2 Samuel 13 - Eipomek

Amnon ap, Tamar ap ati, nyabuk yupu

¹ Daud birye deiamuknye Absalom, el weit kil si ara, Tamar ulamuk. Akil ara, ninye dona kumce, urdem ulamukbuk, el urasin pia teleb kil ulamuk. Amnon babye, Daud elce deibuk mi bukni, yuk kil arye deiamuknye ulamuk. Tonda, Tamar el lin yuk kil ulamuk. El anye Amnonda, Tamar ati, ‘Se, akil dopnamneʼ tenen, pia moun dolamuk.

² Atalak noutam ara, Amnonda, ‘Se akil Tamar ap, nun neika maptinimnye,’ pia tenenauk ulamuk bukni, ‘Akil ara, na weit kil ulula ati, elda dipkoprob kum doptinye ati, yata wiriptinye do?’ tenenauk ulamuk. Tonda, Amnon birye, Tamar ap, neika mana ara, pia kum winipmanto. Ara, Tamar bira, ninye dona ap, yuk nang ap, neika una ap, kum kil. Elda weluk ulamuk ati, aning ati tuba-tuba tenenauk ulamukce, Amnon adiparyuk, ikin kanye bobukce, kanye talima olalamuk.

³ Bukni, Amnon el kwit koproba, tonok weik kelnye ulamuka anya arye, dukunubuka malye ulamne ning ton, bikilinanye ulamuk. Anye, el si ara Yonadab, e li koproba, el si ara, Simea ulamuk. Simea bira, Daud el du ulamuk.

⁴ Yonadab birye, Amnon biti nyabuk, “Amnono, anda ninye deiyoknye Raja, el mi ulyame. Bukni, anda yata ning deiyok ati, asum-asum nirya, tuba tenenauk umince, malye kanye bobuka ulyam do? Anda yata tenemince, malye kanye uk bobuka ulyam do?” nyabuka asipdeyuk. Nyabukba, Amnon birye, Yonadab biti, tamubuka nyabuk. “Yo ura, nara na kwit Absalom, el weit kil Tamar ati, moun donune,” nyabuk.

⁵ Nyabukopura, Yonadab birye tamubuka, Amnon biti nyabuk, “Aning ara, kanye ikin bon ning kume. Teleb ning ara, ani. Amnon an min arye, maminye sukumuk binuka mabukapmince, uk dinmalye nang arye, mikip kumce, mitang ulamle atonun, winibukapmince, mapnulyame. Winipmaminbuk, aminyan talak, an ni koproba yalirye, yanuka asipkilyopura, ance nyapnamlyame. “Naio, anti moropkin. Ance Tamar biti, ‘Telebe,’ teneptumce, nyapnutumba, elce na dina bobuka yanutue. Bobuka yaturye, na din dipnamatinye sukum aryuk, adin ning ara, yanuka dapturye, el taruk aryuk arepnutuba, narye diptinye,” nyabuka moropnulyame. Yonadab birye, Amnon biti nyabuk.

⁶ Nyabukopura, Amnon adiparyuk, ‘Na ni birye, se, na mi ara, uk dinmale, tenepnamanilʼ tenen, uk din nang ulamle atonun kibuka, tamubuka amsuna deiceuk mabuk. Winipmoka ati, ninye deiyoknye Raja Daud bira, ila tamubuka, el mi Amnon dam dilyayuk. Adilyayuk talak ara, Amnon birye, el li koproba Daud biti, nyabuk. “Naio, ance na weit kil Tamar biti, ‘Telebe,’ teneptumce, nyaptumba, Tamar bira, na dam yaturye, mitik din ning, kue yanuka dapturye, el taruk koproba arye, arepnutuba, narye diptinye,” nyabuka morobuk.

⁷ Nyabuka morobukba, Raja Daud birye, anyapmok yupu nirya ara, el kilmu Tamar, el dam nyapdeibuk. Ara, “Tamar anda, an du Amnon dam binulyame. Winiminyopura, Amnon el din ning dapnulyame,” nyabuk.

⁸ Nyabukura, Tamar kekebukopura, adiparyuk Amnon el aik binuka dinmokba, Amnon bira, el man amsuna deiceuk mapmokba eibuk. Winibuka ura, Tamar adiparyuk, ‘Roti din ning dapnunʼ tenen, roti dana ati deiyok ning, el si adonan, mitik tonun doprobuk. Dopdobukopura, el Amnon dinmokak arye, kue dana ning kintinibuka deibukce, mitik din ning, el si kue, Tamar birye dabuk.

⁹ Aning akunum dabuka, sengabukopura, Tamar adiparyuk kue danmok ning, pala ning, piring atonun ning dobuka, ‘Amnon dipnulʼ tenen, akue lukuka dina ati, kintinibuka deibuk. Bukni, Amnon birye, adiparyuk din ning kue ara, kum dibuk. Ati, Amnon birye elce, el melina nang ati nyabuk. “Na aik pum tam unmalum nang nirya ati, bai tam binululume. Ninye nirya ara, anyak arye kutukuka, yukak bindoplulume,” nyabukba, kekebikce, sik nirya bindobik.

¹⁰ Aninye nirya, anyaik noutam arye kutukuka, yukak biyik talak ara, Amnon birye, Tamar biti nyabuk, “Wini talak, ance dapmalam din ning kue ara, dobuka bobuka, na manun sukum boyalyame. Boyamince, na yanuka arepniminyeba, dipnune,” nyabuk. Nyabukba, Tamar birye, Amnon nyabuk touk winibuk.

¹¹ Bukni, atalak ara, Tamar birye akue doprobukce, Amnon dam binuka ariyuk talak ara, Amnon birye, awel kil talibukce, nyabuk. “Na weit kilo, wini talak ara, anda na weit kil, na dam yamimba, na ap neika mapnuname,” nyabuk.

¹² Nyabukba, akil arye tamubuka nyabuk, “Se na duo, winina ara, pia meme.” Na du ance, ‘Na tenena kum ning, aninguk winiptinyeʼ tenen, pia pi dona meme. Sik Israel yala nang nirya ara, atouk malye un ning ton, pia kum unyake. Ati ance, ‘Mikip arye talipnirye, malye kibuka deipnune. ‘Nun neika mapnuname,’ tenenmalam ning ara, bataknulyame, na duo. Aning winina ara, pia malye weik ati, aning atonun ning ara, nun Israel ninye arye dipkoprob kum winiptibye,” Tamar birye nyabuk.

¹³ Tonda ayupu ton nyabuk. “Ato ning winipniminyopura, nati pia malyeto winipdeipniminyopura, nara dan sukum binuka duknuptinye do? Kum wiriptinye. Tonda, an babye, sik Israel nang nirya arye, ‘Se, el Amnon bira, akunum weik malye upmalnye,’ nyabuka, yap-yap anamkiake. Ati teleb ning ara, ance nun ni koproba, Raja ati nyapnulyame. Nyapminyopura, dipkoprob nun ni koproba Raja, elce, anti, ‘Kumeʼ kum nyapnamkile. Na kanye ara, elce, ‘Yo, akil ara, an dopnulyame,’ nyapkiliba, dopnamnilame. Kumopura, pia kume,” Tamar birye nyabuk.

¹⁴ Tamar birye nyabuk bukni, Amnon birye, Tamar nyamok ning ara, kum kekebukce, Amnon elda mikip weiknye anya arye, Amnon birye el weit kil, el nong mikip arye talibukabukace, el tenepmok touk, malye kibukce, ubula yobuk.

¹⁵ Amnon birye, aning akunum winibukopura, elce Tamar biti, adiparyuk, ‘Elda na likeʼ tenen, yu weik ubuk. Kapul talak ara, Amnon birye Tamar biti, kanye deiamukce, moun dilamuk bukni, elce el weit kil ati akunum malye kibuk talak ara, adiparyuk, ‘Na likeʼ tenen, yu weik ubuk. Winibuk ati, Amnon birye, el weit kil Tamar ati, “Anda adiparyuk beo,” nyabuk.

¹⁶ Nyabuk bukni, Tamar birye Amnon ati, tamubuka nyabuk. “Se na du, ance yata ning ati, aning winipnilam do? Ance nati akunum malye kipmanilam ning ara, dipkoprob weik malye kipdeipmanilame. Bukni, na du ance, na yakniminyopura, ance aning winipmalam ara, dipkoprob weik malye ning winipnilame. Arup ning ara, mitik malye bukni, aning ara, malye weik ning,” nyabuk. Nyabuk bukni, Amnon birye Tamar nyabuk yupu ara, moubuka kum kekebuke.

¹⁷ Atalak aryuk, Amnon el melina kamnye biti yukubukce, ayupu nyabuk. “Akil ati bobuka bimince, bai beo, nyapminyeura, bilyopura, adiparyuk, na aik bublan tirikna ning arye, pia dikdongopnulyame,” nyabuk.

¹⁸ Nyabuka ati, Amnon el melilamuk kamnye birye, Amnon nyapdeipmuk touk, Tamar bira, yakuka dopkwetebuk. Winibuk talak ara, Tamar el adiparyuk, el cang baju taruk dam arye dipdongobuka, nong nirya ongon ning ongobuk. (Ura, minop talak noutam ara, ninye deiyok nang, Raja-Raja nang, sik kilmapu, ninye min kum domne kilapu ara, ato cang baju uk ongolamika anya arye, Tamar bira, aning atouk ongobuk.)

¹⁹ Awelnye birye, Tamar yakuka, bai dopkwetebuk talak ara, Tamar adiparyuk sice buta dobuka, el kisok deice deibuk. Winibukce, el ongopmok cang baju, el si juba kwilikuk. Winibukce, akil el taruk bitinye arye, el asok deice lelipdayukce, ninye dipmakiba, weik arye engelamak atouk kibuka, engepra banmok.

²⁰ El aik koproba tamubuka bikyikopura, daunmokbuk, Absalom birye Tamar eibuk. Eibukopura, elce asipdeyuk. “Arup talak ara, Amnon birye anti, malye kipdeipmakil do? El mikip arye ubula yopkuk do? Winipopura, na weit kil, aning ara, laka nyana meme. Anda mangkau asa unulyame. Ance ton ap, aning atibuk tuba pia tenenauk bataknulyame. Amnon elda, an du koproba ulula atia, daupmalye. Ati ara, awinikuk ning ati, ninye yuk nang keken dam ara, laka pia kum nyapnamlyame,” nyabuk. Absalom birye nyabukba, Tamar adiparyuk, mangkau asa ninye babye una kum sukum una atouk, tonda yuk kilapu ap, neika una kum aryuk, ninye arye kilapu pia batakikiba, pia ikin kanye bobuka winilamak touk, el bidamnye yuk kanye tenena deiceuk, el du Absalom, el aik pum tamuk ulamuk.

²¹ Aminyan talak ara, awinibuk ning nirya ara, yuk nang arye, laka nyabikura, ninye deiyoknye Raja Daud akunum kekebuk. Kekebukce, pia yu weik ubuk. Yu weik ubuk bukni, elce el deiamuk mi Amnon ati, ‘Wenebuka opnune,’ kum tenelamuk. ‘Dauplye,’ tenelamukce, talye tunim abuka ulamuk. Deiyok ara, Daud el kil arye, el mi Amon min yuma talak deiamokak ati, Amnon biti kanye weik delilamuk.

²² Tonda, Absalom bira, Amnon pia malye weik uamuk ning ati, pia tuba tenelamuk. Utenelamuk ati, Absalom birye, Amnon biti, yupu tonok ning babye, pia kum nyalamuk. Sik bitinye ara, yupu neika kum sisiklamdik. Deiyok ara, Amnon el weit kil Tamar, malye kipdongamuk ning ara, tuba tenenauk ulamuka ati, yu ubukba, tuba tenelamukce, yupu neika kum sisiklamdik.

Amnon birye, el weit kil Tamar malye kibuk ning ati, Absalom birye, kwang dakuk ati, nyabuk yupu

²³ Keting tamun bitinye akunum ubukopura, Absalom birye, Bahal-Hasor mutuku, ara Efraim tam noutam uamuk. Absalom el pil melin nang arye, el domba basam potong toun pil donmeka ani, sirya dakna talak ara, weik kwalina kwalibik. Winibukopura, Absalom birye, el kayapu nang nirya ati, Raja Daud elce deiamuk nang nirya ati, “Amutuku yalulume,” nyabuka, yukubuk.

²⁴ Absalom adiparyuk, el li ninye deiyoknye, Raja Daud dam biyukce, nyabuk. “Naio, wini talak ara, na domba basam potong toun kwalina yupnamana ati, nara an amu tam ununye birye, tenepmana ara, ani. Na ni an ap, an amu tam pil dona nang nirya ap ara, omutuku yamunyeura, nun neika kwalina dipnamabe,” nyabuka asipdeyuk.

²⁵ Bukni, ninye deiyoknye Raja Daud birye, tamubuka nyabuk. “Kume, na mio, ance, ‘Anggun nirya yanamlulume,’ nyapmasilam ning ara, meme. Winipmanto ara, nun nirya, an dam yapyopura, an ikin kipdeipkinyabe,” nyabuk. Nyabuk bukni, Absalom birye Raja biti, “Kume na nio, anggun nirya ara, yangana uka. Aning ara, teleb uka,” nyabuka, tuba-tuba pi dobuka, nyanauk unmok. Bukni, Absalom el li Raja Daud bira, kum yayuk. Kum yayuk ati, Daud birye Absalom biti, “Teleb aryuk, domba basam potong kon talak ati, yun sum dakwalibuka diplulume. Winipminyopura, ‘Allah arye teleb kipdeipnamsilʼ tenen, moronamne. Aning ara, telebe uka,” nyapdeibuk.

²⁶ Nyabukura, Absalom birye tenebuka, arye nyabuk. “Aning ati ara, na kwit Amnon bira, ‘Telebe,’ teneptumopura, el ap, nun ap neika ansinibuka bitibye,” nyabuk. Nyabuk bukni, ninye deiyoknye Raja Daud birye, “Kume na mio, Amnon babye kum meliptu. El ap neika kum binamale,” nyabuk.

²⁷ Bukni, Absalom birye tuba morona ap, tuba-tuba warikuka nyana ap unmoka ati, ninye deiyoknye, Raja Daud birye, Amnon ap, tonda Raja Daud, el mapu yuk nang nirya babye, ‘Telebe dabinyake,’ tenebukce, aning nyabukba, sik nirya, Absalom melibikura biyik. Biyikopura, Absalom birye, din ning pia teleb ninguk, yubuka kintinipmok. Aning ara, sik Raja nang arelamak atonun ning, kintinibuka deibuk.

²⁸ Atalak ara, Absalom birye, el pil melibuka don nang ati, “Winiplulume,” nyabuk. Ara, anggunce moubuka kalikuka dipdemunce, Amnon el anggur yu mek, kanye walwalan mek weik tonun dinmalya ani, akunum diplirye, el kanye nirya walwalaplyeura, narye anggunti, “Adiparyuk, anye oipnululume,” nyapnamsine. Nyapsinyopura, Amnon adiparyuk oipnamnulume. Ati, anggun ilil una kume. Aning nirya ara, na Absalom aryuk, anggunti nyabuka deipnamsina ati, aning nirya ara, na deiceuk upnamle. Ati winipnamlulume. Aning ati ara, anggunda ilil una kume. Mikip arye winipnamlume. Tonda, ‘Se, anye opnuyap do? Bataknuyab do?’ tenena ap deice ara, pia kume. Asum aryuk winipnamlume. Aning nirya ara, na Absalom deiceuk upnamle. Absalom birye, el amu tam pil melin nang ati nyabuk.

²⁹ Absalom birye nyapdeipmuk touk, el pil melibuka don nang nirya arye winibik. Winibik ning ara, Absalom el yupu nyapneba, kekebuka, un nang nirya arye, Amnon oplobik. Obik talak ara, ninye deiyoknye Raja Daud, el mapu yuk nang ton, Amnon obik ning ara, eibik. Ebikopura, sik anang nirya, adiparyuk sik keledai basam balye deice bukuka, yuk-yuk bikbik abuka, bindobik.

³⁰ Sik anang tuba bisik noutam arye, tamubuka sik mutuku koproba yanganmek talak ara, yuk nang arye, aning nirya dipkoprob winibuk touk, kum bukni, sikce tilila ati, Raja Daud biti awinipmek ning ati nyabik. “Se na nio, an mi Absalom birye, nun deiyoknye, an mapu nirya ara, akunum obuka, sirya dakmale. Tonoknye babye, kum batakmal, nirya opmale,” nyabuka, laka nyabikba, ninye deiyoknye Raja Daud kekebuk.

³¹ Nyabikura, atalak ara, ninye deiyoknye Raja Daud, adiparyuk tikukabukce, el mining ongopmok baju kwiribukce, wiliklobuk. Ara, ‘Se, na mapu nirya dipmakeʼ tenen, bico ubuk ati, mambul kanye bobuk. Winibukopura, Raja Daud adiparyuk, tuku deice mabukce, engebuk. Ninye deiyoknye Raja Daud, el amu tam nang nirya ara, sikce aning eibikce, sik babye, sik nong deice ongopmek baju nirya, kwiribuka wiliknauk ubikce, engebik.

³² Winipmek bukni, Raja Daud el kwit koprop, Simea arye deiamuknye, el si Yonadab ara, ninye deiyoknye, Raja Daud biti nyabuk. “Kume, nun deiyoknye Raja Daud. Anda, ‘Se, na mapu nirya ara, akunuma. Absalom birye opmalba, sik nirya dipmakeʼ tenen, an Raja Daud, kanye pia tenena ap, an ilil una ap, unmakila ara, bataknulyame. Na kanye ara, el babye Amnon tonok opmalba, dipmale. Aning ara, min talak malye uamuk ning ati, kwang dakmale. Ara, Absalom el weit kil Tamar ati, Amnon birye Tamar el nong deice, malye kipdeiamuk talak arye, dukdongobuka, wini talak noutam nirya, Absalom birye aning tuba tenelule. Aning ara, Absalom birye, tuba tenelamuk deice arye, wini talak ara, Amnon akunum opmale.

³³ Ati ara, Raja Daud anda na deiyoknye ulyame. Ance, ‘Se, na mapu yuk nang nirya ara, dipkoprob akunum opmalba dipmake,’ tenena kume. Absalom birye opmalba, dipmalanye bira, Amnon tonoka,” Yonadab birye nyabuk.

³⁴ Aning winibuk talak aryuk, Absalom el babye, yukak kwarabuka biyuk. Atalak ara, ninye deiyoknye Raja Daud, el asik dam kaliklamuknye, elce dinmokba, Horonaim mutuku arye yangan bisik deice bukni, abukamuk mutuku kon deice tam arye, koulukuka yanganmek nang ton eibuk. Atam arye ninye weik koulukuka, yanganmekak eibuk. Koulukuka yanganmekak eibuk ning ara, el anye adiparyuk, bikbik abuka ninye deiyoknye Raja Daud, el dam binuka laka nyabuk.

³⁵ Ura Yonadab birye, ayupu kekebukura, Raja Daud biti nyabuk. “Naio, adipdelyame, an mapu ara, aunmake. Na arup talak, na deiyoknye Raja Daud anti, nyapmakin touk, ‘An yuk mapu nirya ara, kum opmake,’ nyabuka, laka nyapmakunu nang ara, atia,” nyabuk.

³⁶ Yonadab yupu akunum nyabuka, sirya nyayuk talak ara, ninye deiyoknye Raja Daud, el mapu adiparyuk, aik pum tam wekik. Winibik talak ara, sik nirya bulubuka engebik. Tonda, Raja Daud ap, el yupu nyapneura, amu tam kekelamik nang nirya ap ara, bico ubukba, sik babye neika engenmek.

^37-38 Sik nirya arye, Amnon obuk ning ati, engenmek bukni, atalak ara Absalom el yuk bikbik abuka biyuk. Ara, Raja Gesur mutuku binuka ulamuk. Gesur mutuku talibuka ulamuk ninye deiyoknye bira, Amihur el mi Talmai arye, amutuku talibuka ulamuk. Amutuku noutam biyukopura, keting tamun winilye deice arye, amutuku ulamuk. Atalak ara, Raja Daud birye, pia Amnon ati, tenenauk ulamukce, ikin kanye bolamuk.

³⁹ Bukni, aketing kipna winilye akunum ubukura, Raja Daud bira, Amnon ati, bico ubuk ati, engelamuka ani, batakukura, akaren arye ila tamubuka, Raja Daud birye, el mi Absalom ati, weik arye bico tenebukce, ‘Se tonap epdatinimnye,’ tenelamuk.