2 Timotius 3 - Eipomek

“Sirya talak ara, ninye mutuku-mutuku nirya arye, Allah batakuka, pia malye weik winipnin banamake,” nyabuk yupu

¹ Timotiuso, anyapnukin yupu ara, moubuka tenenamlyame. Tukwak mutuku nirya kum upnamle ati, sirya daknamle talak ara, kanye imun ning weik unamle.

² Ninye mutuku-mutuku nirya arye pia malye wininamak ning ara, nyapnukine. Ara, sik bidamnye arye, sik bidamnye ati tenenauk unamake. Yuk nang ati bico tenebuka kum melinamake. Tonda, ‘Yo bok weika arye doproptibye’ tenen, kanye engeplibuk, unamake. Aninye nirya arye, “Nunda pia teleb nang,” nyabuka kanye erena ap, sik babye kanye aryuk erepdeipdakirye, dilana ap, yuk nang ati yu uplirye, sik nong deice malye yupu nyabuka delinamake. Winibikirye, sik ni yapu ap, sik nin yapu ap, nyanyak yupu ati, yanibuka kum kekepnamake. Tonda, yuk nang arye teleb kipdeipsikibuk, anang arye, “Telebe,” nyabuka, kina kum unamsiake. Allah winilul ning nirya ati, ‘Nun lik’ tenen, pia malyeuk wininamake.

³ Yuk nang nirya ati, bico tenebuka kum melinamake. Yuk nang arye malye usikce ning ati, ‘Dauplye’ tenen, luba kina kum arye, pia tenenauk unamake. Yuk nang arye, ton nang ati, ‘Malye nang, tenepnamak’ tenen, tilila yupu bukni, “Anang arye malye wininyak ning ara, ani,” nyabuka minilanauk unamake. Tonda anang arye, ‘Malye upnun do?’ tenen, kanye moubuka tenena pia kum arye, sik tenenyak ning nirya, talye parapkabuka wininamake. Sikce yuk nang ati, yu weik uplibuk, onauk unamake. Teleb un ning aning-aning nirya ati ara, ‘Nun lik’ tenen, batakanamake.

⁴ Anang arye yuk nang ati, tenepce arye teleb yupu yukuna ati, talye nyanamak bukni, aminyan ara, anang deice ikin ning delinamake. Tonda, sik winipnamak ning ati, ‘Winipnyopura, aminyan talak yata winipnamnil do?’ tenena kum aniryuk, ‘Talya parapkabuka winipnune,’ tenebuka malyeuk wininamake. Sirya talak unamak ninye arye, sik bidamnye ati, ‘Nunda pia teleb nang, nunuk ara, pia mambul’ tenen, sik kanye erelilanamake. Anang arye, Allah el winilul ning ap, Allah el ap, ati, kanye kum deipnamak bukni, sik patan ning atibuk, ‘Kanye deibuka talye-talyeuk unamap’ tenebuka malye wininamake.

⁵ Allah el si erena ap, elti, kina ap, ati ara, talye nong bol deice ninguk unamak bukni, sik kanye noutamak ara, ‘Allah el yupu ap, el winilul ning ap, atonun winiptibya babye, anirya deice arye, el mikip weksuturye, mikip kum keipsutue’ tenen, wininamake. ‘Allah el mikip ara, kum ulula anya arye, aning nirya ara, nong kum upnamle ninguk,’ tenebuka wininamake. Sirya talak unamak ninye arye, anyapmasuk touk winipnamaka anya arye, Timotius anda, anang atonun nang ap, neika una kume. Leibuka yuk akuk unamlame. Na Paulus arye nyapkine.

⁶ Arup nyapmasinto nang arye wininyak ning ton nyapnukine. Sik tenepce arye teleb yupu nyabuka yukulakirye, yuk nang aik wekuka neika unyake. Yuk nang aik yupu teleb nyabuka yukulakirye, akunum bikcopura, anyaik unyak kilapu ati, talye yupu nyana deice arye kekebikceura, sik anang kilongonyake. Akilapu ara, ‘Aning winipnun do, kum do? Teleb ning dan do?’ tenen, teniltonauk unyak kilapu ati, anang arye akilapu sik kanye talima lilon yupu nyabikibuk, kekebikirye, anang tamuk kilongonyake. Sik nyanyak yupu ara, akilapu arye talye luba kibuka kekebikirye, diba tenenyake. Akilapu ara, sik malye winin ning weik arye unyaka ati ara, diksukum bisik ara, kum banyake. Tonda, sik kanye talima noutam malye ninguk pataplibuk, aninguk tenenyaka deice arye, sik kanye lipdongoplibuk, yuk malye bisik kirikuka banyake.

⁷ Akilapu arye, ‘Peterepsikibuk, kelbipnuyap’ tenen, kekelbanyak bukni, nong kum upnamla anya arye, bita kum kel biknamake. Akilapu arye, ‘Allah el dipkoprop nyasilye yupu anye’ tenen, moubuka kum kel biktingce, ayupu kekebuka kum taliptinge. Pia malyeuk wininamake.

⁸ Tilila yupu nyalamak bukni, yuk nang aik duknubuka binamak ninye ara, Allah el dipkoprop yupu nirya ara, yaniptabikirye, yupu sekenyake. Minop talak ulamrik nang Yanes ap, Yambres ap arye, Musa nyalamuk yupu ati yanibrikce, el yupu seklamrik touk, anang arye atonun Allah el yupu ati, yaninauk wininamake. Sik kanye talima noutam nirya ara, pia kwalibukba, akunum malyeuk ubuka anya arye, sikce Allah ati diba kum teneptinge. Allah arye sikti, kanye kum deililule. Allah arye sik anang ati akunum batakuke.

⁹ Minop talak Yanes ap, Yambres ap, arye, Musa yupu yanilamrik bukni, aminyan talak ara, yuk nang nirya arye, ‘Kume, sik winirudak ning ara, pia walwal arye winirurake. Aning nirya ara, nong kum upnamle’ tenen, kel kiyamik. Aning atonun, asirya talak tilila nyanyak nang ati ara, yuk nang arye, ‘Kume, sikda pia walwal aryuk nyanyake,’ tenebuka kel biknamak. Ati, yuk nang weik arye dobuka, malye bisik kum bobinamake. Na Paulus arye nyapkine.

Paulus arye Timotius ati, “Kanye moubuka unalyame,” nyapdeibuk yupu

¹⁰ Sirya talak ara, sik malye ning wininamak bukni, Timotius anuk ara, aning atonun kum wininamlyame. Ance na winilamse ning nirya ara, akunum kel bikamnulume. Ara, na winilamse ning ap, na peterelamse yupu ap, narye, ‘Winipnamne’ tenen, pil dolamsa deiyok ning ap, Allah ati dib tenenun ning ap, ikin ning wamnuk bukni, wana kum, nimalye arye winilamse ning ap, yuk nang ati bico tenebuka melilamse ning ap, ikin ulamnuk bukni, batakna kum arye pia pi dobuka, pil dolamse ning ap, aning nirya an akunum kel bikamnulume.

¹¹ Tonda, Allah yupu peterelamsa ati, malye nang arye na nong deice ikin ning deililamnik ning ap, yuk ikin wamnuk ning ap, anirya ara, an akunum bikamnulume. Tonda, Antiokia mutuku ap, Ikonium mutuku ap, Listra mutuku ap, peterelbisi talak noutam, Allah yupu peterelamsibuk, amutuku ninye arye, ‘Nun lik’ tenen, ikin ning weik na nong deice deililamnik bukni, kum bataksirye, pia pil donauk winilamse ning babye, an akunum kel bikamnulume. Kanye imun ning weik ulamnuk noutam, nun ni Allah arye lobuka lyepnuke.

¹² Malye nang arye, ‘Allah yupu nun lik’ tenen, ikin ning weik na nong deice deiamnik ning ara, na tonok kume. Dipkoprop ning ara, yata nang do nirya, ‘Yesus Kristus ap, kanye dukdongobuka Allah yupu nyasilye touk, nun diksukumuk unamyabe,’ tenenyak nang nirya ati, malye nang arye sik nong deice ikin ning delinamake.

¹³ Atalak noutam nirya ara, malye wininyak nang ap, tilila yupu tenepce arye, nyalamak nang ap, malye akunum wininyak bukni, weik arye tonap, tabakuka pia malye wininyake. Sikce yuk nang ati, ‘Tilila ning ati diba tenepnamak’ tenen, tilila yupu talye tenepce arye nyanyake. Aning atonun yuk nang arye aninye ati, tilila yupu nyakibuk, aninye diba tenenamake.

¹⁴ Timotiuso, sik malye nang ara, winibuka wininamak bukni, anuk ara, kume. Allah el yupu akunum diba teneplumce, kanye bokoltona kum bukni, dib tenebuka kel bikamlumce, mikip arye taliplum ning nirya ara, batakna kume. Sikce peterelamkik ninye ara, diksukumuk ulamikbuk, aninye kan-kan akunum kel bikamluma ati, ayupu nirya moubuka talipmince unamlyame.

¹⁵ Tonda, an mitik mi ulamlum talak arye dipdongobuka, anoutam talak nirya, Allah el pia diksukum yupu peterelamkikbuk, akunum kel bikamlume. Allah yupu peterelamsiaka deice arye Allah, ninye ati lyesulul yupu ap, lyen ning ap, nirya ara, kel bikinyabe. Nunce Yesus Kristus ati, dib tenenyap deice arye, Allah lyesulule. Aning nirya ara, Allah el yupu deice arye kel bikinyabe.

¹⁶ Allah yupu seklamika nirya ara, Allah elcuk nyalilamukbuk, sik kanye noutamak kekelamikce yupu seklamik. Allah elcuk, ayupu nirya nyalilamuka anya arye, el yupu dopropbibirye, ninye peterena ap, malye ubiceura, “Malye upmaluma ara, ani,” nyabuka, wenena ap, amalye upnin bana ara, “Aning batakuka teleb winina ara, ani,” nyabuka lipsisikuka peterena ap, tonda, “Malye winin ning nirya batakuka, Allah yupu nyalye touk diksukum winina ara, ani,” nyabuka peterena ap, anirya ara, Allah yupu deice dopropbibirye, apil-apil nirya teleb ubuka donyabe.

¹⁷ Anyapmakin pil nirya donyapa deiyok ara, Allah el pil melina nang nirya ati, pia teleb ubuka peterebibibuk, kel biknamaka deice arye, ‘Teleb pil aning-aning nirya, teleb ubuka sirya dakdongobuka dopnamak’ tenen, Allah yupu dobuka peterebibibuk, sik ap, apil nirya donamabe.