2 Tawarikh 29 - Eipomek

Hizkia birye Raja kibuka, Yehuda tam mutuku nirya taleamuka ati, sekik yupu

¹ Hizkia el keting tamun ara, dua puluh lima (25) tahun kibuk talak ara, Raja kibukce, deiyok kibuka, Yehuda tam talebuk. Winibukce, keting tamun dua puluh sembilan (29) tahun deice arye, Yerusalem mutuku talebuka ulamuk. Hizkia el lin bira, Zakaria birye deiamuk kil, el si ara Abia ulamuk.

² Hizkia birye, Yehuda tam talebuka ulamuk talak ara, pia teleb kibuka pil dolamuka deice arye, Allah el kanye teleb tenelamuk. Ara, el apu koproba Raja Daud birye, diksukum talebuka ulamuk touk ulamuk.

Hizkia birye, Allah el si eren aik, ila tamubuka teleb kibukce, lipsisikdeibuka ati, sekik yupu

³ Hizkia birye, ninye deiyoknye kibuk talak ara, keting tamun tonok kubukbuk, wala babye tonok kibuk talak aryuk, elce Allah si eren aik bublan nirya tirikdongamik ning ara, kukeibukce, anyaik noutam malye uamuk bublan nirya ara, “Wini talak arye, moubuka dopnulume,” nyapdeibuk.

⁴ Tonda, Hizkia birye, “Winida anggun bulubuka weknamlume,” nyabukura, Allah el si eren aik bukni, keting panalyangan tam anyaik damuk, sik imam-imam nang ap, sik pil melina ati Lewi yala nang ap, sik nirya bulubuka weikikce, el yupu kekebik.

⁵ Bulubikopura, Hizkia birye sikti, nyabuk. “Ura anggun Lewi yala nang, anggun nirya ara, ‘Allah el piluk teleb kibuka dopnamapʼ tenen, anggun malye winin ning nirya batakmunce, pia teleb kililanamlume. Tonda, anggun apu yapu arye si erelamik Allah, el si Yahweh, el si eren aik babye, pia mingne kipdeipnamlume. Nun ni koproba Allah arye, ‘Na lik,’ tenelul malye ning ara, anyaik pum tam ton awamlye ning ara, nirya dobuka donoknamlume. Anyaik babye, ‘Allah el ning ululeʼ tenen, apil doprumunce, anyaik kintinipnamlume,” nyapdeibuk.

⁶ Nun ni yapu ara, Allah Yahweh arye, ‘Winipnamlume, aning ara, kum winipnamlume,’ nyapdeiamuk yupu ara, moubuka kum taleamikce, elti, batakuka yaninauk ulamik. Sikce Allah el kanye teleb un pil ton, kum dolamik. Tonda, Allah ati donga anibuka batakamikce, Allah el si eren aik ati ton, ‘Kume anyaik kum wekenamabe, nun lik,’ tenelamikce, anyaik mingne kum kililamik.

⁷ Sikce Allah el si eren aik kup-kup ak botopdeiamik bublan nirya tirikilongolamik. Tonda lampu upna ara, Allah el si eren aik noutam delilamik ning nirya ara, tangalongalamik. Allah el si eren aik noutam ara, ‘Allah moropnuyapʼ tenen, sikce siltong teleb nyan ning ara, mesba deice uku kum dongolamik. Tonda, ‘Allah arye, nun malye winin ning kum kipdeipsilirye, lyelonamsileʼ tenen, Allah el arena ati, kam ning obuka, mesba deice uku sekuka, kum dongolamik. Ara, nun apu yapu, Israel nang arye boyangalamik ning nirya ara, uku kum dongolamik.

⁸ Winilamikopura, Allah el yu ubuka ati, Yehuda tam mutuku noutam unyak nang ap, Yerusalem mutuku weik asik noutam unyak nang ap ati, sik deice wenelamukce, kanye imun weik ning arelamukba dololamik. Kanye imun kanye bobuka, ikin weik ulamik ning ara, yuk mutuku nang nirya eililamikce, ‘Se, anang ara, ikin weik unyake. Sik anang ara, mambul kum ati, Allah arye, ‘Na tenen nang unyake,’ dipkoprob kum tenelule. Sikda talye nanguk unyake. Tonda, ‘Nun ton winipsilyakʼ tenen, ilil weik ulamik. Ura, arup anggunda, na yupu kekenmanulum nang nirya ara, Allah elce awamuk ning nirya ara, anggun akunum eibuka kel bikamlume. Tonda, amutuku-amutuku dana-dana tam ulamik nang nirya arye, aning nirya eiamikce, ilil ulamukba, alye dakalalamik.

⁹ Nun ni yapu arye, malye weik ulamik ati ara, yuk mutuku nang mal olanmanarye, ninye on ya arye obikba, weik arye diamik. Winibukce, sikce deiamik mapu ap, kilmapu ap, kilapu ap nirya ara, tomobuka sik mutuku tamubuka, binuka wenen aik delilbinamikba, tuba aunyake.

¹⁰ Ati ara, wini talak ara, narye nun ni yapu Israel nang, sik si erelamik Allah el si Yahweh ati, nyalin yupu nyapdeipnamne. Winipneba, elce tonap nunti, yu weik uplirye, kum wenenamsile. Teleb kibuka kalekuka melinamsile.

¹¹ Ati na kayapu, wini talak ara, anggun imam-imam nang ap, anggun Lewi yala nang ap ara, ‘Yo, dotalak-dorace, aning ara winipnamap ca,’ nyabuka, talye nyaltakna kume. Dipkoprop Allah arye areamsuk piluk moubuka donamlume. Allah arye anggun dem wipdeipsiliba, el yupu kekena ap, el si eren aik pum tam pil dona ap, Allah moron talak siltong teleb nyan ning uku dongona ap, tonda anggunce Allah el si erena ati pil don ning nirya ara, amutuku unyak nang ati, ‘Allah el yupu kekepnuyap,’ nyamunyeba, kekenamaluma ati nyapsine,” Raja Hizkia birye, nyapdeibuk.

^12-14 Raja birye nyabuka deice arye, sik Lewi yala nang nirya, atalak bulubuka, yana wekmek nang ara, ani. Ara, sik Kehat yala nang arye deiamikba, dadeipdanin, yangalamik nang kan-kan arye, Amizai el mi Mahat ap, tonda Asarya el mi Yoel ap, deiyok koubuka, pil dopre banauk uprik. Aning atouk, Merari yala nang arye deiamikak dadeipdanin, yangalamik nang kan-kan arye, Abdi el mi Kish ap, Yahaleleel el mi Asarya yanmarikce, apil talebuka dona uk kibuk. Atouk, Gersom yala nang arye deiamikak, dadeipdanin, yangalamik nang kan-kan arye, Zima el mi Yoah ap, Yoah el mi Eden ap, yanmarikce, apil talebuka dolamdik. Tonda, Elisapan yala nang arye, deiamikak, dadeipdanin, yangalamik nang kan-kan arye, Simri ap, Yeiel ap, yanmarikce, apil talebuka dolamdik. Asaf yala nang arye, deiamikak dadeipdanin, yangalamik nang kan-kan arye, Zakaria ap, Matan ap, yanmarikce, apil talebuka dolamdik. Hemana yala nang arye deiamikak dadeipdanin, yanganmik nang kan-kan arye, Yehiel ap, Simei ap, yarikce, apil talebuka dolamdik. Tonda, Yedutun yala nang arye deiamikak dadeipdanin, yangalamik nang kan-kan arye, Zemaya ap, Uziel ap, yarikce, apil talebuka dolamdik.

^15-16 Winilamdika ani, sikce sik kayapu nang ton, yuk Lewi yala nang babye, sikce bulupdeibik. Akunum bulupdeipdikopura, sik nirya arye, ‘Allah el piluk donamabʼ tenen, sik nong ap, sik kanye talima ap nirya ara, sik babye mingne kipdeipdayik. Ara, sik deiyoknye Raja birye nyabuk atouk winibik. Tonda, imam-imam nang nirya ara, Allah el si eren aik noutam wekikce, Allah arye, “Aning-aning nirya ara, wininamlume,” nyapdeiamuk touk winibuka, anyaik pum noutam nirya ara, mingne kibuka, teleb kipdeibik. Malye ning ton, Allah si eren aik noutam uamuk ning ara, bobuka bai tamuk boyayik. Akunum boyayikopura, Lewi yala nang arye, amalye ning nirya bobuka, weik asik dobuka ulamik mutuku, pia pere sukum bukni, mutuku si ara, Kidron mutuku luak bobiyikce, moubuka deibik.

¹⁷ Ura, apil dona ati ara, wala babye tonok, tanggal babye tonok ning kibuk talak aryuk, pil dona deiyok koubik. Apil dolamika ani, pinbarye sum ton, tanggal delapan akunum kibukopura, sikce Allah el si eren aik kup-kup ak nirya ap, cang weik aik dam ap ara, akunum mingne kipdeibikce, sirya dakik. Tonda, sik dem noutam pinbarye ton nirya ara, Allah Yahweh el si eren aik domik noutam nirya ara, teleb kibuka pil dolamika ani, awala noutamuk tanggal enam belas deice arye, akunum mingne kipdeibikce, apil dobuka teleb kipdeibikopura, sirya dakik. Apil sirya dakik sum ara, wala tonok bukni, tanggal enam belas deice arye, akunum sirya dakik.

Allah el si eren aik ara, tamubuka Allah el tibuk arebika ati, sekik yupu

¹⁸ Apil nirya akunum winibikopura, sik Lewi yala nang ap, imam-imam nang ap arye, Raja Hizkia dam nyalbiyik. “Na nio, ance, ‘Allah Yahweh el si eren aik, pia teleb kilina ati, pil doplulume,’ nyapdeiamsulum ning ara, akunum dopmapce, sirya dakmabe. Ara, ‘Allah arye nun malye winin ning lyepnamsilʼ tenen, kam ning obuka, uku dongonyab ak mesba ap, apil don ning nirya ap, Allah el arena ati, teleb roti dabuka delin meja deice ap, tonda Allah el aik noutam pil don ning, yuk ning nirya ap ara, nunce akunum mengne kibuka, pia teleb kipdeipmabe.

¹⁹ Tonda nuncuk, Ahas Raja kibuka taleamuk talak arye, Allah nyapdeiamuk ning ara, moubuka kum taleamukce, Allah el aik noutam pil dona ati, deiamik ning yuk-yuk ning nirya, dobuka donokamuk ning ara, ton ap akunum teleb kipdeipmapce, tamubuka anyaik yanuka deipmabe. Aning nirya ara, Allah el aik noutam una ati, akunum kintinibuka teleb kipdeipmabe. Ati atalak ara, Allah arena ati, kam ning opnarye mesba deice deilinyabak, urasin tamuk akunum deipmaba ati, atuba aupmale,” nyabuka, lak nyabik.

²⁰ Lak nyabikba, kekebukce, sik nirya mapmika ani, berekukopura, adiparyuk Raja Hizkia bira, anyasik noutam ulamik ninye talebuka, yupu nyalamik deiyok kiamik nang nirya bulupdeibukce, sik nirya adiparyuk Allah el si eren aik damuk welebiyik.

²¹ Raja Hizikia ap, el amu tam pil don nang ap, amutuku talebuka, yupu nyana deiyok kiamik nang ap, Yehuda mutuku pil dolamik imam-imam nang ap, sik malye ulamik ning kilibuka, teleb kilina ati, aren ning bobiyik. Tonda, Allah el si eren aik ap, Yudea mutuku ap, mek likuka teleb kilina ati ara, aning bobuka arelbiyik. Sikce, ‘Aning obuka, Allah ati arepnuyapʼ tenen, yala yuk-yuk bukni, tekbarye nukuka kintibikce, bobuka arelbiyik kam ning ara ani. Ara, yim sapi basam ap, yim domba basam ap, domba basam mi ap, tonda yim kambing basam ap, nirya yuk-yuk tekbarye bobiyik. Bobiyikopura, Harun birye deiamukak, dadeipdanin yangalamikce, imam pil dolamik nang ati, Raja birye, “Anggunda, akam ning nirya dobuka opmunce, Allah Yahweh el arena ati, mesba deice deibuka, uku dongon pil dopnulume,” nyabuk.

²² Nyabukopura, sik imam nang arye, asapi basam obikce, ining ara dobuka, amesba deice dikeibik. Tonda, sikcuk yim domba basam tekbarye ap, domba mi tekbarye ap nirya ara, ‘Allah arye nun malye winin ning lyebuka, teleb kipdeipnamsilʼ tenen, obukabikce, ining dobuka amesba deice dikeibik.

²³ Aning akunum winibikopura, ‘Allah arye nun malye wininyap ning ara, kum kipdeipnusilʼ tenen, sikcuk akambing basam dobukabikce, Raja ap, el taleamuk nang nirya ap, sik nirya bulubuka wekmikce, Allah yupu kekenmika noutam, boyayik. Yayikopura, sik aunmek nang nirya ara, sik taruk dobuka akambing basam deice uk deibik.

²⁴ Winibikopura, sik imam-imam nang arye, akambing basam nirya ara, obikce ining kwebuka mesba deice uk dikeibik. Ara, amutuku ulamik Israel nang nirya ara, sik malye winilamik ning nirya, ‘Allah arye aning eiplirye, nun malye ning kilipnusilʼ tenen ati, winibik. Aning ara, Raja birye imam nang ati nyapdeibuk. “Anggunce malye ning kilina ati, kam ning obuka uku dongona ap, tonda Allah arena ati, kam ning obuka, uku dongona ap nirya ara, anggunce winipmunyeba, Israel tam unyak nang, sik malye unyak ning nirya ara kilipnamsile,” nyapdeiamuk touk winibik.

²⁵ Allah Yahweh arye, Raja Daud el dam lak nyana ati, Allah el yupu laka nyana deiyok nang, nabi Gad ap, nabi Natan ap, sik deice nyapdeiamukba, yanuka nyapdikopura, “Lewi yala nang ara, Allah el si eren aik noutam bung-bung ana el si ara, kecapi ap, gambus ap, bobana ati wipdeipnamlume,” nyapdeiamukba, wipdeiamuk touk, atalak Raja Hizkia babye, Lewi yala nanguk wipdeibukba, Allah el si eren aik pum tam kintinibuka tikik.

²⁶ “Winipnamlume,” akunum nyapdeibuka ati, sik Lewi yala nang arye, Raja Daud birye minop talak pong an ning, el si terompet, kintinip deibuk ning bobuka tikmikak, imam-imam yala nang nirya ara, sik terompet ton dobuka arebukce wipdeiamuk touk, Raja Hizkia babye, atouk winibukce, wipdeibukba, sik nirya kintinibuka tikmek.

²⁷ Tikmeka ani, Raja Hizkia birye, el aren ning uku dongona ati pil dona ara, aning winibukce, pitinkiamuka deice arye, deiyok koubuk. Allah ati aren ning arelyanganmik talak ara, sik awekmek nang nirya arye, Allah Yahweh ati, si eren mot nyanmek. Atalak sik bung-bung ana bobana kel nang ara, terompet lelim nyanmek. Tonda minop talak Raja Daud birye, kintinibuka deiamuk bung-bung ana, yuk yala ning babye, bopmekce, sik neiktoto mot nyanmek.

^28-29 Raja Hizkia ap, sik awekmek nang ap nirya arye, kutam tuku dipdongobuka kanupdongopmekce, Allah ati si erenmek. Atalakuk sik mot nyana kel nang ara, tuba mot nyanmek. Tonda, terompet bung-bung ana bobana kel nang ara, tuba bopmek. Wininmekce, sik nirya asukumuk tuba unmeka ani, Allah arena ati, kam ning obuka, mesba deice uku dongopmek ning ara, uku arye dibuka sirya dakuk. Akunum uku arye dibuka sirya dakukopura, Raja Hizkia ap, sik awekmek nang nirya arye, kutam tuku dikdongobuka kanupdongomekce, Allah ati si erenmek.

³⁰ Raja Hizkia ap, el amu tam bukni, amutuku nang talebuka ulamika deiyok kilamik nang ap, sikce, Lewi yala nang ati nyabik. “Anggunce, Raja Daud ap, nabi Asap ap, sikce liamdik mot adiparyuk nyamunce, nun ni koproba Allah Yahweh ati, si erepnamlume,” nyabik. Nyabukopura, amot nyanmek talak ara, Allah el si erena ati, awekmek nang nirya ara, sik kisok kanupdongobuka, mot weik tonun nyanmek.

³¹ Aning nirya akunum winipdobikopura, Raja Hizkia birye nyabuk. “Wini talak anggunda, ‘Allah el siuk erenamabe, el yupu uk talebuka teleb unamabe. Allah Yahweh el tam pia ati akunum kibabe,’ tenepmaluma ati, Allah ati anggunce telebe nyana ap, anggun malye winin ning kum kibuka kilina ati ara, kam ning dobuka, Allah el si eren aik dam boyalulume,” nyabuk. Nyabukopura, ayanmekce, bulubuka wekmek nang nirya ara, Allah ati telebe nyana ap, el aren ning ap, sik malye winin ning kum kin ning ap, ‘Uku dongonamapʼ tenen, kam ning bobuka arelyayik. Tonda, sik kanye aryuk, ‘Winipnuyabe,’ tenepmek nang arye, kam ning obuka, uku dongon ning ton boyanuka arelyayik.

³² Sikda, ‘Nun ni koproba Allah arye, nun malye winin ning kilipsilirye, lyelonamsilʼ tenen, kam ning opnarye, uku dongon ning boyayik ning ara ani. Ara, yim sapi basam ara, yupa weik tujuhpuluh (70) ekor ap, yim domba yupa weik seratus (100) ekor ap, tonda yim domba mi winiryuk nepmok ning yupa weik dua ratus (200) ekor boyayik. Aning nirya ara, Allah Yahweh el arena ati, kam ning opnarye, uku dongon ning ati ara, weik tonun bobuka arelyayik.

³³ Tonda, sik nirya adiparyuk, ‘Anye arepmap ning ara, Allah el ninguk ululeʼ tenen, bobuka arebik ning ara, yim sapi basam, yupa weik enam ratus (600) ekor ap, talye domba basam ap, kambing basam ap, yupa pia weik, tiga ribu (3.000) ekor ap boyayikba, sik awekmek nang arye, sik imam nang ati arebik.

³⁴ Kam ning ara, yupa pia weik tonun boyanganmika ati ara, sik imam-imam nang, sik apil dopmanto nang ara, ninye mitik tonun unmika ati, Allah arena ati, ‘Uku dongopnuyapʼ tenen, kam ning boyayik ning obuka, bola kona ati ara, pia weik anya arye, sik akintinipmik imam nang aryuk kum winipmanto kibuk. Winipmika ati, sikce sik kayapu nang ati morobikba, sik Lewi yala nang arye, ton melibuka bola kon pil dobik. Bukni, sik imam-imam nang ara, ton nang ara, adiparyuk akunum pia teleb kina pil ati, kipdeipdanmekce, kintinipmek bukni, ton tam nang ara kume, kum kintinibik. Ati, sik teleb kum kipdeipdanmek imam nang arye, apil donmek talak ara, sik kayapu nang, Lewi yala nang arye, kam ning opmek ning, bola kon pil dona ati melipmek. Deiyok ara, Raja Hizkia birye, “Wini talak anggun adiparyuk kintinip deipnamlume,’ nyabuk talak ara, sik Lewi yala nang ara, adiparyuk minop apil dopmik bukni, sik kayapu imam-imam nang, ton tam nang ara, sikcuk wininmika ati, kum kintibikce, teleb kum kipdeipdayik. Ati, sik Lewi yala nang arye, apil melibuka donmeka ani, atalak ara, ton imam-imam nang arye, teleb kibuka delina ati, pil ton kintinibik. Winibuka melipmeka ani, sik imam nang babye, weik tonun ton kintinibik.

³⁵ Allah arena ati, kam ning obuka, uku dongonmek ning ara, pia weik boyanganmik. Aning atouk ton, ayanmekce, bulubuka wekmek nang arye, ‘Allah ap, nun ap, teleb kibuka neika unamapʼ tenen, ansinilina ati opmik kam ning kalebuka, abasam-abasam nong arye, meta arye dopropmik ning ara, pia weik aubuk. Tonda, sik imam nang arye, ‘Anye arepmapye ning ara, pia teleb, sah kipnuyapʼ tenen, adiparyuk anggur mek ap, aining ning kintinibuka, mesba deice deipmek deice arye, dikeibik ning ara, pia weik aubuk. Mesba deice deibuka uku dongobikba, uku arye dibukopura, sirya dakuk. Minop talak ara, Raja Ahas birye, Allah el si eren aik bublan tirikdongobuk bukni, asum arye aning-aning nirya winipmek deice arye, Allah Yahweh el si eren aik pil don nang nirya ara, tupa tonap teleb kipdeibikce, sikce, ‘Apil nirya, awinibaba atouk, tuba awininamabe,’ tenebik.

³⁶ Aning nirya akunum winibuka, sirya dakik ning ara, Raja Hizkia ap, el taleamuk mutuku noutam ulamik nang ap, sik nirya arye kanye weik deibik. Ara, sikcuk kum bukni, atalak aryuk Allah arye, el tenen nang melina ati, el mikip deice arye melibukura, sik nirya arye, apil nirya minop dobuka sirya dakik. Ati ara, sik nirya kil-kil asa, kanye deibik.