2 Yohanes 1 - Eipomek

Asurat deiyok kouna ati, nyabuk yupu

¹ Na anggun deiyoknye birye, anggunti ayupu seksine. Anggunda Allah arye, melyamsukba, diba tenebuka, Allah yupu aik, neika wekelulum nang nirya babye, anggun diba tenelulum nang babye ati, ayupu seksine. Na ni Allah, el dipkoprop yupu talibuka unirye, kanye delisunune. Tonda, yuk mutuku nang bukni, Allah nyasulul yupu, el dipkoprop yupu ati, kanye delinyak nang nirya arye, anggunti bico tenenyake.

² Allah el dipkoprop yupu diba tenebuka talimunya arye, el yupu, nun talima noutam tuba usulule. Usilye ati, el yupu diba tenebuka, pia talinauk ulamibyopura, el yupu nun talima ak pia unamsile. Anggunti kanye delina ara, naryuk kume. Aning ati, anggunti kanye delina ara, na babye, ninye mutuku-mutuku nirya babye, Allah yupu diba tenebuka talinyak ninye nirya babye, nun nirya arye sikti, kanye delinyabe.

³ Nun teleb ubuka ubya deice arye, kum melisulul bukni, Allah el kanye aryuk bico tenepsilirye, talye melisulule. Winisilirye, nun kanye imun ning ap, nun patalamsilye ning nirya ap, disulula ati, aning nirya patapsilye touk, bico tenebuka melisulule. Anirya winisulula deice arye, nun ap, yuk nang ap, Allah el bidamnye ap, malye kanye bona kumce, teleb ubuka ansinibuka unyabe. Anyapman ning nirya ara, nun ni Allah ap, el Mi Koprop Yesus Kristus ap, arye pia arisururake. Aripsirikceura, dopropbibirye teleb ubuka diksukumuk una ap, bico tenebuka melilana ap arye, unamabe.

⁴ Yuk nang arye, anggunti nyapnike. “Nun ni Allah arye, ‘Wininamlulume,’ nyapsuk touk, anang nirya kum bukni, anggun kan-kan noutam arye, ton ninye ara, Allah el dipkoprop yupu kekebuka diksukumuk unyake,” nyapnike. Nyapnikba, kekepsa ati, na kanye pia teleb deipse.

⁵ Winira, yuk yupu ton nyapnune. Anggun diba tenelulum ninye ati kanye delisunune. “Wininamlulume,” nyabuka seknusin yupu ara, winiryuk ning kume. Nun nirya diba tenebupu talak arye, anoutam talak nirya, ayupu akunum kekenyabe. Ayupu ara ani. Nun nirya arye, bico tenebuka melilanauk unamabe nyapne.

⁶ Ara, bico tenebuka melilanauk unamap nyapman ning ara, ani. Yatato una do, kume. Ara, Allah arye, “Wininamlulume,” nyapsuk yupu nirya kekebuka dobolbanauk unamabe. Yuk ton kume. Allah arye, “Wininamlulume,” nyasulul yupu ara, aninguk ulule. Ati, anggun diba teneplum talak arye kekelamlum touk, wini talak tuba anggun nirya arye, bico tenebuka melilanauk unamlulume.

⁷ Tilila yupu nyanyak nang weik akunum mutuku-mutuku nirya peterelbanyake. ‘Sikce tilila yupu diba tenebikirye, talye bisik dobolyanganamsiak’ tenen, peterelbanyake. Tonda anang arye, ‘Yesus Kristus ninye nong atonun ubuka akunum yayuke’ tenen, diba kum tenenyake. Ati ayupu diba tenebuka kum peterenyake. Anang ulamak ning atonun wininyak nang nirya ara, sikda tilila nang unyake. Ton, ‘Yesus Kristus ap, el ulul ning nirya ap, bisiptibye’ tenen, unyake, nyapne.

⁸ Ati anggun nirya kanye moupnamlulume. Anggunce teleb pil dadolamunyeura, Allah arye, ‘Menenga ning arepnamsile,’ tenebuk ning ap, kanye deibuka erepdeipsilirye, im deice teleb ning arepnamsil ning ap ara, ‘Kum dasilyak’ tenen, anggun nirya moupnamlulume. Ara, ‘Allah arye, tenyamuk ning nirya arepnamsil’ tenen, pia mouplulume, nyapsine.

⁹ Yata nang do, nirya, sikce, Yesus Kristus elce peterelamuk yupu batakuka, elce kum peterelamuk ning bukni, yuk talye yupu dukdongobuka peterenyak ninye nirya ara, Allah sik talima ak kum ulule. Aning kumopura, yata nang do, nirya, Kristus peterelamuk yupu uk talibuka, dobolbanyak ninye nirya ara, nun ni Allah ap, el Mi Koprop Yesus ap, anggun talima ak ururake, nyapne.

¹⁰ Yata nang do, nirya, Kristus peterelamuk yupu kum bukni, sik bidamnang tenenyak ning talibuka, anggun dam peterelyakcopura, anang ati, “Telebe, nun aik neika bukuka, kwaning dinamabe,” nyabuka kum yukunamlulume. Atilila nang yupu talibuka, anggun ap, anggun aik kopropa ap kum wekenamlulume.

¹¹ Ara, atilila yupu peterenyak nang ati, “E, na ka telebe, neika buknuname,” nyabuka, yukulolulnye bira, ayupu nyabuka melibuka ulya deice arye, elce ton, atilila peteren nang ap, ansinibuka malye pil donyaka ati, nyapne.

¹² Ura, narye anggunti, yupu weik anun ton seksitinye bukni, kertas ap, sekna ning ap deice arye, sekuka kum nyapnusine. Aning kume, nara, ‘Se, winipnamne,’ tenenun ara, nyanune. Ara, ‘Sik ap, na ap, nun kanye pia deipdatibye’ tenen, ‘Uruna ati, na yanyopura, mening dam aulamtibirye, yupu sisikilalamtibye,’ tenenune. ‘Winiptinyopura, kanye pia deipdatibye,’ tenenune.

¹³ Ati asukumuk deipne. Allah arye, melyamsukba, Allah diba tenebuka, amutuku ubirye, el yupu kekenyap nang, nunce anggun nirya ati, telebe nyapsiabe. Nunce anggunti, ‘Nun weitcapu atouk unyake,’ tenesinyabe. Telebe, na Yohanes arye akunum nyapne.