1 Timotius 6 - Eipomek

“Anggun nirya arye, anggun deiyok nang ati, si erebuka, telebuk wininamlulume,” nyabuk yupu

¹ Tilila aryuk talye pil don nang malye ubiceura, yuk ninye eibikirye, ‘Allah el si ap, nun peterenyap yupu, Allah yupu ati, malye yupu nyabuka lulupsikcak’ tenen, yata pil don nang do nirya, sik deiyok nang arye yo bok deice dekikura, tilila aryuk talye pil donyak nang nirya arye, sik pil deiyok nang ati, talye nyaltakana kum bukni, si erebuka teleb wininamake.

² Aning atonun, sik tilila aryuk, talye pil donyak ninye bukni, sik deiyok nang, Allah dib tenebik nang wininyakopura, sik amu tam pil dobuka unyak nang arye, ‘E, nun deiyok nang ara, Allah dib tenen nang anya arye, nun mitik nang atonun unyaba ati, mitik anun arye, si erebuka unamabe,’ tenena kume. Aning ara, pia kum bukni, apil don nang arye, sik deiyok nang dib tenebik nang ati ara, mitik anun arye kume. Pia teleb ubuka, sik pil melibuka donamake. Deiyok ara, sik pil dopbiceura, teleb winibikirye, dopropnamak nang ara, Allah dib tenen nang unyaka ati, weik arye si erebuka unamake. Tonda, amu tam ubuka, pil donyak nang arye, sik deiyok nang ati, sik adiparyuk bico tenenamak ati nyapkine. Ati, asukum deice tam nyapmakin yupu ara, urdem aryuk pil dopra unyak nang ati, mikip arye peterenalyame.

“Na kayapu, ‘Yo bok weik doproptibye’ tenen, deice arye malye unyake,” nyabuk yupu

^3-4 Yatanye do nirya, tilila yupu petereplirye, nun Deiyoknye Yesus Kristus arye peterelamsuk yupu ap, Allah arye, ‘Wininamake,’ tenepsuk touk, peteren yupu ap, dib tenen kum arye, batakuka yaniltakalinye bira, maknya kintinipdakirye, ‘Nara, weiknye,’ tenelul bukni, dipkoprop ara, pia walwalnye ulule. Aning-aning nirya moubuka kum tenelule. Atonye bira, ninye arye yupu deice waldanyak yupu ap, moubuka kum laka nyapmanto yupu bukni, “Ayupu deiyok ani, ani,” nyabuka, yu uplye ati, kanye yuk-yuk wilildanyak yupu ap ati, pia patalule. Amalye yupu deice arye, ninye talima wililanyak akarye, tonye birye, yuknye biti, ‘Se, anye birye malye upnamnil do?’ tenen, ilil teneldanyake. Atonye bira, amalye yupu ati, kanye deililula ati ara, elda, uk dinanye atonun ulule. Na Paulus arye nyapkine.

⁵ Wininyak deice arye, kanye deibuka teleb ubuka neiktoto una pia kum arye, malye teneldana ap, waldana ap, oldana ap, wininyake. Awininyak ninye ara, sik kanye talima pia malye ubuka anya arye, dipkoprop moubuka kum teneptinge. Allah el dipkoprop yupu batakuka yaninyaka ati ara, wini talak ara, teleb ning kum teneptinge. Deiyok ara, sikce. Tonda, anang sik malye tenenyaka ara, ‘Allah yupu dobuka yuk nang ati peterebibyopura, aminyan ara, yuk nang arye yo bok arepsikce deice arye bona weik talin nang mapu unamabe,’ tenenyake.

⁶ Sikda, winibuka tenenyak bukni, dipkoprop ning ara, ani. Ara, ‘Allah diksukum ulye touk wininamne,’ tenebuka, ‘Na dam aupmanil ning akunuma,’ tenena ap, tonda, ‘Kanye deibuka telebuk unamne,’ tenena ap ara, pia telebe. Winina ara, pia teleb winilinamsile.

⁷ Anyapmakin yupu deiyok ara, nun ni yapu arye deipsik talak ara, aning-aning bobuka kum yanamupe. Talye nong yoka dem deipsike. Tonda, daulamibya ani, dibibye talak ara, tonok ning babye, kum dobuka bobitibye. Talye nong banang demuk binamabe.

⁸ Bukni, nun dina patapsilye ning ap, ongon baju ap, awabsilyopura, awabsilya deice arye talye kanye bobuka, telebuk unamabe. ‘Se, aning ton, aning ton doproptinyak arye, adiparyuk winiptinye,’ tenena kume, teleb kanye bobuka, ‘Na wapnil ning ara, akunum’ tenen, kanye lamabuka una telebe.

⁹ Bukni, ‘Se, nunda bona weik talin nang mapu uptibye’ tenen, pia pataplye ninye ara, atenen deice arye, Isa Mutuku Dongonye arye, ‘Sik malye upting’ tenen, sik kanye talima lilolibuk, malye un ning patalulbuk, malye weik wininyake. Tonda, nong kum upnamle ning bukni, talye-talye ning patana weik ap, malye usilye ning patana ap, akunum winiplibuk, malye weik wininyake. Wininyakopura, winipmanto ara, anoutamak arye, ikne pum bisik kabang balyebuk youlamle atonun, weik ikin ning pia malye ulisulule. Aning ara, kum lipsisikmanto.

¹⁰ Anyapmakin yupu ara, talye ati kume. El deiyok ara, yata ninye do nirya, ‘Se, bona weik talinanye utibye’ tenen, yo bok do, dengna weik ning do, weik arye patalyopura, adeice arye malye winin ning yala weik wininamake. Anyapmakin touk, ton nang ara, ‘Yo bok weik doproptibye’ tenen, patabuk deice arye, Allah dib tenelamak ning batakuka, talye yuk bisik balamakbuk, aminyan ara, weik kanye imun ning ap, ikin ning weik ap, kanye bokoltona ap, weik ulule. Sik ikin ulilalamik. Na Paulus arye nyapmakine.

Paulus arye Timotius elti, nyabuk yupu

¹¹ Aninye malye ulilalamik bukni, anda Allah el yupu nyasilye touk ubuka, el pil donanye ulyama ati, amalye winin ning nirya dam una meme. Bik-bik abuka yukak balamak atonun, amalye ning batakuka, ‘Pia telebuk winiptinye’ tenen, patapkilyeura, pi dobuka wininalyame. Ara, diksukum una ap, Allah diksukum ulye touk una ap, Allah dib tenena ap, yuk ninye ati bico tenebuka melina ap, ‘Ikin ning aupmanil’ tenena kum arye, batakna kum pia pil dona ap, yuk ninye ati, namin arye una ap, anirya ara, an adiparyuk pia piribuka wininalyame.

¹² Yin talin nang arye, ‘Yuk mutuku ninye obisipsikcak’ tenen, pia pi dobuka olalamak atonun, Allah dib tenebuka taliplum pil moubuka talina ati, mikip arye pirilenamlyame. Allah ati dib tenelulum ning ara, moubuka talipmince pia bobanamlyame. Aning ara, pia telebe. Minop talak, ninye weik kekenmekba, ance, “Kristus ati, dib tenenune,” nyabuka, teleb yupu nyaplum talak ara, Allah arye, ‘Anye bira, na ap, im deice pia unaname’ tenen, wideipkuke. ‘Bol koplobuka pia kam una ati, kintinipkuk ning dopropnamne’ tenen, pia moubuka teneminyak arye dolonamlyame.

¹³ Na mi Timotiuso, aning nirya, kam una deiyok ning arisilinye Allah ap, Pontius Pilatus dam yupu boban talak arye, yupu teleb ubuka lak arye nyabuknye Yesus Kristus ap, sik bitinye kekebuka dinmasirak deice arye, amambul yupu nyapdeipnukine.

¹⁴ Ara, asurat deice nyapmakin yupu nirya kekebuka talinalyame. Moubuka talinalam talak noutamak nirya ara, tonok ning babye, kum bataknamlyame. Tonda, anyapmakin touk, bita teleb pil dolamince, sirya dakanamlyame. Winipminyopura, yuk ninye arye, “E, el malye ulul ning ara, ani,” kum nyapmanto upnamake. Winibuka pia winilamlya ani, aminyan ara, nun Deiyoknye Yesus Kristus tamubuka yanamle.

¹⁵ Yesus tukwak mutuku tamubuka yanamla ara, Allah arye el tenyamuk touk, atalak akunum uplyopura, Yesus lake kibuka yanamle. Nun ni Allah bira, pia telepuk ulirye, ati, tukwak ninye nirya arye, el siuk erebikirye, elti, ‘Anda pia telebuk ulyame,’ nyanamyake. El tonok aryuk aning-aning nirya, pia Mikip Weik Deiyoknye ulirye, aning nirya deice tam ulule. Yuk weik ninye deiyok nang, sisin nang, Raja nang aunyak bukni, elda sik deice tam Mikip Weik Raja ulule. Ninye deiyok nang yala weik daunyak bukni, sik nirya ara, el amutamuk unyake. El tonok ara, sik nirya ap, isa mer ap, aning-aning nirya ap, pia deice tam ulirye, pia Mikip Weik Deiyoknye ulule.

¹⁶ El tonok ara, kum diptue, pia kamuk unamle. El ulya ara, ninye tukwak ninye kum binmanto ak, weik dirina noutam ulule. Yata mutuku ninye do nirya, el nong pia kum elilamik, tonda, pia kum eiptinge. Na Paulus arye nyapmakine. Na pia patanulul ning ara, ninye mutuku-mutuku nirya, el siuk pia erenamake. Tonda, el weik mikip arye aning-aning nirya ap, ninye nirya ap, talibuka unamle. ‘Aning ara, dipkoprop upnamle’ tenen, Amin nyapne. Na Paulus arye sekeibkine.

Surat sirya dakaldongona ati, nyabuk yupu

¹⁷ Wini talak tukwak mutuku unyakce, aning-aning nirya, weik talikirye, bona weik talin nang atonun unyak ninye ati, nyanamlyame. “Anggunda maknya kanyeuk, kintinina ap, dina ap, meme. Bona ap, yo bok ap, tukwak bona weik nang nirya ap ara, anang deice anggun kanye delina kume. Aning arye kum lyepsutue. Aning nirya ara, pia unamle ning kume. Yata wiribuka talakuk aupmalya ani, aminyan talak tukwak ning nirya kum danamle. Tukwak ning ara, ‘Yata talak kum danamsil do?’ Nun walwal anya arye, aning ati kanye delina meme. Aning kum bukni, ‘Allah elcuk melipsilirye, lyepnamsil’ tenen, el deiceuk anggun kanye delinamlulume. Nun kanye deibuka, teleb una ati, arisilya deiyoknye bira, Allah elcuk aning-aning nirya weik arye arisulule.” Ayupu nyapnamlyame.

¹⁸ Tonda, bona weik talin nang ati ayupu ton nyanamlyame. “Sik bona weik talin nang ara, sik bona weik aulye touk, teleb un ning weik arye pia upmunyopura, aning ara, bona weik talin nang atonun unamake. Tonda, ‘Se aning ara, ‘Na’ tenen ning anya arye, kum arenamne’ tenen, teniltona kum aryuk, talye kanye bobuka yuk ninye ati, anggun ning weik arye bokuka arenamlume,” nyabuka peterenamlyame. Na Paulus arye nyapmakine.

¹⁹ Bona weik talin nang, sik ning bokuka, yuk ninye arilamakopura, adeice arye, im deice dekna atonun ning weik arepnamle. Winipmanto ara, ayukumna teleb yo arye aik ayukumna ikikcopura, pia gat ubuka mikip ulamle atonun, bona weik talin nang arye yuk nang ati, weik arye melibikcopura, aminyan talak ara, Allah arye meliplibuk, sik babye teleb unamake. Anirya ara, talye ati kume. Deiyok ara, talye una kum bukni, ‘Pia dipkoprop bol koplobuka, kam pia un ning dopropnamak’ tenen, nyapne.

²⁰ Timotiuso, pia mambul yupu nyapnukine. Allah arye areamkuk ning ara, ‘El dipkoprop yupu ara, malye upnyak’ tenen, bita diminyak arye, pia moubuka talinamlyame. Yata talye yupu do nirya, nong kum upnamle yupu, Allah ati yanin yupu ap, Allah yupu nyasilye touk kum bukni, yuk tilila yupu, talye peteren yupu ap ara, ayupu nirya kekena pia meme. Donga ibuka yukak unamlyame. Atalye yupu nirya ara, ton ninye arye, “Kume, ayupu ara, weik kel bikne yupu. Pia mambul yupu,” nyanyak bukni, dipkoprop ayupu ara, walwal yupu ati ara, talye tilila yupu nyanyake.

²¹ Ton nang ara, ayupu kekebuka talyamik deice arye, Allah el dipkoprop yupu ap, el dipkoprop bisik ap, batakuka, yuk akuk bindobike. ‘Allah arye anti, el kanye aniryuk bico tenebuka melinakil’ tenen, Allah morokunune. Telebe, na Paulus arye akunum nyabuka sekeibkine. Asukumuk deipne.