1 Tesalonika 4 - Eipomek

‘Allah arye nun nirya ati, kanye deipnamsil’ tenen, wininamap ning ati, nyabuk yupu

¹ Telebe nun kayapu, aminyan talak Allah arye, nun nirya ati, kanye deipsilirye, ‘Anang ara, teleb nang unyake tenepnamsil’ tenen, “Wininamlulum, wininamlulum,” nyabuka peterelamsupu. Nunce anggunti peterelamsupu touk, dipkoprop akunum winilulume. Ati ara, wini talak awinimunye ning ara, weik arye tonap, pia tabakuka wininamlulume. Ara, nun Deiyoknye Yesus, el si deice arye ayupu nyapdeipsiyabe.

² Nun Deiyoknye Yesus arye, nunti pil deiyok ning areamsuka deice arye, “Wininamlulum, wininamlulum,” nyabuka peterelamsupu anyak, dololalum ning ara, anggun akunum biklume.

³ Ayupu atouk ning ton nyapnusiabe. Ara, Allah arye nun nirya ati, ‘Wininamake,’ tenelamsuk yupu ara, ani. Tonok ning ara, Allah eluk talilamunce, diksukumuk wininamlulume. Talya ninye arye, talye-talye yoldalamak ning nirya ara, pia kum wininamlulume.

⁴ Anggun nirya bukni, tonok-tonok arye, anggun bidamnye nong ap, anggun bidamnye domlum kilapu ap ati, ‘Talya luba kibuka winipnune,’ tenena kumce, kalekuka dilamunce, malye winina pia kum aniryuk, diksukumuk wininamlulume. Winilamunyopura, yuk nang eipsikirye, ‘Anang ara, pia teleb wininyake,’ tenepsiting touk wininamlulume.

⁵ Sik Allah ati dib tenena kum ninye arye, yuk kilapu ap ati, ‘Se akil ara, dobuka yoptinye’ tenen, pia tuba tenena ap, ‘Na patapnilye touk talye luparabuka winipnune’ tenena ap, winilamak touk, kum wininamlulume.

⁶ Ninye talye yoldalamak ning ap, aning-aning nirya pia pataplibuk, ‘Talya parapkabuka winipnun’ tenena ap ati ara, anggunce yuk nang nirya ati, talye minina yupu nyana ap, malye kilina ap, kum wininamlulume. Nunce anggunti akunum peterepsupu. “Yata ninye do nirya, anyapmasin malye ning ap, aning atonun ning ap, akunum winipmacopura, aminyan ara, Allah weik arye wenebuka opnamle,” nyabuka wenelamsupu.

⁷ Ayupu peterelamsupu ara, talye ati kume. Allah arye nunti nyapsuka ara, malye una ap, teleb una ap, tabakuka una ati kum yukupsuke. ‘Pia diksukumuk wininamak’ tenen, yukupsuke.

⁸ Aning ati ara, yatanye do nirya, anyapmasin yupu batakuka, yaniplyopura, talye tukwak nang nyanyak yupu kum yanilule. Elce, Allah arye, El Dib Kanye arisululnye biti, yanilule. Aning ara, weik mambule.

⁹ Ara, anggunce yuk nang nirya ati, bico tenebuka melin ning ara, yupu ton kum sekeipnusiabe. Ara, Allah arye anggun nirya ati, ayupu ara, akunum peterelamsupu ura, kekelamlume.

¹⁰ Tonda, elce peterelamsuk touk, anggunce yuk diba tenenyak ninye nirya ati, Provinsi Makedonia tam unyakce diba tenenyak ninye nirya ati, bico tenebuka melilanauk ululume. Bukni, nun weit yapu atonun nango, ‘Aning akunum winimunya atonun, pia weika arye tonap, tabakra banamlulume’ tenen, nyapsiabe.

¹¹ Nunce anggunti peterena deice arye, nyapsupu touk, anoutam talak nirya arye, anggunce yuk nang ati, “Anggunda yata ati aning wininmalum do? Winipnamlulum, winipnamlulum,” nyabuka nyalina kume. ‘Nun bidamnye taruk aniryuk pil dobibirye, kanye lamabuka ubibirye, kanye deibuka, nimalye arye unamap’ tenen, pia pi dobuka wininamlulume.

¹² Anyapmasiyap touk, asum-asum nirya winipnumunyopura, yuk diba tenena kum nang eipsikirye, ‘Anang ara, teleb asa unyak nang,’ tenebuka kipdopsikirye, anggun nirya ati, kanye deilinamsiake. Tonda, anggun bidamnye taruk aniryuk, pil dopmunyopura, ‘Yuk nang aniryuk melipnamsiak,’ kum tenenamlume. Anggun bidamnang pil dopmunya deice arye, anggun patan ning dolonamlume.

Nun Deiyoknye Yesus tamubuka yanamla ati, nyabuk yupu

¹³ Na kayapu, akunum diamik nang unyak ning kel bikna ati, ‘Walwal kum wininamlulum’ tenen, nyapnusiabe. Tonda, yuk dib tenena kum nang nirya arye, sik kayapu nang dipmakibuk, ‘Weik arye engebuka boku weik sukulamle touk kum unamlulum’ tenen, ayupu nyapnusiabe.

¹⁴ Nun dib tenenyap ning ara, ani. Ara, Yesus dibuk bukni, Allah ila tamubuka kam bukeibuka anya arye, Yesus dib tenelamik bukni, akunum diamik ninye ara, Yesus tamubuka yanamle talak ara, Allah arye aninye dobuka bobinamsile.

¹⁵ Yesus arye nyapdeiamsuk touk, sik diba tenelamik bukni, akunum diamik ninye ara, minopce tamubuka Yesus ap binamake. Ara, Yesus tamubuka yanamle talak, sik tuba kam ulamak ninye ara, minop im deice kum welebinamake. Akunum min diamice ninye arye menekuka welebicopura, sik kam tuba unyak ninye ara, aminyan welepnamake.

¹⁶ Aning ara, urdemuk, talya kum nyapsine. Nun Deiyoknye im deice arye kwerebuka yanamle talak ara, elce weik yupu nyaplibuk, im deice pil don nang malaikat, sik deiyoknye birye, weik yupu nyana ap, Allah el im deice bung-bung ana el si ara, terompet arye lelim nyana ap, anirya akunum winiplyopura, sik Kristus diba tenelamik bukni, akunum diamik ninye ara, minopce kam bukeiplibuk, dua kan-kan noutamak welepnamake.

¹⁷ Im deice ei, tukwak du noutamak ara, sik min deiamik nang akunum welebicopura, sik kam tuba tukwak aunmace ninye ara, Allah arye aninye dobuka, erebuka deiplibuk, sik min diamik ninye ap, nun Deiyoknye Yesus ap, dua kan-kan noutamak adiparyuk eibdanamake. Anirya akunum winiplyopura, nun nirya Allah arye dobuka bisilibuk, im deice Allah ap neika pia unamabe.

¹⁸ Unamaba ati ara, ayupu nyalamunce, anggun kanye talima melilanauk winilanamlulume.