Amsal 19 - Eipomek

Tukwak mutuku ninye arye unyak ning ap, wininyak ning ap, nyanyak yupu ap ati, sekuk yupu

¹ Pia teleb ning ara, bona utotoa talina kum ulul bukni, malye un ning tonok babye kum ulirye, pia diksukumuk ubuka ulamlinye bira, pia telebuk unamle. Pia malinye bira, walwal uk ulirye, malye yupu uk weik arye talye nyaltakalule. Anye bira, el si bam bol pum bisik ara, malye yupu uk pananamle.

² Ninye tonok ton, el un ning moubuka kum kel kiplirye, talye lukparabuka ululnye bira, ‘Mikip arye pil dopnun’ tenen, doptu babye, malyeuk unamle. Ara, malye winin ninguk talibuka ululnye el ulula atia. Tonda, yatanye do nirya, ‘Kume, sik arye kum unamne’ tenen, el mining kanye aniryuk, ‘Talye lukparabuka banamane,’ tenelule. Tonda, ‘Apil-apil nirya, minopce aryuk, sirya dakanamne’ tenen, balulnye bira, moubuka tenena kumnye ulula anya arye, ‘Teleb ubuka ban bisik ara ani’ tenen, kum kel kilirye, malye bisikuk balule.

³ Ninye sik bidamang aniryuk, ititildanyaka deiyok ara, talye arye kume. Sik bidamang arye, walwal unyaka deice arye, ititildanyake. Malye ulilanyak bukni, sik bidamang tenenyaka deice arye, ‘Kume nun ikin weik usilye ning arisilya deiyoknye bira, Allah elca,’ nyabuka, Allah Yahweh ati, malye yupu nyanyake. Bukni, dipkoprob sik ikin ning dolonyaka deiyok ara, sik deice uk ulule.

⁴ Bona weik talin nang ati, yuk ninye weik arye eibikirye, ‘E, anang ap, neika unamabe. Nun kayapu nang unamaka anya arye, anang neika unamabe,’ tenekirye, bona talin nang damak weik arye yanganyake. Bukni, bona utotoa talina kum ninye ati ara, sik mining damak unyak ninye ap, sik kayapu nang ap arye, ‘Abona talin kum ninye arye, kum melipsitinge’ tenen, batakanyake.

⁵ Ninye ton tilila yupu nyalulnye bira, aminyan talak dipkoprob tomobikirye, wenemna aik delilbinamake. Tonda, tenepce talye yupu nyanyak ninye ati ara, yuk ninye nirya arye sikti, ‘Yo, auplule, sik talye daunamake,’ nyabuka kum namin kipnamake. Aminyan talak ara, atilila yupu nyanyak nang babye tomobikirye, wenena aik dongonamake.

⁶ Ninye nirya arye, sik ninye deiyok nang damak pia piribuka yakirye, ‘Se, aweik nang ara, nunti kanye deipsitingce, teleb ubuka melipsiting,’ tenebikirye, pia pi dobuka pirilenyake. Aning atonun, ninye kanye talima arye, ‘Se, aning ara pia mambul ning’ tenen, pataplye ning ara, dobuka, yuk nang ati, bico tenebuka talye arelulnye, el damuk ninye weik arye yanganamake. Ara, talye ati kume. ‘Anye bira kanye deipsuturye, nunti, e aninye ara, na kayapu nang unyake, tenebuka melinamsil’ tenen, anye biti, kanye deibuka inilonyake.

⁷ Tonda ninye ton pia bona utotoa talina kum ulirye, aning-aning nirya kum talibuka kum ululnye bira, el mining yala nang arye batakanyake. Tonda, el yala nang ap, el kayapu nang ap neika mining dam unyak nang nirya babye, elti, luba kipdongobikirye, batakanyake. Winibuka winibicopura, bona utoto talina kumnye birye, ‘Se, na kayapu nang ap, na yala nang ap, dan tam unyak do?’ tenen, pia pi dobuka dobolbalul bukni, anang ton pia kum eipnamle. ‘Eipsilirye, moropsilyak’ tenen, batakikirye, kwarabuka memelonyake.

⁸ Yatanye do nirya, weik kel bikna ning atibuk, dobolkirikilulnye bira, elcuk el bidamnye atibuk bico teneldalirye, teleb kilidalule. Aning atonun, yatanye do nirya, ‘Deiyok ning ara ani’ tenen, weik kel bikna deiyok ninguk, moubuka talilinye bira, kanye deibuka ulule. Elce wininamle ning nirya ara, telebuk unamle.

⁹ Ninye yupu lipsisikuka bokolin talak ara, ninye ton tilila yupu uk nyalulnye bira, dipkoprob wenena aik deibikirye, wenebuka ikin ning, el nong deice delinamake. Aning atonun, tenepce talye yupu uk nyaltakalulnye bira, aminyan talak dipkoprob Allah arye elti, wenebuka oplopliba dipnamle.

¹⁰ Malye ulirye pia walwal uk ululnye birye, pia teleb aik weklirye, aning-aning nirya talibuka, pia teleb ubuka ulyopura, yuk ninye eibikirye, ‘Se, aning ara, dipkoprob malyeuk ulule,’ tenenamake. Weik ninye deiyok nang, Raja arye delinyak mapu, sik deice tam ukirye, taleamiki bukni, yuk ninye nirya eibikirye, ‘Se, aning ara, pia malye weik ulye ning ara ani,’ tenebikirye, malye kanye bonamake. Ara, ninye deiyoknye el amu tam talye pil melinanye ulul bukni, elce el deiyoknye kibuka, talipliba unamle ning ara, pia kum winipmanto ning unamle ati, ‘Aning ara malye ulule,’ tenenyake.

¹¹ Ninye ton weik kel bikna ning akunum kel bikamlinye bira, yuk ninye arye elti, malye upmacopura, elce minopce sikti, yu upliba, kum walule. Sik yuk ninye arye elti, malye ubikiba, elce namin kiplyeura, yuk teleb nang eibikirye, ‘Se, elda dipkoprob telebuk ulule,’ tenenamake.

¹² Tonda, ninye deiyoknye Raja, weik arye yu upliba wana ati, weik arye nyalul yupu ara, weik yu kus, el si ara singa arye, weik yupu nyapliba, ninye nirya ilil weik ulamle touk, ulule. Raja arye yu upliba, ninye talye lukparabuka olula ati nyapne. Bukni, ninye deiyoknye Raja arye, yuk nang ati kanye deiplyopura, winipmanto, mutmuta deice, mok dumduma sakmalirye, palipmaliba, teleb ulamle touk, winilule. Raja arye, el kanye delilul ninye ati, teleb kibuka melilula ati nyapne.

¹³ Walwal arye malyeuk unyak mapu ara, sik ni yapu nong deice weik ikin ning dobuka delinyakce, malye ulinyake. Aning atonun, yata kilapu do nirya, yu upliba, weik arye yep-yep anyak kilapu ara, sik akanye yapu, pia lik ulule. Winipmanto ara, mek kolkol ana ara, batakaldongona kumce, pia atibuk sakanmalirye, lelim lelapliba, ninye arye, ‘Se, alelim nyalye ning ara, kum datue’ tenen, lik weik ulamak touk, ayu kilapu arye, waldana yupu weik arye nyakiba, sik akanye yapu kekenyakce, lik weik ulule.

¹⁴ Urasin teleb aik ap, talin ning ayala-yala nirya ara, sik apu yapu ap, sik ni yapu ap arye, talilamica ani, dibikirye batakikcopura, anang uk dolonyake. Bukni, teleb winin ninguk taliplirye, kanye moubuka tenelirye, telebuk ulul kil dobikcopura, sikce, ‘E, na ni koprop Allah Yahweh, elcuk amambul ning arepnuke,’ tenen, elti, “Telebe,” nyanamlulume. ‘Ninye dopnamak’ tenen, teleb ubuka unyak kilapu ara, Allah elcuk wibuka aresulule.

¹⁵ Lik-lik asa arye unyak nang, sik dam ara, wi talin ninguk yangaliba, mana uk unyake. Sikda pil teleb ubuka kum donyaka anya arye, ‘Maltakna uk unamabe’ tenen, talye-talye uk unyake. Aning atonun, ‘Aning winipnamne do, aning winipnamne do?’ tenen, lik kanye bobuka, unyak nang ara, obina ayana kinyaka anya arye, sikda din pataliba, imun kanye bobuka unamake.

¹⁶ Yatanye do nirya, Allah el nyalilye yupu uk talibuka ululnye bira, el bidamnye nong uk, kalikilalule. Elda telebuk unamle. Bukni, Allah el nyalilye yupu ati, ‘Na like, ayupu kum kekenamne,’ nyabuka, ayupu yaniptaplirye, malye yupu uk nyalulnye bira, dipkoprob dipnamlarya. Aminyan talak, Allah arye aninye wenebuka oplopnamle.

¹⁷ Yata nang do nirya ara, talye bona utotoa talina kum ukirye, aning-aning kum talinyak ninye ati, melinyak nang ara, Allah Yahweh ati, melilamaka atonun unyake. Winibuka melinyak ning ara, Allah arye luba kum kipnamle ati, yuk talak Allah Yahweh arye, el ‘Naʼ tenen, ning tamubuka, sikti, yamubuka arenamle.

¹⁸ Anggun mapu ap, anggun ap neika unamlum talak nirya ara, sik malye ubicopura, moubuka peterebuka wenenamlulume. Wininalum talak ara, wenepmunce, lipsisikuka peterenamlume. Winipmunyopura, anggunce, ‘E, aminyan talak nirya ara, nun mapu teleb ubuka unamak’ tenen, kanye deibuka, dinauk unamlume. Bukni, anyapmasin touk, kum upmunyopura, malye winin ninguk ukirye, dipna damuk bicopura, amapu sik nirya dipnamaka deiyok ara, sik ni yapu deice uk unamle. Winipnamle ning ara, lipsisikuka kum peteryaminya deice arye, talye lukparabuka malye winin ninguk talibuka, unamaka deice arye, dipnamaka ati nyapsine.

¹⁹ Ninye ton minopce yu tenebuka derebicopura, elce pia yu unamle. Yu deice arye malye uplyopura, aminyan talak ara, amutuku talina deiyok nang arye, elti, tomobuka tapu koubikirye, “An malye ulamluma anya arye, dekna ning ara, pia weik ning arepsilyame,” nyabuka, wenena aik dongopnamake. Sikce el melina ati ara, ‘Se, nun mi ara, kum wenepnamlulume’ nyabuka, wenena aik pum tam arye loplobuka lyepmunya babye, dipkoprob ami ara, moubuka kum kel kipnamle. Kum kel biknamla anya arye, dipkoprob yuk aminyan talak babye, amalye winilamlye ning ara, tuba tamubuka tonap, tabakuka upnin baliba, tonap tomobuka tapu koubikirye, wenena aik dongobikiba, tuba tamubuka, ton lyelona uk unamlum do, kum do? Aning ara, pia moubuka tenenamlulume.

²⁰ Ninye deiyok nang ap, weik kel nang ap arye, wenena yupu deice arye, lipsisikuka peterena yupu ap nyabikiba, moubuka kekepmunce, anirya dopropmunyopura, aminyan talak ara, sik babye, weik kel bikna ning, talibuka umunce, teleb ubuka unamlume.

²¹ Ninye kanye talima noutamak arye, ‘Aminyan talak ara, wininamabe, winibuka unamap ning ara ani,’ tenebikirye, sik kanye tenena weik unyake. Bukni, Allah Yahweh elce, ‘Wininamake,’ tenyamsuk touk, ubuka unyak ning ara, pia nong upnamle. Elce tenesilye ninguk, wininamlulume. Ninye arye tenenyak ninguk, tenebuka una pia kume. Allah elce tenelul ning ara, ninye arye kum bisinyake. Ara, winipmanto kume.

²² Ninye arye, ‘Se aning ayala-yala nirya doproptibirye, bona weik talin ninye unamabe’ tenen, kanye talima engena uk unyaka ara, pia malye unyake. Teleb ning ara, talye bona utotoa talina kum ninye ulamtibye. Tonda, ‘Talye bona utotoa talina kumnye unun anya arye, alye dakalanune,’ tenetibye bukni, anye birye nyalul yupu ara, tilila yupu uk nyalula anya arye, ‘Aning ara, malye un ning ara, pia weik arye ulule,’ tenetibye.

²³ Allah Yahweh atibuk ilil uliba, Allah ati kanye deibuka ululnye bira, el winilya deice arye, kanye deibuka pia telebuk unamle. Allah atibuk ilil tenebuka, el siuk erenyak ninye ara, kanye deibuka telebuk unyake. Wininyak ninye, sik dam ara, weik ikin ning ton, pia kum yanganamle.

²⁴ Ninye ton pil dona ati lik weik uliba, pil teleb ubuka talibuka kum dolinye bira, el din ning babye, lik uplibuk, talye taruk deice uk talipmalya ani, saklirye kum uplyeura, kum dilule. Pil dona ara, sik lik weik unyaka anya arye, sik din ning kum danin balya babye, ‘Nun pil dobipya deice arye, din ning dekuka dinamabe,’ kum tenenyake. Talye-talye kanye uk bobuka unyake. Sik babye din ning ati ara, pil kum donamake.

²⁵ Ninye ton kwalina uk ulirye, yep-yep ana ap, ngilik-ngilik ana ap, weik nyalulnye bira, obuka wenepnamlulume. Winipminyopura, yuk nang, sik walwal atonun unyak ninye eibikirye, kanye moubuka tenebikca deice arye, kel kipnamake. Bukni, teleb ubuka ululnye ati ara, malye uplye talak ara, wenebuka ona kum diparyuk, yupu uk lipsisikuka peterepmunyeba, elce ayupu moubuka kekeplirye, dobolbanamla deice arye, weik kel bikna ning, tonap tabakuka kel kiplirye, telebuk unamle.

²⁶ Yata mapu do nirya, sik nin yapu ap, sik ni yapu ap ati, sik talilamice ning, ubula dopdoplirye, sik aik pum tam arye, ‘Anggunda bai tam bindoplulume,’ nyabuka, yakalkwetenyak mapu ara, pia malye weik unyake. Sik wininyaka deice arye, sik mining damak unyak ninye nirya ati, malye ulinyake. Winibikiba, anyaik ninye ap, sik tam ninye ap nirya ara, alye dakaldanamake. Tonda, yuk mutuku ninye nirya aning eibikirye, ‘Se, sikda pia malye wininyake,’ tenenamake.

²⁷ Se, na ni mio, apeteren ning ati ara, ance, ‘Ayupu ara tonap moubuka kum kekenamne,’ tenepmince, batakminyopura, malye bisikuk, binamlame. Akel bikna yupu ap, lipsisikuka peterena yupu ap nirya, dipdebuka batakminyopura, tuba tonap kum tenenamlyame. Aning nirya batakmince, malye bisikuk binamlame.

²⁸ Ninye yupu lipsisikuka bokolin talak ara, tilila yupu uk nyalulnye birye, utenelule. ‘Kume, ninye arye dipkoprob ulamak touk, yupu lipsisikuka bokolina ara, na like. Uang yo bok weik arepnikiba, dopropnunyopura, yupu bokolinamne’ tenen, tilila yupu uk nyalule.

²⁹ Ninye deiyok talibuka unyak nang arye, ‘Talye tilila yupu ap, nalinyak nang ap, sik wenena ati, wenena ning kintinibuka delinyake.’ Aning atonun, el si pum bisik arye, malye yupu uk panalulnye ap, pia walwal unyakce, malye ninguk talibuka, malye unyak ninye ap, sik wenena ati, kama dobuka, sik balye deice weik arye kulanamake.