2 Samuel 23 - Eipomek

Raja Daud birye, yupu sirya akunum nyabuk yupu

¹ Daud birye, yupu sirya nyabuk yupu ani. Ara, Isai el mi Daud birye nyabuk yupu. Aning-aning nirya, alip tam ululnye, mikip weiknye Allah arye, ‘Anye bira, Raja ninye deiyoknye unamle’ tenen, wipdeiamuknye Daud. Minop talak ulamuknye Yakub biti, Allah arye, bico tenebuka, pia melilamukba, Yakub birye, Allah el si erelamuk. Allah arye, Daud biti wepdeibuk. Daud bira, Israel yalanye birye, Israel ninye nirya, sik kekena ati, mot weik arye erelamukce, nyalamuk. Daud birye, ayupu nyapdeibuk.

² Allah el si Yahweh, el Dib Kanye arye, na talima noutam arye, yupu teleb kibuka nyapdeipnukba, adeice arye yuk nang, sik kekena ati, laka nyalamse. Ara, Allah el Dib Kanye arye, na talima noutam nyapdeipnuk yupu ara, na sitang deice arye nyalamse.

³ Allah arye, Israel ninye ati, bico tenebuka meliamuknye bira, nati nyapnuke. Ara, mutuku yangan keil lelilamsil touk, Allah arye Israel ninye ati, pia melibuka kaliklamuk. Elce nyapdeipnuke. “Yatanye do, Allah ati, ilil ulya deice arye, ninye talina deiyoknye kina ati, malye winina kum aryuk, pia diksukum ulamlirye, Raja ululnye bira winilule.

⁴ Aning atonun ululnye bira, dua kum sum, keting panalyalirye, deiplye talak ara, dirina teleb ulamle atonun ulule. Tonda, anye bira mok cepliba, dola falamlebuk, aminyan keting ula donokliba, urasin teleb ulamle touk ulule. Raja birye, Allah ati ilil upliba, ninye taliplyopura, aninye ara, kanye delinyake. Ara, keting panalyalirye, keting ula deiplyopura, ninye arye kanye delinyaka atonun ulule.” Allah arye, na Daud biti nyapnuke, nyabuk. Nyabukopura, Daud birye, ayupu ton nyabuk.

⁵ “Tenipdelulume. Narye deipseba, dadeipdanin yangalamik nang, na yala ninye ara, Allah arye sikti, ‘Telebe,’ tenebuka, kanye kum delilul do? Anggun kele, Allah arye nati, “Winipnamsine,” nyabuka, nyalina yupu nyalilamsuk yupu ara, kum bataknamle, pia aunamle. Allah arye, ‘Wininamne,’ tenelamnuk ning nirya ara, tonok ning babye kum bataknamle. Elce tenepnuk ning nirya, dipkoprob na ap, na yala ninye ap ati, winipnamsile. Aning atouk, elce lyepnamnil ning ara, dipkoprob winipnamle. Tonda, na patalamnil ning nirya ara, elce tonok ning babye kum bataklirye, nirya arepnamnile. Nyalilamnuk ning nirya ara, kum bataknamle, aning nirya akunum kintinibuka arepnamnile.” Raja Daud birye nyabuk.

⁶ Nyabukce, ayupu ton dukdongobuka nyabuk. “Nyabuk bukni Allah ati, ‘Nun like,’ tenebikirye, malye weik wininyak ninye ati ara, ninye arye dula ning, sik taruk arye talina kum, aning ya arye sekuka, bai tam dolkwetelamak touk, Allah arye malye wininyak nang batakuka, bai tam dopkwetepnamle.

⁷ Tace weik ning ara, ninye arye pia kum talepmanto anya arye, yo dula arye do, besi ning arye do, lumubukabirye, anyaka deiplobikcakuk, uku dongonyake. Winilamikce touk, pia malye unyak nang ara, Allah arye, sik malye wininyak ninye batakuka, uku dongopliba, uku arye dibuka, sirya daknamle.” Raja Daud birye, ayupu nyabuk.

Raja Daud el melin ati, mikip weik yin nang ulamikba, ninye nirya arye, si erelamik nang ati, sekik yupu

⁸ Aning seknuyap ning ara, Israel nang talibuka, ninye deiyoknye Raja Daud, el mikip weik ulamik yin talin nang, sikda ilil tenena kum nang ulamik. Sik si ara, ani. Minyumanye ara, Hakmoni mutukunye el si ara, Ishabal ulamuk. Elda, sik atalak nang arye nyalamik nang, winilye mikip yin talin nang ati, “Kong Winilye Nang” nyalamik ning ara, (Triwira) elcuk deiyok kinannye ulamuk. El anye bira, tonok mal olal ban talak ton, el anye el tonok aryuk, ninye omuk nang yupa ara, pia weik delapan ratus (800) nang omuk. Tonda, sik aobuk nang nirya arye, cang weik keil poka arye, taplakuka domik keil poka babye, kum winibuka deiamuk.

⁹ Yin talinanye bitinyanye bira, “Kong winilye” ning ara, Ahohi arye deiamuknye, el si Dodo, elce deibuknye, el si ara, Eliazar ulamuk. Anye Eliazar ara, Raja Daud melibukba, sik Pilistin nang arye, ‘Israel nang ati mal olalbinamapʼ tenen, bulubuka wekmikak, sik anang birik. Winiprik talak ara, sik Israel yin talin nang nirya ara, ilil ubukura, adiparyuk kisikdobik bukni, Eliazar bira, ilil kum aryuk, asukumuk tikukce, Pilistin nang obuka, sirya dakuk.

¹⁰ Eleasar tuba pia, ‘Pilistin nang nirya ara, opnamneʼ tenen, pirinauk ulamuk bukni, atalak ara, el nong nirya ara, mitang kibuk. Eleasar el yu ya taruk deice arye, talilamuk ning nirya ara, el taruk tapmok ati, atalipmok ning nirya ara, pia batakdongopmanto kum ati, el taruk nirya kitipdopmok. Winyamuk bukni, tonok sum ara, Allah Yahweh arye, sik Israel yala ninye nirya ati, weik oldan ning, sik deice deibuk. Winibuk talak ara, Israel yala ninye, sik yin talin nang nirya ara, min talak arye tamubuka binmek nang ara, Eleasar el Pilistin nang onmok sukumuk, tamubuka yayik. Yayikopura, sik Pilistin nang opmika dipmekak ara, sik yin talin nang arye, talilamik ning nirya ara, ‘Nun tenen ning,’ tenen ara, yanuka alubuka doprobik.

¹¹ “Kong winilye nang,” nyanyak noutamak bukni, Winilinye bira, ninye si Age, elce deiamuknye, el si Shama. Shama bira, Harari mutukunye ulamuk. Ura, sik Pilistin nang bulubukabikce, Lehi mutuku noutamak wekelbanmek talak ara, tonok wa windam dang duk ining bi ning, el si kacang merah, wa piamikak ara, weik tonun palamuk. Awa windam ara, sik Pilistin nang arye, ‘Akacang merah ubula dopropnamapʼ tenen, piripdeyikbuk, Israel yala nang ap, mal oldanmekba, Israel nang nirya ara, ‘Pilistin nang arye obuka, kum danaipsicakʼ tenen, ilil ubukba, sik Pilistin nang dam arye kisikdakuka, bikbik abikce, bindobik.

¹² Sik Israel yala yin talin nang, weik tam nang ara, bikbik abuka, pola bindobik bukni, atalak ara, anye Shama elda, awa noutamuk tikukce, mal pia olanauk unmok. Wininmoka ani, Shama birye, sik Pilistin nang nirya, awa windam noutamak unmek ninye nirya ara, obuka sirya dakuk. Nirya obuk opura, awa windam nirya ara, obukabukce, eluk talibuk. Winibuka Shama birye, ninye weik obuk ati, Allah Yahweh arye, ninye weik olamaka deiyok ning ara, anye deice dopdeibukba, elce sik mal olan nang ati, obuka sirya dakuk.

^13-14 Aning atonun, yuk winiryuk ning, wa wiamne yubuka, lin talak li upnopura, ninye winilye nang bukni, sikda weik deiyok nang, ninye deiyoknye Raja Daud, el yin talin nang ara, yupa tiga puluh (30) mikip weik nang ap, tonda ilil tenena pia kum nang ap ara, ‘Nun ni Daud dam binamabeʼ tenen, pia min arye, mutuku si Adulam mutuku keil deiya dam arye koulukik. Ninye deiyoknye Raja Daud, elda akeil deiya pum tam, ninye kum eibuka opmanto kuma ak, pia teleb sukumak unmok. Ura, atalak ara, sik Pilistin nang, sik baju bol arye dobik tenda aik ara, Refaim mutuku damak binuka, dobuka unmek. Sik Pilistin yin talin nang nirya ulamik deiyok ara, Betlehem mutuku noutamak, anyuk ulamik.

¹⁵ Bukni, Raja Daud birye el deiamik mutuku ati, tuba pia tenelamukce, elce nyalamuk, “Se, Betlehem mutuku bisik bublan dam, pia teleb tuku lukne mek deibukce, balye mek ara, ninye arye ton, kwebuka arepnitingba, diptinyeura, kanye deiptinye tenenune!” nyabuk.

¹⁶ Nyabukopura, sik weik deiyok nang, yupa 30 deiyok nang kan-kan arye, sik mikip weik nang, sik winilye nang ara, sik deiyoknye Raja Daud birye, nyanmok yupu nirya ara, kekebikcuk, yupu kum tabik. Bukni, atalak aryuk, awinilye nang arye, sik Pilistin yin talin nang, bisik kikin kalikna ati, unmek tam arye, leibuka biyik. Sik winilye nang arye biyikopura, nyanmok tuku lukne dam arye, mek kwebuka tamubuka, Daud dam boyayik. Amek akunum kwebuka boyayik bukni, Raja Daud birye, ‘Kume amek kum dipnune,’ tenebuk. Utenebuk ati ara, Raja Daud birye, ‘Amek ara, na ni koprop Allah Yahweh, el si erebuka kinyak nang ati, arepnune,’ tenebukce, Allah el si erena ati, amek tuku deice diklobuk.

¹⁷ Amek diklobukopura, ninye deiyoknye Raja Daud birye nyabuk. “Diba, na ni Allah Yahweh arye, ‘Amek kum diptume,’ nyapdeipnutu atouk, dipkoprob nyapne. Amek ara, dipkoprob narye kum dipnune! Narye amek dobuka dipnyopura, winipmanto ning nyapnune. Ara, anggunce, ‘Nun ni Daud melina ati, omutuku bipyeba, Pilistin nang arye opsikca babye, teleb uka,’ tenepmak nang ati, winipmanto yupu nyapnune. Ara, yu nang arye, awinilye nang optingba, sik ining saklyopura, ara sik ining dobuka, dina atonun una ati, ‘Aning pia kum winipnune,’ tenebukce,” nyabuk. Ati ninye deiyoknye Raja Daud birye, amek ara, pia kum dibuk. Aning ara, sik yupa winilye, mikip weik nang ap, ilil tenena kum nang ap, winipmake ati, tenebukce amek batakuk.

¹⁸ Aning atonun, sik yin nang ilil tenena pia kum nang, sik si ati ara, “Kong ara, tiga puluh deiyok-deiyok nang” nyalamik. Ura, Yoab el weit koprop, el si Zeruya, elce deiamuknye, Abisai bira, akong tiga puluh deiyok nang ara, elce deiyok kipdobukce, sik deiyoknye ulamuk. Winibukopura, minop talak arye Abisai bira, sik mal olan nang, ninye yupa pia weik, tiga ratus nang (300) ton omuk. Aning winyamuka ati ara, Abisai el si ati, amutuku ulamik nang nirya arye, akunum bikamik.

¹⁹ Awinibuk ning ati, atalak ulamik nang arye, el si bikamikce, aning ara, 30 nang ton aulamik bukni, el tibuk, ‘Se, elda weik mambulnye tenelamikce, el si weika arye kibuka, si erelamik. Tonda, akong 30 nang ati, sik deiyoknye una ati, elce deiyok koubuka, deiyoknye ulamuk. Bukni, atalak ninye arye, ‘Weik tonun mikip weik ap, ilil kum ap unyak deiyok nang ara, kong winilye,” nyalamik nang ara, el Abisai bira, sik mikip ulamak atonun ning ara, pia kum ulule,’ tenelamik.

²⁰ Yuk yin nye ton, el si Yoyada. Elce deiamuknye, el si Benaya ulamuk. Elda Kabseel mutukunye ulamuk. El anye bira, ilil una pia kumnye ulamuk. Winilamuka anya arye, mikip weiknye ulamuk. Anye birye, Moab nang weik nang bitinye omuk. Aomuk nang, sik ni koproba ara, Ariel ulamuk. Tonda, anye Benaya ara, ton talak ara, im noutamak arye, weik moul ning, el si salju sakuk. Winibukba, Benaya elda adiparyuk, tonok mutuku tuku pum tam noutamak wekukce, atuku pum tam wekdobuk talak ara, yu ning el si singa tonok ton, aunmokak, elce obuk.

²¹ Tonda, aninguk bukni, yuk talak babye, Benaya birye, Mesir mutuku nang kan-kan, mikip weiknye ton obuk. Ara, ilil una pia kumce, el ninye ona ati taleamuk yo, lubuka taleamuk ning, el si ara tombak, taleamuknye biti, Benaya birye, aMesirnye dam yayukopura, el kama aryuk talibuka yayuk. AMesirnye el taruk deice arye, talipmok weik ninye on yo, yin tombak ara, Benaya birye adiparyuk, alubuka doprobuk. Atombak doprobuk opura, aMesir mikip weiknye, adiparyuk oplobuk. Mesirnye el mining tombak arye oplobuk.

²² Aning ara, Yoyada el mi Benaya birye, winibuk ning asekmabe. Benaya ara, weik mambul ning bomuk ning ati ara, amutuku ulamik ninye arye, el si ton bikamik bukni, elda, sik “Kong Winilye Nang,” nyalamik nang si ati, si erebuka kilamik touk, el Benaya ara, atonun si erebuka kum kilamik.

²³ Bukni, sik akong tiga puluh (30) ulamik yin talin nang kan-kan ara, el Benaya, mikip weik ning winilamuka anya arye, el si ton bikamikce, elti, kibuka si erelamik. Winibuk bukni, elti, ara, “Elda sik Yupa Winilye Nang ulamik atonun kume. Elda sik tonye kum ulule,” nyalamik. Bukni, pia teleb ubuk ning ara, ninye deiyoknye Raja Daud birye, ‘Na babye, nong kalekinanye yin talin nang, sik deiyoknye unamleʼ tenen, Benaya ara, erepdeibukba, weiknye kibuka ulamuk.

²⁴ Sik amutuku ninye arye, “Sikda Kong Tiga Puluh (30) nang,” nyalamik nang ara, sik si ani. Ara, Yoab el weit koprop Asael, tonda, Dodo el mi Elhanan Betlehem mutukunye, tonda,

²⁵ Herob mutuku nang, sik si Sama ap, Elika ap,

²⁶ Tonda, Palti mutukunye Heles ap, Tekoa mutukunye Ikes, elce deibuk mi Ira ap,

²⁷ Tonda, Anatot mutukunye Abieser ap, tonda, Husa mutukunye Mebunai ap,

²⁸ Ahohi mutukunye Zalmonda ap, Netofa mutukunye Maharai ap,

²⁹ Netofa mutukunye Baana, el mi Heleb ap, Ribai el mi Itai bira, Gibea mutukunye bukni, Benyamin yalanye ap,

³⁰ Piraton mutukunye Benaya ap, weik mutuku bukamukak, Gaas mutukunye Hidai ap,

³¹ Beet-Araba mutukunye Abialbon ap, Bahurim mutukunye Asamawet ap,

³² Salbon mutukunye Elyaba ap, Guni mutukunye Yasyen ap,

³³ Harari mutukunye Sama, elce deibuk mi Yonatan ap, tonda Harari mutukunye Sarar, el mi Ahiam ap,

³⁴ Maakha mutukunye Ahasbai, elce deibuk mi Elifelet ap, Gilo mutukunye Ahitofel, elce deibuk mi Eliam ap,

³⁵ Karmel mutukunye Hesrai ap, Arbi mutukunye Paerai ap,

³⁶ Tonda, Zoba mutukunye Natan, elce deibuk mi Yigal ap, Kat yalanye Bani ap,

³⁷ Amon yalanye Zelek ap, Beerot mutukunye Nahari, elda Zeruya el mi Yoab bira, el ninye olbana ati, kat baju ongolamuk ning bobuka bananye ulamuk.

³⁸ Tonda, Yetri mutukunye Ira ap, Yetri mutukunye Gareb ap,

³⁹ Het mutukunye Uria ap ara, akunuma. Sik ayin talin nang, sik yupa nirya ara, tiga puluh tujuh (37) nanguk ulamik. Sik ayin talin nang nirya ara, “Kong Tiga Puluh (30)” nyalamik nang, mikip weik nang ulamikba, sikti, kibuka si erelamik.