Amos 3 - Eipomek

Israel ninye arye, malye weik winilamikba, Allah arye, sikti, ‘Wenepnamsine,’ nyapdeibuk yupu

¹ Allah arye Israel ninye ati nyapdeibukba, Amos kekebukce, sekuk yupu ara ani. “Na Allah Yahweh arye, ‘Anggun Israel ninye ati wenepnamsin’ tenen, nyapsin yupu ara, moubuka kekeplulume. Se, Israel ninye anggunda, Mesir mutuku ulalumba, na Allah Yahweh arye dobuka boyanamsise. Ati, na Allah Yahweh arye, anggun Israel ninye nirya ati, awenen yupu nyapsine.

² Ara, talye ati kume. Ninye mutuku-mutuku nirya aulamik bukni, anoutamak arye tonok yala nanguk, sik Israel nang ati, na Allah arye wiamsise. ‘Na tenena ninye unamak’ tenen, anggun wiamsise bukni, wini talak ara, anggunce tuba malye winin ninguk, pia weik arye tuba ululumba, elisunune ati, dipkoprob narye anggunti, weik arye wenebuka opnamsine.

³ Tonda, winipmanto ning ara, moubuka tenipdelulume. Anggun kele, ninye bitinye nang arye, neiktoto barudake. Ara, sik abitinye nang ara, ‘Nun winipnamaname. Bisikuk neika binamaname,’ nyabuka, laka kum nyapdanmarikiryuk, tonok bisikuk barudak do? Kume, ‘Nun bitinye ara, abisikuk binuname,’ nyabuka, neika kum nyapdatiringopura, neika tonok bisikuk kum bitiringe. (Aning atouk, anggun ap, na ap, tonok kanye uk, kum boptipyopura, neika kum uptibye.) Allah arye nyapdeibukba, Amos birye kekebuk.

⁴ Amos ayupu kekebukopura, elce ayupu ton nyabuk. Israel ninye, tenipdelulume. Weik yu kus atonun ning, el si ara singa kus, bai tam kalikinmatua ani, kapang ton obuka, kum diptuopura, weik ngaluktu do? Kume, el talye malyopura, urdem ati weik kum ngalukulule. Aning atonun, weik yu kus atonun ning, el si ara singa kus, kam ulul ning min kum opmalye talak ara, ‘Na din ning ton dipnune’ tenen, kamupturye, weik ngaluktu do? Kume, el din ning min kum opmalye talak ara, talye yupu tunim abuka malule.

⁵ Winipmanto ning ton, nyapnusine. Ninye arye, wena min wepmatingba, maka arye, ‘Na youpnamil’ tenen, wepmangtinga dam bituba youptu do? Tonda, wena wepmatingba, kum youptopura, adiparyuk, wepmating yala ara, talye biliktu do? Kume wena arye, maka youpliba, adiparyuk, tukwak sakalule. Aning atonun, bai tam balamle kam ning, wena wepmacak, mangkau arye yaniplyopura, wena youlule.

⁶ Winipmanto ning ara, sik weik kota mutuku unyak nang ara, mal opdanamatinga ati, pong-pong ana, el si terompet, lelim arye lak nyatingba, kekeptingopura, yok sirim kum taliptu do? Kume, terompet lelim kekebiceura, ‘Se, nun mal olan nang olyanmasiyake,’ tenen, ilil ulule. Tonda, weik asik dobuka ulamting mutuku ak, Allah Yahweh arye, ikin ning sik nong deice deiptu ura, imun kanye kum bopting do? Kume, Allah el si Yahweh arye, ‘Ikin ning aninye deice deipnun,’ tenen, kintinipturye, anang ati kum areptuopura, kanye imun ning, sik nong deice kum yatue. Ara, Allah el uka.

⁷ Dipkoprop Allah Yahweh elda, Weik Erena Deiyoknye, aning-aning nirya talibuka, deice tam ulule. Winilula anya arye, Allah elce, ‘Aning nirya ara, winipnamne,’ nyabuka, el yupu lak nyan nang, ‘Nabi-nabi arye kekepnamak’ tenen, lak nyaliba kekenyake. Sikda, el amu tam pil don nang unyake. Allah arye, sik dam lak kum nyapdeiamturye, el pil dolye ning nirya, talye mangkau kibuka kum pil dolule. ‘Winipnamna arye,’ nyabuka, laka nyaliba, nabi nang akunum kekebiceura, Allah arye apil dolule.

⁸ Ara, winipmanto yupu, akunum nyapmasina anya arye, tenipdelulume. Yu weik kus atonun, el si singa kus weik yupu arye, kamunmatopura, yata tonye birye, ilil kum uptu do? Aning atonun, Allah Yahweh arye, weik mambul yupu akunum nyapdeipnuka ati, ‘Anggun Israel ninye kekenamlum’ tenen, ayupu kum laka nyapnamsil do? Allah Yahweh elda, Weik Erena Deiyoknye, aning-aning nirya talibuka, deice tam ululnye birye, yupu nyaplyopura, yatanye do, ilil kum arye, ayupu tana kumce, monoktu do? Allah arye nyaptu ning ara, batakturye, ayupu kum laka nyaptu do? Kume, na Amos birye, ayupu nirya ara, nyapnamsine. Aning ara, kum bataktinye nyapsine.” Amos birye nyabuk.

Allah arye Israel ninye ati, wenepnamle ning ati, nyabuk yupu

⁹ Allah el si Yahweh arye, ayupu nyabuk. “Narye akunum nyapdeipnamasin yupu nirya ara, laka nyalbinamlume. Mutuku si Asdod mutuku deiyok talibuka unyak ninye ap, Mesir mutuku deiyok talibuka unyak ninye ap ati, nyapnulyame. Ara, sik nirya bulubukabikirye, Samaria mutuku tamuk ukirye, kalikuka dinamake. Ara, amutuku deiyok nang, Samaria mutuku dam yakirye, dinmaki bukni, Israel ninye arye, pia weik arye malye weik winilamik ning ap, malye wininyak ning ap, lakak kipnibuk eipnamake. Winipniba, amutuku unyak ninye arye eibikirye, ‘Se, dib aning ara, Israel ninye sik malye unyak ning weik wininyaka ara, atia,’ tenebuka kel kipnamake.

¹⁰ Allah Yahweh arye nyalule. Sik Israel ninye ara, pia dipkoprob teleb ton kum unyake. Teleb winin ning ara, akunum luba kibik. Bukni yu weik upliba, sik yuk nang ning nirya dalubuka dolonyake. Yu upliba, ninye ona ap, sik ning ubula dolona ap, ulamika deice arye, yuk mutuku ninye taleamik ning weik dopromik. Winilamikce, abona-bona nirya, sik keil arye deibuka, domik aik pum tam dongolamik. Ati, sik Israel ninye ara, pia diksukum winin ning ara, ton kum wininyake. Sikda pia malye-malye ninguk wininyake.” Allah arye nyabukba, Amos kekebukce sekuk.

¹¹ Allah arye nyabuk. “Ati, na Allah Yahweh arye nyapsine. Nara Weik Erenanye, aning-aning nirya talibuka, deice tam unune. Na wininunye birye nyapsine. Wini talak ara, Israel ninye, sik oldan nang arye, sik unyak mutuku nirya warikuka antanapnamake. Winibicopura, anggun mikip usilye ning nirya ara, mitang upnamsile. ‘Nun mal olan nang yanuka weksikirye, opsicak’ tenen, keil aik ap, cang keil poka ap, domik ning nirya ara, sik mal olan nang arye, uluplopnamake. Winibicopura, sik unyak mutuku nirya, dalubuka dopropnamake.

¹² Winipmanto yupu ton nyapnusine. Domba weinanye birye, el domba basam ara, yu weik kus singa atonun ning arye, obuka akunum diplyopura, adomba weinanye birye, el domba ati dolbinmalye bukni, seklopmaliba, dololamle ning ara, yan bitinye ap, amul ap, singa kus arye seklopmaliba, bulubuka boyangalule. Adomba nong nirya kum lyeptue. Aning atonun, Samaria mutuku noutam unyak Israel ninye nirya ara, sik mal olan nang yakirye obuka, sirya daknamake. Akunum obikirye, Israel ninye akunum sirya dakmanto upnamak bukni, tuba kam unamak nang ara, mitik tonunuk unamake. Tonda, sik bona tuba upnamle ning ara, pia mitik tonun uka. Winipmanto ara, sik bulamak ning, tonok yan ap, sik amsuna, kwiliklobikirye, mitik anun batakmace ning ap, anyuk dopdopnamake. Yuk bona taleamik ning nirya ara, sik mal olan nang arye, dalubuka dopropnamake. Israel ninye nirya obikirye, bona ara, mitik anunuk batakmakibuk unamake.” Allah arye nyabuk.

¹³ Nyabukura, ayupu ton dukdongobuka nyabuk. “Nara, Allah Yahweh unune. Nara, aning-aning nirya talibuka, deice tam erebuka, Pia Mikip Weik Deiyoknye unune. Nara, im deice unyak yin talin nang nirya, sik deiyoknye unune. Na mikip weik unye touk, yuk ning ton pia kum ulule. Narye nyapsine. Wini talak ara, na nyapnusin yupu moubuka kekepmunce, bikmunyopura, anggun mining yala nang nirya ara, anggun apu koprop, Yakub birye deibukba dadeipdanin banyak Israel nang nirya ati, laka nyanamlulume.

¹⁴ Ara, na tenepse sum, akunum dam uplyopura, Israel nang sik malye unyak ning ati, wenebuka opnamne. Tonda atalakuk, Isa Mutuku Dongonye si erena ati, Betel mutuku noutam, keil yangapdeibikak ara, dakuka bataknirye, kum kipdeipnamne. Winipnyopura, keil yangapdeibik ning deice tam, dana-dana nirya ara, sirik tam belebuk ning nirya, dakniba tukwak saknamle. Ara, basam sapi kisok tace urasin atonun ning ati nyapne.

¹⁵ Tonda, sik bona weik talin ninye arye, ‘Pia teleb aik unamap’ tenen, buppu li talak, tia bukuka dikdik sen asik domik ning nirya ap, tonda arukna li talak, ‘Uku dam bukibirye, peikda unamap’ tenen, teleb aik domik ning nirya ara, ulubuka bataknamne. Tonda, weik teleb aik domikce, pia dekna weik ning dongolamik ning, delilamik aik nirya ara, ulubuka daklopnamne. Tonda, weik asik domik ning nirya ara, ulubuka atu buklopnamne.” Allah el si Yahweh arye nyabuk.