1 Yohanes 2 - Eipomek

‘Diba tenen nang arye, malye winibicak’ tenen, nyabuk yupu

¹ Na mapu bico tenesunune. ‘Anggunda malye kum unamlume’ tenen, ayupu seksene. Bukni, yata nang do nirya, malye winibicopura, nun kanye barina ap, melina ap ati, Allah dam tuba-tuba yupu melibuka nyasululnye tonok usulule. ‘Allah arye sik tukwak mutuku ninye oploplyak’ tenen, Yesus Kristus arye, nun melina ati, teleb yupu nyaplirye, yupu sekelule. Allah dam melina yupu nyasululnye bira, Yesus Kristus uka. Yesus Kristus ara, Pia Diksukumuk ulule.

² Nun malye tenenyap ning ap, malye wininyap ning ap, kum ubuka delina ati, akunum deksukce, lyebuka deipsuke. Allah arye nun malye unyap ning ati wenebuka opsutu bukni, ‘Sik opnyak’ tenen, nun pununa ati, Allah tenyamuk tok, sik malye nang arye, Yesus obikbuk, el ining binmoka deice arye, nun malye winin ning nirya kilibuka, kum danalisulula ak, Allah arye namin kilisulule. Ara nun malye wininyap ninguk kume. Ninye mutuk sirya im sirya nirya sik malye wininyak ning babye kiliplirye, lyelule.

³ Allah arye, “Wininamlulume, aning ton kum wininamlulume,” nyalul yupu nirya kekebuka, dobolbalamibya deice arye, ‘Allah ap, nun ap, neika unyabe,’ tenenyabe. Ara kanye bokoltona kumce, ‘Dipkoprop el ap unyabe,’ tenenyabe.

⁴ Yatanye do, “Na ap, Allah ap, neika unyame,” nyabuka talye nyaltakalul bukni, Allah arye, “Wininamlulume, aning ton kum wininamlulume,” nyalul yupu ara, kum kekebuka, dobolbalulnye bira, anye bira, tilila yupu uk nyalule. Tonda, dipkoprop yupu el talima ak kum ulule.

⁵ Bukni, yata ninye do nirya, Allah el yupu moubuka kekebuka dobolbanyake nang ara, sikce Allah ati, ‘Nun nie’ tenen, dipkoprop kanye pia deibuka unyake. Anang ara, sik talima ak, bico tenena ning ara, akunum wisibuka ati, Allah arye ninye tukwak ninye bico tenelul touk, sik babye ninye ati, bico tenenyake. Yuk nang ati bico tenenyaka ara, kum suktalipnamle.

⁶ Yata ninye do, nirya, “Diba tenepsirye, Allah ap, na ap neika unyame,” nyanyak nang ara, adiparyuk Yesus ulamuk touk wininamnyake. Yuk ton kume. Winilamibya deice aryuk, ‘E, Allah ap, nun ap neika unyabe,’ tenebuka kel kinyabe. Ati, Yesus winilamuk touk, kum wininyak nang ara, ‘Allah ap, nun ap, neika unyabe,’ talye nyaplopting bukni, ara tilila yupu uk nyanyake.

⁷ Ura, na kayapu, “Wininamlulume,” nyapsin yupu ara, winiryuk yupu kum seksene. Kume, deiyok kibuka, diba teneplum talak anyapce, dipdongobuka, atalak noutamak nirya, akunum nyalamsiseba, kekelamlum yupu uk seksene. Ayupu ara, ani. “Anggun nirya, kanye deipdanuka, bico tenebuka unamlume,” nyapne. Ayupu, “Wininamlulume,” nyapmasin yupu ara, Allah yupu deice, akunum kekelamlum ning bukni, na Yohanes arye, ila tamubuka tonap nyapsine. Ara, anggun nirya kanye deipdanuka, bico tenebuka, unamlulume, nyapsine.

⁸ Asekman yupu ara, winiryuk yupu kum nyapmasin bukni, ton mitik winiryuk ning atouk ulule. Ara, “Wininamlulume,” nyapmasin yupu ara, Yesus el ulamuk ning ap, Yesus el yupu dopdoplumce, telebuk winilamlum ning ap, adeice arye, ‘Ara dipkoprop winibuka,’ tenebuka elinyabe. Allah yupu deice arye, kanye kunuknak ning, dirina uprebanmala ani, kanye dirina ning ara, akunum dirina upmale. Ati ara, “Allah yupu kekebuka dodoplum ning ara, ayupu ara, dipkopropuk ulule,” nyapmasine. Yesus ara, dirina atouk ulula anya arye, dipkoprop dirina ning ara, akunum elinyabe.

⁹ Yata nang do, nirya, “Nunda dirina noutamak unyabe,” nyanyak nang bukni, sikce yuk ninye ati, ‘Aning ara, nun like,’ tenebuka malye wininyak nang ara, wini talak babye, yuk talak babye, kunuknak noutam akuk tuba unyake.

¹⁰ Yata nang do nirya, sikce yuk nang ati, bico tenebuka, teleb ubuka unyak ninye ara, dirin akuk tuba unyake. Wininyaka ati, sik winilamaka deice arye yuk nang ton malye kum wininamake.

¹¹ Aning ato kum bukni, yata nang do nirya, sikce yuk nang ati, ‘Aning ara nun like,’ tenebuka, malye unyak ninye ara, kuna akuk tuba unyake. Ara dipkoprop winina ning kum kel kibika ati, walwal atouk wininyakce, aminyan unamle ning nirya kum tenenyake. Ara asing pun nang arye, bisik balamakak kum dikirye, yukak balamak touk, anang ara malye ubuka walwal wininyaka deice arye, sik ban bisik kum tenenyaka ati nyapne. Ara, sik kanye tenena kumce, asing kun nang winilamak touk unyake.

¹² Sik kamto nang ara, narye bico tenesununa ati, na mapu atonun ululume. Anggun malye tenelulum ning ap, malye winilamlum ning ap, Yesus Kristus el si deice, Allah arye, ‘Sik malye winilamik bukni, aning tonok minopce kum opnune’ tenen, batakdongobukce, talye kanye bobuke. Winibukce, anggun malye winilamlum ning nirya ara, akunum namin kipsukce, anggun malye ning ara, kum ubuka deibuke. Ati ara, ayupu seksene.

¹³ Anggun dipkoprop wisi nang ara, na ni yapu atonun ululume. Aning-aning nirya min kum uamuk talak, minop arye el tonok ulamuknye, Allah akunum kel kiplume. Allah akunum kel kipluma ati, ayupu seksene. Anggun kam nang ara, Pia Malye Ululnye, Isa Mutuku Dongonye akunum bisibuka yaniptapluma ati, ayupu seksene. Tonda, na mapu atouk nang ara, nun ni Allah akunum diba tenebuka kel kipluma ati, ayupu seksene.

¹⁴ Na ni yapu atouk nang ara, aning-aning nirya min kum kwepdeiamuk talak, minop talak arye, el tonok ulamuknye, Allah akunum diba tenebuka kel kipluma ati, ayupu seksene. Anggun kam nang ara, anggun talima wisipsuk ak, anggun talima tunim abuka umunya deice arye mikip upsuke. Tonda, Allah el yupu diba teneplumce, talibuka dobolbalulume. Tonda, Pia Malye Ululnye, Isa Mutuku Dongonye akunum bisibuka yaniptaplume. Aning-aning nirya ati ning ara, ayupu seksene.

“Talya tukwak ning ati, anyuk talibuka, kanye kum delinamlulume,” nyabuk yupu

¹⁵ Talya tukwak nirya ap, anoutamak ulul ning nirya ap ati, ‘Se, aning ara pia taliptinye,’ kum tenenamlulume. Yatanye do nirya, Isa Mutuku Dongonye arye talilul ning ap, atalibuka unyak ninye ap ati, ‘Aning ara na’ tenen, talipmunyopura, nun Ni Koprop Allah ati dipkoprop kanye kum deililulume.

¹⁶ Aning ara urtalya ati kum nyapsine. Deiyok ara, tukwak tam ulul ning nirya ara, malye wininyak ninye, sik patalamle ning ap, sikce, ‘Se, aning doproptibye’ tenen, asing arye eibuka patalamle ning ap, sik bona do, sik talibuka kimilan ning nirya ara, aning ara nun ni Allah el ning kume. Amalye tenena ap, malye patana ap, anirya ara Isa Mutuku Dongonye el ninguk ulule.

¹⁷ Atuku ak ulul ning nirya ap, malye wininyak ninye sik patalamle ning nirya ap ara, kum upnamle. Aning nirya kum upnin banamle bukni, yatanye do nirya, Allah elce tenebuka nyasilye yupu uk kekebuka, dobolbalamice nang ara, pia kam unamake. Pia kum dipnamake.

‘Yesus si yanipnamap’ tenen, yakasinyak nang ati, “Kanye moupnamlulume,” nyabuk yupu

¹⁸ Na mapu ati bico tenesunune. Winira, sirya talak arye Yesus yalyopura, tukwak ubuk ning nirya kum upnamle talak ara, akunum dam upsile. “Aminyan Yesus Kristus Yanipnamle Deiyoknye yanamlarya,” nyalamikbuk, kekelamlum touk, wini talak akunuma. Akunum yanmanto upmale. Elce Kristus si yanipre yanamle touk, el mapu babye, ‘Kristus si yanipnamap’ tenen, nun dam akunum yangasinyake. Wininyaka deice arye, ‘Dipkoprop sirya talak akunum dam upmale,’ tenenyabe.

¹⁹ Anang ara, nun batakuka nun kan-kan arye yukak bindobik bukni, nun kanye ap, sik kanye ap neiktoto kume. Nun diba tenebuka, nun kanye tenenyap atouk nang ulamtingtoura, nun batakna kumce, nun ap neika ulamtibye. Bukni, sikce nun batakuka bindobikce, yuk tam kipdobikbuk, eibupurye, sik ulamik ning kel kibupe. Ara, ‘Aning sik kan-kan danerye, tonoknye babye ton, nun diba tenebuka kanye tenenyap touk, sik babye, diba kum tenenyaka’ tenen, kel bikamubu.

²⁰ Sik abataksik nang ara wininyak bukni, anggunda kume. Yesus ara, malye winina ning tonok babye kum ulule. Allah arye el Dib Kanye ara, Yesus arye arepsukbuk, anggun talima ak weksuke. Tonda, anggun nirya, el dipkoprop yupu akunum kel kiplume.

²¹ ‘Allah el dipkoprop yupu ara anggun walwale’ tenen, ayupu kum seksene. Aning ara kume. Allah el yupu ara, akunum kel kiplume. Tonda, el dipkoprop yupu noutamak ara, tilila yupu tonok babye kum ulule. Aning bitinye ati ning ara, anggun talima mulina ati, ayupu seksene.

²² Tilila yupu nyalulnye bira, yatatonye do? Elda, ‘Allah arye Yesus Kristus ninye mutuk sirya, im sirya nirya lyeplirye, taliplibuka, dobolbanamak’ tenen, dopkwetepsuknye bira, ‘Yesus el uka’ tenen, diba kum teneplirye, “Ara kum winipmanto,” nyalule. Ayupu nyalulnye bira, tilila yupu uk nyalule. El nyalye touk nyanyak nang ara, Kristus ati, yanina nang unyake. Sikce Allah babye, el Mi Yesus babye, diba tenena kumce, ‘Yanipra bataknamap’ tenen, bisipetenyake.

²³ Allah el Mi Yesus ati, diba kum tenebikirye, wilibuka batakanyak ninye ara, Allah babye ati, diba tenebuka, kum talinyake. Aning atonun, Allah el Mi Yesus ati, diba tenebikirye, talinyak ninye ara, el ni Allah babye ati, diba tenebuka talinyake.

²⁴ Anggun kanye talima moupnamlulume. Ara, deiyok kibuka, diba teneplum talak bukni, atalak nirya kekelamlum yupu ara, ‘Mankau arye batakipyak’ tenen, pia moupnamlulume. Ayupu ara, batakna kumce, anggun talima ak, pia upsilyopura, anggun bidamnye ap, Allah el Mi Yesus ap, Allah ap, neikauk unamlume.

²⁵ Allah arye, “Aripnamsine,” nyalilamsuk yupu ara, ani. “Ara, pia kam una deiyok ning arepnamsine,” nyapsuke.

²⁶ Ara, yuk nang arye utenenyake. ‘Aning ara, kanye yuk tenebikcebuk, nunce dobuka, yuk malye bisik bobitibyeba, nunuk dobolyasitinge,’ tenenyake. Utenebikirye, ‘Dalubuka bobisinyaka’ tenen, asurat seksene.

²⁷ Bukni, anggunda Allah El Dib Kanye Yesus arye arepsuka ara, anggun talima ak, wekamukce, tuba ulula ati, talye ninye arye nyapsitinge yupu ara, kum patasulule. Anang nyasikce yupu ara, kum kekenamlulume. Bukni, Allah El Dib Kanye arye, aning-aning nirya peteresulule. Aning nirya peteresilye ning ara, moubuka kekenamlulume. El babye, el peterelye ning babye, talye kum, dipkopropuk ulule. Ati ning ara, elce peteresilye yupu uk, kekebuka dobolbalamunyopura, Yesus ap neika uk unamlume, nyapsine.

“Pia telebuk unyak ninye ara, Allah el mapu unyake,” nyabuk yupu

²⁸ Ura, na mapu bico tenesunune. Winira pia diba tenebuka, Yesus yupu uk, dobolbanamlulume. Winilamibyebuk, aminyan Yesus yalyopura, nun alye una ap, ilil una ap kumce, ‘Talye kanye bopnamap’ tenen, nyapne.

²⁹ Anggun kele, Yesus ara malye ning tonok babye kum winilule. Pia telebuk ulula ati, el mapu ababye telebuk unyake. Ara, yata nang do, nirya, sik teleb-telebuk unyak ninye ara, sik nong ara kam ulamik bukni, sik kanye tenen ning ap, sik talima ap, dipna atonun ulamukbuk, Yesus lyepsukce kam bukeipsuka ati, wini talak ara, telebuk unyake, nyapne. Ara, nun nirya babye wininyaba ati, na Yohanes arye nyapne.