1 Tawarikh 27 - Eipomek

Israel nang, sik yin talen ati, deiyok-deiyok nang ap, sik amu tam yin nang ap ati, sekik yupu

¹ Anyapce sekupu ninye si nirya ara, Raja Daud biti melilamik. Sik anang nirya ara, yin talina deiyok nang ulamik. Ton nang ara, sik yala nang ati buk taleamik. Ton nang ara, yuk yin nang, sik amu tam sik yupa seratus (100) nang taleamik. Ton nang ara, sik amu tam sik yuk yin nang, sik yupa seribu (1.000) nang taleamik. Ton nang ara, ayin talina deiyok nang amu tam ulamik bukni, sikce deiyok kibuka ulamik. Ayin talina deiyok nang, sik yupa yuk-yuk wipdeibik bukni, tonok yupa ara, yupa pia weik, dua puluh empat ribu (24.000) nang wipdeibik. Keting tamun, keting tamun noutam nirya ara, sik yupa tonok-tonok arye, yuk-yuk bukni, tonok wala deice arye, amutuku kaliklamikce, Raja Daud birye, “Winipnamlume,” nyapdeiamuk touk pil dolamik. Owala ati ara, yuk yupa arye, apiluk talibuka dolamik. Atonun kibuka upnin balamikce, amutuku kalikuka pil dolamik. Sikce pil dolamik ning ara ani.

² Keting tamun, aketing tamun nirya bukni, min yuma wala yalyopura, Zabdiel birye deiamuknye, el si Yosabam birye, awala pil dolamik yin talin nang ati, deiyok kibuka yupu nyananye ulamuk.

³ Anye Zabdiel bira, ninye si Peres birye deiamukba, dadeipdanin yangalamika ani, yanuka deiamiknye ulamuk. Wala tonok noutam arye, elcuk deiyoknye ulamuka deice arye, el yin talen nang, sik yupa ara amutuku kaliklamik.

⁴ Keting tamun nirya, wala bitinye ara, Ahoi yalanye el si Dodai, elce el yala nang ati, deiyok kibuka taleamukba, sikce apiluk dolamik. Dodai el amu tam melina ati, mitik tonun deiyok atonun ulamuknye bira, el si Miklot ulamukce apil dolamuk. Sik yala ara ninye weik sik yupa ara, dua puluh empat ribu (24.000) nang ulamik.

⁵ Keting tamun nirya, wala winilye deice ara, imamnye el si Yoyada, elce deiamuknye Benaya birye, elce el tam nang deiyok kibuka taleamukba, sikce apiluk dolamik. Sik yala nang yupa ara, weik dua puluh empat ribu (24.000) nang ulamik.

⁶ Anye Benaya bira, Raja Daud el amu tam ulamik mikip weik yin nang ara, tiga puluh (30) nang ulamika kan-kan, el ton daulamuk bukni, elda ayupa ati deiyok kibukce, deiyok kibuka, sik deiyoknye ulamukce yupu nyalamukba, sikce Raja Daud ap ninye olbalamik. Benaya birye deiamuknye, el si Amizadab, elce el li koproba, el amu tam ulamukce, melibuka pil dolamuk.

⁷ Keting tamun nirya, wala dumbarye ara, Yoab el kwit koproba, el si Asael bira, el yupa ati deiyok kibuka taleamukba, sikce apiluk dolamik. Asael birye deiamuknye, el si Zebaja, elce el li koproba akunum minop dibukopura, el li koproba punubukce, deiyok kibuka sik yala yupa ati deiyok kibukce, melibuka pil dolamuk. Sik yala yupa ara, ninye yupa weik dua puluh empat ribu (24.000) nang ulamik.

⁸ Keting tamun nirya, wala pamubarye ara, Yizra birye deiamuknye el si Samhut bira, elce el yala kong ati, deiyok kibuka taleamukba, sikce apiluk dolamik. Sik yala kong ara, ninye yupa weik, dua puluh empat ribu (24.000) nang ulamik.

⁹ Keting tamun nirya, wala nakub barye ara, Ikes birye deiamuknye, el si Ira bira, elce el yala kong ati, deiyok kibuka taleamukba, sikce apiluk dolamik. Sik yala kong ara, ninye yupa weik dua puluh empat ribu (24.000) nang ulamik.

¹⁰ Keting tamun nirya, wala tekbarye ara, Efraim yala nang arye deiamikba, dadeipdanin yangalamika ani, yanuka deiamiknye, el si Heles bira, weik asik si ara Peloni mutuku noutam ulamuk. Heles birye el yala nang kong ati, deiyok kibuka taleamukba, sikce apiluk dolamik. Sik yala kong ara, ninye yupa weik dua puluh empat ribu (24.000) nang ulamik.

¹¹ Keting tamun nirya, wala pinbarye ning ara, Zerah yala nang arye deiamikba, dadeipdanin yangalamika ani, yanuka deiamiknye, el si Sibkai bira, weik asik si ara, Husa mutuku noutam ulamuk. Sibkai birye el yala kong ati, deiyok kibuka taleamukba, sikce apiluk dolamik. Sik yala kong ara, ninye yupa weik dua puluh empat ribu (24.000) nang ulamik.

¹² Keting tamun nirya, wala topne barye (9) ning ara, Benyamin yala nang arye deiamikba, dadeipdanin yangalamika ani, yanuka deiamiknye, el si Abieser bira, weik asik si ara, Anatot mutuku noutam ulamuk. Abieser birye el yala yupa ati, deiyok kibuka taleamukba, sikce apiluk dolamik. Sik yala yupa ara, ninye yupa weik dua puluh empat ribu (24.000) nang ulamik.

¹³ Keting tamun nirya, wala takubarye (10) ning ara, ninye si Zerah, elce deiamuknye, el si Maharai birye, elce el yala kong ati, deiyok kibuka taleamukba, sikce apiluk dolamik. Sik yala kong ara, ninye yupa weik dua puluh empat ribu (24.000) nang ulamik. Anye Maharai birye, weik asik si ara, Netofa mutukunye ulamuk.

¹⁴ Keting tamun nirya, wala koklombarye ara, Efraim yala nang arye deiamikba, dadeipdanin yangalamika ani, yanuka deiamiknye, el si Benaya, elda weik asik Piraton mutukunye ulamuk. Sikce anye wipdeibikba, el yala yupa ati, deiyok kibuka taleamukba, sikce apiluk dolamik. Sik kong ara, ninye yupa weik dua puluh empat ribu (24.000) nang ulamik.

¹⁵ Keting tamun nirya, wala obarye ton dua belas ara, ninye si Otniel, elce deiamukba, dadeipdanin yangalamika ani, yanuka deiamiknye el si Heldai, weik asik, Netofa mutukunye ulamuk. Anye wipdeibikba, elce el yala kong ati, deiyok kibuka taleamukba, sikce apiluk dolamik. Sik yala kong ara, ninye yupa weik, dua puluh empat ribu (24.000) nang ulamik.

Israel mutuku noutam ulamik nang, sik yala nang ati, kong kibuka deiyok kiamikce, yupu nyalamik nang ati, sekik yupu.

¹⁶ Israel tam noutam nirya ara, Israel yala nang deiyok kibuka taleamikce, yupu nyalamik nang, sik si ara ani. Ninye si Zikri, elce deiamuknye, el si Elieser, elce deiyok kiamukce, talibuka ulamukce yupu nyalamuk. Tonda, sik Ruben yala nang ati, taleamukce, elcuk yupu nyalamuk. Tonda, ninye si Maakha, elce deiamuknye, el si Sefaca, elce Simeon yala nang ati, deiyok kibuka taleamukce yupu nyalamuk.

¹⁷ Lewi yala nang ati, deiyok kibuka taleamukce, yupu nyalamuknye, el si ara Hasabya ulamuk. El li bira Kemuel ulamuk. Harun yala nang ati, deiyok kibuka taleamukce, yupu nyalamuknye, el si ara Zadok ulamuk.

¹⁸ Yehuda yala nang ati, deiyok kibuka taleamukce, yupu nyalamuknye, el si ara Elihu ulamuk. Tonda el, Raja Daud, el du ulamuk. Isakar yala nang ati, deiyok kibuka taleamukce, yupu nyalamuknye, el si ara Omri. Eli koprop ara, Mikhael ulamuk.

¹⁹ Zebulon yala nang ati, deiyok kibuka taleamukce, yupu nyalamuknye, el si ara Yismaya ulamuk. Eli koprop ara, Obaja ulamuk. Naftali yala nang ati, deiyok kibuka taleamukce, yupu nyalamuknye, el si ara Yerimot ulamuk. Eli koprop ara, Asriel ulamuk.

²⁰ Efraim yala nang ati, deiyok kibuka taleamukce, yupu nyalamuknye, el si ara Hosea ulamuk. Eli koprop ara, Asazya ulamuk. Manasye yala nang bukni, noutam bokukabikce, Yordan mek koubuka otam, keting kumulban tam ulamik nang ati, elce deiyok kibuka taleamukce, yupu nyalamuknye, el si ara Yoel ulamuk. Eli koprop ara, Pedaya ulamuk.

²¹ Manasye yala nang bukni, noutam bokukabikce, Yordan mek koubuka otam, keting panalyangan tam bukni, Gilead mutuku ulamik nang ati, deiyok kibuka taleamukce, yupu nyalamuknye, el si ara, Yido ulamuk. Eli koprop ara, Zakaria ulamuk. Benyamin yala nang ati, deiyok kibuka taleamukce, yupu nyalamuknye, el si ara Yaasiel ulamuk. Eli koprop ara, Abnar ulamuk.

²² Dan yala nang ati deiyok kibuka taleamukce, yupu nyalamuknye, el si ara Asareel ulamuk. Eli koprop ara, Yeroham ulamuk.

²³ Ura, ninye deiyoknye Raja Daud bira, sik ninye aulamik noutam nirya ara, sik aninye akunum nelamik keting tamun ara, dua puluh (20) arye dipdongobuka, outam kiamne nang ara kum nukuk. Aning kum nukuka deiyok ara, Allah Yahweh arye, “Israel nang ara, deiamikiba, dadeipdanin banamak nang ara, yupa pia weik unyake. Im deice kurya weik tonun tiklamle touk unamake,” nyabuka nyalin yupu deice arye, nyapdeiamuka anya arye, Daud birye sik nena mitik tonunuk ulamik nanguk, kum nukuk.

²⁴ Tonda, ninye si Zeruya, elce deiamuknye Yoab birye, Israel nang sik ninye si seken pil deiyok koubuka, dolamuk bukni, adiparyuk obuka sirya dakuk. Deiyok ara, ‘Allah arye, sik tam nang si sekna meme. ‘Aning ara na like,’ akunum nyapdeibukba, Yoab birye akunum kel bikamuka anya arye, ‘Nun Israel nang deice, Allah arye ikin ning deipsilyakʼ tenen, ninye si kum sekuka sirya dakuk. Ara asi sekmanya deice, Allah arye yu kiplirye, wenebuka ikin ning deipsilyakʼ tenen ati, apil batakuk. Ati ara, aning-aning nirya winina ati sekamik buku, ninye deiyoknye Raja Daud, el ulamuk ning sekamik buku noutam ara, ‘Israel nang yata wiribuka unyak do?’ tenen, sekuka deibik ning ara, abuku sekna deiyok nang arye, aning kum sekik.

Ninye deiyoknye Raja Daud, el amu tam mitik deiyok kibuka, yuk pil talibuka ulamik nang ati, sekik yupu

²⁵ Ninye deiyoknye Raja Daud, el amu tam mitik deiyok kibuka, yuk pil talibuka ulamik nang ara, sik si sekik ning ara, anyapce ubuka utam sekupu. Raja Daud, el aik noutam dekna weik bona delinak ap, talina ap ati, tonoknye el si Asmawet wipdeibukba, apil talibuka ulamuk. Asmawet, el li koprop ara, Adiel ulamuk. Aning atouk ton, yuk dekna weik ning uamukak nirya ara, yuknye el si Yonatan wipdeibukba, apil talibuka ulamuk. Yonatan el li koprop ara, Uzia ulamuk. Yonatan birye, kaliklamuk bona ara, weik asik noutam kum bukni, bai tam noutam ‘Naʼ tenen, delilamikak ap, tonda weik asik yuk-yuk bukni, mambul weik asik dolamik noutam, ‘Naʼ tenen, delilamik ning ap, mitik asik dolamik, noutam arye, ‘Naʼ tenen, delilamik ning ap, tonda, ‘Yu nang arye olyanamsiyak talak ara, eipnamap,’ tenelamik ning ap tonda, ‘Nun wa win dam arye libuka, ‘Naʼ tenen, delilamikak,’ eipsikcak,’ tenelamikce, weik cang aik dolamikce, bona delilamika nirya ara, Yonatan birye deiyok kibukba, el tam nang arye aning nirya ati kaliklamik.

²⁶ Aik dam ap, bai tam ap, wa win pil donak ap, tuku palibuka koun ning kuna ati pil don nang ara, tonoknye el si Kelub birye deiamuknye, el si Ezri birye, deiyok kibuka apil taleamukce, ‘Wininamlume,’ nyabuka, deiyok kina deiyoknye ulamuk.

²⁷ ‘Anggur wa ara, winibuka wipnamlume,’ nyana ati deiyoknye bira, Rama mutukunye, el si Simei birye, deiyok kibuka apil taleamukce, deiyoknye ulamuk. Aning atouk, ‘Anggur duk dakuka teikmunce, anggur mek kwebuka deipnumunyak ara ani,’ nyana ati, deiyoknye bira, Syifmi mutukunye el si ara Zabdi, elce deiyok kibuka, apil taleamukce, deiyoknye ulamuk.

²⁸ Zaitun duk moulamuk yo ap, Arah yo duk moulamuk yo ap ati, keting kumulban tam mutuku kon bukukak arye dobuka, delina ati, “Winipnamlume,” nyana deiyoknye bira, Gederi mutukunye el si ara, Bahal-Hanannye birye deiyok kibuka taleamukce, deiyoknye ulamuk. Zaitun duk teikuka, zaitun minyak mek deilinak ati, yupu nyana deiyoknye bira, Yoas birye deiyok kibuka, apil taleamukce, weik deiyoknye ulamuk.

²⁹ Sapi basam weilamik nang ati, pala weik mutuku, Saron mutuku dam ara, “Winipnamlume,” nyana deiyoknye bira, Saron mutukunye el si Sitrai, elce deiyok kibuka apil taleamukce, deiyoknye ulamuk. Mutuku lilul bukni, lu tam sapi basam weina ati ara, tonoknye el si Adlai, elce deiamuknye, Safat birye apil deiyoknye ulamuk.

³⁰ Unta basam weilamik ning ati, “Wininamlume,” nyana deiyoknye bira, ninye si Ismael, elce deiamukba, dadeipdanin yangalamika ani, yanuka deiamiknye, el si Obil, elce deiyok kibuka apil taleamukce, deiyoknye ulamuk. Keledai kil basam ati, “Winipnamlume,” nyalamuka deiyoknye bira, Meronot mutukunye, el si ara Yedeya birye, deiyok kibuka apil taleamukce, deiyoknye ulamuk. Atonun ton, domba basam ap, kambing basam ap ati ara, Hagri mutukunye, el si Yasis, elce, “Winipnamlume,” nyalamukce, deiyok kibuka apil taleamukce, deiyoknye ulamuk.

³¹ Anyapce eitam sekupu nang ara, sikce Raja Daud elce taleamuk ning ati, moubuka kaliklamikce, sik apil dona ati, kalikna deiyok nang ulamik.

³² Raja Daud, el li koproba, ap, tonda el kwit koproba arye deiamuknye, el si Yonatan bira, ninye deiyoknye Raja Daud biti, “Winina ara telebe, aning ara malye un ning ulule,” nyabuka, el yupu melina ati mal olana deiyoknye ulamuk. Yonatan bira, seken ning nirya ara, el pia kel weiknye ulamuk. Tonda, Teleb ning ara ani, malye ning ara aniʼ tenen, kel weik bikamuknye ulamuk. El ap, yuknye el si Yehiel ap, sik bitinye arye, Raja Daud elce deiamuk mapu nirya ati, “Teleb una ara ani,” nyabuka, kel bikina deiyok ning yuk-yuk ning nirya peterelamdik. Yehiel el li koprop ara, Hakmoni ulamuk.

³³ Yuknye el si ara Ahitofel, elce ninye deiyoknye Raja Daud biti, “Winina ara telebe, aning ara malye un ning ulule,” nyabuka, el yupu melina ati nyalamuka deiyoknye, tonoknye ton ulamuk. Aning ara mitik tonun ton, Arki mutukunye, el si ara Husai, elda, ninye deiyoknye Raja Daud, el kwit koproba ulamuka anya arye, Raja Daud el kanye pum tam uamuk ning ara, anye biti laka nyalamukba, el ap yupu sisiklamdikce, sik neika mining damuk ulamdik.

³⁴ Ura, Raja Daud, el yupu melibuka nyana deiyoknye, Ahitofel akunum dibukopura, el pununa ati, yuknye el si Yoyada birye apil talibuka dolamukce, yupu melibuka nyalamuk. Yoyada el li koprop ara, el si Benaya ulamuk. Tonda, aminyan talak ara, Yoyada dibukopura, tonoknye ton, el si Abiatar, elce Yoyada punubukce, Raja Daud, el yupu melina deiyoknye ulamuk. Tonda, ninye deiyoknye Raja Daud, el yin talen nang, sik deice tam deiyoknye bira, Yoab wipdeibukba, apil talibuka ulamuk.