1 Tawarikh 29 - Eipomek

Allah Yahweh el si eren aik dona ati, yuk-yuk ning nirya bulubuka, Allah arebika ati, sekik yupu

¹ Israel mutuku noutam ulamik nang, sik ninye deiyok kibuka ulamuknye, Raja Daud birye, el dam bulubuka yanmek nang nirya ati, nyabuk. “Ura, na kayapo. Na mi Salomo bira, Allah arye, ‘Anye bira Raja unamleʼ tenen, akunum wipdeipmasile. Anye wipdeipmal bukni, elda welnye tuba unmal talak wipdeipmala anya arye, el pil dona ara, kabula. Elda winiryuk biknin banmale. Tonda, nun ni koproba Allah Yahweh, el si eren aik dona ati ara, pia ikin pil ulule. Deiyok ara, aweik aik ara, talye tukwak nang, dipnamak nang arye wekenamak aik kume. Ninye talye nang sik weken aik kum bukni, anyaik ara, Allah el si Yahweh, aning-aning deice tam ululnye, el aik ulul ati nyapne.

² Ati ara, anyaik don ning nirya ara, na Raja Daud ninye deiyoknye birye, na dam awamnuk aik don ning, narye bulubuka deipmanto ning emas deice arye, anyaik don ning yuk-yuk ning nirya ara, bulubuka deipse. Narye bulubuka deipse ning yuk-yuk ning nirya ara, dekna weik kat ning emas ap, perak ap, perunggu ap, kat ning besi ap, urasin teleb kat yo ap, pia urasin teleb keil ap, keil si permata keil ap, beraneka warna dekna weik keil, pia urasin teleb kibuka deilin keil ap, dekna weik keil, tonda urasin teleb kat keil, el si ara pualam keil ap, aning nirya ara, weik tonun bulubuka deipse.

³ Aning-aning nirya, adekna weik ning, yuk-yuk mutuku nang arye, boyanuka areamnikba, buluamsirye, ‘Allah el ning atouk deiyok ara, na Daud birye akunum Allah el aik dona ati pia tenenuna anya arye, aning nirya Allah el si erena ati areamse. Aninguk kum bukni, na bidamnye bira, dekna mambul weik ning, na talenun ning ara, emas ap, perak ap dobuka, anyaik dona ati akunum kintinibuka areamse.

^4-5 Narye, ‘Anyaik dopnamapʼ tenen, kintinip deiamse ning, el si emas, pia teleb ning, ara Ofir mutuku emas ikin pia weik 110 ton (1.100 kilogram) urasin pia teleb ning, el si perak murni, el ikin ara, pia weik, 240 ton (2.240 kilogram) akunum kintinip deiamse. Aning emas ap, perak ap doprobikirye, Allah Yahweh el si eren aik, ‘Anyaik urasin pia teleb unamleʼ tenen, abilinga pina ati, taplak deipnamake. Aning nirya, anyaik dona ati akunum bulubuka deipse. Tonda, apil nirya ara, sik kel weik bikamik nang arye, apil talibuka donamake. Emas ning ara, emas arye dobuka, puturubuka donamake. Perak ning ati ara, perak arye dobuka puturubuka donamake. Sik aik dona pia kel weik bikamik nang arye donamak yuk-yuk ning nirya ap ara, deiyok ning nirya akunum bulupdeipse. Ura, ati ara, wini talak ara, yatanye, ‘Allah Yahweh elti, boyanirye arepnune teneplinye bira, el kanye talima nirya ara, teleb teneplya deice aryuk arelyanganamle do? Anggun nirya arye arelyanganamlume,” Raja Daud birye nyabuk.

⁶ Raja Daud birye, ayupu nirya akunum nyabukce sirya dakukopura, sik Israel yala nang, sik yuk-yuk daulamika atonun, sik deiyok nang ap, Israel mutuku noutam talibuka unyak deiyok nang ap, yin talen nang yupa weik, seribu (1.000) yin nang, sik deiyok-deiyok nang ap, tonda seratus yin talen nang, sik deiyok nang ap, tonda, sik yuk yupu nyana deiyok nang ap, sik nirya ara, ninye deiyoknye Raja birye, “Winira areplulume,” nyabukopura, sik nirya, sik kanye aryuk, aning-aning bulubuka, ‘Arepnuyabeʼ tenen, boyanmekce arebik.

⁷ Sik Israel nang deiyok-deiyok nang nirya arye, aning nirya bulubuka, Allah Yahweh el si eren aik dona ati, yanuka arebik ning ara ani. Ara, dekna weik kat ning emas ara, ikin pia weik ning 170 ton (1.070 kilogram) boyayik. Atonun dekna weik ning perak ara, ikin weik 340 ton (3.040 kilogram) boyayik. Tonda, kat don ning el si tembaga babye, atouk ubuka ikin pia weik, 620 ton (6.020 kilogram) boyayik. Tonda, kat ning besi ara, ikin pia weik, tiga ribu tujuh ratus lima puluh (3.750) ton boyayik.

⁸ Tonda, amutuku noutam yupu nyana deiyok nang sik urasin pia teleb keil, el si permata keil ara, tonoknye el si Yehiel, elti, boyanuka arelyayik. Ara Allah Yahweh el aik noutam ara, ninye arye talin ning delin aik pum tam, ‘Naʼ tenen delina ap, kalikna ap ati, ‘Wininamlume-wininamlume,’ nyana deiyoknye ulamuk. (Yehiel bira, Lewi yalanye bukni, Gerson birye deiamukba, deipdanin yangalamika ani, yanuka deiamiknye ulamuk.)

⁹ Amutuku noutam bulubuka delilamik nang nirya arye, aning-aning nirya, sikce boyanuka arelyangalamik ning elilamikce, sik talima noutam arye kanye delilamik. Deiyok ara, adeiyok-adeiyok nang nirya ara, sik kanye deice arye, ‘Nun ni Allah ati, akunuma weik ning talye arepnamabe,’ tenepnarye, Allah Yahweh ati arelamik. Aboyanuka arelamik ning nirya ara, yupa weik ulamik bukni, sik nirya ara, tonok kanye bona atouk kibuka, tonoknye una atouk kibuka, aning-aning weik tonun bulubukabikce neika uk arelyangalamik. Tonda, ninye deiyoknye Raja Daud, el babye pia kanye delilamuk.

Ninye deiyoknye Raja Daud birye, Allah el si erebukce, nyabuk yupu

¹⁰ Israel nang nirya bulubuka wekmeka noutam arye, Raja Daud elce Allah Yahweh el si erebukce wininmok. Allah el si erebukce nyabuk, “Se diba nun apu Yakub birye si erelamkuk Allah, anda Allah Yahweh ulyame. Anda dipkoprob pia teleb ulyame. Anda minop talak arye dipdongobuka, dounamle talak babye, pia telebuk unalama anya arye, an siuk pia erenamkiyabe,” nyabuk.

¹¹ Nyabukopura, ayupu ton nyabuk. “Anda pia diba, weiknye ulyame. Tonda anda aning-aning deice tam umince, pia mikip weiknye ulyame. Se, anda dipkoprob mambul weiknye Ulyama anya arye, tukwak nang nirya arye, an si kel bikamikce, ‘Seʼ tenebuka winikinyake. An mikip deice arye, yuk mutuku nang nirya ap, yuk mikip ulul ning nirya ap ati, malye kibuka deice tam ulyame. Anda pia diksukumnye, umince weik ninye deiyoknye erebuka, ulyama anya arye, yuk Raja nang nirya ara, an amu tamuk unyake. Aning ara, talye ati kum nyapkine. Winimince, im tam ulul ning babye, tukwak mutuku noutam ulul ning nirya babye, an ninguk ulule. Anda Yahweh arye aning-aning nirya ap, ninye mutuku sirya im sirya nirya ap, talilyamce, weik deiyoknye ulyame. Sik nirya ara, an amu tam unyak bukni, anda pia deice tamuk umince, aning-aning nirya talilyame. Ati, na ni koproba Allah Yahweh, anda aning-aning nirya ap, yata nang do nirya ati, ancuk ninye deiyoknye kibuka delilyame. Ati na nio, anda mikip weik nirya ara, anuk taliplumce, aning-aning nirya kwepdeiplumce, talibuka ulyamnye biti, teleb nyapkine.

¹² Yata teleb ning do nirya, ninye arye talibuka isa mutuku dongonye unyak ning nirya ap, dekna weik ning ap, ancuk tukwak nang ati arelyame. Tonda teleb diksukum unyak ning ap, ninye tukwak nang ati, yuk mutuku nang arye, sik si kel bikikirye, ‘Se, anang ara mambul weik unyake,’ tenen ning deiyok ning babye, an taruk aryuk aresilyame. Bukni, aning-aning nirya ara, an mikip aryuk talilyame. Tonda, aning nirya ara an uk, an mikip weik deice aryuk, ‘Winipnamne,’ teneplum ning nirya ara, an tenepminye touk ulyame. Aning nirya talibuka umince, yata nang do nirya, ninye deiyok kina ap, mikip kina ap ati nirya ara, ancuk erelilyame.

¹³ Aning-aning nirya ati ara, wini talak ara, diba nun ni koproba Allah, nunce nun ni koproba anti, “Pia teleb,” nyapkiyabe. Tonda nun ni koproba an si ati, weik tonun erepkibirye kikenyabe. An pia teleb si, an siuk erenamabe.” Raja Daud birye ayupu nyabuk.

¹⁴ Nyabukopura, ayupu ton dukdongobuka nyabuk. “Bukni, na kanye se, na ap, narye talipseba, amutuku noutam unyap nang nirya ara, nunda yatato nang ubibirye, aning winipmap do? Ara, nun kanye aryuk, yata wiribuka anti, teleb aren ning atonun ning, weik tonun bulubuka arepkitibye do? Deiyok ara, dipkoprob aning-aning nirya ara, nun ni koproba ancuk aresilyame. An taruk deice aryuk arepsiminyeba, aning talinyabe. Ati, nunce anti boyabirye, arekinyap ning nirya babye, Allah Yahweh an ninguk ulul bukni, nunce aning boyanuka arekinyabe.

¹⁵ Aning ara, talye ati kum nyapne. Ara se, Allah Yahweh anda, an kele. An disiminyeba, nun apu yapu nirya babye, ninye asik nang atonun an dam arye boyanamikce, dana-dana boyanuka obinmana, ayanmana kiltolamikba, an babye bikamlume. Ati, nun amutuku noutam unyap nang babye atouk, tiya mutuku uk unyabe. Winipmanto ara, keting deiplye talak arye, ninye kanya lake kipmalya ani, tamubuka tunim alamle touk unyabe. Ati na nio, ‘Nun babye pia teleb unamabe, aminyan kum dipnamabe,’ kum teneptibye. Aning ara, dipkoprob kum winipmanto anya arye, aning ara, pia kum teninamabe.

¹⁶ Ati, dipkoprob Allah Yahweh, nun ni koproba Allah anti, ninye arye ‘Ara mambul weik ning,’ tenen ning nirya ara, amutuku noutam akunum bulupdeibuburye, ‘An aik tonok dopnamabe. Winibibirye, an si adobipye aik noutam arye, an pia teleb leknye, an siuk erenamkiyabe,’ tenebupe. Bukni, dipkoprob aning bulupmapu ning nirya ara, an taruk arye dobuka aresilyame. Ancuk aresiminye ning arye, doprobibirye an diamuk arenamkiyabe. Ara, an ninguk ulule na nio.

¹⁷ Na Daud birye akunum kele bikamse. Na ni koproba Allah, ninye nirya sik kanye noutamuk deipmince, asilelyame. Tonda, el talima noutam pia teleb ulamlanye bira, diksukum ulamlanye biti, kanye pia delilyame. Ati, narye aning nirya ara, na kanye pia teleb deice aryuk talye arepkine. Tonda wini talak ara, narye an mapu koproba, abulupmak Israel nang babye, akunum eipmane. Ara, asukum yanmakce, aning nirya, sik kanye talima noutam arye, ‘Se, nun ni Allah ara pia telebeʼ tenen, teleb kanye bobuka, pin-pin deice arye, aning boyanuka arepmak nang ara, akunum eipmane.

¹⁸ Diba, Allah Yahweh anda, nun apu yapu Abraham ap, Ishak ap, Yakub ap, tonda nun apu yapu Israel nang nirya ap ati melilamukba, sikce kanye deibuka an si erelamkik. Ati nun ni koproba Allah, ance an mapu koproba ati melipminba, wini talak sikce teleb ning dobuka an si erebuka kina ati talye dem arepnamkiyak ning atouk, aminyan talak babye winibikirye, pia ati unamakʼ tenen, moropmabe. ‘Winipnamtingʼ’ tenen ati, ance sik melipnamlyame. Tonda sik an mapu koproba ati, melipminyopura, sikce antibuk nun ni tenenamkiake.

¹⁹ Tonda, nara Daud birye, ‘Na deiamse mi, Salomo melipnamlamʼ tenen, moropkine. Winipminyeura, elce, ‘Aning winipnamne do, kum do?’ tenena kumce, pia dipkoprob tonok kanye aryuk, ance, Winipnamlume, aning ara kum winipnamlume,’ nyabuka, nyapdeiamlum mem yupu ap, ance, ‘Teleb un ning ara ani,’ nyapsulum yupu ap, ‘Na tam nang arye, aninguk talibuka unamake,’ nyapdeipsulum yupu ap, aning nirya ara, Salomo moubuka tenelirye, dobolbilirye, an siuk erenamkileʼ tenen ati moropkine. Winibuka winiptopura, narye, ‘An si eren aik dopnamakinʼ tenen, aik don ning yuk-yuk ning nirya akunum kintinip deipse ninguk, ‘Na mi Salomo doproplirye, an aik dopnamkilʼ tenen moropkine, na ni Allah.” Ayupu ara, Daud birye Allah ati nyabuka morobuk.

²⁰ Ayupu nirya akunum nyabuka Allah ati morobukopura, ninye deiyoknye Raja Daud birye, sik amutuku noutam bulubuka wekmek nang ati nyabuk. “Nun ni koproba Allah el si Yahweh, nun melisilye Allah ati, ‘Telebe,’ nyabuka kinamlume.” Daud birye nyabukopura, sik awekmek nang, Allah el ‘Naʼ tenen nang, el mapu koproba Israel nang nirya arye, “Allah Yahweh ara, nun ni koproba Allah, nun apu yapu sik melilamlumnye, anda pia telebe,” nyabik. Nyabikopura, sik anang nirya arye kutam tuku dipdongobuka, sik kisok babye tuku deice kanupdongobik. Ara, ‘Nun ni koproba Allah Yahweh ap, tonda nun deiyoknye Raja Daud ap ati, pia kanye deibuka, si erebuka kipnuyapʼ tenen, winibik.

²¹ Awinibuka mapmeka berekuk sum ara, sik adiparyuk, ‘Allah arye nun malye un ning namin kipsilirye, kum kipdeipnamsilʼ tenen, sik weilamik kam ning obuka, uku dongobikce, Allah Yahweh ati, el si erebik. Winibikopura, amutuku noutam ulamik nang nirya ati bokdeibik. Anyapce ubuka yuk ning ara, Allah el arena ati, sapi basam yim ara, seribu sapi (1.000) obuka uku dongobik. Atonun domba basam yim ton, seribu (1.000) domba basam obikce, uku dongobik. Tonda, winiryuk deibik domba basam mi ara, pia weik tonun seribu (1.000) obuka uku dongona ati, kintinibuka keil pala arye taplakuka yangeiamika dam mesba deice deibuka, uku dongobik. Tonda, domba ato ning tup ap, adomba deice diklobik anggur mek ap, yuk ning ap aren ning ton, Allah ati arebikce, el si weik tonun erenmek. Aning nirya ara yupa weik tonun arenmekce, ‘Nun Israel nang nirya ati, nun malye unyap ning kilipnamsil,’ tenen ati winibik.

Daud birye deiamuknye Salomo biti, ‘Raja kibuka talipnamsilʼ tenen, erepdeibik yupu

²² Aning nirya akunum winibikce, aning-aning nirya, Allah ati akunum arebikopura, asum aryuk sik anang nirya arye, anggur mek ap, din ning yuk-yuk ning nirya ap, kanye deibikce din dinmek. Winibikopura, Allah Yahweh el damuk, weik tonun kanye deipmikce, elti, ‘Telebe,’ nyabuka, si erebuka kinmek. Winibikopura, like bitinye ara, asum ara, ‘Daud elce deiamuknye, el mi Salomo bira, el weik sum aniʼ tenen, tonda, ‘Anye bira, nun deiyoknye Raja kipnamsilʼ tenen, lak kina ati, weik sum kintinip deibikce, minyak zaitun mek dobuka, Salomo el kisok deice dikdeibik. Winibika deice arye, ‘Anye Salomo bira, Allah Yahweh el amu tam ulul bukni, weik deiyoknye unamsilʼ tenen, winibik. Tonda, atalak aryuk tonoknye el si Zadok, ‘Allah el si eren aik pum tam pil donamle. Elda, imamnye unamleʼ tenen ati, minyak zaitun mek, el kisok deice dikdeibik.

²³ Winibukopura, Salomo el adiparyuk Allah Yahweh el bun ning tahkta deice ninye deiyoknye Raja Daud, el li koproba pununa ati, erepdeibik. Atalak ara, Salomo akunum kibuk. Winibukba, sik Israel nang nirya arye, kanye pia deibik.

²⁴ Amutuku noutam talibuka ulamik ninye deiyok nang nirya ap, yin talen nang nirya ap, ninye deiyoknye Raja Daud, elce deiamuknye Salomo biti, “Elda Raja unamsile,” nyapdeiamik nang ap, tonda, el Salomo biti “Tuba-tuba melilamep birye, el ap dopnin banamabe,” nyabuka melibik.

²⁵ Winibikba, Allah Yahweh arye Salomo biti, sik Israel nang sik dam pia kanye deibuka, weiknye kipdeibuk. Tonda, winibukopura, Salomo elce talibuka, unamuk deiyok mutuku pemerintahan weik kipdeibuk. Tonda, Israel mutuku noutam Salomo Raja kum tikamuk talak arye, talibuka ulamik ninye deiyok nang Raja-Raja nirya ara, mitik mambul bukni, Salomo bira mambul weiknye kipdeibik.

Daud talibuka ninye deiyoknye ulamuk ning ati, nyabuk yupu

^26-27 Ati ara, Isai el mi Daud birye keting tamun empat puluh tahun deice arye, sik Israel nang ulamik mutuku noutam taleamukce yupu nyalamuk. Winilamuk talak ara, ninye deiyoknye Raja Daud, elda Hebron mutuku noutam keting tamun tujuh tahun deice arye, talibuka yupu peterelamuk touk, Yerusalem mutuku noutam tiga puluh tiga keting tamun el uk talibuka ulamukce, yupu nyalamuk.

²⁸ Winibuka pil ouku weik taleamuka ani, wisi dayukce, daulamuka ani, adiparyuk Daud dibuk. Atalibuka ulamuk talak ara, ninye deiyok Raja Daud bira, sisinanye ulamukce, bona weik talinanye ulamuka ati, sik nirya arye kanye pia delilamik. Bukni el li koproba Daud akunum dibukopura, adiparyuk el mi Salomo punubukce, el ninye deiyoknye Raja tikuk.

²⁹ Ninye deiyoknye Raja Daud, el ulamukce pil deiyok koubuka dolamuk ning arye dipdongobuka, sirya dakdongobuk ning nirya, lak lena ati, si sekna buku el si ati nyabuka sekik ning ara, ani. Ara “Nabi Samuel ap, nabi Natan ap, nabi Kat ap nyabuka sekebik.

³⁰ Abuku noutam nukun yupu nyapdeibikce, sekik ning ara, “Daud elce Israel nang ap, amutuku ap taleamukce yupu nyalamuk ning ara ani,” nyapdeibikce, sekik. Tonda, Daud el mikip weik deice ap, sik Israel nang nirya dam deiyok kibuka yupu nyalamuk ning ap, tonda, Israel mutuku noutam ap, yuk-yuk mutuku nang anoutam ulamik bukni, sik Israel nang sik mining dam aulamikba, sik yuk mutuku nang nirya arye kel bikamikce, ulamik ning ap ara, abuku el si ara “Sejarah Raja Daud,” nyabuka sekebik.