2 Samuel 8 - Eipomek

Daud birye, asum-asum nirya, el mal olan nang obuka, kum danalilamuk ati, nyabuk yupu

¹ Yata barye talak akunum ubukopura, ninye deiyoknye Raja Daud, elce Pilistin nang olbiyuk. Olbiyukce, sik anang nirya ara, akunum obukabukce, Pilistin nang ulamik mutuku nirya ara, eluk doprobuk.

² Tonda, ninye deiyoknye Raja Daud ap, el yin talin nang ap arye, Moab mutuku ulamik nang ton, obuka sirya dakuk. Obuka sirya dakukopura, elce, “Sikda tuku deiceuk mapnamalume,” nyabukura mabik. Nyabukura, tuku deice mabik talak ara, sik winilye nang amapmik kan-kan arye, ninye bitinye-bitinye nang wibuka, opnin banmokba dibinmek. Ati ara, sik awinilye nang kan-kan arye, bokuka bitinye nang obik bukni, tonoknye bira, batakikba kam tuba unmok. Winipnin banmoka ani, ninye weik tam ara, obuk bukni, ninye mitik tam ara, kam tuba unmek. Ninye tonok-tonok wibuka batakaldongonmok, abatakdongopmok nang anyuk, kam tuba ulamik. Ati, sik Moab nang ara, ninye deiyoknye Raja Daud, el amu tam tamubuka ulamikce, el dekna ati ara, elti, yo bok weik tonun arelyangalamik.

³ Aning atonun, aminyan talak dukdongobuka, ninye deiyoknye Raja Daud birye, ninye ton Rehob, elce deiamuknye, elda ninye deiyoknye, Raja Hadadezer ap, el yin talin nang ap, obuka dakuk. Raja Hadadezer ara, Zoba mutuku noutam nirya, taleamukce ulamuk bukni, Daud ap, el yin talin nang ap arye, anye ap, el mapu silip ap nirya, obuka sirya dakuk. Zoba mutuku ara, pala weik mutuku tonok, Damasyik tam noutam uamuk. Atalak ara, Daud arye, weik balamuk mek, Efrata mek lilun mutuku nirya ati, ‘Na mikip weika arye, amutuku nirya talinuna ara, tonap talepkipdeipnamanʼ tenen, banmok talak ara, Raja Hadadezer binyak obuka dakuk.

⁴ Ninye deiyoknye Raja Daud ap, el yin talin nang ap arye, Raja Hadadezer olbiyik talak ara, ninye olbana ati, sik kuda basam balye deice bukuka ban nang, seribu tujuh ratus (1.700) yin talin nang ap, tonda talye tuku bisik yin talibuka ban nang, dua puluh ribu (20.000) nang nirya ap ara, tomobukabikce, tapu koubuka bukdeibik. Winibik ning ara, ninye olbana ati, kuda basam tapu kirikuka, tuku deice li balamuk ning ap, kereta mal olana ati bolamik kuda basam ap ara, ‘Bicakʼ tenen, yan milmil sekdongobik. Ara, ‘Winibuka ara, abasam arye, ton kum bobinamakʼ tenen, sik balye tam yan tub sekdobikba, aik bukdeibukba, aikuk bukik. Winibuk bukni, tuba batakuk kuda basam ara, tapu kirikdongobikura birikce, ninye olbana ning, el si kereta perang ton, akuda seratus (100) ton batakuk.

⁵ Tonda, Damasyik tam noutam bukni, weik asik dolamik asik si ara, Damasyik mutuku ulamik ninye arye, ninye deiyok Damasyik tam taleamuknye, Raja Hadadezer, el melina ati, yin nang yupa weik dopdeibik. Dopdeibikba yayik bukni, Daud ap, el yin talin nang ap arye, sik Damasyik mutuku arye yanmek yin nang, weika arye oplobikce, malye kibik. Sikce obuka, sirya dakik yin talin nang ara, sik dekna ati ara, dua puluh dua ribu (22.000) nang obik.

⁶ Winibukopura, Raja Daud birye, ‘Amutuku nang, na amu tam unamakʼ tenen ati, na yin talin nang arye, atam nirya kalikuka talinmak tenebukce, el yin talin nang kong ton, yuk-yuk bukni, Damasyik tam noutam deibuka balamukba, daulamikce, atam nang nirya, sik amu tam kipdobik. Tonda, amutuku nang nirya arye, Raja Daud amu tam kibuka ulamika ati, yo bok bobuka yanuka, Daud biti arelyangalamik. Tonda, atam noutam nirya ara, Allah Yahweh arye, ninye deiyoknye Raja Daud ati, elce dan mutuku do nirya, olbalamok talak nirya ara, Allah meliamuk deice arye, Daud el deice obuka bisina deiyok ning deibikba, teleb kibuka olbisilamuk. Tonok mutuku nang babye, Daud biti kum malye kibik.

⁷ Tonda, Damasyik tam taleamuk ninye deiyoknye Hadadezer, el amu tam pil dolamik deiyok-deiyok nang arye taleamik ning, ‘Mal olalbanak opnicakʼ tenen, lelin ning, el si ara, perisai nyalamak ning, kat dekna weik ning, emas deice arye moubuka deiamik ning ara, Daud birye aning nirya, alubuka doprobukce, adiparyuk ila tamubuka, Yerusalem mutuku bobiyuk.

⁸ Tonda aning atouk, yuk ning babye, ninye deiyoknye Raja Daud birye, kat dekna weik ning, el si perunggu ara, pia weika arye doprobuk ara, minop talak Raja Hadadezer elce taleamukba, ulamok mutuku noutam ara, Bita mutuku ap, tonda Berotai mutuku ap, amutuku-amutuku noutam nirya arye, akat ning perunggu doprobukce, tamubuka el mutuku bobiyuk.

⁹ Aminyan talak, ninye arye, “Raja Daud birye, Damasyik tam taleamuknye, Raja Hadadezer ap, el yin talin nang ap nirya ara, akunum obukabukce, sirya dakuk ning,” lake nyabikura, yuk ninye deiyoknye, Raja Tou ara, Hamat mutuku taleamuknye arye kekebuk.

¹⁰ Kekebuk ning ara, ninye deiyoknye, Raja Tou arye, el mi Yoram wibuka deibukce, “Raja Daud birye, Raja Hadadezer obisibuka ati, “Teleb winipmalum,” nyalbinulyame. Tonda, Raja Hadadezer, elce Damasyik mutuku taleamuk ning nirya ara, an Raja Daud birye, akunum obisipmumu ati, pia weik arye telebe. “Na ni koproba, Raja Tou arye nyaipmakile,” nyabuka, “Lak nyalbinamalume,” nyabuka dopdeibuk. Dopdeibukura, Daud dam binuka, ayupu nyapdeibukba, lak nyalbiyuk. Raja Tou arye, ayupu nyapdeibuk deiyok ara, minop talak ara, Raja Hadadezer arye, Raja Tou ap, elce taleamok nang ap ati, olanauk ulamdika ati, teleb kanye deibukce, ayupu dopdeibuk. Tonda, Raja Tou el mi Yoram birye, Daud el menenga arena ati, kat dekna weik ning, emas ap, perak ap, perunggu ap, aning nirya bobuka, ninye deiyoknye Raja Daud, el dam boyanuka arebuk.

^11-12 Ninye deiyoknye Raja Daud birye, el menenga ning, Raja Tou arye dobuka deipmokba, Yoram birye, Daud dam yanuka arebuk ning ara, dekna weik kat ning nirya ara, Raja Daud birye, ‘Na ni koprop Allah Yahweh, el si erena ap, el si kina ap ati, el tibuk arepnuneʼ tenen, aning nirya dobuka, sik imam-imam nang, sik dam arebukba, ‘Allah el ‘Naʼ tenen ning deibik. Aning atouk tonda, Daud birye, yuk mutuku-mutuku noutam nirya ara, sik winilamik ning obuka, sirya dakamuk mutuku nirya ara, sik emas ap, perak ap, yuk dekna weik ning ap, talamik ning nirya, Daud birye, alubuka dolamuk ning nirya babye, Allah el si erebuka kina ati, arebuk. Ara, Edom mutuku ap, Moab mutuku ap, Amon yala nang ulamik mutuku ap, Pilistin yala nang ulamik mutuku ap, Amalek yala nang ulamik ap, amutuku-amutuku noutam nirya ara, Raja Daud birye obukabukce, sik talilamik teleb ning, weika arye alubuka doprobukce, Allah ati arebukba, ‘Nun naʼ tenen, deibik. Tonda atonunuk, Zorba mutukunye, el si Rehob, elce deiamuknye, Raja Hadadezer arye taleamuk dekna weik ning babye, Daud birye, alubuka doprobukce, Yerusalem mutuku tamubuka bobiyukce, Allah el si erena ati arebukba, ‘Nun naʼ tenen, deibik.

¹³ Ura, Raja Daud ap, el yin talin nang ap arye, Damasyik tam ulamik nang nirya, sirya obuka dakukce, tamubuka el mutuku yayuk talak ara, ninye nirya, el teleb winilamuk ning nirya kekelamikce, Daud el si ati, weik arye erelamik. Amutuku noutam ulamik nang nirya ara, Raja Daud, el si kel bikamik. Ara, Edom mutuku noutam bukni, Asing tam mutuku ulamik nang, yupa pia weik, delapan belas ribu (18.000) yin talin nang, obisibuk ning kekebika ati, Daud el si weik arye kel kibikce, elti, weika arye, si erelamik.

¹⁴ Winibukopura, adiparyuk Raja Daud birye, aik dobuka, el yin talin nanguk, Edom mutuku noutam nirya ara, yupa yuk-yuk bukni, weika arye deibuk. Dobuka deibukba, ayin talin nang arye, Edom tam nirya kalikinmikba, sik Edom tam ulamik nang nirya arye, Raja Daud biti, amu tam kibuka ulamik. Tonda, atam noutam nirya ara, Allah Yahweh arye, ninye deiyoknye, Raja Daud biti, elce dan mutuku do nirya, olal balamik mutuku nirya ara, Allah meliamuka deice arye, Daud el deice mikip weik ap, ninye obuka, dakna deiyok ning ap deibukba, amutuku ninye nirya ati, teleb kibuka olbisilamuk. Tonok mutuku nang babye, Daud biti kum malye kibik.

Daud birye, ‘Adeiyok nang arye melinamakeʼ tenen, ninye wipdeibukba, el amu tamuk, pil dolamika ati, nyabuk yupu

¹⁵ Aning nirya, akunum winibukopura, Raja Daud elce, sik Israel yala ninye, dana-dana tam ulamik nang nirya ati ara, sik ninye deiyoknye Raja kibukce, talibuka ulamukce, yupu nyalamuk. Tonda, elce moubuka kalikuka taleamukce, sik Israel yala ninye nirya ati, pia teleb kibuka, diksukum yupu deice aryuk, sik yupu lipsisikuka bokilamuk. Elce ton tam nang ati, ‘E, sikda, na kayapu nang ati, sikti, teleb yupu nyapdeipnamne bukni, yuk tam nang ati ara, malye yupu uk nyanamneʼ tenen, kanye kum wilibuka ulamuk. Aning pia kum tenelamuk. Sik Israel ninye nirya ati ara, atonunuk tenelamukce, pia teleb kibuka anang nirya taleamukce, yupu nyalamok.

^16-17 Winibuka ulamuk talak noutam arye, Daud ninye deiyoknye, Raja kibuka taleamuk bukni, el melina ati, el amu tam pil yuk-yuk dona ati ara, deiyok koubuka, deiamuk nang ara, sik si ani. Ara, Seruya el mi Yoab ara, yin talin nang sik deiyoknye una ati, Daud birye el wipdeibuk. Tonda, Raja Daud birye, el taleamuk nang nirya ati, “Winipnamlume, aning kum winamlume,” nyapdeiamok ning bobuka, laka nyana deiyoknye bira, Ahilut birye deiamuknye, el si Yosafat wipdeibuk. Tonda, imam-imam pil dona ati ara, Ahitub el mi Zadok ap, Abyatar elce deiamuknye, Ahimelekh ap wipdeibuk. Tonda, amutuku noutam dolamik pil ap, winilamik nirya ap, ‘Tuba bikinamakʼ tenen, sekna pil dona deiyoknye bira, el si Seraya wipdeibuk.

¹⁸ Tonda, Yoyada birye deiamuknye, el si Benaya bira, Daud birye wipdeibukba, anye birye, Daud el koproba kalikuka melina ati, yin talin nang, sik deiyoknye ulamuk. Ara, sik kong si ara, Kereti nang ap, Peleti nang ap, ayin talin nang, sik deiyoknye ulamuk. Tonda, sik imam-imam nang pil dona ati ara, Israel nang ninye deiyoknye Raja Daud, el mapu koproba wipdeibukba, imam pil talibuka dolamik.