1 Timotius 4 - Eipomek

Allah yupu yaniplobuka tenepce arye, tilila yupu nyan nang ati, nyabuk yupu

¹ Allah El Dib Kanye arye, akunum min ning lak nyapsuk yupu ara, ani. “Sirya daknamle talak ara, ton nang ara, Allah el dipkoprop yupu yanibikirye, talya ati tilila yupu nyan isa arye peterenyak ning kekebuka, dobolbikirye, isa tam kipropnamake.”

² Atilila yupu peteren ning ara, pia malye yupu, nyanyak nang peterenyaka deice arye yangasulule. Anang ara, ‘Tilila yupu nyanyaba,’ akunum tenenyak bukni, ‘Aning dauplye, tilila yupu auplibuk, talye kanye bobuka peterenamabe,’ tenenyake. Anang sik kanye tenen ning ara, yan diplamsil atonun ulule. Minop talak, teleb ubuka tenelamik bukni, malye weik winilamik deice arye, wini talak ara, merekuka kum kel biktingce, moubuka kum kel bikinyake. Ati wini talak ara, sik kanye tenena deice arye, ‘Malye ning ani, teleb ning ani’ tenen, moubuka kum biknamake.

³ Sikce peterenyak yupu ara, ani. “Ninye kil dona malye, adiparyuk kil dona kum nang ara, kamuk kil dona kum unamlulume. Din ning dina ati ara, ton din ning yala adiparyuk kum dinamlume, ton din ning yala dinamlume,” nyabuka, peterenyake. Nyanyak bukni, Allah ati dib tenebuka, el dipkoprop teleb yupu akunum kel bikinyak ninye ara, Allah arye aninye ati, ‘Din ning yala-yala nirya ara, telebe nyabuka, doprobikirye talye mangkau arye dinamak’ tenen, aning-aning nirya kwepdeipsuke.

⁴ Ara, Allah arye kwepdeiamuk ning nirya, yata yala ning do nirya, Allah tenebibirye, aning ati, “Telebe,” nyabuka, kanye deibuka dopropbibyopura, telebuk ulule. Aning nirya tonok ning babye, ‘Malye do?’ tenen, batakna kume.

⁵ Din ning do, yata yala ning do nirya, batakna kum, talye mangkau kanye deibuka doproptibya deiyok ara, bitinye. Tonok ning ara, Allah arye, “Aning-aning kwepdeipse ning nirya teleb ulule,” nyapsuke. Bitinye ning ara, nunce aning ati, “Nun ni Allah, Telebe,” nyabuka Allah ati moronyap deice arye teleb kililule. Ati din ning yala-yala nirya ara, telye diptibye.

⁶ Timotiuso, winiryuk nyapmakin ning nirya dobuka, yuk nang dib tenen ninye ati, peterepminyopura, adeice arye Yesus Kristus, el teleb pil melinanye una ati, teleb unamlame. Winipminyopura, Allah el yupu dib tenenyap ning ap, sikce teleb ubuka peterepkikbuk, kel biklumce moubuka talilyam ning ap, anoutam arye nebuka kanye wisinamkile.

⁷ Allah arye kum nyapdeiamuk bukni, sik yuk nang arye talye nukunyak yupu ap, nong kum upnamle yupu, talye-talye peterelamak yupu ap ara, kekebuka dib tenena meme. Ayupu kekena pia kume. Aning kum bukni, ‘Allah el diksukumuk ulye touk, na babye winiptinye’ tenen, ance moubuka dilamince, kel biknamlyame.

⁸ “Wininalyame,” nyapmakina deiyok ara, ani. Ara, nun nong mikip kilana ati, bik-bik ana ap, mikip arye pil dona ap ara, mitik teleb bukni, Allah pia diksukumuk ulye touk, nun babye teleb koprop una ati, adiparyuk kel bikna ara, weik mambul. Diksukum ubya deice arye, yuk winin ning nirya noutam melisulule. Nun kele, diksukumuk ubibyopura, wini talak tukwak unyap talak babye, aminyan im deice binuka unamap talak babye, melibuka teleb keipdeipnamsile. Weik mambul ning ara, ‘Allah diksukum ulul touk, na babye diksukumuk unamne’ tenen unamabe.

⁹ Anyapnusin yupu ara, pia dipkoprop yupu anya arye, ninye mutuku-mutuku nirya dib teneptinge.

¹⁰ Allah ara, pia Kam Una Deiyoknye ulirye, ‘Ninye mutuku-mutuku nirya lyeptinye’ tenen, patalula ati ara, ninye arye dib tenebiceura, dipkoprop lyesulule. Ninye Lyena Deiyoknye ulula ati ara, el deiceuk nun kanye delinyabe. ‘Eluk melinamsil’ tenen, dinauk unyabe. Winilye ara, pia dib tenenyap ati ara, pia pi dobuka, mikip arye el piluk donyabe.

¹¹ Na nyapkin yupu dobuka, ance yuk ninye ati, “Anggun adiparyuk wininamlulume,” nyabuka, mikip arye peterenalyame.

¹² Tonda, yuk nang arye, anti, “Anda kamnye atonun ulyama ati ara, an yupu kum kekepnukiyap ati, dauplye,” nyapkicopura, sik anang ati yupu sekenamlyame. ‘Dauplye,’ tenena kume. Aning kum bukni, an winilaminye ning, yuk nang eipkikirye, ‘Kel biknamak’ tenen, winipmantonye bira anuk unamlame. Ara, an yupu nyana ap, an winin ning nirya ap, yuk nang ati bico tenebuka melina ap, Allah ap, el yupu ap, diba tenelulum ning ap, mingne ubuka, diksukum una ap, winipminye deice arye yuk nang kel biknamkiake.

¹³ An dam min kum yanamnye talak noutam nirya, batakna kum arye, pia tuba-tuba anyapnukin pil ara, donalyame. Ara, ‘Yuk ninye kekenamak’ tenen, laka ninye kekenak arye, Allah yupu yininamlyame. Tonda, Allah el yupu deice arye laka nyana ap, “Winiplulume,” nyabuka, peterena ap, “Winina meme,” nyabuka, wenena ap, pia wininamlyame.

¹⁴ Minop talak apil min kum dolamlum talak ara, Allah yupu aik deiyok nang arye, sik taruk an nong deice deibuka, “Allah el pil moubuka winipman kum pil winibuka, winibuka donamle,” nyalilamkika deice arye, Allah El Dib Kanye arye pil bita dona deiyok ning arepkuk. Aripkuk ning ara, ‘Dauplye’ tenen, batakna meme. Anyuk tenebuka pi dobuka mikip arye pil donalyame.

¹⁵ Anyapmakin yupu nirya ara, batakna kum arye pia pi dobuka, pil donalyame. An kanye ap, nong ap, mikip ap nirya arye, pia piribuka dopminyopura, yuk ninye eibikirye, ‘E apil donmala ara, teleb winipnin banmala atia,’ tenenamake.

¹⁶ An winin ning nirya ap, an petereminye ning nirya ap, ‘Malye nyapnikcak’ tenen, pia moubuka dildanamlyame. Ara, ‘Na babye, na peterenye yupu kekenyak ninye babye, Allah arye lyepnamsil’ tenen, an adiparyuk batakna kum arye, tuba-tuba wininamlyame. Winipminyopura, Allah arye an ap, an peterepnalam ninye ap, lyepnamsile. Na Paulus arye nyabuka sekeibkine.