2 Peterus 3 - Eipomek

Yesus tamubuka yanamle talak ati, nyabuk yupu

¹ Na kayapu, na kanye delisunune. Minop arye tonok surat ton seksise bukni, wini talak ara, asurat bitinye ning ara seksine. Abitinye sekeipsin surat ara, asurat nyalulum deice arye, diksukum kel kiyamlum ning ara, ‘Ila tamubuka kanye arye moubuka tenenamlum’ tenen, sekeipsene.

² Ara, Allah el yupu laka nyalamik nang, nabi nang diksukumuk ulamikce, laka nyalamik yupu ap, tonda nun Deiyoknye Yesus Kristus, nun Lyenanye birye nyapdeibukura, ‘Na yupu dobuka peterebuka banamak’ tenen, Rasul nang wibuka deiamuk nang arye peterelamsik yupu ap, ‘Anirya ara, ila tamubuka tonap tenenamlum’ tenen, asurat sekeipsene.

³ Ara, weik mambul tenenamlum yupu ara ani. Ara, sirya talak Yesus tamubuka yanamle talak, dam akunum uplyopura, Yesus el yupu ati, lyab-lyab nilik-nilik abuka nalisice nang yanganamake. Lyab-lyab nyabuka, nilik-nilik asinyakce, sik malye pataplye ninguk tenebuka, pia malye-malye wininamake.

⁴ Sikce nalibuka nyanamsiak yupu ara ani. Sikce, “Kume, Yesus arye, ‘Tukwak mutuku tamubuka yanamne,’ nyalilamuk yupu dan do? ‘Yanamne,’ nyalilamuk bukni, min kum yanmale. Nun ni yapu diamik talak arye dibuka, dipdongobuka danoutam talak nirya ap, wini talak babye, aning-aning nirya ara, minop arye ulamuk touk tuba upnin balule.

⁵ Aning-aning nirya kweipdeibuk talak arye dipdongobuka, wini talak babye, aning nirya atouk ulule.” Ayupu nyabuka nalibuka nyamsiake. ‘Ayupu ara, tilila yupu’ tenen, akunum kel kinyak bukni, sikce, ‘Aning kum tenepnuyap’ tenen, talye lubakinyake. Sikce, ‘Ayupu ara kum tenepnuyap’ tenen, lubakinyak ning ara nyapnusine. Ara, Allah arye, “Winipnamle,” nyabuka, el yupu nyabuk deice arye, im ap, im noutam ulul ning nirya ap kwepdeibuk. Tonda, tukwak mutuku ap, tukwak ulul ning nirya ap ara, mek dobuka dobukce, mekwen noutamak danerye, “Aning-aning nirya dalyame,” nyabukura, atouk kwepdeibuk.

⁶ Tonda, aning atonun aminyan ara, Allah arye nyapdeibukura, mok weik arye pia celamukbuk, mekwen weik arye deibuka deice arye, minop talak ulamuk ning nirya ap, ulamik ninye nirya ap ara, mekwen arye dibukura, kum dayuk.

⁷ Allah arye ayupu nyapdeibukura, aning ubuk touk, Allah el yupu nyabuka deice arye, wini talak ulul im ap, tukwak ap, tonda im ap, tukwak ap noutamak ulul ning nirya ara, tenebuka tenepce deibuka kalikilule. Aning-aning nirya ara, tenebuka tenepce deibuka kalikilamlya ani, apia daulamlye bukni, Allah teneplye talak arye, elti, yaniptabuka, pia malye winin nang ati, yupu bokeiplirye, wenebuka oploplyopura, kum ubuka daneipnamle. Atalak aryuk, wini talak tukwak mutuku ap, im noutam ulul ning nirya ap ara, Allah teneplye talak arye, el yupu nyaplibuk uku arye dipnamle. Allah arye, ‘Na tenepse talakuk, aning nirya kum ubuka deipnamne,’ tenelula anya arye, aning ara wini talak ati, talye tenebuka tenepce deibuka kalikilule.

⁸ Winipnamle bukni, na kayapu amambul nyapnusin yupu ara, luba kina pia kume. Ara, Allah el kanye ara, ‘Liki tonok sum ara, keting tamun yupa weik 1.000 tahun atouk ulule,’ tenelule. Atouk, ‘Keting tamun yupa weik, 1.000 tahun ara, liki tonok sum atouk ulule,’ tenelule.

⁹ Aning ati ara, ‘Yesus tukwak mutuku tamubuka yanamle,’ nyalilamuk yupu ara, yuk nang arye, ‘Kume, Allah arye nimalya ap asa aryuk, pil donamsile,’ tenenyak atonun, anggunce aning kum tenenamlulume. Yuk nang ara, ‘Allah arye nimalyap asa pil dolule,’ tenenyak touk, pia kum tenenamlume. Aning kum bukni, Allah arye, sik nirya ati, ‘Se, aninye mutuku sirya, im sirya nirya, sik malye wininyak ning nirya, bataktingce, tamubuka diksukum bisikuk, binuka utingura, tonoknye babye, sik malye winina deice arye, nirya dibuka, kum danana kume,’ tenesulule. Utenesulula ati, tenepce adiparyuk, wenena kumce, aning-aning nirya kum kum danipmasile. Ati, elce nunti eibuka, ‘Yata wiripnamak do?’ tenen, nimalyap arye, dinauk usulule.

¹⁰ Winilul bukni, Allah arye tenyamuk sum akunum uplyopura, nun mankau kanye bopmabyebuk, winipmanto ara, ubula don nang duknubuka talye karin arye yangalamak touk, Yesus Kristus tamubuka, tukwak mutuku yanamle. Atalak ara, Allah arye nyapdeiplibuk, im noutamak ulul ning nirya ara, adiparyuk tunim abuka, kum daneiplibuk, weik lelim nyapnamle. Winiplyopura, tukwak mutuku ap, im ap, aulye ning, deiyok ning nirya ara, weik uku buk arye dibuka, sirya daknamle. Winiplyopura, Allah arye, tukwak mutuku ap, tukwak mutuku ulul ning ap, ninye ati kwepdeiamuk arye memenyak ning nirya ap ara, kum ubuka daneipnamle.

¹¹ Aning-aning nirya ara, na nyapmasin touk, Allah arye malye kibuka oplobuka, kum ubuka daneipnamle. Aning ati ara, anggunda yata ninye atouk ubuka unamlulum do? Kume. Yesus tukwak tamubuka yanamla ati, ‘Allah arye wibuka tenyamuk sum ara, dan sum yanamle do?’ tenen, kintinibuka pia dinauk unamlulume.

¹² Winibuka unamlulum talak nirya ara, diksukumuk unamlulume. Ara Allah arye, ‘Aning wininamak’ tenen, el yupu deice nyasilye touk, malye una kumce arye, diksukumuk ubuka unamlulume. Tonda, ‘Asum ara, minopce yatue’ tenen, pil pia pi dobuka, palibuka donamlume. Yesus tamubuka yalyopura, im ap, im noutam ulul ning nirya ap, weik uku buk diplirye, sirya daknamle. Weik uku buk dilirye, bupu weik uplyopura, awinilya deiyok ning nirya ara, telepropnamle. Kum ubuka daneipnamle.

¹³ Anyapmasin touk, anirya ara, winipnamle bukni, Allah arye, “Im deice winibuk ning ap, im noutamak winibuk ning ap, tukwak winibuk ning ap kwepdeipnamsine,” nyabuka, nyapdeiamsuk touk, ‘Winipnamsil’ tenen, kintinibuka dinauk unyabe. Im deice winibuk ning ap, tukwak mutuku winibuk ning ap, kwepdeipnamsil noutamak ara, malye una kum arye, diksukum unyak ninyeuk unamake. Yuk malye winin ninye nirya ara, pia kume.

Asurat sirya dangna ati, sekuk yupu

¹⁴ Aning ati ara, na kayapu, anyapmasin ning nirya ara, ‘Allah arye winamsil’ tenen, kanye deiplumce, kintinibuka dinauk ululuma anya arye, ‘Allah nyasilye touk, diksukumuk wininamap’ tenen, pia pi dobuka pirilenamlulume. Wininamluma deiyok ara, ani. Ara, ‘Allah arye ninye nirya ati wenebuka bokeipnamsil talak ara, dipdesilirye, “Aninye ara, malye un ning kum upmale. Sikda diksukumuk unyakce, na ap dukdongobuka, teleb-teleb ubuka neika unyabe,” nyabuka deipnamsil’ tenen, teleb ubuka unamlulume.

¹⁵ Tonda, ayupu ara, moubuka tenenauk unamlulume. Ara, nun du koprop Paulus ara, Allah arye weik kel kina deiyok ning aribuka deice arye, Paulus arye sekeipsuk touk, nun Deiyoknye Yesus minpola wenena kum arye, dinauk usulula ara, talye ati kume. Elda, ‘Ninye mutuku-mutuku nirya lyeptinye’ tenen, dinasululce, minopce kum wenesulule.

¹⁶ Paulus arye Yesus tamubuka yalibuk, winipnamle ning yupu ati, weik kel kiyamukce sekeipsuk touk, el yuk surat sekeiyamsuk ning noutam babye, ayupu ati weik kel kiyamukce sekeiyamsuke. Ura, nun kele, asurat sekeipsuk ning noutamak ara, ninye ikine aryuk moubuka tenepting yupu ulule. Allah dipkoprop kum kel kibuka unyakce, kanye talima bokoltonauk unyak ninye ara, aikin yupu dobuka tamubikirye, tilila yupu ap, tabakdobikirye, tilila yupu uk laka nyabuka peterenyake. Wininyaka atonun, Allah el yupu yuk ning babye, tamubikirye, tilila yupu nyabuka peterenyake. Winibikcopura, Allah arye aninye nirya wenebuka oplopnamle.

¹⁷ Aning ati ara, na kayapu, siktilila yupu peterena ninye arye wininyak ning ara, anggun akunum kel kipmaluma anya arye, ‘Aning nyanyak yupu pia kum kekenamabe’ tenen, kanye moupropmunce, kalikildanamlulume. Allah yaniplobice ninye malye wininyakce, tilila yupu peteresicebuk, mankau arye luba kibuka diba tenepmunyak, ‘Yuk bisik bobisinyak’ tenen ati, anggun kanye mouplulume, nyapsine. Sik malye winin ninye arye, wininyak ning ap, nyanyak yupu ap deice arye, tilila ning mankau arye ubuka, diba tenepmunyebuk, yuk bisik bobisikceura, ‘Wini talak akunum diba teneplumce, tunim abuka winilulum ning batakmunyak’ tenena ati nyapsine. Ati, kanye mouprumunce kalikildanamlulume.

¹⁸ Yuk yupu diba tenebuka kum wininamlulum bukni, nun Deiyoknye bira, nun Lyenanye Yesus Kristus kel kibuka el ap, dukdongobuka ululum ning ap, Yesus bico tenepsilirye, talye melisilye ning ap, ‘Weik upnin banamsil’ tenen, pia palibuka pil donamlume. Ara, nun Lyena Deiyoknye Yesus Kristus ati, nun nirya el si weik arye erebibirye, ‘Elda weik mambulnye tenepnamap’ tenen, Allah moronune. Ara, ‘Wini talak babye, aminyan doryanamle talak nirya babye, el siuk weik unamle’ tenen, Allah moronune. Telebe, akunuma. Na Peterus arye nyapsine. Asukum anyuk sekuka deipsine.