2 Timotius 2 - Eipomek

“Ikin ning ukilya babye, kanye teniltona kum unamlyam bukni, mikip arye unamlyame,” nyabuk yupu

¹ Ara, Timotiuso, ance Yesus Kristus ati, diba tenebuka el ap, kanye dukdongobuka uminye talak noutam nirya ara, Yesus arye anti bico tenebuka, el kanye aryuk talye melikilya deice arye, pia kanye darapdongobuka, mikip arye unamlame.

² Tonda, narye yuk nang kekelamik mutuku peterepra balamsibuk, ance kekelamlum yupu nirya ara, an babye ayupu dobuka, yuk teleb nang ati peterenamlyame. Peterelbinamlam nang ara, talye nang kum bukni, sikce “Wininamabe,” nyabuka nyanamak touk, aninguk dipkoprop unyakce, diba tenepmanto nang ati peterenamlyame. Tonda, anang arye yuk nang ati, teleb ubuka peterepting nanguk wibuka peterenamlyame. Talya-talya daunyak nang ara, kume.

³ Tonda, sik yin talin nang arye, ‘Ikin ning awabsilya babye, telebuka,’ tenebikirye, pia pi dobuka pil dolamak touk, na ap, na neiktoto unyap nang ap, ikin upsilibuk, aning tenena kum arye, ‘Yesus Kristus el pil don nang, el yin talin nang atonun unamabe’ tenen, nyabe. Wininyap touk, Timotius an babye, atonun tenebuka unamlame.

⁴ Winira, winipmanto yupu nyapnukine. Talya-talya unyak ninye arye tenebuka, winilamak ning nirya ara, sik yin talin nang koprop arye, aning talibuka kum wininyake. Aning kum bukni, ‘Na weik deiyoknye birye kanye deipnamnil’ tenen, adeiyoknye birye nyalye yupu uk kekebuka pil donyake.

⁵ Aning atonun, sik kil-kil nyanyak nang arye, ‘Bik-bik apnin banmakca ani, minop bikcopura, dekni ning arepnamniak,’ tenepting bukni, bik-bik ana deiyok nang arye, “Winibuka, winibuka bik-bik albinamlulume,” nyabikce touk kum kekebikirye, talyeuk bakcopura, dipkoprop dekni ning kum dopdopnamake.

⁶ Aning atonun, wa wina deiyoknye birye, pia pi dobuka mikip weik arye pil dolinye bira, aminyan talak, awa win dam kouamice ning, akunum wisiplyopura, elce minop libuka dilule. Yuk nang nirya ara, aminyan talakuk libuka dinyake.

⁷ Adomon yupu deice arye nyapmakin yupu nirya ara, ‘Deiyok dan do?’ tenen, moubuka tenipdeminyebuk, Allah arye, “Ayupu nong ara, ani. Ayupu deiyok ara, ani,” nyabuka lak kipdeipkilibuk, kel biknamlyame.

⁸ Nun apu koprop Daud arye deibukura, dadeipdanin yangalamika ani, aminyan talak deibik mi, Yesus Kristus ara, obikura, dibuk bukni, tuba tamubuka, kam bukuk. Winibuk ning anirya ara, tuba tenenamlyame. Ayupu ara, Yesus el lak teleb yupu noutam aubuk ak, dobuka peterenune.

⁹ Yesus Kristus arye ninye lyena ati, el laka teleb yupu peterenibuk, yuk nang arye, ‘Nun lik’ tenen, ikin ning weik na nong deice deilinikibuk, kanye imun kanye bobuka unune. Tonda, sik pia malye unyak ninye tomobikirye, tapu koubuka wenena aik dongolamak touk, ayupu peterepnin balamsibuk, tapu koubuka wenena aik dongopnike. Bukni, Allah el yupu ara, ninye arye tapu kum kouptinge. El yupu peterenyakbuk, ninye kekebikirye, diba tenebuka weik arye biknin banamake.

¹⁰ Allah el yupu ara, kum sekdongopmanto ulula ati ara, yata ikin ning do nirya, kanye imun ning aupmanilya babye, aning tenena kum arye, apiluk donamne. Wininuna ara, talye ati kume. Deiyok ara, Allah arye minop talak, ‘Na mapu unamak’ tenen, wibuka deiamuk nang nirya ara, Yesus Kristus pil dopsuka deice arye, lyen ning kintinipsuk ning ara, ‘Dipkoprop dopropnamak’ tenen, apil kum batakanune. Tonda, ‘Doprobikcebuk, aminyan talak Allah arye teleb updeipsilibuk, oyanamle talak noutamak nirya ara, telebuk pia kam unamak’ tenen, ikin unilya babye, pi dobuka pia pil donune.

¹¹ Anyapnukin yupu ara, pia dipkoprop yupu ati ara, moubuka tenepmince, pia peterenamlyame. Ayupu ara, ani. ‘Allah arye nun ap, Yesus ap, kanye dukdongopsuka ati, Yesus dibuk talak ara, nun ap, dukdongobuka dibupa ati ara, el pia kam unamle talak ara, nun babye, el ap neika kam pia unamabe.’

¹² ‘Ikin ning nun nong deice awabsilya babye, batakna kum aryuk, pia pi dobuka, pil donauk ulamibyeura, aminyan talak Yesus arye aning-aning ap, ninye mutuku-mutuku nirya ap, ati, taliplirye, Weik Ninye Deiyoknye unamle talak nirya ara, nun ap, el ap, aning nirya neika talibuka unamabe.’ ‘Bukni, nunce elti, “Elda nun like,” nyabuka batakipyopura, elce nun babye, ati ara, “Aninye ara, na like,” nyabuka bataknamsile.’

¹³ ‘Nunce, “Wininamabe,” nyaptibye bukni, mikip ning mitang upsilibuk, nunce pil kum dopmanto usilirye, batakibye ababye, Yesus arye, “Na mapu ati wininamsine,” nyabuka nyalilamsuk yupu dipkoprop winipnamsile. Tonok ning babye, kum bataknamle. Ara, el bidamnye arye el bidamnye ati, kum batakmanto ulula ati nyapne.’

‘Allah el pil donak ati, teleb ninguk unamne’ tenen, “Pirildenamlume,” nyabuk yupu

¹⁴ Ara, Timotiuso, narye nyapnukin ning ara, ‘Diba tenenyak ninye arye, tuba tenenamake’ tenen, ila tonap, pia peterenauk wininamlame. Ara, “Allah disululce, yupu bokeipnamsile ati, kanye mouplulume,” nyabuka peterenamlam yupu ara, ani. Ara, “Ninye arye talye-talye yupu ati, yu uplibuk, nyaldanyak ning ara, bataklulume,” nyanamlyame. Tonda, “Yupu deice arye waldaluluma ara, teleb kum winililalulume. Yupu ati waldalulum nang ap, waldamunyebuk, eibikirye, ayupu kekenyak nang ap, malyeuk winililanyake,” nyabuka peterenamlame.

¹⁵ Aning kum wininamlam bukni, Timotius anda, ‘Allah arye kanye deipnamnil’ tenen, tonda, ‘Pil pia teleb ubuka donanye unamne,’ tenenamlyame, nyapkine. Tonda, ‘Allah arye winipdenilopura,’ “Anye bira, telebuka,” nyapnamnile. Allah el dipkoprop yupu nyasilye touk, diksukum peterenanye ununa ati ara, ‘Alye kum dakanamne,’ tenebuka unamlyame. ‘Winipnyopura, Allah arye kanye deipnamnil,’ tenebuka unamlyame. Ayupu pia tenebuka unamlame. Na Paulus arye Timotius anti nyapkine.

¹⁶ Tonda, ayupu peterenamlyame. Allah pia diksukum ulye touk kum bukni, pia malye-malye yupu nyaltakalamak nang ara, sik yupu kekena kume. Ayupu kekenyak nang ap, ayupu nyanyak nang ap ara, akunum malye wininyak bukni, ayupu nyanyaka deice arye, Allah el ulul ning atonun kum bukni, weika arye tonap, pia malye winipnin banamake.

¹⁷ Winipmanto yupu nyapnukine. Butbutukne suse deiyok kibuka disilye talak ara, mitikuk usululbuk, pia dilamsilya ani, weik upnin balyopura, weik barye suse disulule. Aning atonun, apia malye yupu nyanyak nang, peterenyaka deice arye, ninye weik arye tonap, malye winilinyake. Aning atonun peteren nang ara, Himeneus ap, Piletus ap, ururake.

¹⁸ Anang bitinye ara, Allah el dipkoprop bisik balamrikbuk, akunum lekuka, yuk malye bisik birikce, tilila ninguk talibuka winirurake. Abitinye nang arye, “Kume, Allah arye akunum diamik nang kam bukeipnamla ara, akunum ubuk,” nyarurake. Ayupu petererikca deice arye, ton nang kekebikirye, Yesus ati diba tenepnin banyak ning ara, akunum batakanyake. Tuba Yesus ati dib kum tenenyake.

¹⁹ Aninye ara wininyak bukni, Allah arye nyapsuk yupu ara, min kum upsutue. Winipmanto ara, pia teleb ayukumna yo, gat yo iknabuk, pia gat ulamle atonun, Allah arye nyapsuk yupu ara, min kum kum datue. Allah el yupu noutamak sekamik yupu deice arye, lak kipdeipsuke. Ayupu ara, ani. ‘Allah arye, ‘Aninye na mapu unamake’ tenen, akunum wipdeiamsuk ninye ara, el akunum kel bikamsuke.’ (Bilangan 16:5) Tonda, ‘Yata nang do nirya, “Allah ati akunum diba tenepsa ati, el mi unune,” nyanyak nang nirya ara, adiparyuk malye winin ning nirya ara, batakikirye, balye tamubuka diksukum bisikuk banamake.’

²⁰ Ara, Timotiuso, na Paulus arye yuk domon yupu ton nyapnukine. Weik asik dolamak noutam nirya ara, aning-aning weik deilinyake. Ton ning ati ara, ‘Aning dobuka weik mambul talak ati, mambul piluk donamape’ tenen, dekna weik ning, emas ap, perak ap, doprobikirye puturubuka deilinyake. Ton ning ati ara, ‘Aning dobuka, talye sum nirya deice arye mambul kum piluk donamabe. Aning ara, ilil kume’ tenen, talye awablye ning, yo ap, tapu ap, kat tuku ap, doprobikirye, memenyake.

²¹ Aning mitik tonun, yatanye do nirya, mambul un ning, malye ning yala-yala nirya ati, bataktopura, teleb pil donanye unamle. Winipmanto ara, elda weik aik pum dekna weik ning ulye touk, weik mambul pil talibuka dopmantonye unamle. Atonye, el deiyoknye Allah arye anye biti, el malye winin ning kum kipdeiplyopura, anye biti teleb kipdeipnamle. Teleb akunum winibdeiplyopura, weik mambul pil aning-aning nirya talibuka, el li koprop ati, teleb pil melibuka dopmantonye unamle.

²² Ati Timotiuso, sik kam kili sal arye malye ning patapliba, winilamak ning ati, bita dipdemince, yuk karin ak unamlyame. Amalye ning nirya batakuka, diksukum winin ninguk tenebuka unamlyame. Tonda, Yesus ati diba tenena ap; yuk nang ati bico tenebuka melina ap; malye kanye bona kum arye, yuk nang ap, kanye deibuka, ‘Nimalye arye neika unamabe’ tenena ap; aning nirya ara, tenenauk unamlame. Ara, anuk kum bukni, sik yuk nang, tenepce arye talye nyana kum bukni, sik kanye talima diksukum unyak ninye arye, nun Deiyoknye Yesus ati, diba tenenyak nang ap, ateleb ninguk tenebuka, neiktotouk unamlulume.

²³ Ara, sik yuk ninye arye, ‘Deiyok ani,’ kum tenepmanto yupubuk, walwal arye nyapdakibuk, yu uplirye, yupu deice waldanyak yupu nirya ara, ance kum kekenamlame. Talya-talya yupu ap, walwal arye nyanyak yupu ap, ati, yupu talibikirye, yu uplirye, derelana ap, waldana ap, nyanyak yupu nirya ara, teleb kum updeipsutue. An kele, ayupu ara, malye ulisulula ati, ayupu nirya ara, kekena meme. Tonda ato yupu ara, nyana kume.

²⁴ Tonda, Allah el pil dona ati melina ninye ara, yupu deice arye yu uplirye, derelana ara, pia meme. Yu uplirye, malye yupu nyaldana kum bukni, Allah el pil melina ninye arye yuk nang ati, nimalye arye teleb ubuka adiparyuk melinamake. Yuk nang ati, adiparyuk teleb ubuka peterepnamake. Yuk nang arye, Allah el pil don nang ati, malye updeisikca babye, ‘Malye winipdeipmaniak,’ kum tenenamake. Aning ati lubakibikirye, tuba tenena kum unamake. Kanye nimalye aryuk teleb unamake.

²⁵ Yuk nang arye, Allah el yupu peteren nang ati, ‘Nun lik’ tenen, el yupu yanibikirye, malye kibuka bisibikcopura, elce anang ati, teleb yupu nyabuka, nimalye arye peterenamle. Sik walwal arye wininyak ning ati lipsisikuka peterenamlyame. Ara, talye ati kume. Ara, ‘Allah arye anang ati, sik kanye noutamak pil melibuka doptubuk, sikce, “Nun malye un ning batakape,” nyaptingce, Allah el bisikuk tamubuka yanamak do?’ tenen, nimalye arye peterenamlume. ‘Sik malye ning batakikcopura, Allah el dipkoprop yupu kel biktingce, teleb uptinge,’ tenenamlame.

²⁶ Tonda, Isa Mutuku Dongonye arye, ‘Na malye piluk donamniak,’ tenen, sik kanye talima tapu koubuka deibuka ati ara, el ikne pum bisik atonun unyake. Bukni, Allah el dipkoprop yupu kel kibting deice arye, ‘Se, nun mankau arye malye winilamubu bukni, winira, akunum kel bikmapa ati, aning bataknuyabe,’ tenebikirye, ‘Moubuka tenepnamak’ tenen, nimalye arye peterenamlyame.