3 Yohanes 1 - Eipomek

Yohanes arye, ‘Telebe’ nyana ati, nyabuk yupu

¹ Nara, an deiyoknye Yohanes arye, na ka Gaius ati, yupu seknukine. Allah el yupu dib tenebuka talinirye, anti kanye delikunune.

² Na kwito, Allah diba tenepluma ati, an talima ap, an kanye ap, teleb-teleb kibuka ukilye touk, ‘An nong babye, kipe lopdop asa uminyeura, aning-aning nirya, teleb kibuka wininamlyam’ tenen, Allah moronauk unune.

³ Allah diba tenena ati, nun ap, du weit atonun unyak nang arye, an ulalum ning ati yanuka laka nyapnike. Sikce nyapnik. “Gaius bira, Allah el dipkoprop yupu pia batakna kumce, talinauk ulule. Tonda, Allah yupu nyasilye touk, Gaius moubuka kekelirye, aninguk talibuka telebuk ulule,” nyabuka anti nyapnikba, na weik kanye deipkise.

⁴ Na Yohanes arye, peterelamsibuk, diba tenebik ninye ati, “Aninye ara, Allah yupu nyasilye touk, moubuka kekenyakce, pia teleb ubuka unyake,” yuk nang arye, nyapkikbuk kekenun ara, pia kanye teleb delinune. Yuk teleb kanye delinun ning ara, mitikuka. Weik ning ara, atonoka.

⁵ Na kweito, na kanye delikunune. Ara, sik diba tenebikce, nun du weit atonun unyak nang ara, an ton minopce kum elilyame. Tonda, anang kum kel kiyamlum bukni, sik anang melina ati, batakna kumce, pil tuba dominya ara, telebuk winilyame.

⁶ Ance sikti, bico tenebuka melilamlum ning ara, sikce yuk Allah diba tenebik nang nirya ati, laka nyakinyake. Allah el bidamnye, nun unyabak yasutu ura, meliptibye touk, anang babye ati, teleb ubuka melipmince, sik binamak ak, “Telebe, dabilulume,” nyabuka, melibuka dokwetepminyopura, aning ara telebuka. Yuk diba tenen, nang melipminyopura, ara mitik anun Allah el bidamnye ati melina atouk winilyama ati nyapkine.

⁷ Diba tenena kum ninye arye, anang ati kum melilamikbuk, ‘Yesus el si deice arye pil donamap’ tenen, sik mutuku koprop batakuka, Yesus el ninye lyena ati, laka teleb yupu peterelbana ati, yuk mutuku pil dopra balamika ani, tuba apiluk dopra banyake.

⁸ Aning ati ara, ‘Aning nirya nun ap, arye, ansinibuka pil melibuka doptibnyopura, yuk ninye babye ton, Allah el dipkoprop yupu kekepnamak,’ tenena ati, ato nang melinamabe. Anang ara, sik pataplye ning nirya ati, melinauk unamabe. Ara, din ning do, aik manak do, aning nirya ati, melinauk unamabe.

⁹ Ara, yuk ning ton nyapnune. ‘Anggun Allah diba tenelulum ninye nirya kekepnamlum’ tenen, surat sekeipsise bukni, tonoknye el si Diotrepes ara, yuk nang arye nati, ‘Elda pia weiknye ulule tenepnamniake’ tenen, pia patalibuk, nun yupu kum kekesulule. Elce nunti, ‘Sik yuk,’ tenesulule.

¹⁰ Aning ati ara, narye an dam yatinye do, el Diotrepes ati, “El ulul ning nirya ani,” nyabuka lak akarye nyapnamne. Ara, elce nunti, ‘Yuk nang arye Yohanes ap, el mapu silip ap ati, malye tenepnamak’ tenen, elce yu ubuka, minina yupu nyasulula ati, nyapkine. Tonda, aninguk kume. Diotrepes arye, nun du weit atonun unyap ninye ati, “Telebe,” nyabuka, pia kum yuk ululce, tonda pia kum melisulule. “Na kume, Yesus diba tenenyak ninye ara, narye kum melinamne,” nyalule. Tonda, yuk nang arye, ‘Kume, anang ara, nun du weit atonun unyaka anya arye, nuncuk, “Telebe,” nyabuka melipnamabe,’ tenenyak nang ati ara, Diotrepes arye, ‘Na mutuku nang arye, yukubicak’ tenen, “Anggun bataklulume,” nyabuka yupu sekelongolule. Winilirye, “Allah yupu aik tonap, kum wekenamlulume,” nyabuka, nunti melipmanto unyak nang ati, batakalulce yupu sekelule.

¹¹ Na kwit Gaiuso, malye winin ning ara dipdemince, leibuka yukak unamlyame. Malye winin nang arye winilamak touk, anda pia kum wininamlyame. Malye winin ning kum bukni, teleb winin ninguk eibuka aninguk wininamlyame. Yata nang do nirya, teleb ubuka funguk wininyak ninye ara, Allah ap, ansinibuka unyakce, Allah el mapu unyake. Sik malye-malye wininyak ninye ara, Allah ati moubuka kum kel kiyamika ati, el winilul ning moubuka kum tenenyake. Tonda, diba kum tenenyake, nyapne.

¹² Yuk ning ton nyapnune. Yuk ninye nirya arye, nun kwit Demetrius ati, “Elda telebuk ulule,” nyabuka nyanyake. Tonda, Allah yupu nyasilye touk ululnye anya arye, Allah yupu deice arye ton, ‘Demetrius bira, telebuk ulule,’ tenenyabe. Atouk ton, nun babye, elti, “Telebuk winilule,” nyanyabe. Aning ara, talye kum nyanyabe. Tonda, anggun kele, nunce nyalamap yupu nirya ara, dipkopropuk nyanyabe.

¹³ Ara, yupu weik tonun aupmanila ara, surat jang ning arye seksitinye bukni, kertas ap, sekna ning tinta bolpen ap, deice arye sekuka kum nyapnusine.

¹⁴ Deiyok ara, ani. ‘Anggun dam yanirye, sik nong ton eipnamsine,’ tenebuka patanulul ati, anggun dam yanamne talak ara, neika bukibirye yupu sisikinamabe.

¹⁵ Ati akunuma, ‘Anggunda teleb kanyeuk bonamlulume’ tenen, Allah morosunune. Anggun kayapu, na dam amutuku unyak ninye arye, anggunti, “Telebe,” nyasinyake. Tonda, anggun dam unyak nang, nun kayapu, anggun mutuku noutamak unyak ninye ati, anggun si yuk-yuk sisibuka, “Yohanes arye, anggunti telebe nyapsile,” nyabuka anang ati nyapdeipnamsilyame. Telebe na Yohanes arye akunum nyapne.