2 Korintus 4 - Eipomek

“Allah arye, pil arepsuka ati ara, ‘Se, yata wiriptibye do?’ tenen, bouku kum sukupnamsile,” nyabuk yupu

¹ Aning ati ara, Allah el kanye aniryuk bicoe tenepsukce, melisilya deice arye, ninye lyena ati winiryuk nyalisulul yupu laka nyalbana ati, pil arepsuke. Winipdeipsukce, apil arepsuka ati, ‘Se, yata winiptibye do?’ tenena kumce, bouku kum sukupsiliba, kum batakanyabe.

² Aning kum bukni, pia malye ning wininyak nang arye, ‘Yuk ninye eibuka kel biksikcak’ tenen, duknulamak ning aning-aning nirya akunum batakibirye, tenepce arye yupu nyana ap, tilila yupu ap kum nyanyabe. Tonda, Allah yupu dipkoprop nyasilye touk aninguk moubuka peterenyabe. ‘Yuk nang arye kanye deipsitinge’ tenen, nun kanye aryuk kwalibuka kum peterenyabe. Aning nirya kum wininyap bukni, Allah el dinmasilibuk, Allah el dipkoprop yupu ulye touk, aninguk dobuka laka arye peterenyabe. Peterenyaba deice arye, ninye nirya kekebikirye, sik kanye tenena noutamak arye nunti, ‘Anang ara, dipkopropuk wininyak,’ tenesinyake.

³ Nunce ninye lyena yupu, laka teleb yupu peterebibibuk, ton nang ati ara, kum kekepmanto unyake. Ara, ninye nirya kum bukni, ayupu kekena kum nang ara, sik dib tenena kumce, dipnamak ninyeuk unyaka anya arye, ayupu moubuka kum kekepsitinge. Yuk deiyok ati kume.

⁴ Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.

⁵ Nunce, nun bidamnye kanye tenenyap ning ap, nun bidamnye nong ap, ati kum peterenyabe. Aning kum bukni, nunce, “Yesus Kristus ara, nun Weik Ninye Deiyoknye el tonok ulule,” nyabuka peterenyabe. Tonda, Yesus el amu tam ubirye, el piluk donyapa anya arye, elti, pil donyap bukni, apil donyapa ara, anggun Korintus mutuku ap, Akaya tam ninye ap, anggun talye melin nang atonun unyabe. Ati nun yupu nyabibibuk, ayupu pia kum kekepmanto ninye ara, Allah arye tenyamuk touk, sik dipnamaka ati kum kekepsitinge. Yuk deiyok ati kume.

⁶ Allah arye, “Kuna noutamak arye, dirina unamle,” nyabuk. Ayupu nyabuknye Allah, elcuk nunti pia mambul ning arepsuke. Ara, nun kanye talima noutamak, el dirina ning arepsuka deice arye, Allah el pia teleb ulul ning ap, pia teleb winilul ning ap ara, bikinyabe. Allah el pia teleb ulula ara, Yesus Kristus el winilamuk ning kel kibibya deice arye, laka usilibuk, bikinyabe.

⁷ Arup nyapmasin mambul ning, Yesus ati diba tenepmupka ati, elti moubuka tenena ati, Allah arye nunti dirina atonun ning arepsuka ara, nun mikip kum ninye unyap bukni, nun kanye talima noutamak ara, ila mambul ning, dirina weik aresulule. Winipmanto ning ara, ninye arye kira tuku dobuka, makau kintinibikirye, winiryuk arye dabuka delilamak ning, pia namin ning ulule. Aning ulye touk, nun nong babye, namin ninguk unyabe. Ara, talye ati kume. Deiyok ara, ninye nirya, ‘Allah arye, mambul ning arepsuk ning ara, mikip weik ning ulul bukni, Allah el mikip aryuk usulule. Ara, ninye mikip arye, Allah el laka teleb yupu peterenyak, kum tenepnamak’ tenen, nun diba teneyab ninye nong pum tamuk, dirina weik ning kunum arepsuke.

⁸ Ara, nunda, dana-dana tam nirya arye, ikin ning, nun nong deice yangasulul bukni, kum teikisulule. ‘Yata wiriptibye do?’ tenen, kanye teniltonyap bukni, nun bouku kum sukusulule. Tonda, “Kume, Allah el pil donyap ning ara, ‘Dauplye’ tenen, kum winiptibye ati, bataknuyabe,” nyabuka kum batakanyabe.

⁹ Nun dib tenenyaba ati, malye nang arye, nun nong deice, ikin ning delisinyak bukni, Allah arye kum batakasulule. Sikce opsikiba, tukwak sakanyap bukni, sirya dakuka kum, kum daneipsitinge.

¹⁰ Malye nang arye, Yesus obik touk, atalak-atalak nirya ara, sikce nunti, opmanto usinyake. Opmanto usinyak bukni, aning deiyok ara, Allah arye utenesulule. ‘Sik nong ap, sik kam unyaka ap deice arye, yuk ninye eibikirye, ‘E sik pil donyaka ap, kam tuba unyaka ap ara, Yesus el tuba kam ulirye, anang ati el mikip ariliba, adeice arye unyake,’ tenebuka, kel biknamak’ tenen, winisulule.

¹¹ Nun kam tuba unyap bukni, nunce Yesus ati dib tenebibibuk, yuk nang arye, ‘Anang oploptibye’ tenen, pia pidirinamsiyaka ara, deiyok ton aupmale. Ara, Allah arye nunti, ‘Sik talye ninye nong noutamak ara, Yesus el kam una deiyok ning ap, el winilul ning ap, laka upliba, ninye nirya kel biknamake,’ tenesulule.

¹² Aning ati ara, nunda atalak-atalak nirya, nun nong deice ikin ning deibuka opmanto winisinyak bukni, awinipsica deice arye anggun Korintus mutuku ninye ara, kam pia una deiyok ning kel bikilulume.

¹³ Allah yupu noutamak ara, minop talak sekik yupu ara ani. ‘Na dib tenepsa ati, adiparyuk na yupu nyapse.’ (Mazmur 116:10) Ayupu sekuknye birye dib tenyamuk touk, nun babye dib tenebuka ayupu nyasinyabe.

¹⁴ Nun kele, nun Deiyoknye Yesus Kristus dibukura, kam bukeibuknye, Allah arye nunti kam bukdeipnamsile. Winipsilirye, Kristus ap, nun ap, anggun Korintus mutuku ninye ap dobuka, Allah el ulyak neika deipnamsile. Aning dib tenenyaba anya arye, ayupu nyasinyabe.

¹⁵ Arup nyapmap yupu nirya ara, anggun Korintus mutuku ninye, sik melina ap, sik teleb kilina ap ati, aning nirya ulule. Winipyopura, Allah el kanye aniryuk bico tenepsilirye, melisilye ning, yuk ninye weik tonun tonap, ayupu kekebuka dib tenebikirye, weik upnin banamake. Ninye weik tonap dib tenebikcopura, sik nirya arye Allah ati, “Nun ni Allah, anda pia teleb,” nyabuka, weik arye nyakcopura, Allah el si weik arye erebuka kinamake.

“Oyanamle talak nirya ara, Allah dib tenebuka, pia moubuka unamlume,” nyabuk yupu

¹⁶ Aning-aning nirya wininamla ati, nunda, ‘Se, yata wiripnuyap do?’ tenen, ilil arye malye kanye bobuka, bouku kum sukupnamsile. Nun nong bola deice ara, dipkoprop asum-asum nirya ikin usilibuk, malye bol bopnamap bukni, nun kanye talima noutamak ara, Allah arye asum-asum nirya teleb kibuka winiryuk ninye atonun mikip kilisulule.

¹⁷ Tonda, nun ilil arye malye kanye kum bonyaba deiyok ton ani. Ara, kanye imun kanye upsile ning nirya ara, dipkoprop tia talakuk usulule. Tonda, kanamuk usulule. Kanye imun ning usilya deice arye, aminyan pia kam unamabak ara, pia teleb unamsile. Aning ara, weik mambul anya arye, wini talak ikin usilye ning ara, nun kanye ara, ‘Aning nirya ara, dipkoprop pia kanam atonunuk usulule. Aning ara, mambul kume,’ tenenyabe. Weik mambul ning ara, Allah ap neika pia kam unyabbuk, weik mambul ning arenamsil ning ara, kum nukmanto, pia weik arye arenamsile. Ati tukwak mutuku unyap talak, ikin usilye ning ati, ‘Aning ara, mitik mambul uka,’ tenenyabe.

¹⁸ ‘Aning ara, yata wiribuka arye, teneptibye do?’ tenena kume. Deiyok aupmale. Ara, nun asing arye eibibirye, pia tenenyap ning ara, talye ninye asing arye eiptibye ning kume. Nun pia tenenyap ning ara, ninye asing arye kum eiptibye ning uka. Deiyok ton aupmale. Ara, ninye asing arye dinyap ning nirya ara, dipkoprop tia ninguk ulula anya arye, kum winipnamlarya. Bukni, asing arye kum elinyap ninguk ara, tia talak ning kume. Aning ara, pia aunamla anya arye, kum winipmanto ning winilula ati, aninguk tenenyabe. Na Paulus arye nyapsine.