Amos 1 - Eipomek

Allah el yupu laka nyananye Amos biti, nyabuk yupu

¹ Amos bira, Tekoa mutuku unye ulamuk. Tonda, Amos bira domba weinanye ulamuk. Atalak ara, Israel yala ninye ati, deiyoknye kibuka taleamuknye bira, Yoas el mi Yerobeam ulamuk. Tonda, atalak ara, Yehuda yala ninye ati, deiyoknye kibuka taleamuknye, Raja Uzia ulamuk. Atalak ara, Allah arye, ‘Amos bira, talye domba weinanye ulul bukni, na yupu laka nyalbinamle’ tenen, el yupu nyapdeibukba, Amos kekebuk. Amos birye, ayupu kekebuka, seklamuk talak ara, mutuku lulukna weik ning, min kum lulukamuk talak noutam, Raja Yerobeam ap, Raja Uzia ap arye, ninye deiyok nang kibuka, amutuku noutam ulamik ninye nirya taleamdik. Amos ayupu kekebuk talak arye diprongobuka, keting tamun bitinye tonap, mabik talak noutam ara, Allah arye weik mutuku lulukna arebuk. Arebuk talak arye, ayupu nyapdeibuk talak ara, weik mutuku lulukna min kum dobuk bukni, Allah el yupu laka nyananye Amos, el dam yanuka lak nyapdeibukba, kekebuk. Ara, Israel ninye ati, aminyan talak arye winipnamuk ning ati, ‘Lak nyapnulyame,’ nyabuka, yanuka lak nyabuk.

Israel yala ninye ulamik mutuku tam bukni, talye yuk-yuk daulamik yala ninye ati, Allah arye wenepnamuk ning ati, nyabuk yupu

² Allah el si Yahweh arye, anye el Amos biti nyabuk yupu ara, ani. “Allah Yahweh arye, Sion mutuku deice yalirye, weik yupu nyapnamle. Tonda, Sion mutuku noutam bukni, amutuku kota si ara, Yerusalem mutuku yalirye, el si eren aik pum tam arye, weik yupu nyapliba, aninye nirya kekepnamake. Weik yupu arye, akunum nyaplyopura, mutmuta palamle ning nirya ara, pia teleb ulul bukni, adiparyuk kel-kel abuka, koulupdopnamle. Sik domba basam weina deiyok nang arye, ‘Amutuku ara, teleb mutuku,’ tenelamik ning ara, malye upnamlarya. Tonda, Karmel mutuku palye mutmuta nirya ara, nunuplirye koulupsaknamle,” nyalamuk.

Allah arye, Israel yala ninye unyak mutuku noutam bukni, dana-dana weik asik dobuka unyak ninye ati, wenepnamla ati, nyabuk yupu

³ Allah el si Yahweh arye, nyabuk. “Sik Damsyik mutuku ninye arye, tuba-tuba weik malye wininyaka ati, dipkoprob narye, sik amutuku ninye nirya ati, wenebuka opnamne. Anggunti bico tenenuna anya arye, sik malye winin ning, weik winilamik ning ara, minop talak arye, adiparyuk wenebuka kum omse. Bukni, sik Damsyik mutuku ninye aryuk, Gilead mutuku ninye ati, weik yu upliba, weik arye onyake. Winipmanto ara, ninye arye, ‘Gandum duk kwapnamak’ tenen, ikin ning dobuka, gandum duk deice deibikirye, teiklamak touk, sik Damsyik ninye arye, ‘Naʼ tenen, ninye, Geleat mutuku noutam unyak ninye ati, ikin ning weik, sik nong deice delinyake. Ati, na Allah arye Damsyik mutuku unyak ninye nirya ati, wenebuka opnamne. Aning kum bataknamne,” nyabuk.

⁴ Nyabukopura, ayupu ton nyabuk. “Aning ara, na Allah arye, sik deiyoknye Raja Hazael, el weik aik ulyak ap, el aik neika unyak nang ap, sik deice uku dopkwetepnamne. Tonda ninye deiyoknye, Raja Benhadad birye, ‘Nun mal olan nang arye yanuka opsicak’ tenen, weik keil poka dobuka antanapdongamik ning nirya ara, uku dopkwetepniba, elce domuk aik nirya dipnamle.

⁵ Tonda, Damsyik mutuku wekelban bisik bublan dam, kat ning el si besi beton arye, kintinibuka deiamik ning nirya ara, narye ulubuka bataknamne. Winipnyopura, amutuku arye dipdongobuka opnin banirye, mutuku si Awen mutuku tam nirya, obuka sirya dakdanamne. Aninye nirya opnamnarya. Tonda, mutuku si Bet-Eden mutuku noutam, ninye deiyok kibuka bululnye bira, opnamne. Tonda, mutuku si Siria mutuku unyak ninye babye, obuka wenepnirye, pera mutuku si, Kir mutuku nang arepneba, Kir mutuku bobikirye, wenen aik noutam binuka dipnamake. Nara, Allah Yahweh arye nyapdeipkine,” nyabukba, Amos birye kekebuk.

Pilistin ninye arye, malye winin ning weik winilamikba, Allah arye wenepnamuk ning ati, nyabuk yupu

⁶ Allah el si Yahweh arye, ayupu ton nyabuk. “Sik Gasa mutuku ninye arye, tup-tupa weik arye malye wininyaka ati, dipkoprob narye, sik amutuku ninye ati, wenebuka opnamne. Sik malye winilamik ning ara, namin kiamsirye adiparyuk wenebuka kum omse bukni, wini talak ara, sik malye winin ning weik, wininyaka ati, aninye wenebuka opnamne. Aninye ati opnamne ning ara, pia dipkoprob kum bataknamne. Deiyok ara, sik Gasa ninye ara, ‘Naʼ tenen, ninye, sirya obikce, tapu koubuka boyanamikce, bobuka yuk ninye dam, uang yo bok deklamik. Abobinamik nang ara, sik Edom mutuku nang ati, ‘Anang obuka, sirya dakupurye boyapu nang ara, deksululume,’ nyabikba, Edom mutuku ninye arye, ‘Naʼ tenen, ninye ati, deklamik. Akunum Edom mutuku nang arye dekikopura, sik pil dona ati bobuka, sik mutuku bobinamika ati, sik Pilistin yala ninye nirya wenebuka opnamne.

⁷ Sikce winilamik ning ati, na Allah arye, uku dopkwetepniba, Gasa mutuku keil poka dobuka, unyaka deiyok ara, uku dibuka sirya daknamle. Tonda, sik Gasa mutuku nang arye, ‘Nun oldan ninye yanuka opsicak’ tenen, weik keil poka dobuka antanap dongamik ning nirya ara, uku dopkwetepniba, sikce domik aik nirya, uku dipnamle.

⁸ Tonda, mutuku si Asdod mutuku unyak ninye ap, mutuku si Askelon mutuku deiyoknye ap, sik mapu nirya ara, narye obuka sirya daknamnarya. Aning akunum winipnyopura, mutuku si Ekron mutuku ninye ara, dobuka yukak dopkwetepnamne. Winipnirye ninye babye, wenebuka opnamne. Opnyopura, sik Pilistin nang ton, tuba bataknamne. Winipniba, ton tuba aunamak ninye nirya, obuka kum kipdeipnamne. Nara, Allah Yahweh, Weik Erena Deiyoknye arye nyapsine,” nyapdeibukba, Amos birye kekebuk.

Mutuku si Tirus mutuku ninye ara, malye weik winilamikba, Allah arye wenepnamuk ning ati, nyabuk yupu

⁹ Allah el si Yahweh arye, ayupu ton nyabuk. Sik Tirus mutuku nang arye, tup-tupa weik malye wininyaka ati, dipkoprob narye, sik amutuku ninye ati, wenebuka opnamne. Minop talak, sik malye winilamik ning ara, namin kiamsirye, minopce wenebuka kum omse bukni, wini talak ara, sik malye winin ning weik wininyaka ati, aninye nirya opnamne. Aninye opnamne ning ara, pia dipkoprob kum bataknamne. Deiyok ara, sik Tirus mutuku ninye arye, ‘Naʼ tenen, ninye, Israel nang ati, tapu koubukabikce, aninye dobukabikce, yuk pera mutuku nang dam, uang yo bok deklamik. Adeklamik nang ara, sik Edom mutuku nang ati, “Tapu koubuka, boyanmap ninye deksululume,” nyalamikba, deklamika ati, adeice arye, sik Tirus mutuku ninye arye, sik Israel ninye ati, “E, nun kayapu, sik Israel ninye ap, nun ap, olana kumce, teleb ubuka neika unamabe,” nyabuka, akunum nyalina yupu nyapdeiamik ani, sik Tirus ninye arye, ayupu batakika ati, aninye nirya wenebuka opnamne.

¹⁰ Sikce amalye weik winilamik ning ati, na Allah arye, uku dopkwetepniba, Tirus mutuku keil poka dobuka, unyaka deiyok ara, uku arye dibuka, sirya daknamle. Tonda, sik Tirus mutuku nang arye, ‘Nun mal olan nang yanuka opsicak’ tenen, weik keil poka dobuka, antanap dongoplum ning nirya ap, tonda sikce domik aik nirya ara, uku dopkwetepniba, uku arye dipnamle.

Edom mutuku ninye arye, malye weik winilamikba, Allah arye wenepnamuk ning ati, nyabuk yupu

¹¹ Allah el si Yahweh arye, ayupu nyabuk. Sik Edom mutuku ninye arye, tuba-tuba weik arye malye wininyaka ati, dipkoprob narye, sik amutuku ninye ati, wenebuka opnamne. Minop talak, sik malye winilamik ning ara, namin kiamsirye, minopce wenebuka kum oplopse bukni, wini talak ara, sik malye winin ning weik wininyaka ati, aninye opnamne. Aninye ati opnamne ning ara, pia dipkoprob kum bataknamne. Deiyok ara, sik Edom mutuku ninye arye, sik mining yala nang, na mapu Israel nang, weik arye olamika ati, kwang dakuka opnamne. Ara, sik kayapu koprop ati, bico tenena kum arye, Israel ninye atibuk mal pilamikce olamika ati, sik Edom ninye wenebuka opnamne. Edom nang arye Israel ninye ati, kum namin kilamikce, pia yu ulamukba, tuba-tuba tenipna arye, olyangalamik ning ati, opnamne.

¹² Sikce amalye weik winilamik ning ati ara, na Allah arye, uku dopkwetepniba, Teman mutuku asik ap, amutuku unyak ninye ap, uku arye dibuka sirya daknamle. Tonda, sik Bosra mutuku nang arye, ‘Nun olan ninye yanuka opsicak’ tenen, weik keil poka dobuka antanap dongamik ning nirya ap, sikce domik aik nirya ap, uku dopkwetepniba, uku arye dipnamle. Allah arye nyabuk.

Amon mutuku ninye arye, malye weik winilamikba, Allah arye wenepnamuk ning ati, nyabuk yupu

¹³ Allah el si Yahweh arye, ayupu ton nyabuk. “Sik Amon mutuku ninye ara, tuba-tuba weik arye malye unyaka ati, dipkoprob narye, sik amutuku ninye ati, wenebuka opnamne. Minop talak, sik malye ning ara, luba kiyamsirye, adiparyuk kum wenebuka oplopse bukni, wini talak ara, sik malye winin ning weik winilamik ning ati, aninye opnamne. Aninye ati, opnamne ning ara, pia dipkoprob kum bataknamne. Deiyok ara, sik Amon mutuku ninye arye, ‘Nun dem aryuk, amutuku nirya lo weik arye talinamabe,’ tenelamikce, mal olan talak ara, sikce Gilead mutuku ulamik kilapu, mi bomna kipman ap, mi moum dilamne mapu ap, nirya obuka bataklamika ati, kwang dakuka opnamne.

¹⁴ Ati, na Allah arye, mutuku si Raba mutuku poka domika ap, weik cang poka dobuka antanap dongobik ning ap, uku dopkwetepniba, diplirye kum danamle. Tonda, sik Raba mutuku nang arye, ‘Nun olan ninye arye yanuka opsicak’ tenen, weik keil poka dobuka, antanap dongamik ning nirya ara, uku dopkwetepniba, sikce domik aik nirya, uku arye dipnamle. Winibuka aninye opnamne talak ara, mal olan talak, weik lelim nyalamle touk, nyanmaliba kekepnamake. Tonda, mal olan talak ara, like tonok uku buk dingaplirye, dilamle touk winipnamle. Tonda, weik kumanya mikip arye dopliba, aik ap, aning-aning nirya ap, ulubuka, sirya daklamle touk winipnamle.

¹⁵ Winipnyopura, amutuku noutam, ninye deiyok kibuka talinyak nang Raja-Raja nirya ap, tonda, sik amu tam weik pil deiyok yuk-yuk talibuka, donyak nang nirya ara, dopropnirye, yuk mutuku ninye arepneba, tapu koubikirye, yuk mutuku delilbinamake. Nara, Allah Yahweh arye nyapsine,” nyabuka Amos dam nyabukba, Amos birye kekebuk.