1 Tesalonika 3 - Eipomek

¹ Anggun dam yangalamuburye peterelamsupubuk, anggunti tuba tenelamsuburye, adiparyuk kum winipmanto upsukura, nunce, winibuka tenebupu. ‘Kume, nun asukumuk, Atena mutuku aulamepyeba, tonoknye dobuka deiptibyeura, nun batakuka, anggun Tesalonika ninye dilbana ati, bitue,’ tenebupu.

² Winibuka tenebuburye, Timotius anggun dam dilyangana ati, dopdeipsupu. Timotius ara, talinye kume. Elda, nun weit atonunye ulule. Tonda, el ap, Allah ap, Kristus el laka teleb yupu dobuka, mutuku-mutuku nirya peterelbana ati, pil neiktoto dodurake. ‘Timotius arye, anggun diba tenemunya ati, kwa dakna ap, mikip kilina ap, upnamsil’ tenen, dobuka dopkwetebupu.

³ Anggun ikin ning ap, kanye imun kanye ap usilye ning deice arye, Yesus ati, akunum diba tenelamlum ning ‘Bataknamap do?’ tenen, ‘Kum teniltonamlulum’ tenen, Timotius anggun dam dopdeipsupu. Anggun akunum kele. Aikin ning upsilye ning ara, Allah arye el mapu nirya ati, ‘Wininamake,’ akunum tenelamsuke.

⁴ Aninguk kum bukni, nun ap neika ulamubu talak ara, ayupu uk, ila tonap, laka nyalamsupu. “Allah ati, diba tenebibibuk, yuk nang arye, ikin ning nun nong deice deilinamsiake,” nyabuka, laka nyalamsupu. Ayupu nyalamsupu touk, akunum wininmasile. Anggun babye, aning akunum kel biklume.

⁵ Aning ati ara, anggunti tuba tenelamsisirye, adiparyuk kum winipmanto upnukura, Timotius anggun dam dopdeipsise. Ara, dilbilirye, aminyan talak ‘Sik Tesalonika ninye arye, Allah ati diba tenenyaka ara, tuba teleb unyak do, kum do?’ tenen, dopdeipse. Ara, ‘Isa Mutuku Dongonye arye pirilena ning winiplibuk, malye winibicak do?’ tenen, tuba moubuka dilamnuke. Deiyok ara, ‘Isa Mutuku Dongonye arye akunum piripdesukba, malye akunum winibdeibsuk ak, nun pil dolamubu ning ara, nong kum upsuk do?’ tenen, Timotius anggun dam dopdeipsise.

Timotius arye, Paulus dam binuka, Tesalonika ninye ati, nyabuk yupu

⁶ ‘Nun pil dolamubu ning ara, nong kum upsuk do?’ tenen, ilil ulamnuk bukni, wini talak ara, Timotius arye anggun dam anirye, nun dam akunum yanmasila anya arye, anggunce Allah ati, dib teneplum ning ap, yuk ninye ati, bico tenebuka melilamlum ning ap ati, teleb yupu akunum laka nyalyanmasile. Tonda, nyapsuke. “Sik Tesalonika ninye arye, sik ap neika ulamik talak ati, tuba tonap tenebice talak ara, kanye deibuka pin-pin kanye bonyake. Tonda, Paulus an ap, an neika ululum ninye ap arye, sik Tesalonika ninye ati, ‘Se sik ton eibuka, epdatibye’ tenen, pia patasulul touk, sik Tesalonika nang arye, sik nirya ati, atonun patalule,” nyabuka, Timotius arye nunti laka nyapsuke.

⁷ Ayupu nirya akunum nyapsuka ati ara, nun diba tenebya, ikin ning nun nong deice delisinyaka ap, kanye imun kanye bobuka unyaba ap, aupmalya babye, anggun tuba diba teneplum ning ati, laka nyapsuk ak, nun kanye lopsuke.

⁸ “Sikda, nun Deiyoknye Yesus ati, dib tenebikirye, kanye dukdongobuka, pia kanye lamabuka unyake,” nyabuka laka nyapsuk ak, akunum kekebupu anya arye, nunda, dipkoprop pin-pin kilisululume.

⁹ Allah ap kanye dukdongobuka neika unyap noutam talak nirya ara, anggunti tenebibirye, kanye deibuka unyabe. Pia pin-pin kilisululume anya arye, yata ubuka arye, afinfin ulisulul ning ati, nun ni Allah ati, “Telebe,” nyabuka deiptibye do? Weika arye, “Telebe,” nyaptibye babye, aning deice arye, pin-pin kipsulum ning ara, kum punupsetibye.

¹⁰ Lukunyan babye, keting noutam babye, nunce Allah ati, ‘Se, nun kayapu nang Tesalonika mutuku ninye ap, ila tonap epdatibirye, sik diba tenenyak ning noutamak lo usilye ning do, sukmalye ning do, tabakuka petereptibyeba, sirya dakana ati, moubuka pil doptibye’ tenen, morosenyabe.

¹¹ Wini talak ara, nun ni Allah ap, nun Deiyoknye Yesus ap arye, nun bisik moupdeipsitringbuk, ‘Sik Tesalonika mutuku ninye dam dilbitibye’ tenen, Allah morosenyabe.

¹² Tonda, Allah morosinyap ning ara, nyapnusine. Ara, nunce anggun Tesalonika ninye ati, bico tenena ap, kanye delina ap, weik tabaknin balamle touk, nun Deiyoknye Yesus, anggunti melisilya deice arye, anggunce yuk ninye nirya ati, bico tenebuka, weika arye melinamlulume.

¹³ Tonda, nun Deiyoknye Yesus ap, el im deice melina nang, malaikat ap, tukwak tamubuka yanamak talak noutamak bukni, anggun Tesalonika ninye ara, nun ni Allah dam tikilbinamlum talak ara, ‘Anggun malye winin ning tonok ning babye, kum uplye deice arye, pia diksukumuk wininamlulum’ tenen, Allah morosunune. Tonda, ‘Winibuka wininamak’ tenen, ‘Yesus arye anggun talima mikip kilililamsilya deice arye unamak’ tenen, Allah morosunune. Na Paulus arye nyapsine.