2 Tawarikh 3 - Eipomek

Ninye deiyoknye Raja Salomo birye, Allah el si eren aik dolamuk yupu

¹ Ninye deiyoknye Raja Salomo birye, akunum Allah Yahweh el si erena ati, pia teleb aik ara Yerusalem mutuku bukni, Moria mutuku kon deice arye deiyok koubuka dobuk. Asukum ara, Yebus yalanye el si Arauna, el gandum duk dakuka teiklamuk sukum, amutuku dam dobuk. Tonda, Allah Yahweh arye, minop talak Raja Daud dam lak kipdeibukba, Daud birye eibuk. Amutuku talibuka, ‘Daud birye, Asukumuk Allah Yahweh el si eren aik dopnamapʼ tenen, wipdeiamuk sukum awamuk. Allah Yahweh el si eren aik deiyok koubuka dona ati ara, minop talak Raja Daud, elce deiamukba, aminyan el pununanye, ninye deiyoknye Raja salomo birye deiyok kibukce dobuk.

² Salomo birye ninye deiyok talebuka ulamuk talak bukni, keting tamun dumbarye noutam arye, wala ara bitinye deice arye anyaik dona ati deiyok koubuk.

³ Ninye deiyoknye Raja Salomo birye anyaik el cang kiklibuka dobuk ning ara, 27 meter, tonda anyaik el pala ara 9 meter kiklibuka dobuk.

⁴ Anyaik urasin tam ara, ninye wekelbana ati, atolonga atonun buk weik ning ton dobik. Anyatolonga el weik lo ubuk ning, el cang ara, tukwak arye dipdongobuka, eitam cang ara 54 meter uamuk. Anyatolonga el pala ara, 9 meter uk uamuk. Anyaik urasin tam dobuk atolong ara, pum noutam ara, dekena weik ning emas lek pia weik ning dobuka urasin teleb ning arye taplak deibikce dobik.

⁵ Tonda, anyaik atolong abilinga, pia teleb keipyal yo lakase arye pibuka dobuk. Winibukopura, ayo urasin pia teleb kina ati ara, dekena weik ning emas pia teleb ning arye, taplak deibikce dobuk. Tonda, taplak deibuka dobuk emas deice tam ara, emas arye yo si palem yo, el urasin atonun puturupdeibukce dobuk. Tonda rantai tapu urasin atonun kipdeibukce dobuk.

⁶ Ninye deiyoknye Raja Salomo birye, ‘Winiplulume,’ nyapdeibuk touk, el pil don nang arye, anyaik noutam ara urasin pia teleb ap, dekena weik keil ap, pia teleb-teleb ning ap, tonda Parwaim mutuku arye boyanamik emas ap arye tablakuka dobik.

⁷ Sik pil don nang arye, apia teleb emas deibuka dobik ning babye, Allah Yahweh el si eren aik ati tablakuka dobik aik abilinga kat ning nirya ara, aemas dobukabikce abilinga deice taplakuka deibik. Ara balok yo ap, tonda bisik bublan dana-dana tam telikilin yo ap, tonda anyaik wekelban bisik bublan dana-dana tam yo ap nirya ara, emas arye taplak deibuka dobik. Atonun, tembok-tembok adobik ning nirya babye, aemas deice aryuk urasin pia teleb ubuka puturubikce, ‘Anyaik abilinga urasin pia teleb upnamleʼ tenen ati, malaikat atonun ning, el si Kerub urasin atonun puturupdeibuka dobik.

⁸ Ura Raja Salomo birye, ‘Winipnulyame,’ nyapbukba, el pil don nang arye, Allah el si eren aik pum tam bukni, otam pia noutam ara, Pia Teleb Lek Aik ton dobik. APia Teleb Lek Aik noutam el cang ara, 9 meter ubuk. Tonda, atonun, anyaik el pala babye, 9 meter uk ubuk. Ara Allah Yahweh el si eren aik ati cang dobik touk, anoutam Pia Teleb Lek Aik babye atonun ubuk. Anyaik ara, emas dua puluh tiga ribu (23.000) kilogram ikin deice arye, Allah el si erena ati Pia Teleb Lek Aik noutam ara, abilinga deice arye taplak deibikce dobik.

⁹ Tonda emas arye yo dukulongon ning deice ara, paku uamuk ning ara, palu arye apaku dakuka, anyaik yo lakase dukdongamik ning ara paku alip lak upnamuk ning babye, emas arye taplak deibik. Paku lak ulamuk ning, el ikin ara, 570 gram ubuk. Anyaik noutam bukni, im tam aik pibuka dobik abilinga babye, pia teleb emas deice aryuk, teriplex urasin atonun bukni, emas arye memebuka, aning dobuka abilinga deice palibuka taplakuka, dobik.

^10-13 Ninye deiyoknye Raja arye, el melin nang ati nyabukba, sikce kat teleb yo doprobikce, malaikat urasin ato ning, si Kerub, patung bitinye puturubikce, kintinip deibik. Apatung babye emas doprobikce, taplak deibik, ning alip tam lamakdongobik. Akerub ara, Allah si eren aik pum tam bukni, Pia Teleb Lek Aik kup-kup ak tikdeibukce, anyaik bisik wekelban ati bublan dam tikeibuk. Tonda, amalaikat ato ning, Kerub bitinye ning ara, pol dana-dana tam, cang ara 2.2 meter ubuk. Winibuka tikibikura, ton ning, kwanim tam pol el mouse ara, abilinga tam bol pipdongobuk. Dana tam pol ara, otam tikeibik Kerub, el pol dam bol pipdongobuk. Atonun, otam Kerub babye, ton tam pol ara, diksukum tam abilinga binuka bepdobuk bukni, anyaik noutam ara, dana tam pol, okwanim tam Kerub pol binuka bol pipdobuk. Ati aKerub bitinye ara, atam abilinga arye dipdongobuka, otam abilinga dukgongamik ning cang ara, 9 meter ubuk. Akerub bitinye ara, anyaik pum bukni, anyaik wekelyangan bisik bublan dam tikeibik.

¹⁴ Tonda, Pia Teleb Lek Aik dobukce, atam aik ap, otam aik bukni, noutam wekelban bisik dam, anoutam arye wililonak ning, kain lenan, tonda gorden nyanyak ning ara, pia teleb namin baju arye lapkwetebik. Tonda, aning gorden bola im kalum ning, kain biru ap, warna unggu ap, bi ning merah ap arye, ansinibuka wibik ning deibuka lapkwetebik. Tonda akain gorden deice ara, malaikat el si Kerub urasin ato ning wibuka akain gorden deice deibik.

Weik ayukumna bitinye ara, perunggu deice arye ikdeibik yupu

¹⁵ Ninye deiyoknye Raja Salomo birye, ‘Winipnamlume,’ nyabukba, el pil don nang arye, teleb kat ning, si ara perunggu doprobikce, anya ayukumna bitinye memebuka tikeibik. Anyaik urasin tam, aning ara bitinye yuk-yuk tikeibik. Anya ayukumna ara, el utam arye eitam cang ara, 15.5 meter kibuk. Winibukopura, Allah Yahweh el si eren aik urasin tam uk kintinip deibuk. Anya ayukumna deice tam el kisok cang ara 2.2 meter arye dobik.

¹⁶ Tikibikopura, anya ayukumna deice kup-kup tam ara, rantai tapu ato ning koubuka darapdongobik. Tonda, perunggu arye delima yo duk urasin atonun ning, el yupa ara seratus 100 teleb arye puturubuka memebikce, arantai tapu deice ak deibik.

¹⁷ Anya ayukumnatikdeibik ning ara, Allah Yahweh si eren aik bisik bublan dam sirik tam ap, kwanim tam ap, kub-kub dana-danatikeibik. Ateikeibikce iknapnye, selatan tam deibik ning, si sina ati ara, Yakhin nyabuk. Tonda, dabu tam deibik ning si sina ati, Boas nyabuka si sibik.