Amos 2 - Eipomek

¹ Allah Yahweh arye, ayupu ton nyapdeibukba, Amos birye kekebuk. Allah el si Yahweh arye, ayupu nyapdeibuk. Sik Moab mutuku ninye arye, tup-tupa weik arye, malye wininyaka ati, dipkoprob narye, sik amutuku ninye ati, wenebuka opnamne. Sik malye wininyak ning, namin kiamsirye, adiparyuk wenebuka kum omse bukni, wini talak ara, sik malye winin ning weik, winilamak ning ati, Moab ninye weik arye wenebuka opnamne. Aninye ati opnamne ning ara, pia dipkoprob kum bataknamne. Deiyok ara, sik Moab mutuku ninye arye, Edom mutuku ninye deiyok kibuka, taleamuknye akunum, ‘Merekukua bita dibukba, Moab nang arye weibik,’ tenebikce, el anye weiamik ning dakuka batakikce, el yok dobuka, uku dongobikba, uku dibukce, atu dayuk ning ati, na Allah arye, sik Moab mutuku ninye nirya wenebuka opnamne.

² Sikce malye weik winilamik ning ati ara, na Allah arye, uku dopkwetepniba, Moab mutuku ap, Moab ninye ap, uku arye dibuka, sirya daknamle. Tonda, sik mutuku si, Keriot mutuku nang arye, ‘Nun olan ninye arye yanuka opsicak’ tenen, weik keil poka dobuka, antanap dongobik ning nirya ara, uku dopkwetepniba, sikce domik aik nirya, uku arye dibuka, sirya daknamle. Tonda, Moab mutuku unyak ninye ara, talye kanye lamapdongobuka una kumce, malye yupu nyabuka, ngalukunmakibuk, narye sik opnyopura, dipnamake. Ara, yuk ninye arye, sik mutuku yanuka opnamak talak ara, lelim weik arye nyana ap, tonda, cang pong-pong ana, el si ara terompet, lelim arye lak nyapnamle talak dipnamake. Alelim nyan talak ara, mal olana deiyok koubikiba, Moab mutuku ninye ara, alelim kekenamak talak, aniryuk dipnamake.

³ Moab mutuku talibuka, ninye deiyoknye kibuka ulamuknye ap, tonda el amu tam pil deiyok yuk-yuk talibuka, donyak nang ap nirya ara, obuka bataknamne. Sik Raja deiyoknye dipnamle talakuk, el amu tam deiyok nang babye, nirya dipnamake. Allah arye nyapdeibukba, Amos kekebuk.

Yehuda yala ninye arye, malye weik ulamikba, Allah arye wenepnamuk ning ati, nyabuk yupu

⁴ Allah Yahweh arye, ayupu ton dukdongobuka nyabukba, Amos birye kekebuk. “Sik Yehuda yala ninye arye, tuba-tuba weik arye malye wininyaka ati, dipkoprob narye, sik amutuku unyak ninye ati, wenebuka opnamne. Sik malye ulamik ning namin kiamsirye, adiparyuk wenebuka kum omse bukni, wini talak ara, sik malye winin ning weik wininyaka ati, aninye ara, opnamne. Aninye ati opnamne ning ara, pia dipkoprob kum bataknamne. Deiyok ara, sik Yehuda yala ninye ara, na Allah Yahweh arye, ‘Aning wininamlulume. Aning ara, kum wininamlulume,’ nyapdeiamse yupu nirya, batakuka yanilamikce, sikda asum-asum nirya, akunum pia malyeuk wininyake. Narye, nyapdeiamse yupu nirya ara, ‘Nun lik’ tenen, batakanauk ululuma ati, dipkoprob narye wenebuka opnamsine. Ara, talye ati kume. Sik deipkirikdop nang, si erelamik ning kwemdina ap, ninye arye puturubuka delinyak ning anyuk, si erenyaka deice arye, tilila yupu uk kekebuka talinyake. Na Allah arye nyapdeiamse ning ton kum tenekirye, malye winin ninguk tenenyaka ati, Yehuda yala ninye nirya wenebuka opnamne.

⁵ Sikce amalye ning weik winilamika ati, na Allah arye uku dopkwetepniba, Yehuda mutuku ap, amutuku unyak ninye ap, uku arye dibuka sirya daknamle. Tonda, sik Yerusalem mutuku ninye arye, ‘Nun olan ninye arye yanuka opsicak’ tenen, weik keil poka dobuka, antanap dongamik ning nirya ara, uku dopkwetepniba, apoka ap, sikce domik aik nirya ap, uku diplirye, sirya daknamle.” Allah arye nyapdeibukba, Amos kekebuk.

Israel ninye arye, malye weik winilamikba, Allah arye wenepnamuk ning ati, nyabuk yupu

⁶ Allah Yahweh arye, ayupu ton nyapdeibukba, Amos birye kekebuk. Sik Israel yala ninye arye, tuba-tuba weik malye wininyaka ati, dipkoprob narye, sik amutuku ninye ati, wenebuka opnamne. Sik malye winilamik ning ara, namin kiyamsirye, adiparyuk wenebuka kum oplopse bukni, wini talak ara, sik malye winin ning weik wininyaka ati, aninye opnamne. Aninye opnamne ning ara, pia dipkoprob kum bataknamne. Deiyok ara, sik Israel ninye arye, pia diksukumuk unyak ninye ati, ‘E nun kayapu nang anye,’ tenena kumce, ‘Kume, anang ara, nun pil donamsiyaka ati, aninye tapu koubikirye, bobuka sik aik binuka deibipyopura, Pil donamsiyake. Sik dekna ati, sikce dekna weik ning, el si perak arepnamsulume,’ nyabuka bobanyake. Aning wininyaka atonun, aning-aning nirya kum upmale bukni, talye bona utotoa talina kum unyak ninye babye, atonun ubuka, ‘Nun pil talye donamsiyak’ tenen, tapu koubikirye, bobinuka yuk nang ati, ‘Dekenyak ning kum bukni, yan ongona ara, sandaluk arepsumunce, aninye dopropnamlume,’ nyabuka bona utotoa talina kum ninye dekenyake. Yuk nang arye, bona utoto talina kum ninye, akunum dekicopura, ikin pil dinyake.

⁷ Tonda, ninye arye, tuku mikamlye deice yanibuka balamak touk, sik Israel ninye arye, bona utotoa talina kum ninye ati, weik ikin pil dibikiba, pia imun kanye bobuka unyake. Aning atouk, uk dilamliba, mikip kum mitanguk unyak ninye ati, ‘Sik anang ara, awaplye’ tenen, yaniltakakirye, pia kum melinyake. Tonda, sik ni yapu ap, sik mapu arye, tonok wel kil ulamliba, akiluk sik bitinye binuka, dobuka neika marurake. Amalye ning nirya wininyaka deice arye, na Allah malye una kumnye, na si malye kilininyake. Sik malye wininyak ning, yuk ninye ton eibikirye, na Allah ati, “E, el ‘Naʼ tenen, nang ara, pia malye wininyak ninye anya arye, sik ni Allah babye, atonun ulule,” nyabuka, na si malye kibuka yaninyinyake. Malye weik wininyaka anya arye, narye Israel ninye nirya wenepnamne.

⁸ Sik Israel ninye ara, yata talye ning do nirya, aning si erena ati, yuk nang arye, ‘Kam ning obuka, si erenyap ning arenamap’ tenen, pala keil taplakuka, delilamakak nirya ara, aning dam talye kanye bobuka manyake. Tonda, talye ning ati, si eren aik noutam talye-talye mapnin bakce talak ara, ubula dolamik baju deice arye manyake. Ara, yuk ninye ati, uang yo bok tia arebikirye, ‘Ayo bok tamubuka arepnamsiyak’ tenen, “Anggun teleb baju arepsupu ning ara, nun uang yo bok tamubuka arepsumunyopura, abaju tamubuka arenamsiyabe,” nyanyak bukni, dipkoprob tamubuka kum arinyake. Tonda, Allah, na si eren aik noutam, pil donyak talak ara, ubula dolamik uang yo bok deice arye, deklamik anggur mek kwebuka dinyake. Winibuka unyaka deice arye, sikce na Allah ati, si yaniltakaninyake. Allah arye nyapdeibukba, Amos kekebuk.

⁹ Nyabukce, ayupu ton nyabuk. Se anggun Israel ninye arye, nati malye kilinululum bukni, tuba tonap tenipdelulume. Se, na mapu Israel nango. Sik Amori mutuku nang ara, pia weik nang ulamik. Sikda kepyal yo weik arye erebuka palamle atonun, ubuka nelamik nang bukni, narye meilyamsisa deice arye, sik Amori ninye ati, obisiplume. Tonda, pia kat yo, el si terpentin yo atonun ubuka, mikip pia weik ninye ulamik bukni, narye meilyamsisa deice, anggun Israel nang arye, Amori mutuku ninye nirya obisiplume. Aninye nirya obuka batakse ning ara, kum kel biklumce, luba kiplum do? Winipmanto ara, ninye arye, duk moulamle yo, duk nirya dakikirye, yo deiyok wepbikirye, el yating nirya bobikiba, ayo koululamle touk, Amori ninye ara, mikip weik ninye ulamik bukni, narye sik Amori yala ninye nirya oltaklamse. Ara, talye ati kum wamse. Anggun Israel ninye melina ati, winyamsik buk, kum kel bikamlume.

¹⁰ Tonda, anggun Mesir mutuku noutam pia imun kanye bobuka ulalum bukni, naryuk lyebuka dopromsise. Winipsirye, anggun teleb mutuku bana ati, pata mutuku bisik boyanamsise. Ara, keting tamun yupa weik, empat puluh (40) tahun deice arye, mok ap, mek ap kum ati, buppu weik arye ninye kum ulamik mutuku bisik pia kalikuka meliyangalamsisiba, yangalalume. Winilalumba, narye Amori yala ninye, sik talibuka ulamik mutuku dalubuka arelamsiseba, anggun mutuku atonun ubuka, yanuka ulamlume. Aning ara, narye dipkoprob anggun melina ati winilamsise bukni, aning nirya ara, anggunce tenibuka kum kel bikamlume.

¹¹ Tonda, narye melilamsise talak noutam ara, anggun mapu nirya noutam, narye bokdeipsisirye, ton tam nang ara, ‘Allah yupu laka nyana deiyok nang unamak’ tenen, wipdeiamsise. Ton tam kam nang ara, ‘Aminyan winipnamle ning, lak lena deiyok nang, nabi unamak’ tenen, wipdeipnin yangalamsise. Ton tam kam nang ara, ‘Na Allah yupu moubuka kekebikirye, pia diksukumuk irye, na piluk donamniak’ tenen, ereipsirye, kintinip deipnin yangalamse. Anyasinye ning ara, talye nyapsin do? Dipkoprop winilamse do? Israel nang, aning nirya ara, anggunce moubuka tenepmunce, kel bikso. Nara anggun ni Allah Yahweh arye nyapsine. Allah arye nyabukba, Amos kekebuk.

¹² Allah arye ayupu ton nyabuk. Na Allah arye, ‘Na yupu moubuka kekebikirye, pia diksukumuk irye, na piluk donamniak’ tenen, wipdeipsisirye, erepdeipse nang ara, mutuku si Nasir mutuku nang, “Sikda, kanye wangalamak mek dina meme,” nyapse. Bukni, anggun Israel yala ninye arye, na wipdeiamse nang ati, “Sikda, kanye wangalamak mek ara, talye mangkau kibuka diplulume,” nyalalum deice arye, dilamik. Tonda, ‘Aminyan anirye winipnamle ning ap, Allah yupu ap, laka nyan deiyok nang, nabi nang unamak’ tenen, wipdeiamsise nang ara, anggun Israel ninye arye, “Ayupu nirya, nun dam laka nyana meme. Ayupu ara, nun dam kum laka nyalyanganamsulume,” nyabuka yupu seklalumba, ayupu kum nyalamik. Mambul yupu nyapdeiamse ning ara, akunum yaniptaplume.

¹³ Ati wini talak, narye anggun deice ikin ning weik deipsinyopura, aikin ning arye darapdongopsiliba, tuku deiceuk, ganupdongopnalume. Aning atonun, winipmanto ara, kuda basam arye libuka, tuku deice balamle ning, el si ara kereta kuda, gandum pia weik bobuka, aning pum tam, ikin pia weik arye deipmakiba, ikin upliba, aning kum binmanto ulamle touk, narye anggunti wenepsiniba, anggun babye, ikin weik unamlume.

¹⁴ Tonda, bikbik abuka merkabang doplirye balinye babye, adiparyuk kum bikbik abuka binmanto upnamle. Atouk, mikip weik arye ulamik bukni, atalak ara, mikip ulamik ninye babye, mikip kum upnamle. Tonda, mikip weik ulamik yin talin nang babye, kum lyepdanamake. Anggun nirya mikip kum, mitanguk unamlume.

¹⁵ Tonda, mal oldan ati, weik kel nang babye, adiparyuk yin kum dopmanto upnamake. Tonda, minopce bikbik abuka balamak ninye babye, adiparyuk bikbik abuka, kum binmanto upnamake. Tonda, kuda basam balye deice bukuka, bikbik abuka balamak nang babye, bikbik abuka kum binmanto upnamake. Sik nirya ara, ikin weik upliba, lyepdanmanto kum upnamake. Sik nirya ikin ninguk dopropnamake.

¹⁶ Na Allah arye, anggun Israel ninye ati, wenebuka opnamsin talak ara, yin talin nang, pia ilil kum ulul nang nirya babye, sik yin ton pia kum bopnamake. Ara, sik ilil upliba, yin kum bopmaca ati, ‘Se’ tenen, yin batakikirye, imun kanye bobuka, bikbik abuka bindopnamake. Ara, talye ati kume. Narye sik Israel ninye ati, wenepnamsin talak, akunum uplyopura, tonoknye babye ton, malye tenen kum tiknamake. Sik nirya batakuka binamake. Aning nirya ara, dipkoprob na anggun deiyoknye, Allah Yahweh arye nyapsine. Allah arye nyabukba, Amos birye kekebuk.