Amsal 15 - Eipomek

Allah arye, teleb ubuka wininyak ninye babye, malye ubuka wininyak ninye nirya babye, elcuk tuba-tuba dilule.

¹ Ninye ton yu tenebuka malye yupu arye, yupu nyabuka walace talak ara, sik yupu tamubuka nyapnumunyopura, nimalye aryuk nyapnin bamunce, teleb yupu uk tenebuka nyanamlulume. El ti tamubuka nyapnumunyopura, derelana deice arye, pia kum nyanamlulume. Talima nimalye arye, tamubuka nyapmunyeura, yu unmalinye babye, teleb kanye bonamle. Bukni, dereldanmace talak arye, tuba yu yupu uk tamubuka nyaldamunyopura, atonun yu yupu nyapdanin bamunba, aninguk weik kipnin banamsile. Ara, minopce deiyok koubuka yu nyanmalinye ap, tabakuka nyanmalinye ap, yuk nang nirya babye kekenmamunce, melibuka dereldana uk unamlume. ‘Winipsilyak’ tenen, ninye dereldan talak ara, kanye talima namin asa aryuk, teleb yupu nyanamlulume.

² Ninye ton weik kel bikilulnye birye nyalul yupu ara, ninye nirya arye kanye deibuka kekebikirye, ‘Se, anye birye nyasulul yupu ara, pia telebe,’ tenebikirye, sik kanye talima lilolibuk, sik babye, ‘Se, nun babye aning kel biktibye’ tenen, pataliba, weik arye tabakuka kel kipnamake. Weik kel deice arye nyalulnye ati, yuk ninye nirya arye elti, kanye delinamake. Bukni, ninye ton walwal kanye bobuka, ululnye birye nyalul yupu ara, moubuka kum tenenmalya deice arye, talye yupu uk nyalule. Elda, yupu canga arye nyalya deice arye, malye yupu weik nyanamle. Atonye bira, talye yupu weik nyaltakalule.

³ Allah Yahweh elda, mutuku-mutuku nirya tuba-tuba dilula anya arye, yata winin ning do nirya, malye winin ning babye, teleb winin ning babye nirya ara, aning nirya dilirye kel kisulule. Tonda ninye kanye noutamak tenenyap ning nirya babye, eibuka kel kisulule. Teleb ubuka unyak ninye babye, malye ubuka unyak ninye nirya babye, elcuk sik damak ulirye, tuba-tuba pia disulule. Allah ati, tonok ning babye kum dungnuptibye.

⁴ Ninye arye yuk nang ati, yupu nyapnuce talak ara, nimalye arye tenipdekirye, teleb yupu uk nyanamake. Winibikce deice arye, yuk ninye sik kanye teleb ulinamake. Winipmanto ara pia teleb yo duk moupmaliba, ninye arye dakuka arepmakibuk dibikirye, kam ulamak touk unamle. Sik nirya arye, teleb yupu kekebikirye, sik kanye talima mikip kibuka melildakirye unamake. Wininamak bukni, yuk nang arye yuk ninye ati tenena kumce, talye tilila yupu nyaltakanyake. Atilila yupu nyaltakaca deice arye, malye kanye bobikirye, dipkoprob anang sik kanye talima kam un ning ara, mitang kilinyake.

⁵ Walwal kanye bobuka unyak nang ara, sik ni yapu arye, wenena yupu ap, lipsisikuka peterena yupu ap, nyanyak ning kekebikirye, moubuka kum dobolbanyake. Yaniltana uk unyake. Bukni, ninye ton sik ni yapu do, yuk nang do, sikce nyabice wenena yupu ap, lipsisikuka peterena yupu ap, moubuka kekenyak nang ara, pia weik kel nang unamake.

⁶ Ninye ton, Allah yupu moubuka kekelirye, Allah arye nyalye touk ubuka diksukumuk ululnye bira, telebuk unamle. Winipmanto ning ara ani. Ninye arye sik aik bona ning weik deiamikiba, weik ulamle touk, Allah yupu moubuka kekelinya bira, bona utotoa talinanye atonun unamle. Bukni, malye ninguk ululnye birye, ‘Bona ning weik arye tabakuka dopropnirye, deipniba weik unamnile,’ tenelul bukni, el malye ulya deice arye, el ap, el mapu silip ap sik dam ara, asum-asum nirya kanye imun ninguk yanganamle.

⁷ Ninye ton weik kel bikna deice arye, yupu nyalulnye bira, pia teleb yupu uk nyalula anya arye, yata ninye do nirya, el nyalul yupu kekenyakce, sik babye moubuka kel kinyake. Bukni, walwal kanye bobuka unyak nang ara, sik kanye talima tenenyak ning ara, aning atonun kum tenenyake. Walwal ubuka unyake tenekirye, talye ninguk nyaltakanyaka anya arye, yata ninye do nirya, sik nyanyak yupu kekenyakce, sik babye walwal nanguk unamake. Wininyaka deice arye, yuk nang nirya ati, tabakuka pia walwal kilinyake.

⁸ Allah Yahweh elda, malye winin ninye arye elti, morona ap, ‘Nun malye un ning kilipsilirye, namin kipnamsil’ tenen, teleb ning weik arye arena ap, wininyak ning nirya ara, el kanye deibuka kum dolonamle. Allah arye anang ati yu tenelule. Bukni, ninye ton Allah arye, “Wininamlulume, aning ara pia kum wininamlulume,” nyabuka, nyasilye touk kekebikirye, moubuka wininyak ninye nirya ara, el kanye delilule. Sikce Allah ati, arena ning pia teleb ning kum upmalya babye, sik aninye arye morobice ning ara, Allah kekebuka dopdoplirye, sikti, kanye delilule.

⁹ Ninye ton Allah Yahweh el ulye touk, tenebuka kum ukirye, malye winin ninguk talibuka wininyak nang ara, Allah Yahweh arye, ‘Na like,’ tenelirye, anang ati, pia yu ulule. Bukni, ninye ton, ‘Allah el ulye touk uptinye’ tenen, pia pi dobuka, kel bikilulnye bira, Allah elce, ‘Winibuka unamake,’ tenelul touk, ululnye ati ara, pia kanye delilule. Atonun unyak nang ara, Allah arye pia bico tenelule.

¹⁰ Ninye ton malye winin ninguk ulirye, Allah arye, “Teleb un bisikuk dobolbanamlulume,” nyabuka peterelirye, “Aning ara wininamlulume, aning ara, pia kum wininamlulume,” nyabuka, nyalisulul yupu moubuka kum kekenyak nang ara, aminyan talak Allah arye sik dam weik kanye imun un ning arenamle. Aning atonun, yata ninye do nirya, sik deiyok nang arye, “Moubuka unamlume,” nyabuka, nyanyak yupu kum kekenyak ninye ara, aminyan talak ara, Allah arye wenebuka opliba dipnamake.

¹¹ Allah Yahweh ara, aning-aning nirya el akunum kele. Malye ubuka unyak ninye dibikirye, wekelbanamak sukum ulul ning nirya, akunum atu buklobuka sirya dakamice ning babye, aminyan talak sirya daknamak ning babye, el akunum kel bikilule. Aning ati ara, dipkoprob nyapsine. Aning-aning nirya akunum bikamuka anya arye, ninye tukwak mutuku unyak nang nirya arye, malye ubuka unyakce, sik kanye talima noutamak dungnunyak ning nirya ara, tonok ning babye, Allah ati kum dungnuptinge. Allah elcuk aning nirya akunum kel bikilule anya arye, aning nirya ara, dilulba lakak uk ulule.

¹² Ninye ton, yuk nang ap, Allah el yupu ap ati, ‘Na like,’ tenebuka, malye yupu nyalulnye bira, yuk kel nang arye elti, “Winina kume,” nyabuka lipsisikna yupu nyanmace talak ara, anye birye, sik kel nang ati, kanye yu ulule. Aning atonun, yatanye do nirya, yuk ninye ati, talye yep-yep aplirye, malye kilulnye birye, yuk kel bikamikce nang ati, “Anggun ton melibuka peterepnululume,” nyabuka, pia kum moropnamle. Kume, sik bidamang kanye ereldanyak nang arye, sik bidamnye ati, ‘Nunda kele weik nang akunum unyap,’ tenenyake. Pia kwalina uk unyak ninye anya arye, sik bidamang kanye noutamak tenenyak ninguk, talibuka unamake. Tonda, ‘Yuk nang arye nyanyak yupu nirya ara, nun like,’ tenenyake.

¹³ Ninye ton, el kanye talima noutamak arye, kanye deiplinye bira, el urasin nirya etek-etek aplirye, kanye deibuka ulule. Bukni, imun kanye bobuka ululnye bira, el kanye talima ap, el kanye tenen ning ap, pia ikin weik ulula anya arye, ‘Se’ tenen, mikip pia kum uk ulirye, kanye deibuka kum unamle. Ikin asa uk unamle.

¹⁴ Winipmanto ara, ninye ton teleb ubuka ululnye bira, din patapnamle talak ara, teleb din ninguk, dobuka denamle. Wininamle bukni, ninye ton el kanye talima noutamak pia walwal uk ululnye bira, din bama donoklamikiba, lyulamle ning awaplya babye, amalye ninguk dobuka denamle. Aning atonun, ninye ton, ‘Kel bikna deiyok ning weik arye kel biktinye,’ tenebuka, kel bikna deiyok ning ati elkirikilule. Anye bira, dipkoprob elce tenebuka elamle touk, weik arye tonap tabakuka, kel kipnin banamle. Bukni, sik kanye talima ap, kanye tenen ning ap, walwal uk unyak nang ara, ‘Talye-talye yupu uk nyapsitingba kekeptibye’ tenen, pataliba ayupu atibuk, eibuka dobolbanyake. Ato nang ara, pia walwal uk unamake.

¹⁵ Ninye ton utotoa talina kumce, ulamice nang ati, yuk nang arye ikin ning weik sik nong deice dobuka, delinyaka anya arye, sik aninye kam unamak talak, asum-asum nirya ara, ‘Se, yata ning ton uptibye do?’ tenen, pataliba, ikin kanye uk bobuka unamake. Ikin ning noutamakuk unamake. Bukni, yuk ninye nirya ara, teleb kanye bobuka ukirye, pia yuk tenenyake. Sikda, ‘Kume, nun kam unyap talak nirya ara, pia telebuk unyabe,’ tenebuka kanye deibuka pin-pina asa arye unyake. Winipmanto ara, sik weik kwalina dipnuce ati, kanye delilamak touk, unamake.

¹⁶ Sik talibuka un ning mitik anun uk aupmal bukni, sikce, ‘Kume nun ni koprop Allah Yahweh, elcuk arenulule,’ tenebuka, tuba-tuba Allah atibuk ilil tenebuka ukirye, elti, kanye deibuka kibuka si erenyake. Sik wininyak ninye ara, pia telebuk unamake. Bukni, yuk nang arye aning-aning nirya dekikirye, bona ning weik arye bulubuka delinyak bukni, kanye deibuka kum unyake. Aninye ara, sikce tuba-tuba yuk nang ati, derena uk unyake. Wininyak talak ara, sikce yuk ninye ap, neika dukdongobuka tonok kanye bobuka, pia kum unamake. Aninye sik pataplye ning ara, ‘Pia nyaldana uk ulamtibye,’ tenebuka unamake. Sik bona ning weik aupmatu babye, sik kanye talima noutamak ara, malye kanye bobuka unyake.

¹⁷ Pia teleb ning ara, ninye ton tonok lyun ning deice malmalya lukuka deipdakirye, mek dibice deice arye, ‘Pia telebe, na ka koprop, nun neika unyame,’ tenebuka unyake. Bukni, yuk nang ara, basam obuka weik kwalina kwalibikirye, dibice deice arye, ‘Nun ap neika dipnamap nang, neika una ara, nun pia like,’ tenelanyake. Basam tup weik aupmatu babye, akwalina neika dibice deice arye, ‘Nun like,’ tenebiceura, kanye talima wilipdakirye unyake. Aning ara, pia malyeuk ulule.

¹⁸ Ninye ton tuba-tuba yu ninguk tenebuka ululnye bira, atenelye deice arye, minopce yu welepliba, yuk nang ap waldana ap, oldana ap uk unyake. Wininyak bukni, ninye ton kanye talima dakdongobuka nimalye arye ululnye bira, elce, ‘Yu yupu nyapnun’ tenen, moubuka tenipdepnin balirye, teleb yupu uk nyalulnye bira, adeice arye, el damak unamak ninye nirya babye, yuk nang ap neika dukdongobuka pia telebuk unamake.

¹⁹ Ninye ton tuba-tuba, ‘Pil mikip arye dona ara na like,’ tenelirye, pil teleb ubuka kum dolulnye bira, el kam unamle talak nirya ara, patana uk uliba, imun kanye bobuka pia ikin weik unamle. Bukni, ninye ton diksukumuk ulirye, Allah el yupu uk kekebuka dobolbalulnye bira, pia telebuk unamle. Tonda, weik kanye imun ning ton, el damak pia kum yanganamle.

²⁰ Mapu nirya arye teleb ubuka ukirye, weik kel kipnin banyak mapu nirya ati, sik ni yapu arye pia kanye delinyake. Bukni, teleb ubuka kum ukirye, malye-malyeuk wininyak mapu nirya ara, sik nin yapu, kanye uk delilamliba, amapu ati, ‘Nun like,’ tenenyake.

²¹ Yata nang do nirya, tuba walwal uk unyak nang ara, ‘Aning ara wiriptibye’ tenen, tuba-tuba pataliba, yuk nang arye awal-wal ninguk upnin balamikiba, yuk ninye ikin uplyopura, aning eibikirye, kanye delinamake. Sik walwal ninguk patalye ninye ara, wininyaka deice arye, weik kanye imun un ning sik damak yanganamle. Bukni, ninye ton kanye moubuka tenipdekirye, ‘Teleb bisikuk dobolbanamabe,’ tenenyak nang ara, dipkoprob teleb ninguk talibuka unamake. Winipnin banamaka deice arye, sik kam unamak talak nirya ara, telebuk unamake. Sik pil donamak ning nirya babye, nong pia weik upnin banamle.

²² Tonda sik nirya arye, ‘Weik mambul ning ton winipnamabe,’ tenepmunyopura, kabul talak arye moubuka tenepmunce, weik kel bikamikce nang ap, yupu talipmunce, “Winipnamabe, aning teleb do, malye do?” nyabuka, yupu sisikmunce, anang nirya arye, yupu ton melibuka nyapsikcopura, aminyan talak sikce kel bikicopura, anggunce, ‘Aning wininamabe,’ tenepmamun pil dopmunyopura, dipkoprob nong upnamle. Aning ara, kum kum danamle. Bukni, yuk nang arye aning atonun pia kum unyake. Sik pil min kum dopmakce talak arye, ‘Aning ara teleb do, malye do?’ tenen, yuk nang ap yupu talina kum diparyuk, talye lukparabuka pil dolbanyake. Aning nirya kum tenipdekirye, talye piluk dolinyak nang ara, sik tenenyak ning, dipkoprob nong pia kum upnamle. Aning nirya ara kum danamle.

²³ Ninye ton, ‘Yupu nyapnun’ tenen, teneplirye, yupu nyanulye talak ara, el tenepmalye touk, minopce teleb yupu uk nyapliba, ninye nirya kekebikirye, kanye delinyake. Sik nirya arye elti, “E, nun kwit telebe,” nyanamake. Aning atonun, yata nang do nirya, weik kel deice arye, ninye melina yupu teleb ubuka nyaptingopura, sik yupu nyabice talak, teleb ubuka nyabikiba, ninye nirya kekebikirye, kanye delinamake.

²⁴ Teleb ubuka kel kinyak nang ara, sik kanye diksukumuk upliba, teleb ubuka unyakce, Allah el yupu uk moubuka kekebikirye, ulamica ani, yuk talak dibicopura, dipkoprob im deice bikirye kam pia unamake. Aning atonun, ninye ton anang wininyak atonun kanye talima diksukum teleb ubuka unyak nang ara, ninye dibikirye banyak bisik ara, batakuka kam una bisikuk banamake. Tukwak mutuku noutamak unyak talak ara, sik nong dipnamak bukni, dibikce babye, aminyan talak tuba tamubuka, kam bukikirye, pia kam uk unamake.

²⁵ Ninye ton kanye talima erebuka ululnye bira, el kam unamle talak pil donamle ning ap, el upnamle ning ap, el kilapu ap, el mapu silip nirya ap ati, Allah Yahweh arye, sik wenen ning nirya, kum kilinamle. Bukni, diksukum teleb ubuka unyak youwak kilapu ara, sik talibuka unamak talak noutamak nirya ara, Allah Yahweh elce melibuka, arenamle deice arye, sik bona ning ap, sik mapu ap ati, pia melibuka kalikinamle. Sik ning ara, kum kum upnin banamle.

²⁶ Ninye ton yu kanye uk tenebuka, malye ninguk wininyak nang ara, Allah Yahweh elce, ‘Anang ara na like,’ tenelule. Utenelul bukni, diksukum teleb ubuka unyak ninye arye nyanyak yupu ati ara, Allah arye pia kanye delilule.

²⁷ Yatanye do, ‘Yo bok weik arye koproptinirye, bona weik talinanye kiptinye’ tenen, tilila yupu nyabuka ubula dololulnye bira, aning-aning nirya, winibuka dololya deice arye, el ap, el mapu silip nirya ap ati, malye kililule. El malye ulya deice arye, bona ning weik dolonamle bukni, adeice arye, el mapu silip nirya malye winililulba, ikin ning weik unamake. Ton nang ara, ‘Ubula dopropnamne’ tenen, mambul ning bokuka arepmantonye ati, morolbalule. ‘Anye bira kanye deipnilirye, kum arepnamnutu ning bukni, dungnubuka arepnamnil’ tenen, amorolbalulnye birye, teleb ning dobuka, weik deiyoknye ati dungnubuka arelbalule. Winilul bukni, Allah arye amalye ululnye ati, aminyan sirya talak, wenebuka oplopnamle. Ati ara, yatanye do, ‘Ayo bok ara dungnubuka dolona na like,’ teneplirye, binuka moroplirye, kum dolbalulnye bira, teleb ubuka kam pia unamle.

²⁸ Diksukum teleb ubuka ukirye, Allah el yupu nyasilye touk, tuba-tuba moubuka kekebikirye, ayupu talibuka unyak nang ara, sik nyapnamak yupu ati, min kum nyapmace talak arye, moubuka tenipdekirye nyanyake. Anang ara, sik nyanyak yupu nirya telebuk ulule. Bukni, malye winin ninguk ton talibuka unyak nang ara, sik nyapnamak yupu kabul talak arye, moubuka tenina kumce, yu upliba, talye lukparabuka adiparyuk, malye yupu uk nyaltakanyake.

²⁹ Ninye kanye talima diksukumuk ubuka unyak ninye arye, Allah morobiceura, Allah Yahweh arye sik morobice yupu kekenamle. Bukni, tuba malye-malyeuk upra banyak nang arye, moronyak ning ara, Allah arye kum kekenamle. Deiyok ara, sikce Allah ati, “Melipsilyame,” nyabuka moronyak bukni, tuba malyeuk unyaka ati, Allah elda sik damak pia kum ulula anya arye, sik pataliba moronyak ning ara, pia kum kekelule.

³⁰ Ninye ton sik urasin etek-etek abikirye, kanye deibuka unyak nang ara, ninye yuk nang nirya eibikirye, sik babye kanye delinyake. Aning atonun, yuk nang arye nun melina ati, teleb yupu dobuka, yuk pera mutuku arye, nun dam laka nyalyasicopura, ayupu kekebibirye, nun kanye deibuka unamabe.

³¹ Ninye ton wenena yupu ap, lipsisikuka peterena yupu ap, nyanmakiba, kekeplirye, ‘E, ayupu ara mambul ulul yupu anya arye, na ton kekepnirye, talibuka unamne,’ tenelulnye bira, yuk weik kel bikamikce nang ap, neika upyopura, kanye deibuka unamle. Deiyok ara, weik kel nang ap, el ap neika ulamikca ani, sikce weik kel bikna ning nyakiba, kekeplyopura, aminyan talak el babye weik kel biknanye upnin banamle.

³² Ninye ton yuk nang arye wenebuka peterena yupu ap, lipsisikuka peterena yupu ap, nyabice talak, sikce ayupu moubuka kum kekenyakce, melibuka kum dobolbanyak ninye ara, dipkoprob sik bidamnye ati kum kalikildanyake anya arye, wininyaka deice arye, sik diamuk malye ulilanyake. Wininyak bukni, yata ninye do nirya, yuk nang arye wenebuka peterenyak yupu ati, kanye deibikirye, moubuka kekenyak ninye ara, weik kel bikna deiyok ning ton, weik tabakuka kel kipnin banamake.

³³ Yata ninye do nirya, Allah Yahweh ati, ilil tenebuka ukirye, el siuk erenyak ninye nirya ara, sik peterena deiyok nang arye, peterenyakba moubuka kekebikca deice arye, weik kel bikna ning tonap, tabakuka kel kipnin banamake. Tonda, yata nang do nirya, sik talima nimalye aryuk amu tamukiba, aminyan talak yuk ninye nirya eibikirye, ‘E, anang ara, telebuk unyaka anya arye, nun ninye deiyok nang unamsiyak’ tenen, anang dobuka erebikirye, kanye delinamake.