Amos 5 - Eipomek

Allah arye Israel yala ninye wenepliba, ikin weik unamaka ati, nyabuk yupu

¹ Allah arye nyabukba, Amos birye kekebuka sekuk yupu ara, ani. Allah arye nyabuk. Narye engena deice arye nyapnamasin ning ara, anggun Israel ninye ikin ning dopropmunce, imun kanye bopnamlum ning ati, laka nyapnusine. Ayupu ara, pia moubuka kekepnululume.

² Ara, anggun Israel ninye ara, wel kilapu atonun, pia teleb ulamlum bukni, wini talak ara, anggun akunum sakmalume. Anggun mutuku koprop noutam akunum saklum bukni, yatanye birye, melibukba tikdeipsutu do? Kume, na Allah arye, tonap tamubuka, kum bukeipnamsine. Luba kipsiniba, anggun unamlum tuku deiceuk unamlume.

³ Nara, Allah Yahweh arye, aning-aning talibuka deice tam, Pia Mikip Weik Deiyoknye unirye, anggun ni koproba Allah unune. Narye nyapsine. Tonok mutuku ara, anggun Israel yala ninye ululum mutuku arye, yin talin nang weik, seribu nang (1.000) wibuka deipmunba, yuk mutuku nang olbinamak buk, aminyan talak ara, tamubuka yanamak yin talin nang ara, seratus (100) nang ton yanamake. Atonun, yuk mutuku asik dobuka unyak nang ton, mal olana ati, seratus nang wipdeipmunba, mal olalbinamak bukni, sepuluh (10) nang diamuk tamubuka yanamake.

⁴ Na Allah Yahweh arye nyapsine. Se na mapu, Israel yala nang, anggunda, ‘Naʼ tenen, ninye ululuma anya arye, anggun malye ululum ning batakmunce, anggun tamubuka, na damak yamunyeura, anggunda pia kam unamlume.

⁵ Anggunce yuk talye ning ap, Isa Mutuku Dongonye si ap erena ati, Betel mutuku bana kume. Tonda, Gilgal mutuku si erenyak isa ati, ‘Sik si erebibirye, melipsiting do?’ tenen, Gilgal mutuku kum elbinamlulume. Atonun tonda, ‘Bersyeba mutuku bibirye, sik isa si erenamap’ tenen, bana kume. Aning ara, talye ati kum nyapsine. Sik Gilgal mutuku asik dobuka, unyak ninye nirya ara, sik wenena ati, narye lo arepneba, yuk mutuku yu nang arye, Gilgal mutuku unyak ninye obisibikirye, tapu koubikirye, sik mutuku bobinamake. Tonda, sik Betel mutuku unyak ninye babye, sik wenena ati, kum kipdeipniba, ton kum upnamake. ‘Wininamap,’ tenenyak ning nirya ara, dipkoprob nong kum upnamle.

⁶ Ati ara, anggun Israel ninye nirya ara, tonap tuba tamubuka, na Allah Yahweh damuk yanamlulume. Yamunyopura, anggun pia tuba kamuk unamlum bukni, na dam tamubuka kum yamunyopura, Allah na yu ara, uku dilamle atonun unulula ati, anggun apu koprop, Yusup arye deiamukba, dadeipdanin yangalamik nang, anggun Israel yala ninye nirya, sirya daknamsine. Winipmanto ara, uku dibuka sirya daklamle touk, anggun wenena ati, kum daneipnamsine. Tonda, Betel mutuku unyak nang babye, auku arye diplirye, sirya daknamle. Adinamle uku ara, yatanye birye tangap dongopturye, aninye lyeptu do? Pia kuma ati, ‘Allah arye wenepsilyak’ tenen, nyapsine ati, anggun kanye mouplulume, nyapsine.

⁷ Se anggun nirya ara, pia imun kanye bobuka unamlume. Kanye imun ning weik arenamsin ning ara, anggun kayapu nang ati, yupu lipsisikuka bokolin talak, diksukum yupu uk nyaptumce, aninye winilamak touk, yupu nyaptum bukni, tilila yupu nyana ap, malye winina ap winimunyeba, anggun kayapu ninye nirya, ikin kanye bobuka unyake. Tonda, angguncuk diksukum un ning nirya batakuka, yaniplopmunce, tonap tuba tamubuka, malye un ninguk winilulume. Ati, na Allah arye wenepnamsine nyapsine.

⁸ Nara Allah, na si Yahweh unune. Na aryuk kurya im deice tiklamle ning ara, kwepdeipse. Ara, kurya nirya ap, tonda ninye weik bikamik kurya si ara, Kartika ap, Belantik ap ara, naryuk kwepdeipse. Atonun, na Allah aryuk lukunyan noutam kuna ara, tonap tuba tamubuka dirina kilinune. Tonda, keting noutam arye tamubuka lukunyan kilinune. Tonda, weik laut mekwen deipse noutam arye, mek weik dopropnirye, dou tam kipdeipniba, mok cepliba, tuku deice mok ceplirye, mek sakalule. Aning-aning nirya winilulnye bira, na uka. Na si ara, Allah Yahweh, naryuk wininune.

⁹ Ati na Allah aryuk, bebeya laklirye, minopce lingum alamle touk, na mikip weik deice arye, malye ninye ati wenepnirye, kum kilinune. Yatato ninye do nirya, sik mikip uptinga babye, sik ap, sikce keil aik domik ning nirya ara, narye kum kilinune. Ara, sikce, ‘Nun osinyak ninye kum yana weknamak’ tenen, keil aik ap, cang keil poka ap, domik ning nirya ara, narye kum kilinune. Nara Allah, na mikip weik deice arye, sik anang tenenyak ning nirya, minopce kum kilinune.

¹⁰ Anggun malye winilulum ninye nirya ara, yatanye do nirya, ninye yupu bokolin talak ara, el diksukum yupu nyalulnye bira, anggunce elti, ‘Nun like’ tenen, yu usulule. Aning atouk, yupu bokolina dam arye, teleb yupu uk nyalulnye bira, ‘Nunda anye bira, nun like,’ tenelulume.

¹¹ Atonun anggunce talye bona utotoa talina kum ninye ati, ‘Sikda talye ninye unyake’ tenen, yanipdongobuka, sik gandum talye dalubuka dololulume. Sik ning ap, sik uang yo bok ap, ubula weik dololuluma anya arye, pia malye winilulume. Wininululuma ati ara, anggun aning winilulum ning ara, pia teleb keil arye dolalum aik ara, aminyan talak ara, anyaik pum tam, pia kum unamlume. Ara, anggun bidamnye arye, urasin pia teleb ubuka dolalum asik ara, anyasik pia kum unamlume, nyapsine. Tonda, anggun bidamnye mikip deice arye, wa wibuka koululum anggur duk moulamle tapu ara, duk dakmunce, aduk teikuka, anggur mek kwebuka kum dinamlume.

¹² Narye wenepsiniba, aning nirya kum wininamlum ning ara, urdem ati kume. Deiyok ara ani. Anggunce malye ninguk tenebuka, weik malye winilulum ning ara, na akunum kele bikisunune. Anggunda, pia malye winin ning weik arye winilulum ning ara, na kele. Ara, anggun yupu bokolin talak ara, teleb ninguk wininmak nang ati ara, “Sik malye wininyake,” nyaplobuka, ikin ning, sik nong deice delilulume. Bukni, malye wininmalinye bira, “Elda malye kum winipmale,” nyabuka, talye nyaltakalulume. Ara, urdem ati, kum winilulume. Deiyok ara, el malye winimalinye bira, anggun yupu bokolina nang ati ara, “Lak kum nyapnamanulume,” nyabuka, kunusa don yo bok arepsikiba, dololuluma deice arye nyaltakalulume. Tonda, sik talye bona utotoa talina kum ninye ati ara, yupu bokolin talak ara, aninye talye yaniltalulume. ‘Aninye ara, awaplye’ tenen, batakalulume. Sikti diksukum teleb yupu ton, kum nyalulume.

¹³ Anggunce winiluluma deice arye, atalak noutamak ara, malye winin ning, pia weik ulule. Aning ati, sik pia moubuka diksukumuk unyak nang arye, yupu nyana kum yupu, tunim abuka unyake. Ara, ‘Sik malye deiyok nang arye, deiyok kum upmale bukni opsicak’ tenen, yupu kum nyanyake.

¹⁴ ‘Kam uptibye,’ tenelulum nang ara, pia teleb unauk, pi dobuka unamlulume. Malye winin ning nirya batakmunce, ton pia kum wininamlulume. Adeice arye kamuk unamlulume. Winipmunyopura, nara Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggun kan-kan unamne. Ara, anggunce, “Allah Yahweh arye, kalikuka melisulule,” nyabuka, laka nyalamlum touk, dipkoprob wininamsina ati nyapsine.

¹⁵ Aning atouk, ‘Malye winin ning ara, nun like’ tenen, pia diksukumuk unamlume. Yata malye winin ning do nirya, malye ning nirya batakmunce, ‘Aning ara, nun like’ tenen, malye ning pia kum wininamlulume. Winibuka umunyopura, dinamlume. Winipmunyopura, nara, Allah Yahweh, Pia Mikip Weik Deiyoknye unirye, im deice unyak yin talin nang nirya talinunye bira, dipkoprob anggunti, melinamsine. Telebuk winimunyopura, narye minopce wenebuka kum opsinirye, tuba tamubuka, tonap bico tenepsinyopura, Yusup el yala ninye ati, teleb updeipnamsine. Ara, anggun apu koproba, Yusup birye deiamukba, dadeipdanin yangalamika ani, wini talak babye ululum Israel ninye ati, na Allah Yahweh arye anggunti, bico tenesipnirye, melinamsine.

¹⁶ Anggun malye weik winilamluma ati ara, nara Allah Yahweh, Pia Mikip Weik Deiyoknye unirye, im deice yin talin nang nirya talinunye bira, na Allah Yahweh aryuk nyapsine. Ara, weik asik dobikirye, anoutam bulubuka yupu wekenyak ninye nirya ara, engenauk unamake. Tonda, anyaik dobikce, anoutam banyak bisik nirya ara, sikce, ‘Se yata ning ati, malye ulamupu do?’ tenen, tenebikirye, sik kanye talima pia engenauk unamake. Sik nirya arye, ‘Se, wenepmasila ara, nun like,’ tenebikirye, malye yupu nyanamake. Sik kota mutuku noutam unyak ninye arye, bai tam talye wa wena deiyok nang yukubikiba, yacopura, “Sik ton neika engenamabe,” nyanamake. Tonda, sik engenman talak, weik kel bikamikce, mot senyak ninye ara, yukubikiba, yacopura, “Sikce ton, malye yupu nyabuka, sen mot ton nyabuka engeplulume,” nyanamake. Sik nirya ara, imun kanye bobuka unamaka ati, engenauk unamake.

¹⁷ Tonda, anggur tapu duk wa win dam unmakce ninye nirya arye, sik ton engenamake. Ara, urdem ati kum engenamake. Deiyok ara, na Yahweh yanirye, anggun nirya wenebuka opnamsina ati, engenauk unamake. Ayupu ara, na Allah Yahweh arye, akunum nyapsine.

“Allah el si ara Yahweh arye, tukwak ninye wenepnamle talak ara, ikin weik unamake,” nyabuk yupu

¹⁸ ‘Allah Yahweh arye, malye unyak nang wenepnamle sum ara, nun kanye deibabe,’ talye ati nyaltakalulum ninye ara, bicoe. Dipkoprop, anggun malye winilulum diparyuk, na Allah arye opnamsinarya. Anggun malyeuk winilulum bukni, yata deiyok ati, ‘Se, Allah Yahweh arye, dan sum yalirye, malye ninye wenepnamle do?’ tenen, kanye deibuka dilulum do? Anggun walwal aryuk winilulume. Asum ara, dirina sum kuma. Pia kunukna sum ati, anggunda, ‘Asum ara, minop yatue,’ tenena meme.

¹⁹ Asum elti, tenena ara, pia ikin weik anya arye, winipmanto yupu ton nyapnusine. Weik yu kus atonun ning, el si ara, singa kus mapmaliba, eibikirye, ‘Obuka dipsilyak’ tenen, ilil upliba, bikbik abuka banmaki bukni, mangkau arye, yuk bai tam ulul yu ning, el si ara beruang mapmalyak, bikiba beruang arye, ‘Aninye obuka dipnun’ tenen, dobolamle touk, winipnamsile. Winipmanto yupu ton nyapnusine. Ninye tonoknye, ‘Na asik binuka dikdik sepnune’ tenen, banmale bukni, inipmaliba mangkau asa arye pola-pola banmalya arye, kwatima mapmalyak talipliba, adiparyuk el taruk si topliba, diplamaka atonun winipnalume. Ara, ‘Ikin upsilyak ati, bikbik abuka, bibirye lyepdatibye’ tenen, bikbik abuka bindenamlum bukni, na Allah arye, anggun wenena ati, weik ikin ning ara, anggun nong deice deipnamsina ati nyapsine.

²⁰ Ati ara, talye ati kum nyapsine. Ara, na Allah Yahweh arye, malye wininyak ninye wenena ati, tenepse sum akunum uplyopura, dirina kum upnamle. Dipkoprop ininauk upnamle. Winipmanto ara, mok denepmalye sum, dua arye kunuklamle touk upnamle ati, asum ara dirina pia kum upnamle. Iniplirye kunudaknamle.

²¹ Na Allah Yahweh arye nyapsine. Anggunce malye tuba winimunyeura, ‘Nun ni koprop Allah, el si erenamabe’ tenen, weik sum nirya kintinilimunye ning ara, na eilisinirye yu unulule. Aning nirya ara, na like. Tonda anggunce, ‘Kume, Allah si erena ati, mambul sum ani,’ nyabuka, ninye weik arye bulumunye sum nirya ati ara, na dukmanto unune.

²² Anggun malye weik tuba-tuba winilulum ninye ara, ‘Nun malye ning dekna ati, kam ning obuka uku dabibirye, Allah ati si erebibirye, moronamabe,’ nyamunce, kam ning domba basam ap, kambing basam ap, anggun wa wining gandum ap, yakong atonun ning ap, boyanganauk ululum bukni, aning nirya ara, na like. Anggunce, ‘Nun ni Allah arye lyepnamsilarya’ tenen, kam ning ap, gandum ap, na dam boyangalulum ning ara, kum dolosunune. Tonda, anggunce na arena ati, meta weik ning obuka boyamunce, tup sekdoba uku dongopmunce, ‘Nun malye wininyap ning ara, kum kipdeipsila ati, nun Allah ap epdanuyabe,’ tenelulum ning ara, kum epdanamabe. Aning nirya ara, talye atibuk tenebuka winilulume. Anggun malyeuk winimunyeba, aning boyanuka arenululuma anya arye, narye aning nirya, pia kum dolosunune. Aning na lik anya arye, kum dinamne.

²³ Malyeuk winimunyeba, ‘Allah el si erepnuyap’ tenen, kanye deibuka, mot semunye ning nirya ara, adiparyuk bataknululume. Aning atouk, anggun bung-bung ana, el si ara kecapi bopmunce, na si erena ati selulum mot nirya bataknululume. Malye winimunyeba, amot seluluma ati, amot lelim ara, na lik ati, pia kum kekesunune.

²⁴ Bukni, pia teleb ning ara, diksukum teleb ubuka winin ninguk talibuka unamlume. Na patapnil ning ara, weik mek mikip arye balamle atonun, teleb winin ninguk, diksukumuk winimumnyeura, kanye delinamsine. Tonda, mek lilun talyeuk balamle atonun, anggunce tilila yupu nyana kumce, ‘Malye winipmalinye bira, malye winipmale,’ nyabuka, yupu bokolinamlulume. Teleb wininmalinye biti ara, ‘Teleb wininmale,’ nyabuka, yupu lipsisikuka bokolinmalulume. Winipmunya deice arye, telebuk ubuka, pil donamlume. Aning ara, batakana kum bukni, mek lia bukuka balamle atonun unamlulume. Winipmunyopura, narye anggunti, kanye delinamsine. Na Allah arye nyapsine.

²⁵ Se, na mapu Israel ninyeo. Aning ara, tuba tonap tenyeipdemunce, kel biknululume. Narye Mesir mutuku noutam arye lyepdomsiseba, anggun weik pata mutuku noutam, bisik yangalalum talak ara, narye melibuka boyanamsiseba, teleb asa arye, yanamlume. Ara, keting tamun odeikin empat puluh tahun deice arye, bisik mapnin yangalamlume. Atalak noutam nirya ara, anggunce kam ning obuka arelyangalamnulum ning ara, dipkoprob nati boyangalamnulum do? Aning nirya obuka, uku dongolamlum ning nirya ara, na si erena ati apil dolulum do? Na kanye ara, kume. Anggun kanye talima pum tam ara, yuk talye ning atibuk, tenelamlume.

²⁶ Kume, natibuk, aining ning nirya kum arelamnulume. Anggunce kanye deibuka, si erelamlum ning ara, nati kume. Anggunce talye isa si erena ati, apil dolalume. Ara, na Allah ati, pia kum kel bikamik ninye, anggun isa si Sakut ap, Kewan ap ati, anggun si erelulume. Nati, kume. Sakut bira, ‘Nun Raja nang melinamsil’ tenen, el si erelulume. Aning atouk, ‘Isa si Kewan, elda im deice kurya nirya talibuka, weik deiyoknye ulule’ tenen, el si erelulume. Anggun isa mer ati, ‘Nun ni yapu, nun deiyok nang,’ nyabuka, isa si erelulume. Ati, anggunce talye yo ap, talye keil ap dobuka, moubuka deiplumce, aning si erelulum ning ara, anggun taruk aryuk memebuka delilbalulume.

²⁷ Aning nirya winiluluma ara, anggunti wenepnamsine. Na akunum tenepse talak ara, narye lo arepneba, yuk pera mutuku yu nang arye, anggun opsikirye, tapu koubuka bobinamsiake. Ara, pia pera weik mutuku, Damasyik mutuku arye, otam mutuku, keting panalyangan tam bobinamsiake. Awinipnamsiyaka ara, narye donoknamsin talak ati, nyapsine. Ara dipkoprop, na Allah Yahweh arye, aning-aning nirya talibuka, deice tam unirye, im deice yin talin nang nirya, sik deiyoknye birye nyapsine. Si Weik Erenanye mikip weiknye bira, na uka. Narye ayupu akunum nyapdeipsine. Allah el si Yahweh arye, sik Israel ninye ati nyabuk.