2 Peterus 1 - Eipomek

Peterus arye, ‘Telebe’ nyana ati, nyabuk yupu

¹ Na kayapu, telebe nyapsine. Asurat ara, na Simon Peterus arye seksene. Yesus Kristus lyebuka talipnuka, ati el piluk donune. Tonda, ‘Na yupu dobuka peterelbanamle. Rasulnye unamle’ tenen, Yesus arye wibuka deipnuke. Allah kanye deipsukce, nunti el yupu ap, nun diba tenen ning ap, areamsukak, dobuka talyamubu ning, pia teleb ulye touk, anggun babye, atonun upsukbuk, diba tenebuka, na nyapman ning talibuka ululume. Nun Lyena Deiyoknye Yesus Kristus ara, Allah ulule. El diksukumuk ulya deice arye anggun ap, nun nirya ap ati, diba tenena ning areamsukak dopdobupu. Anggun nirya ati asurat seksene.

² Anggun nirya ara, Allah ap, nun Deiyoknye Yesus ap, akunum kel biknamluma anya arye, ‘Yesus ap, Allah ap, anggun ap, kanye dukdongobuka ululuma deice arye, telebuk unamlulum’ tenen, Allah morosunune. Ara, Allah arye bico tenepsilirye, talye melibuka arisulul ning ap, Allah ap, neikauk teleb ubuka umunce, teleb kanye bobuka una ati arisulul ning ap, ‘Weik upnin banamsil’ tenen, Allah morosunune.

Allah wibuka deipsukce, ‘Wininamak’ tenen, yukupsuk ning ati, “Talibuka unamlulume,” nyabuk yupu

³ Allah el weik mikip deice arye, nun nirya ati, ‘Aninye ara, bola koplobuka kam pia unamake. Tonda, na Allah unye touk, diksukumuk unamak’ tenen, patapsilye ning nirya ara, akunum areamsuke. Ara, ‘Diksukumuk unamak’ tenen, deiyok ning areamsuka nirya ara, el ap kanye dukdongobuka neika ubirye, el ulul ning nirya kel bikanyaba deice arye, akunum areamsuke. Tonda, tuba arisulule. Allah arye nun nirya ati, nyapsuka ara, ‘Aninye ara na mapu unamake,’ tenenyamsukce, el weik mambule ulula ap, el pia teleb-teleb ubuka dirina weik ulula ap deice arye, akupsukce yukamsukce, wibuka deiamsuke.

⁴ Allah weik mambul ulirye, pia teleb-teleb ubuka ulula deice arye, “Weik mambul pil donamsine,” nyabuka, pia teleb nyalin yupu akunum nyalilamsuke. Ayupu areamsuka ara, talya urdem ati kume. Deiyok ara, Allah arye, “Wininamsine, aning ton wininamsine,” nyalisilye yupu deice arye, nun nirya ara, ‘Nada Allah pia diksukumuk unye touk unamak’ tenen, areamsuke. Tonda, adeiyok ton aupmale. Ara, sik yuk ninye, Kristus ati diba kum tenenyak ninye arye, ‘Malye un ninguk wininamap’ tenen, pataplibuk tenenyake. Wininyaka deice arye, dipkoprop sik kanye talima, pia malye-malye uplibuk malyeuk unyake. ‘Aninye ara, pia malye unyaka atonun, na mapu ton kum unamak’ tenen, Allah arye nunti, el teleb nyalin yupu areamsuke.

⁵ Ara, Allah arye, ‘Sik diksukumuk unamak’ tenen, el pia teleb nyalin yupu akunum areamsuk ning ati ara, anggunce pia pi dobuka pil donamlum ning ara, laka nyapnusine. Anggunce Allah ati, diba akunum tenyamlum bukni, pia diksukum una ara, tonap tabakanamlulume. Diksukum una ning aupmasilyopura, pung un bisik una ati, weik kel bikna kina deiyok ning ton tabakanamlulume.

⁶ Weik arye kel kina deiyok ning akunum aupmasilyopura, anggun nong ap, anggun un ning ap, ‘Malye ubibyak’ tenen, pia kalikilamunce, memelonamlulume. Anggun babye, anggunti kalikdamunce, kalikdana un ning akunum aupmasilyopura, ikin ning auapsilya babye, batakna kum arye, pil pia palibuka dona ati, una deiyok ning ton, tabakanamlulume. Batakna kum arye, pil pia palibuka dona ati winin ning, akunum aupmasilyopura, Allah diksukumuk ulye touk, teleb mikne un ning ton tabakanamlulume.

⁷ Allah ulye touk teleb mikne un ning akunum aupmasilyopura, yuk diba tenena nang ati, bico tenebuka, nimalye arye una deiyok ning ton tabakanamlulume. Yuk diba tenena nang ati bico tenebuka nimalye arye una deiyok ning akunum aupmasilyopura, yuk ninye nirya ati, bico tenebuka melilana deiyok ning ton tabakanamlulume.

⁸ Aning-aning nirya upsilirye, tabakuka weik upnin balyopura, anyapsin ning nirya usilya deice arye, anggun ap, nun Deiyoknye Yesus Kristus ap, kanye dukdongobuka umunye ning ap, Yesus ati kel kinamunya ap ara, talye demuk kum unamlulume. Duk moupsilirye, nong weik unamsile.

⁹ Bukni, anyapmasin ning nirya, kum ulul ninye ara, sikda asing kuna dakliba kuplyeba, yukak upmalye ning kum eipmanto ninye atonun, tonda asing kum pun ninye atonun unyake. Atonye bira, ‘Allah arye na malye winilamse ning kum kipdeipnukce, namin kipnuke’ tenen, aning akunum lubakibuk ati, anyapmasin ning ara, ‘Mambule’ tenebuka kum ulule.

¹⁰ Aning ati ara, na kayapu, anyapmasin ning kum uplinye birye ulye touk, kum wininamlulume. Anggunda, Allah arye, ‘Aninye na mapu unamake’ tenen, wiamsukce yukupsuk nyapsuka ara, ‘Dipkoprop anyuk wininamap’ unamap tenen, pia pi dobuka, Allah el piluk donamlume.

¹¹ Ara talye ati kume. Winilamlumopura, pia malye una kumce arye, dipkoprop Allah kum batakanamlulume. Tonda, sirya talak nun Deiyoknye Yesus Kristus, nun Lyenanye birye, ninye weik arye lyebuka talima talisilirye, aning-aning nirya talilyanganamlak wekna ati, weik kanye deipsilirye, “Telebe,” nyapsilyopura, el ulyakuk, wekuka apia unamlulume.

Peterus arye, ‘Aning tuba tenenamak’ tenen, nyabuk yupu

¹² Ara, na kayapu, winiryuk nyapmasin ning nirya ara, anggun akunum kel bikamlume. Tonda, akunum peterelamsik yupu kekelulumce, ayupu uk talibuka, tunim abuka umunce, dobolbanauk ululume. Bukni, ‘Kanye arye tonap tenenamlum’ tenen, narye tuba-tuba ayupu uk, tuba nyanamsine.

¹³ Na kanye ara, na kam unye talak noutamak nirya ara, ayupu ila tamubuka tonap nyapnamsin deice arye, ‘Diba tenebuka mikip arye pil donamlum’ tenen, nyanamsine. Aning ara, telebuka.

¹⁴ Nun Deiyoknye Yesus Kristus arye lakak nyapnukbuk kel kiyamse. Mitikanun ton unmanyani, dipnamnarya. Ati, arup asum nyapmasin yupu ara, tuba-tuba ila tamubuka nyanamsine.

¹⁵ Aninguk kum bukni, ‘Na akunum dipnyopura, aminyan talak nirya, anggunce anyapmasin yupu tuba tenebuka winamlulum’ tenen, pia piripdenirye, anggun melina ati, mikip arye pil donamne.

“Yesus el mikip weik ubukura, nun asing kopropa arye eibupu,” nyabuk yupu

¹⁶ Nunce, anggunti, “Nun Deiyoknye Yesus Kristus ara, weik mikipnye ulirye, aminyan talak ara, tukwak mutuku tamubuka yanamle,” nyabuka peterelamsupu ning ara, talye ninye sik kanye aniryuk tenebuka, talye-talye yupu weik kililamsikba kumdisinak touk, kum peterelamsupu. Aning ara kum bukni, nun bidamnye aryuk, Yesus Kristus mikip weik ulamuka ap, pia teleb mambul pil dolamuka ap ara, nun asing kopropa arye elilamubu ati, ayupu lakak ubuka peterelamsupu.

¹⁷ Nun pi asing kopropa arye eibupu ning ap, amul arye kekebupu ning ap nyapnusine. Ara, nun ni Allah arye Yesus ati, “Anye bira, na Mi Koprop ulule. Elti na bico tenepnirye, elti, na kanye deipne,” nyabuka deice arye, Allah arye Yesus ati si erebuka, el si weik aribuk. Allah pia telebnye, weik mambulnye birye, im deice arye ayupu nyapdeibukura, nunce kekebupe.

¹⁸ Nun ap, Yesus ap, pia mingne mutuku dup beipu talak ara, Allah im deice arye, ayupu nyabukba, nun amul arye kekebupe.

¹⁹ Aninguk kum bukni, tonda, Allah el yupu laka nyalamik nang, nabi nang arye sekeiyamik yupu, pia dipkoprop yupu ara, akunum upmasile. Ayupu ara, ninye arye kunuknak banukce talak, weisa ubikibuk, dirina uplibuk, bita dikirye balamak touk, usulule. Allah el yupu, laka nyalamik nang arye seklamik yupu ara, dirina atouk usulule ati, anggunce ayupu moubuka kekenamlulume. Allah ati, moubuka min kum kel kiplum bikamlum talak noutamak ap, Yesus Kristus tukwak mutuku, tamubuka min kum yanaplye talak noutam ap, sik seklamik yupu moubuka kekenamlulume. Aning upnamsil talak ara, beren tam talak kipnamalya ati, tulik bisik yalamle talak ap, ulul kurya tikilyangalamle talak ap, dirina uplibuk, ‘Aning nirya, lakak dinuyabe,’ tenelamap touk, upnamsile.

²⁰ Ura, mambul yupu ton nyapsinibuk, kel kibuka moupnamlulume. Ara, yata yupu do nirya, Allah el yupu laka nyalamik nang arye, sik yupu seklamikce, Allah el buku noutamak deiamik yupu nirya ara, anabi nang sik kanye aryuk, ‘Deiyok ani’ tenen, kum seklamik.

²¹ Aning ara pia kume. Allah el yupu laka nyalamik nang, sik nabi nang arye seklamik yupu nirya ara, talye nang arye, ‘Ayupu ara mambule, ayupu ara seklulume,’ nyalamika deice arye kum seklamik. Aning kum bukni, Allah El Dib Kanye arye, nabi nang sik talima noutam yupu nyabuka, pil dolamuka deice arye, Allah el yupu laka nyalamik nang arye, sik yupu nyabuka seklamik. Ara, Allah El Dib Kanye arye anang ati, el mikip areamuka deice arye, apil dolamik.