Amos 7 - Eipomek

Allah Yahweh arye ninye wenena ati, kintinyamuk ning nirya, lak kipdeibukba, Amos birye eibuk ning ati, nyabuk yupu

¹ Amos birye nyabuk. Allah Yahweh elda, aning-aning nirya talibuka deice tam ulirye, Pia Mikip Weik Deiyoknye ululnye birye, na Amos biti, lak dopdeipnukba, narye eipse. Eipse ning ara, ani. Sul kwising ara, yupa pia weik arye dopdeibukak, unmekba eipse. Atalak ara, ninye deiyoknye Raja arena ati, gandum ap, yuk dina kouamik ning ap, akunum sekuka arepmekba, tonap tuba winiryuk panmok ning, deiyok koubuka, dinamik sul kwising dopdeibuk. Amutmuta sekdopmek ning, kabul kwapu kum silikmok talak arye eipse.

² Awinibuk ning eipse talak ara, asul kwising yupa weik panabuka yayikce, tuku deice palamuk mutmuta nirya ara, yanuka dibikce, sirya dakikopura, narye, Allah ati nyapse. “Se, Allah Yahweh, anda aning-aning nirya talibuka, deice tam Pia Mikip Weik Deiyoknye ulyamnye bira, anti yupu nyapnuna ara, ‘Malye yupu nyapnyak’ tenen, ‘Ance nati, namin kipnunilyame’ tenen, moropkine. Na nio, an mapu koprop, Yakub birye deiamukba, dadeipdanin yangalamik ninye, sikda mikip kum mitang ninye ati, ikin ning weik, sik nong deice deipminyopura, yata wiribuka tuba kam upting do? Sik yupa ara, yala mitik ninyeuk unyaka anya arye, ance aning arepminyopura, yata wiribuka tuba teleb ubuka kam winipting do?” nyabuka asipdese.

³ Nyabuka moropsebuk, Allah Yahweh arye, ‘Winibuka wenepnamsine’ tenen, kintinip deibukce, laka kipdeibuk ning ara, batakuk. Allah arye tamubuka tenibukce, ‘Aning ara, tuba kum winipnamne’ tenen, batakuk. Batakukce, tuba tamubuka nati nyapnuke. “Narye ‘Israel ninye wenena ati winipnamne,’ tenepse ning ara, kum winipnamane,” nyapnuk.

Allah arye Amos biti, like bitinye ning ara, uku lak kipdeibukba eibuka ati, nyabuk yupu

⁴ Allah Yahweh elda aning-aning nirya talibuka, deice tam Pia Mikip Weik Deiyoknye ululnye birye, na Amos biti, lak kipdeipnukba, narye eipse. Eipse ning ara, ani. Ara, el mapu Israel ninye, sik wenena ati, ‘Weik uku arepnamne’ tenen, kintinibuk. Akintinibuka deipmokba, eipse ning ara, uku ara weik laut mekwen deibukak ara, uku sakukce, asukum arye deiyok koubuka, amekwen nirya ap, tukwak mutuku-mutuku nirya ap ara, ‘Uku arye dibuka sirya daknamle’ tenen, akunum kintinip deibukce, dopkwetepnuyuka ati, kintinipmokba eipse.

⁵ Winibukopura, na Amos birye tamubuka Allah ati nyapse. “Se, na ni Allah Yahweh, anda aning-aning nirya talibuka, deice tam Pia Mikip Weik Deiyoknye ulyamnye, ance, ‘Weik uku kintinipmalam ning ara, dipkoprob dopkwetepnun’ tenen, kintinipmalam ning ara, ‘Aning bataknulyame,’ nyabuka moropkine. Na nio, an mapu koprop, Yakub birye deiamukba, dadeipdanin yangalamik ninye ara, sikda mikip kume, mitang ninye anya arye, ance aweik uku dopkwetepminyopura, yata wiribuka tuba kam upting do? Sik yala yupa ara, mitik kopropuk unyaka ati ara, ance aning dipkoprob arepminyopura, yata wiribuka, tuba teleb ubuka kam upting do?” nyabuka asipdese.

⁶ Nyabuka moropsebuk, Allah Yahweh arye, ‘Winibuka wenepnamsine’ tenen, kintinibukce, laka kintinipmok ning ara batakuk. Allah arye tamubuka tenibukce, ‘Aning ara, tuba kum winipnamne’ tenen, batakuk. Batakukce, tuba tamubuka, nati nyapnuke. “Na Allah Yahweh aning-aning nirya deice tam, Pia Mikip Weik Deiyoknye arye, nyapkine. ‘Israel ninye wenena ati winipnamne,’ tenepse ning ara, kum winipnamane,” nyapnuke.

Cang tapu arye, keil poka kiklipdeyukura, eibuka ati, nyabuk yupu

⁷ Tonda, na Amos birye dinmasibuk, Allah arye, yuk ning ton kiklipdeyukce, laka kipdeibukba eipse. Aeipse ning ara, ani. Allah arye keil poka, cang weik ning arye, apoka dam tikuk. Apoka domik ninye arye, pia cang tapu pung ning arye kiklipdebuka domik. Allah ara, apoka deice tikmokce, el taruk noutam ara, ‘Cang do, bumang do?’ tenen, kiklilden tapu bopmukce, ‘Adobik poka ara, kiklipdenune. Ara, punguk deibuka dobik do, kum do?’ tenen, kiklilden ning, kiklilenmokba eipse.

⁸ Akunum eipsopura, Allah Yahweh arye, na Amos biti asipdenuk. “Na taruk deice arye talipman ning ara, yata ning eipmalam do?” nyabuka asipnukba, narye tamubuka nyapse. “Na ni Allah, ance cang weik pung tapu kiklilena ati, talipmalame,” nyapse. Nyapsiba, Allah Yahweh arye nyapnuke. “Kume atapu talipman deice arye, na mapu koprop, ‘Naʼ tenen, ninye Israel ninye ara, ‘Dipkoprop pia diksukumuk unyak do, kum do?’ tenen, kiklipdenamne. Acang keil poka pung kipdeibuka, domik touk ubuka, ton kum unyaka ati nyapne. Sikce tuba-tuba malyeuk wininyaka ati, minop talak aning nirya namin kibuka, luba kiamse bukni, wini talak ara, tuba tonap, kum luba kipnamne. Narye, ‘Sik malye unyak ning wenena ati, oplopnamne’ tenen, kintinipse ning ara, kum bataknamne. Dipkoprop adiparyuk sikti, wenebuka opnamne.

⁹ Winipnamne talak ara, Isak birye, talye ning Isa Mutuku Dongonye si erena ati, mutuku deice keil pala deiamuk ning ara, narye ulubuka bataknirye, kum kipdeipniba, aminyan talak ara, ninye ara, amutuku pia kum binamake. Tonda, Isak birye deibukba, dadeipdanin yanganyak ninye, Israel ninye arye, ‘Isa Mutuku Dongonye si erenamap’ tenen, domikba, teleb uamuk aik nirya ara, narye ulubuka bataknamne. Winipniba amutuku nirya ap, anyasik nirya ap, oldemuk upnamle. Winipnyopura, sik ninye deiyoknye, el si ara Raja Yerobeam, el taleamuk ning ap, el yala ninye ap, el taleamuk mutuku ap, el amu tam deiyok kibuka ulamik ninye nirya ap, obuka sirya daknamne. Winipnirye, yuk mutuku yu nang ati, lo arepneba, parang ya boyakirye, Raja Yerobeam taleamuk ning ap, ninye nirya ap, obuka sirya daknamake.” Allah arye, na Amos biti nyapdeipnukba kekepse.

Betel mutukunye, el si ara Amazia birye, Raja Yerobeam biti, nyabuk yupu

¹⁰ Ara, Allah arye ayupu nirya nyapdeibukba, nabi Amos birye, ayupu akunum laka nyalbiyukopura, Betel mutuku Allah yupu aik pum tam, pil dolamuknye, el si ara, Amazia birye kekebuk. Kekebukce, ninye tonoknye ton, wipdeibukura, Israel ninye taleamuka deiyoknye, Raja Yerobeam dam laka nyalbiyuk. Elce nyapdeibuk yupu ara, ani. “Atalak ara, Amos birye nyasulule, ‘Nun deiyoknye Raja Yerobeam ap, el talibuka ulul mutuku nirya ara, kum danamle.’ Amos birye nyabuka, malye yupu nyalula deice arye, amutuku noutam unyak Israel ninye arye, anti malye kilina ati, yupu talinamake. Aning ara, mambul weik anya arye, kanye moupnulyame.”

¹¹ Tonda Amos birye ayupu nyakulule. ‘Nun deiyoknye Raja Yerobeam bira, mal olan makca deice arye obikiba, dipnamlarya,’ nyakulule. Tonda, ‘Raja obikirye, el taleamuk Israel ninye ara, dipkoprob yu nang arye tapu koubikirye, bobuka yuk mutuku delilbinamake. Sik nong deice ikin weik deilinamake,’ nyalule.” Imam Amazia birye dopdeibuknye birye, Raja Yerobeam biti laka nyalbiyuk.

¹² Ayupu nyalbinmok talak ara, Amazia birye, nabi Amos biti nyabuk. “Anda Allah el yupu nyapdeipliba, aminyan winipnamle ning eililyamnye, tonda Allah el yupu laka nyana deiyoknye, nabi ulyame. Bukni, ance nyasilyam yupu ara, kekena nun lik ati, adiparyuk Yehuda yala ninye talibuka unyak mutuku noutamuk, Allah yupu bobuka, laka nyalbinulyame. Nun dam tonap nyana kume. Winipminba, sik Yehuda yala ninye arye, an melina ati, arepnamkiyake.”

¹³ “Yehuda yala nang unyak tam mutuku bana teleb bukni, nun mutuku noutam, Betel mutuku ara, Allah yupu tonap kum peterenamsilame. Amutuku ara, ninye deiyoknye Raja Yerobeam birye, ‘Amutuku ara na mambul mutuku,’ tenelula anya arye, amutuku noutam ara, pia weik aik akunum dobuka, anyaik domukak yanganyabe. Amutuku ap, anyaik ap ara, nun ni Raja Yerobeam el ning ati, ance amutuku ton yangana kume. Ati ara, Allah el yupu ton amutuku noutam laka nyalbana kume,” Amazia birye, Amos biti nyabuk.

¹⁴ Nyabukopura, Amos birye tamubuka, Amazia biti nyabuk. “Ance nabinye nyabuka, si sipmanilam bukni, nara dipkoprob nabinye kume. Nara, Allah el yupu laka nyana ap, aminyan winipnamle ning, laka nyananye kuma. Aning atouk, na ni koprop babye, nabinye kum ulamuk. Dipkoprop, nara basam weina ap, bai tam palamle yo, el si ara, yo duk dakananye unune. Na pil ara, apil bitinye uka.

¹⁵ Apil bitinyeuk dopra winilamse bukni, na domba basam wein pil dolamsa noutam, Allah Yahweh, elce na dopropnukce, nyapnuke. ‘Kume anda adiparyuk, na yupu bobukapmince, sik Israel ninye unyak mutuku nyalbinamlame. Aminyan winipnamle ning laka nyapdeipkiniba, ayupu bobuka, narye wipdeiamse ninye, ‘Naʼ tenen, ninye sik Israel yala nang ati laka nyalbilyame,’ nyapdeipnuke,” Amos birye nyabuk.

¹⁶ Nyabukce, ayupu ton dukdongobuka nyabuk. “Allah arye wipdeipnukce, ‘Israel ninye ati laka nyalbilyame,’ nyapdeipnuke. Ati, Allah Yahweh arye, anggunti nyapdeipsuk yupu ara, moubuka kekenamlulume. Ara, ance nati, ‘Nun Israel ninye dam ara, Allah arye nyapmakil yupu laka nyana kume. Israel ninye sik wenena ati, aminyan talak ara, ikin ning sik nong deice yanamle ning ara, tuba tamubuka tonap laka nyana kume. Aning atonun, Isak birye deibukba, dadeipdanin yanganyak ninye, sik wenena ati, yupu ton kum laka nyapnamsilyame,’ nyapnuluma ati, nyapkine.” Amos birye, Amazia biti nyabuk.

¹⁷ Nyabukce, ayupu ton nyabuk. “Ance, ‘Allah nyapdeipkuk yupu ara, laka kum nyapnamsilyame,’ nyabuka, yupu sekenilyama ati, Allah Yahweh arye nyapmakil yupu ara ani. Allah Yahweh arye, nyapkile. An kil ara, akota noutam bukni, talye bisik banauk uliba, ninye nirya arye, yo bok arebikirye, akil bobuka, ubula nang arye, talye-talye yukak bonamake. Tonda, an mapu nirya ara, yuk nang yakirye, mal olanmakcak arye, ya dobukabikirye, an mapu nirya obuka, sirya daknamkiyake. Tonda, an taliplum mutuku nirya ara, tapu arye kiklipdekirye, bokukabikirye, yuk ninye arye, atuku nirya dekuka, dopropnamake. Winipnamak talak ara, yuk mutuku nang, Allah Yahweh ati, dib kum tenenyak ninye arye, tapu koupkikirye, an nong babye, sik noutamak binuka dipnalame. Tonda atalak aryuk, yuk mutuku ninye yanukabikirye, obuka sirya dakikcopura, sik Israel mutuku unyak ninye nirya bobuka, yuk mutuku delilbinamake. Ara, pia pera mutuku bobinamake. Allah arye nyapdeipmakile,” nyabuka, Amos birye laka nyabuk.