2 Samuel 22 - Eipomek

Raja Daud birye, Allah el si Yahweh ati, ‘Telebe,’ nyabuka, mot sebuk yupu

¹ Allah el si Yahweh arye, Raja Daud biti, akunum lyebukopura, Daud kanye delin mot senmok. Aning ara, urdem ati kume, ‘Daud optinye’ tenen, el oldan nang nirya ap, Saul ap arye, Daud dobolamikce, opterelamik bukni, Allah arye meliamukba, kum omika ati, Raja Daud birye, ayupu mot deice arye sebukce, Allah el si erebuk.

² Raja Daud birye, mot deice sebuk yupu ara, ani. Na ni Allah, anda Yahweh ulyame. Na oldan nang oldanmapye talak nirya ara, ance melibuka kalikinilyame. Tonda ancuk lyenilyame. Wininilyama anya arye, ‘Yu nang arye opnamap’ tenen, mutuku yangan keil deice, bikbik abuka binirye, dungnubuka ulamne tonun, anda lelildongonilyame. Aning atonun ton, ‘Yu nang arye opnamap’ tenen, malye nang kum wekmanto keil aik pum bisik wekuka, dungnubuka banun tonun, anda aning atonun wininilyame. Ancuk talipdongopniminba, ikin unilye ning nirya, noutam arye lyenilyame.

³ Na ni Allah, na ilil unilye talak nirya ara, keil deiya wekuka, dungnunye touk, ikin unilye talak nirya ara, ancuk melibuka lelildongonilyama anya arye, an aminyan tam dungnubuka banune. Yin talin nang arye, ‘Mal oldan talak ara, mal dobikceura, biklyak’ tenen, kelapye lilibuka winilamak touk, ance melibuka kalikinilyame. Na melina ati, kelapye atonun lelinilyame. Na lyena deiyoknye bira, an uka. Na ni Allah, anda keil bukamlye mutuku dup amu tam dungnul banun atonun, an mikip deice arye lelilamnilame. Pia yu nang arye, ‘Anye bira opnuyap,’ tenebikirye, mal wiyanganinyak bukni, na ni koprop ance lyenilyame.

⁴ Ati ara, narye na ni koprop Allah el si Yahweh ati, ‘Melipnilyame,’ nyabuka moropnyopura, na oldan nang noutamak unmanya babye, Allah arye lyenilyame. Na ni koprop Allah, pia mambulnye anya arye, ninye nirya arye, el si erenemaka ara, pia teleb uka.

⁵ Dipkoprop weik mek opliba, ninye amek noutam wekikiba, amek arye angnapdongoplirye, sik ninye dipmanto winilamle touk, yu nang arye, na opmanto upnike. ‘Opnikiba dipnamne,’ tenepsirye, ikin kanye bobuka, teniltonauk ulamse bukni, ance lyepnulume. Mek arye obuka, ninye dipna arye binamana ati, winilamle tonun, yu nang arye, ninye olamak ning arye, na nong ara, opmanto ulamnik bukni, ance lyepnulume.

⁶ Tonda, na ulamse talak nirya ara, tapu arye ninye koupdongopnaba, binmanto kum ulamak touk, dipna dam ulamsirye, ‘Se, wini talak dipkoprob dipnamnarya,’ tenepse bukni, ance lyepnulume. Tonda, aning atonun, maka wena pum bisik wekliba youlamle touk, na babye atonun winyamnukba, dipmanto ulamse. Dipmanto ulamse bukni, ance lyepnulumba, tuba kam unune.

⁷ Ara, na kanye imun wamnukba, malye kanye bobuka, ulamse talak nirya ara, Yahweh anti, weik arye malye nyalamkise. ‘Na ni Allah, na melipnilyame,’ nyalamsa deice arye, Allah an si eren aik, an uminyak arye, ayupu kekepnulume. Tonda, na engepna arye, malye yupu nyalamsa nirya ara, an amul arye, na nyalamse ning kekelamnulumce, lyelamnulume.

⁸ Tonda, mutuku-mutuku nirya lulukukce bindakuk. Tonda atalak ara, im ulul ning deiyok kibukak nirya ara, weik arye lulukukce lulukdayuk. Ara, urdem arye kume, Allah el yu weik arye winibuka ati, aning-aning nirya lulukdayuk.

⁹ Winipmanto ara, el u pum bisik ara, uku buk dilamukba, tulum weik arye welelamuk. El si bam bol pum bisik ara, uku buk weik arye welelamuk. Tonda, el si bam bol pum bisik ara, uku dilamle kalum weik arye, welelamukba, laka uamuk.

¹⁰ Winipmanto ara, Allah el si Yahweh arye, im noutam ara, dilikukba dua kan-kan arye, tukwak yayuk. El yan amu tam ara, kunukuk dua kan-kan deice arye yayuk.

¹¹ Winipmanto ara, yuk talak ara, malaikat sik si Kerub, sik deice lakuka welebuka balamuk. Tonda, kumanya mikip deice arye, welebuka balamukce, pol deice arye balamle atonun laklamukce, minopce yangalamuk.

¹² Ninye arye, cang baju dobuka, sik nong ongolamak atonun, atalak ara, weik arye kunukuk dua ap, weik mok ap, el nong dana-dana tam ongopdongobuka deiamukce, weik arye kunukamukba, yangalamuk bukni, ninye arye eipmanto kum ulamik.

¹³ Atalak ara, Allah el dirina weik ulamuka noutam aryuk, bebeya lakna ap, uku buk ap, adua noutam aryuk welelamuk.

¹⁴ Winilamuk talak ara, Allah el si Yahweh arye, el mikip im deice arye, limang opmana atonun ubukba, ninye nirya kekelamik. Allah el si Yahweh ara, aning-aning nirya, deice tam ulirye, mikip weik ulya deice arye, el yupu ara, weik arye nyalamukba, ninye mutuku-mutuku nirya kekelamik.

¹⁵ Tonda, Allah arye meliamsukba, nun yin talen nang arye, yin tapu loplobuka, mal pilamikba, nun oldan nang nirya, ilil ulamukba, bikbik abuka bindobik. Aning atouk, Allah im deice arye dopdeibukba, bebeya weik arye lakukopura, nun oldan nang nirya, ilil ubukba, bindobik.

¹⁶ Na ni Allah, el si Yahweh arye, ninye wenebuk talak ara, el yu ubukba, yupu mikip arye nyalamukce, el upum arye “Gus,” nyabukba, tuku amu uamuk ning nirya ara, laka ubuk. Laut mekwen amu tam nirya ara, tengeplobukba laka ubuk.

¹⁷ Allah ara, im deice eitam ululnye birye, na lyena ati, ikin ulamse talak ara, im deice arye, el taruk dopkwetebukce, talibuka dopropnuke. Weik mekwen dipmanto nang, mek pum tam arye ulamak touk, ikin weik ulamse talak noutam arye, dobuka lyepnuke.

¹⁸ Aning atonun, nati, ‘Optibye,’ tenelamnik nang, weik arye malye kibuka, mikip weik ulamik bukni, na mikip ara, kum mitanguk upnukba, kum lyepdanmanto ulamse bukni, na ni koprop Allah arye nati, lyebukapnukce, teleb updeipnuke.

¹⁹ Ayu nang ara, sikce nati, ‘Talye mangkau arye optibye’ tenen, dobolkiriklamnikce, pirilamnikba, ikin pia weik ulamse bukni, Allah el si Yahweh arye, nati, pia melilamnukce, lyepnuke. Na talima kwa dipnuke.

²⁰ Nara, oldan nang noutamak ulamsebuk, Allah arye nati, tuba bico tenelamnukce, kanye deiamnuka anya arye, lyebuka dopropnukce, pia telebak deipnuke. Weik pala mutuku noutam tikikiba, malye ning tonok ning babye, nun dam kum yanmanto ulye touk, Allah arye, na dobuka teleb mutuku deipnuka ati, kanye deibuka telebuk unune.

²¹ Na diksukumnye ulamse ati, Allah el si Yahweh arye nati, teleb kwepdeipnuke. ‘Anye bira malye do, teleb do?’ tenen, dipdenukba, narye malye ning ton kum winilamse ati ara, teleb winilamse touk, yupu bokeipnukce, dekna arepnuke. Elda na dam ulamokce, eipnukca.

²² Aning ara, urdem ati kum nyapne. Na ni koprop Allah, el si Yahweh arye, ‘Wininalyame,’ nyapdeiamsuk yupu moubuka kekelamsirye, el yupu talibuka ulamse. Nara, binan arye ulamsirye, Allah elce, ‘Wininamlume, aning ara, kum wininamlume,’ nyamsuk yupu uk, kekebuka dobolbalamsirye, Allah batakuka, malye kum winilamse. Ati ara, dekna weik ning arepnuke.

²³ Allah arye, ‘Wininamlume, aning ara, ton kum wininamlume,’ nyapdeiamsuk yupu nirya ara, na dam deipnirye, pia moubuka tuba-tuba tenenune. Elce, ‘Wininamlulume,’ nyapdeiamsuk yupu nirya ara, pia kum bataklamse. Ayupu nirya ara, tuba talibuka unune.

²⁴ Tonda, elce kel bikamuka ara, narye elti, mitik malye ning babye ton kum winilamse. Tonda, ‘Na malye upnyak’ tenen, pia moubuka kalilamsirye, malye winin ning kum winilamse. Allah arye, moubuka dilamnukba, telebuk ulamse.

²⁵ Na diksukumnye ulamsirye, malye ning ton kum winipsa ati, Allah el si Yahweh arye, na dam ulamnukce, moubuka dilamnukba, na diksukum winilamse touk, ‘Anye bira, telebuk ulule’ tenen, teleb kipdeipnukce, dekna weik ning arepnuke.

²⁶ Na ni Allah, na kele. Yata nang do nirya, Allah anti, kum batakikirye, an damuk dukdongobuka, pia moubuka talinyak nang ati ara, ancuk sikti, kum batakalyame, pia melilyame. Ance, ‘Wininamsine, winibuka melinamsine,’ nyasilyam touk, pia aninguk winilyame. Malye ning tonok ning babye, kum wininyak nang ati ara, an babye, malye ning tonok ning babye, kum arisilyame. Diksukumuk ulyamba, elinyabe.

²⁷ Malye winina pia kumce, telebuk unyak nang ara, ance telebuk kililyamba, elikinyake. Bukni, talima malye-malye unyak nang ati ara, sik wininyak ning moubuka dipdemince, wenelyame. Walwal atonun kum ulyame, ninye wininyak ning nirya, moubuka dilyamce, yupu bokolisilyame.

²⁸ Tonda, talima namin kibuka, amu tam unyak nang ara, melibuka lyelyam bukni, talima erenyak nang ara, moubuka dimince, wenebuka amu tam kibuka delilyame.

²⁹ Na ni Allah, an si Yahweh, anda weisa dirina lalamle touk ulyame. Na ni Yahweh, ikin weik uniliba, ‘Yata wiripnun do?’ tenen, teniltona unmanye talak nirya ara, kunuknak atonun, noutam unulul bukni, ance dirinauk kilinilyame. Na wininamne ning nirya ara, ancuk laka nyaniminba, teleb bisikuk banune.

³⁰ Ati, an mikip melipnilama deice arye, na mal olan nang yupa weik uptinga babye, nara yaribuka uptinirye, anang ati olbitinye. Allah an mikip meliniminya deice arye, weik marikna marikamtu bukni, bisibuka bindoptinye. Ara, ikin weik unulul ning ara, malye kiptinirye, telebuk ulamtinye.

³¹ Tonda, Allah an tenelyam bisik ara, pia teleb bisikuka. Ance ninye ati, ‘Wininamlyame, abisikuk banalyame,’ nyasilyam ning ara, teleb bisikuka. Malye ning tonok babye kum ulule. Tonda, an Yahweh arye, nyasilyam yupu ara, pia dipkoprob uka. Malye ning tonok babye, kum ulule. Tonda, yin talin nang arye, ‘Mal dobikiba, biksilyak’ tenen, kelapye dobuka, lelildongolamak tonun, ninye nirya ikin uplye talak nirya ara, ‘Allah elcuk melibuka kalikinamsil’ tenen, antibuk dib tenebibya deice arye, ance teleb ubuka melisilyame. Winisiminba, malye ning, nun dam ton kum yanuka, kum winipsutue.

³² Aning ara, urdem ati kum nyapkine. Deiyok ara, nun ni koprop Allah, anda Yahweh, tonokuk ulyame. Yuk Allah ton, pia kume. Allah an tonok, mutuku yangan keil atonun umince, lelisilyame. Lelipsimince, nunti kalikisilyame. Yuknye ton aning kum winiptue, an tonoka.

³³ Tonda, Allah elcuk nati, mikip deiyok ning arenulule. El mikip deice arye, pia pi dobuka, mikip kildelinulule. Tonda, elcuk na banun bisik nirya babye, telebuk kiliniliba, teleb ubuka banune.

³⁴ Allah arye, na yan mikip ap, kat kina deiyok ning ap, areniliba, rusa basam yan kat arye, weik mutuku konak welebuka balamle atonun, Allah arye, na mikip kipdeipnilirye, weik mambul pil babye doptinye. Ikin weik upnutua babye, el melinilya deice arye, tuba pil doptinye.

³⁵ Tonda, Allah arye, mikip deiyok ning, na taruk deice arepnilibuk, na mal olan nang ati, malye kipnirye olbitinye. Mikip deiyok ning weik arenilya ati, na yin ara, besi yin arye singipmanitinga babye, yin tapu piptiniba bungkweptaliptinye.

³⁶ Tonda, na ni kokprop Allah, ance pia melibuka lyenilyam deice arye, na mal olan nang nirya ati, bisibuka malye kinune. Winipmanto ara, yin talin nang arye, ‘Mal dobikiba, biksilyak’ tenen, kelapye dobuka lelilongolamak touk, Allah ancuk, melibuka kalikinilyame. Anda weik deice tam ulyamnye bukni, an amu tam ununye dam yamince, teleb kibuka erepdeipnulume. An meliniminya deice arye, weiknye kipdeipnulume.

³⁷ Ance nati, ‘El yan kum duklabum nyapnamle, tonda yan kum tamupnamle’ tenen, bisik karayong teleb yapdeipniminba, talye kanye bobuka, tanlye binune. Na wininamne ning nirya ara, ance teleb kipdeipnilama deice arye, walwal una kumce, telebuk unamne.

³⁸ Ton ning ara, narye mal olan nang nirya, obuka yaknin balamse. Winilamsirye, anang nirya obuka, sirya dakamse. Anang nirya min kum obuka, sirya dakse talak ara, na mutuku tamubuka kum yase.

³⁹ Narye, mal olan nang obisipnin balamse talak ara, sikce tuba tonap tamubuka, kum tekmanto ulamik. Sik nirya, obuka daklamsiba, na yan damuk sakuka paupmalamik.

⁴⁰ Aning ara, urdem ati kume. Ance ninye olbana ati, an mikip weik arepnuluma deice arye olbalamse. Tonda, an meliamnuluma deice arye, na mal olan nang nirya ara, obuka sirya daksiba, na si erena ati, na yan dam tuku gutam dipdongobuka winilamik.

⁴¹ Na ni Allah, an mikip arye meliamnuluma deice arye, na mal olan nang nirya ara, ilil ubukba, sik aminyan tamubuka, bikbik abuka, bai tam sakuka balamik. An mikip deice arye, na mal olan nang nirya ara, narye obuka, sirya daknin balamse.

⁴² Ati ara, sik mal olan nang nirya arye, ‘Se, yatanye birye melipsutu do?’ tenen, malye nyalamik bukni, yuk nang arye sikti, kum melilamik. Tonda, ‘Allah el si Yahweh arye melipsutu do?’ tenen, nyabuka, malye nyalamkik bukni, Allah ance na mal olan nang ati, bico tenebuka, kum kekeplumce, kum lyepdomlume.

⁴³ Narye, aninye obuka, sirya dakamse talak nirya ara, atu butbuta lubuka yamulamaka atonun, anang obuka, sirya daklamse. Tonda, narye sikti, obuka bisilamsa ara, ninye weik arye, bisik deice bakirye, bental yanibuka balamak touk ulamse. Anang nirya opnin balamsirye, sirya daklamse ati nyapne.

⁴⁴ Tonda, na ni Allah, na mutuku nang bukni, ‘Anye bira obisipnamabe’ tenen, olamnik bukni, ance nati, anang noutamak arye lyepdeipnulume. Tonda, amutuku ninye, sik talina deiyoknye kipdeipnulumba, sikda na amu tam unyaka anya arye, na mapu unyake. Nara, sik ninye deiyoknye tuba unune.

⁴⁵ Tonda, ance meliamnulumba, na kum bikamse ninye, yuk mutuku-mutuku daunyak nang babye, nati ilil upliba, mitang arye, na amu tam yanuka bukna arye, narye nyanye yupu nyapnyopura, adiparyuk, na nyalamne yupu nirya ara, adiparyuk amul kekebuka dobolbanyake.

⁴⁶ Sik mandipna weik ulamik bukni, nati ilil weik upliba, talima mitang asa aryuk upliba, sik weik keil aik pum tam arye, yuk nang arye, kum wekmanto ulamuk bukni, ilil ati sirim talibuka yangakirye, na amu tam bukuka unyake.

⁴⁷ Ati ara, na ni Allah, an si ara Yahweh, kamuk ulyamnye ati, telebe nyapkine! Tonda, anda mutuku yangan keil lelilamsil touk, ance melibuka lelildongolamsulume. Allah anda mutuku yangan keil atonun usimince, nun Lyena Deiyoknye, nun ni Allah, an si weik arye erenamabe.

⁴⁸ Na ni Allah, na oldan nang arye nati, ikin ning na deice deipnikcopura, ance tamubuka anang ati, wenebuka oplyame. An melinilyama deice arye, yuk mutuku-mutuku daunyak nang nirya ati, obuka sirya daksiba, na amu tam unyake.

⁴⁹ Yuk mutuku nang arye, nati tapu koulamak touk, ikin ning na deice deipnik bukni, ancuk na ikin ulamsak lobuka lyepropnulume. Tonda, nara oldan nang noutamak ulamse tam, sikce nati, opmanto winilamnikba, ance lyepropnulume. Na ni Allah, ance mikip ning arepnulumba, na mal olan nang nirya obuka, sirya daksiba, ance na dobuka, sik deice tam deipnulume. Aning atonun, ance melibuka lelipdongopnulum arye, nati, ‘Optibye,’ tenelamnikce, dobolbalamnik nang nirya ati ara, ance wenebuka oplumba, sikce ton kum opnik.

⁵⁰ Na nio, aning-aning nirya, akunum winilamnuluma ati ara, amutuku-amutuku ninye nirya, noutam unamne talak arye, teleb mot sebuka, an si Yahweh ati, si erenamkunune. Narye, teleb mot sepnirye, an si Yahweh ati, pia erenamkunune.

⁵¹ Allah ance, ‘Anye bira Raja unamle’ tenen, wibuka ereiyamnulumnye biti, meliamnuluma deice arye, na mal olan nang nirya, opnin balamsa ani, Israel ninye yala nirya ati, sik ninye deiyoknye Raja una ati, tuba tamubuka ereipnulume. Tonda Allah ance, ‘Anye bira, Raja Israel unamle’ tenen, bico tenebuka wiamnulumnye bira, na Daud biti, batakana pia kum aryuk, tuba nati, teleb ubuka melinilyame. Tonda, na ap, na mapu silip ap, dadeipdanin banamak ninye nirya ap ati, batakana pia kum aryuk, bico tenebuka winisiminba, telebuk pia unamake. Ayupu nirya ara, Raja Daud birye, mot sebuka, Allah el si ati erenmokce, nyabuk.