika teleb kibuka upnamsile. Yuk tenesinyak nang ati, teleb arin ning arepmunyopura, aning doproplirye, yu tenenmalye ning ara talima namin upliba, ila tuba tamubuka teleb kibuka unamle.

¹⁵ Ninye nirya walana ap, olana ap, unyaka ati, wenena aik bobikirye, ‘Yupu lipsisikuka bokeipnamap’ tenen, yupu nyanyake. Ara, ayupu walanmaca kan-kan arye, sik yupu lipsisikuka bokolina deiyok nang arye, dipkoprob winipmace touk, wenebuka yupu bokeibicopura, sik diksukum unyak ninye nirya arye, pia kanye deibuka telebuk unyake. Bukni, ninye ton, malye-malyeuk tuba winipra balulnye bira, sik yupu bokolina deiyok nang arye wenebikiba, ayupu moubuka kekeplirye, ‘Se, aning ara, na winipse ning ati, teleb kibuka wenen yupu nyapmaniake,’ teneplirye, ayupu kekebuka lukuldalule. Tonda, ‘Weik arye wenepnamniake’ tenen, ilil weik ulule. Malye winilulnye birye, ‘Ayupu ara, na like,’ tenelule. ‘E, aning ara dipkoprob nyapmaniake,’ tenebuka, kanye pia kum delilule.

¹⁶ Ninye ton teleb kibuka kum tenebikirye, talye kanye bobuka malye-malyeuk unyak ninye ara, ‘Aning winibibiba, aminyan talak yata wiripnamsil do?’ tenena kumce, malye bisikuk dobolbanyak ninye ara, dipkoprob ninye diplamice, ninye kanye unyak sukumuk banyake.

¹⁷ Yata ninye do nirya, ‘Se, pia teleb ninguk talibuka, bona utotoa talin nanguk unamabe’ tenen, bouku sukuna uk unyak ninye ara, aminyan talak talye bona utotoa talina kum ninye uk upnamake. Deiyok ara, ateleb ning dolonyaka deice arye, sik mining talilamik ning ap, yo bok nirya ap kum upre baliba, bona utotoa talina kum ninye uk unamake. Deiyok ara, dekna ning ap, anggur tapu mek dekna ap, yuk talye ning dekna ap deice arye, sik talinyak ning nirya kum upliba, bona utotoa talin nang kum unamak bukni, bona utotoa talina kum ninye uk upre banamake.

¹⁸ Ninye ton, tuba-tuba pia malye winin uk tenebuka winipra banyak ninye ara, Allah Yahweh arye, amalye ning talibuka wininyak ninye nirya ati, weik arye weneplirye opnamle. Ara, winipnamle deiyok ara, malye wininyak ninye nirya oplirye, teleb diksukumuk unyak ninye nirya ati, teleb kipdeiplirye lyepnamle.

¹⁹ Ninye ton kil doplirye, ‘Na ap, na kil ap, teleb ubuka neika unanam’ tenen, el ap el kil ap neika ururak bukni, anye el kil arye malye kanye boplirye, el akanye nyalye yupu bisikuka deren uk ulyopura, malye kanye boplirye, tuba-tuba, “Ance wininmalam ning ara, deiyok yata ati do? Aning winina ara, pia na like,” nyalule. Aning atonun nyalul kil ara, el akanye birye, el yu kanye boplirye, ‘Kume teleb ning ara, na yuk unamne. Mok pia cena kumce, mek kum baliba, ninye kum unyak mutuku noutamak ara, na yuk unamne. Akil ap neika kum uptenemnye. Na like,’ tenelulue.

²⁰ Ninye ton teleb kibuka ululnye el pil dolula deice arye, dekuka talilye ning ara, teleb kibuka el aik pum tam delilule. Winilula deice arye, teleb aik noutamak ulule. Tonda, elce talilul ning weik upra banamle. Bukni, walwal aryuk unyak ninye ara, sik pil dobikirye, dolonyak yo bok ara, adiparyuk sik patan ning dekenyaka deice arye kum upliba, tonok ning babye dokola kum delinyake. Ati sik doprobikce ning ara, minopce kum danalule.

²¹ Yata nang do nirya, teleb winin ninguk patalyeba, ‘Allah arye nyasilye touk unamabe. Tonda yuk nang ati bico tenebuka melilana uk unamabe,’ tenebikirye, aning atibuk dobolnyak ninye ara, telebuk unamake. Sikce kam una deiyok ning ap, Allah arye, ‘Wininamake,’ tenyamsuk deiyok ning ap dolonamake. Tonda, yuk ninye arye sikti, ‘Se, aninye ara, dipkoprob telebuk unyake,’ tenebikirye, sikti, kanye delinamake. Teleb kibuka una deiyok ning doprobicopura, sik upre banamaka ati, Allah arye ouku cang arye arepliba, pia telebuk upre banamake.

²² Kel pia weik deice arye, pia teleb kibuka ululnye bira, el mal olan nang, sik pia weik kota mutuku noutamak, mikip yin talin nang arye kalikuka dinmatinga babye, el biturye amutuku nirya obuka uku sice buklopnamle. El mal olan nang arye, ‘Kume pia weik cang keil poka ap, keil aik ap dobupa noutamak unyaba anya arye, yata ninye arye obuka sirya daksiting do, kume,’ tenelamik bukni, pia weik kelnye birye aning nirya dakloplirye, aninye ati obuka sirya daknamle.

²³ Yata nang do nirya, yupu nyana ati, ‘Malye yupu talye lukparabuka, kum nyapnuyap’ tenen, sik sitang ara moubuka kalikdakirye, ‘Yupu weika arye kum nyapnuyabe,’ tenen, mitik anun uk nyanyak nang ara, ikin ning weik sik dam kum yanganamle. Yupu weika arye talye lukparabuka nyanyak nang ara, ikin ning sik dam yanamle.

²⁴ Ninye ton erepdanuka kwalibikirye, dinauk unyak nang ara, minopce talima erenyakce, ‘Malye winiptibye’ tenen, ilil pia kum kanye bobuka, weika arye malye winin ninguk unyake. ‘Winibibiba, ikin ning nun dam yanamsil do?’ pia kum tenenyake.

²⁵ Pil dona ati ara, ‘Na like, pil kum donamne,’ tenelulnye bira, pil aning-aning nirya teleb kibuka kum dolule. Ati, el patan ning ati, ‘Se, aning ap, aning ap, doproptinye’ tenen, patalibuk, malye winin ning talibuka unamla deice arye, el bidamnye arye, el bidamang atibuk olilanamle.

²⁶ Pil dona ati ara, ‘Na like, pil kum dopnirye, talye urdemuk unamne,’ tenelulnye bira, el patan ning nirya ati ara, pia tenena uk unamle. Yata ning do nirya, mitik tonun arye akunum doproplyopura, ‘Akunuma,’ kum tenelule. Elda, ‘Se, weika arye tonap tabakuka doptinye’ tenen, pia weik arye patalyeba, pirina uk unamle. Bukni, Allah arye, ‘Tukwak kili sal winibuka teleb unamake,’ tenyamsuk touk, aninguk tenebikirye, telebuk unyak kili sal ara, yuk nang ati bico tenebikirye, weika arye arinyake. ‘Na uk dopropnune’ tenen, kum unyake.

²⁷ Malye ninguk talibuka ulinye birye, ‘Na malye unun ning, Allah arye kilipnuturye, namin kipnamnil’ tenen, teleb ning boyalirye, Allah ati areplya babye, Allah arye anye biti el kanye pia kum delilule. Aninguk kum bukni, amalye ulinye birye, ‘Aning dobuka Allah ati arepnyopura, Allah arye teleb ning arepnilirye, weika arye melinamnile,’ teneplirye, el kanye talima pum tam ulul ning duknuplirye, atenena deice arye, Allah ati areplyopura, Allah Yahweh arye anye biti kanye pia kum delilule. ‘Anye na like,’ tenelule.

²⁸ Ninye yupu lipsisikuka bokolina ati, bulubice talak ara, tilila yupu uk nyaltakalulnye biti ara, sik deiyok nang arye, “Anda monoklyame, yupu tonap kunusa dobuka kum nyanamlyame,” nyabikirye, el nyalul yupu sekelongonamake. Bukni ninye ton yupu nyapnamalye ning nirya moubuka tenepdelirye, ‘Deiyok ning ara ani, ani’ tenen, akunum moubuka tenipdelirye, diksukum yupu nyalulnye biti ara, sik yupu lipsisikuka bokolina deiyok nang arye, “Telebe, anda yupu dukdongobuka nyapra banalame,” nyapnamake.

²⁹ Ninye ton dipkoprob ninguk winilulnye bira, ‘Teleb una ara ani, malye ning ara ani’ tenen, el wininamle ning nirya moubuka tenelya deice aryuk, aning nirya tenebuka kintinililule. Bukni, malye ninguk winilulnye bira, ‘Yuk ninye kel biknicak’ tenen, ilil pia kum kanye bobuka weik winiplirye, erepdanuka kwalilule. Dipkoprop el wininamle ning min kum tenepmale bukni, el urasin ara, ilil una kum kili sal wininyak touk kibuka, talye lukparabuka balule.

³⁰ Yata ninye do nirya, sikce, ‘Wininamabe, teleb una ara ani. Nunce pil donamap ning ara ani,’ tenebikirye, ‘Yata wiripnamap do?’ tenen, pia weik kel kilamik nang ap, yupu taliptingce, pia mambul kirikuka piripdeca babye, Allah Yahweh arye, ‘Wininamne,’ tenyamuk ning ati ara, tukwak ninye arye kum malye kiptinge. Allah arye tenelul touk ulula atie.

³¹ Sik mal olalban nang arye, ‘Nun kuda balye deice bukibirye, nun mal olan ninye ati olbinamap’ tenen, aning-aning nirya kintiniptinga babye, sik mikip deice aniryuk, sik mal olan ninye ati obuka sirya kum daknamake. Allah Yahweh, elcuk, ‘Aninye obuka sirya daknamle. Aninye arye otam ninye ati, oplopnamake,’ tenelye touk, nong upnamle. Allah tenepmalye touk, obuka sirya daknamle. Ninye arye teneipdeting bukni, Allah arye tenelye touk apia wininamle.