2 Timotius 4 - Eipomek

Allah arye, ‘Na pil donamnil,’ tenyamkuk pil nirya ara, “Dolaminya ani, sirya daknamlyame,” nyabuka, Paulus arye Timotius ati, nyabuk yupu

¹ Winira, na mi Timotiuso, Allah ap, Yesus Kristus ap, sik bitinye arye dinmasirakbuk, ayupu nyapnukin ati, kanye moupnamlyame. Yesus Kristus arye, sik akunum diamikce ninye babye, el yanamle talak tuba kam unyak ninye babye, yupu bokeipnamsile. Tonda, el ila tamubuka tonap, lak yalirye, aning-aning nirya talibuka, weik deiyoknye unamsila ati ara, ayupu talye kekeltakana kume. Dipkoprop adiparyuk wininamlyame.

² Ara, yuk ninye arye kanye deibuka, “Peterepsilyame,” nyanyak talak babye, lik uplibuk, “Peterena nun lik,” nyanyak talak babye, anda, ‘Yata tenepnuniak do?’ tenena kum arye, ‘Allah yupu peterepnaman’ tenen, kintinilinauk unamlame. Malye upmakce talak ara, ance, “Aning bataklulume, teleb una ara, ani,” nyabuka lipsisikuka peterenamlyame. Tuba malye unyak ninye ati, “Aning ara, meme. Bataklulume,” nyabuka, yupu sekenamlyame. Teleb akunum wininyak nang ati, “E, aning ara, telebe, aning ara, pia atonun wininamlulume,” nyabuka, sik kanye moulinamlyame. Anyapmakin pil donamlam talak nirya noutam arye, pia moubuka tenepmince, Allah el yupu nyasilye touk, teleb ubuka peterenamlyame. Tonda, aninye nirya ati, minopce wana ap, lik una ap kum bukni, nimalye aryuk peterenamlyame.

³ “Wininalyame,” nyapmakina ara, talye ati kum nyapkine. Deiyok ara, aminyan talak ara, ninye nirya arye, ‘Allah yupu nyasilye touk nun lik’ tenen, diksukum peteren yupu kum kekepnamake. Peteren yupu dipkoprop kum bukni, ‘Nun kanye delinyap ning ap, nun patapsilye ning ap, aninguk peterepnamsiak’ tenen, “Buluplulume,” nyabikibuk, peteren nang talye-talye nanguk bulupnamake. Bulubikibuk, aninye arye, sik talye yupu peteren nang ati, “Nunce nyabipye ning uk, peterepsululume,” nyabuka moronyak yupu uk, sik talye peteren nang arye aninguk peterepnamake. Dipkoprop Allah yupu nyalye touk kum peterenamake.

⁴ Aninye nirya arye, Allah el dipkoprop yupu nyasilye touk pataplibuk, kum kekepnamake. “Aning ara, nun lik ati, nun like,” nyabikirye, talye-talye nyanyak yupu, nong kum upnamle yupu uk kekepnamake.

⁵ Sikda wininamak bukni, Timotius anuk ara, kanye teniltona ap, kanye walwal una ap, kum unamlyame. Sirya talak nirya ara, kanye moupmince, moubuka tenenamlyame. Ikin ning weik aupkilya babye, batakna kum arye, pia pi dobuka pil donamlyame. Allah yupu min kum kekelamik ninye ara, ‘Sik ton kekeptinge’ tenen, Allah el ninye lyen yupu laka peterelbanauk unamlyame. Allah arye areamkuk pil nirya ara, tonok ning babye, batakna kum arye, sirya dakanamlyame.

⁶ Ayupu nyapmakina ara, talye ati kum nyapkine. Deiyok ara, ani. Yahudi yala ninye arye, Allah el si erena ati, kam ning obuka arilyamik talak bukni, sirya dakana ati, anggur mek ton dobuka, aning deice dikilongolamik touk, na wininune. Ara, Allah tenyamnuk touk, pil dopra balamsa ani, sirya dakna talak dam upnila anya arye, na dipnamne talak dam upnile.

⁷ Ara, sik yin talin nang arye, batakna kum aniryuk, malye nang ati olbalamikirye, malye kibuka batakalamak touk, akunum winilamse. Tonda, bik-bik nyan nang arye, ‘Dekni ning dopdopnuyap’ tenen, batakna kum, pi deipnarye piribuka bik-bik abuka balamak touk, akunum winilamse. Anyapmakin yupu nong ara, Allah ap, el yupu ap, ati, diba tenyamse ning ara, kum bataklamsirye, pia moubuka tuba talinune. Allah areamnuk pil ara, akunum dobuka sirya daknin banmane.

⁸ Winibuka ulamsa ani, wini talak babye, tuba wininune anya arye, Allah arye dekna ning kintinibuka ara, dipkoprop dopropnamne. Ara, Yesus arye ninye mutuku-mutuku nirya ati, yupu bokeipnamsil sum ara, pia diksukum yupu bokolina deiyoknye Allah arye nati, malye ning nirya kilipnilirye, pia diksukumnye kipnamnile. Dekna ning dopropnamne ara, aninguka. Pia teleb updeipnamnil ara, nauk ati kume. Aning kum bukni, yata nang do nirya, ‘Se, nun Deiyoknye Yesus arye, ila tamubuka tonap, tukwak mutuku tamubuka yasutue’ tenen, buku sukubuka, kintinibuka dinauk unyak nang nirya ati, dekni ning arepnamsil ning ara, diksukum kili sal daneipnamsile. Na Paulus arye nyapkine.

Asurat sirya dakana ati, nyabuk yupu

⁹ Winira Timotiuso, ‘Paulus dam minop binun’ tenen, pia piripdenamlyame.

¹⁰ Deiyok ara, na melipnuknye Demas ara, talye tukwak mutuku ulul ning nirya ati, ‘Aning ara ilil ulul. Na doproptinye’ tenen, kanye engelamuka ati, akunum bataknukce, Tesalonika mutuku biyuk. Kereskes ara, Galatia tam biyuk touk, Titus ara, Dalmatia mutuku akunum biyuk.

¹¹ Ati, na melinanye, tonoknye Lukas ap unyame. Ati, Timotiuso, ance na dam yanamlam talak ara, Markus dobuka boyanamnilyame. Allah el pil donye talak ara, Markus arye teleb ubuka melinulula ati nyapkine.

¹² Na kwit Tikikus ara, Efesus mutuku dopkwetepse.

¹³ Ura, Teroas mutuku noutam na ka Karpus ap, neika ulamnumu talak ara, na deice ongon cang bupu baju, el si jaket luba kipsirye, batakse. Timotius ance na dam yanamlam talak ara, aongon cang baju ap, na buku ap, surat ap, libuka boyanamnilyame. Na batakse buku-buku nirya boyanamnilam bukni, ‘Weik mambul,’ tenenye ning ara, kam uning obukabikce, bola koplobuka ketingak mikikbuk, sisal lebukura, abola deice Allah yupu sekik ning ara, luba kina kume. Aning babye, boyanamnilyame.

¹⁴ Ura, yuk yupu nyapnukine. Tonoknye el si ara, Aleksander ara, kat ning tembaga dobuka, aning-aning memelulnye birye, ikin ning pia weik arye, na nong deice delilamnuke. Elce nati, kanye imun ning weik areamnuke. Ati ara, Allah arye anye bira, kwa dibuka wenena ati, kanye imun ning weik arenamle.

¹⁵ Nunce Allah yupu peterelamubu ning ati, mikip arye yupu seklamsukce, yanilamsuka anya arye, Timotius ance, ‘Anye bira malye upnilyak’ tenen, kanye moubuka kalikdanalyame.

¹⁶ “Paulus malye winibuk ning ani,” nyabuka, ‘Yupu bokeipnamap’ tenen, yu nang arye na dobuka, yupu bokolina deiyok nang dam bobinik talak, minopce aning ara, na yupu melina ati, tonoknye babye, yupu nyabuka kum melipnuke. Sik nirya arye na batakuka bindopnik. Winipnik bukni, ‘Allah arye aninye na bataknik ning ati, kum weneplirye, talye namin kipnamle’ tenen, Allah moronune.

¹⁷ Anang nirya bataknik bukni, nun deiyoknye Yesus, na dam yanuka melipnuka deice arye, el mikip arepnukbuk, na yupu teleb ubuka nyapse deice arye, atalak bulupmek Yahudi yala kum ninye nirya arye, Allah el ninye lyen yupu kekebik. Atalak ara, aninye arye talye merekukua oplopmanitinge. Bukni, Yesus arye lobuka lyepnuka ati, sikce kum opnike.

¹⁸ Atalak arye melipnuk touk, aminyan yanamle talak noutam nirya ara, malye ninye arye nati, ‘Paulus optibye,’ tenepniting bukni, na kele, nun Deiyoknye Yesus arye lyepnamnile. Winibuka ulamnilya ani, aminyan talak ara, elce aning-aning nirya talibuka, weik deiyoknye unamlak ara, teleb ubuka dopdopnilirye, im deice bobinamnile. ‘Ninye mutuku-mutuku nirya arye, el Yesus ati, el si erebuka el si pia erenamak’ tenen, patanulule. Anyapman touk, ‘Winipting’ tenen, “Amin,” nyapne.

“Na kayapu ati, ‘Telebe nyapmasile,’ nyabuka nyapdeipnamlyame,” nyabuk yupu

¹⁹ Na mi Timotiuso, na kayapu Akwila ap, el kil Pereskila ap, na ka Onesiporus ap, el asik nang nirya ap, ati, “Paulus arye telebe nyapmasile,” nyabuka lak nyapdeipnamnalyame.

²⁰ Nun kwit Erastus ara, Korintus mutuku tuba unmale. Tonda, Miletus mutuku binumu talak ara, na ka Teropimus, uk dibukura, elda asukumuk batakuka bise.

²¹ Timotiuso, arukna wala li upnamle dam akunum ubuka ati, aning min kum upmalye talak, ‘Minop na laka nyalyanutume’ tenen, moropkine. Na ap, unyak ninye arye anti, “Telebe,” nyalikinyake. Sikda, Ebulus ap, Pudes ap, Linus ap, Kelaudia ap, amutuku diba tenenyak nang nirya ap ati, narye nyapkine.

²² Nun Deiyoknye Yesus ap, an ap, talima dukdongobuka neika unamkil talak noutam, ‘Melinamkil’ tenen, Allah morokunune. Tonda, ‘Allah el kanye aryuk bico tenekilirye, talye melinamkile,’ tenen, Allah morokunune. Telebe, na Paulus arye nyapkine. Asukum anyuk deipkine.