1 Tawarikh 24 - Eipomek

Pil dona deiyok ning ara, dobuka sik imam nang ati, arebik yupu

¹ Imam Harun el mapu ara, dumbarye deiamuk. Ara, Nadab ap, Abihu ap, Eleasar ap, tonda Itamar ap deiamuk.

² Nadab ap, Abihu ap ara, sik ni koproba kanam kum dibuk talak aryuk, sik anang ara minop diprik. Adiprik talak ara, sik mapu ton pia kum deiamdik diparyuk diprik. Ati ara, sik kayapu nang bitinye ara, Eliazar ap, Itamar ap sik bitinye uk, imam nang kipdeibik.

³ Daud bira, Harun elce deiamukba dadeipdanin yangalamik nang nirya ati, yupa yuk-yuk kipdeibukce bokeibuk. Ara, sik Allah el si eren aik pum tam pil dona ati weken talak ap, tonda pil yuk-yuk donamake tenebukce, wipdeibukopura, anang sik yupa yuk-yuk bokeibuk. Apil dona ati, Daud birye yupa yuk-yuk winmok talak ara, Eliazar birye deiamukba, dadeipdanin yangalamika ani, deiamiknye Zadok ap, tonda Itamar deiamukba, dadeipdanin yangalamika ani, deiamiknye Ahimelek ap, tonda sik yala nang yuk nang ap, ninye deiyoknye Raja Daud birye bokdeibukba, apil talibuka dolamik.

⁴ Atalak ara, sik Eleasar birye deiamukba, dadeipdanin yangalamik yala nang kan-kan arye, Allah el si eren aik deiyok kipmanto nang ulamik. Tonda, ‘Allah el mambul piluk dopnamakʼ tenen, wipdeipmanto nang ton, aulamik. Aning atonun, Itamar birye deiamukba, dadeipdanin yangalamika ani, deibik yala nang kan-kan arye, apil-apil talibuka dopmanto nang ton a ulamik. Ati ara, Daud ap, sik imam-imam deiyok nang ap arye, ‘Ayala nang ara teleb bukni, otam yala nang ara kume,’ tenen deice arye, ‘Anang kum bokeipnamabe,’ tenebika anya arye, ninye urasin dina kumce, Allah si eren aik pil dona deiyok kipmanto nang ara, sik kel bikilin ning, tonda win ning el si undi winibika deice arye, adeiyok nang wipdeibuk. Ati, Itamar el deipdanin yanamik yala nang ara, sik pinbarye (8) nang ulamik. Bukni, Eleasar el deipdanin yanamik yala nang,ara enambelas (16) deiyok nang kipdeibikce, anang sik amu tam deibik.

⁵ Ara, Eliazar birye el deipdanin, yangalamik yala nang ap, Itamar birye el deipdanin, yangalamik yala nang ap ara, pia telebuk ulamikce, Allah Yahweh el si eren aik noutam pil talibuka dona ati, deiyok kipmanto nang ap, ‘Allah el yupu moubuka talibikirye, el piluk donamakʼ tenen, wipdeipmanto nang ton, mitik weik tonun ulamika anya arye, sik kel bikna ati lakakin ning, tonda win ning, el si undi pil dobika deice arye, anang wibuka yuk-yuk deibik. Bokdeibikce, atam nang ara, sik pil ani. ‘Atam nang ara, sik pil ani,’ nyabuka, yuk-yuk wipdeibuk. Ura anang nirya ara, Allah yupu talibuka, diksukumuk un nang asukumuk ulamika ati, pil yuk-yuk bokdeibikba, undi kel bikilin ning deice arye winibik touk, ‘Aning akunuma,’ tenebikce, anang yuk-yuk bokdeibik.

⁶ Bokdeibikopura, adiparyuk sik winilamik ning ap, ninye si yuk-yuk sekna ap, apil dona deiyoknye birye sekdeibuk. Anye bira, Lewi yalanye el si ara Netanel, elce deiamuknye Semaya birye, seken pil dolamuka anya arye, elce anang sik si sekdeibuk. Undi winibika deice arye, Itamar el tam nang noutam arye, tonok yala deiyoknye doprobikopura, Eleasar biti ara, el yala deiyok nang bitinye doprobik. Asi seknanye birye, anang sik si sekenmok talak nirya ara, ninye deiyoknye Raja Daud ap, el amu tam deiyok nang ap, tonda imamnye el si Zadok ap, Abyatar elce deiamuknye Ahimelek ap, tonda sik imam-imam nang, sik yala deiyok nang ap, sik Lewi yala deiyok nang ap, sik nirya arye dinmek.

⁷ Sikce undi donmek talak ara, tonok ning arye lak sukum ubukba, doprobikce sekikopura, anerye dipdongobuka, yuk ning ton seknin bana uk unmeka ani, winibuka sirya sekikopura, pia weik dua puluh empat (24) yala deiyok nang wipdeibik. Sik kel bikna ati lak kin ning, el si undi deice arye wipdeibuknye, min yumanye bira, Yoyarib wipdeibikba, elce deiyok kibuk. Undi bitinye deice arye dobik ning ara, Yedaya wipdeibuk.

⁸ Undi winilinye ning dobik ning ara, Harim wipdeibik. Undi dumu ning dobik ara Seorim wipdeibik.

⁹ Undi pamubarye ning dobik ara, Malkia wipdeibik. Undi nakub barye ning dobik ara, Miyamin wipdeibik.

¹⁰ Undi tekbarye deice arye dobik ning ara, Hakos wipdeibik. Undi pinbarye deice arye dobik ning ara, Abia wipdeibik.

¹¹ Undi toupne barye (9) deice arye dobik ning ara, Yesua wipdeibik. Undi takubarye deice arye (10) dobik ning ara, Sekhanya wipdeibik.

¹² Sik kel bikilina ati lak len ning, el si undi deice arye, koklombarye (11) deice arye dobik ning ara, Elyasib wipdeibik. Undi obarye (12) deice arye dobik ning ara, Yakim wipdeibik.

¹³ Anerye, undi dobikce, mikbarye deice arye (13) wipdeibik ning ara, Hupa wipdeibik. Dana tam odikin (14) wipdeibik ning ara, Yesebeab wipdeibik.

¹⁴ Dantam koklomdikin, (15) undi dobik ning ara, Bilgad wipdeibik. Dana tam takudikin (16) undi dobik ning ara, Imel wipdeibik.

¹⁵ Dana tam toupne dikin (17) undi dobik ning ara, Hezir wipdeibik. Dana tam pindikin (18) undi dobik ning ara, Hapizes wipdeibik.

¹⁶ Dana tam tekdikin (19) undi dobik ning ara, Petahya wipdeibik. Dana tam nakub dikin undi dobik ning ara, (20), Yehezkiel wipdeibik.

¹⁷ Dana tam pamu dikin (21) undi dobik ning ara, Yakhin wipdeibik. Dana tam dumudikin (22) undi dobik ning ara, Gamul wipdeibik.

¹⁸ Dana tam winilya dikin (23) undi dobik ning ara, Delaya wipdeibik. Anerye dana tam bitinya dikin (24) undi dobik ning ara, el si Maazya wipdeibik. Aning nirya akunum wipdeibikba, sik yuk-yuk ning deiyok nang, sik yupa nirya ara, dua puluh empat (24) nang kibuk.

¹⁹ Anang sik si yuk-yuk si nyabuka sekik nang ara, sik yala yuk-yuk bukni, deiyok kibuka ulamik nang ati sekik. Sik si asekmek touk nukuka deibik. Sik ayala-ayala deiyok nang, sik pil ara ani. Ara, Allah Yahweh el si eren aik noutam wekelbana ap, tonda anyaik pum tam mambul pil dona ap, Allah arena ap, el si erena ap ati, ‘Apil-apil talibuka donamakʼ tenen, wipdeibik. Minop talak ara, Allah Yahweh arye, imam Harun biti, Winipnamlume, aning ton kum winipnamlume,’ nyapdeiamuk touk, sik anang dolamik pil nirya ara, aning atonun pil dolamikce, Allah el si erelamik. Ara, Allah arye imam Harun biti, “Wininamlume, aning ara pia kum wininamlume,” nyapdeiamukba, daulamik touk, atalak wipdeibik nang babye, atonunuk winipnin balamik.

Lewi birye deiamukba, dadeipdanin yangalamika ani, ulamik nang, sik si sekik yupu

²⁰ Ura, yuk nang babye, sik Lewi yala nang arye deiamikba, dadeipdanin yangalamik nang arye deiamik nang ton, sik si seknuyape. Ayala deiyok-deiyok nang ara, asukum dipdongobuka, utam sekdeiamik nang sik si ara ani. Ara, Amaram birye deiamukba, dadeipdanin yangalamika ani, deibiknye, el si Subael ulamuk. Subael birye Yedeya deiamuk.

²¹ Eleasar birye deiamuknye Rehabya, elce min yuma deiamuknye bira, Yisia ulamuk.

²² Kohat birye deiamuknye, Yizhar birye deiamukba, dadeipdanin yangalamika ani, deiamiknye bira, Selomot deibik. Selomot birye deiamukba, dadeipdanin yangalamika ani, yanuka deiamiknye bira, Yahat deibik.

²³ Kohat birye deiamuknye Hebron, elce min yuma el mi Yeriya deiamuk. Yeriya deibukopura, aminyan talak el mapu ton winilye deiamuk. Ara, Amraya ap, Yahasiel ap, tonda winilye deiamuknye bira, Yekameam deiamuk.

²⁴ Kohat birye deiamuknye, Uziel birye deiamukba, dadeipdanin yangalamika ani, yanuka deiamiknye bira, Mikha deibik. Mikha birye deiamukba, dadeipdanin yangalamika ani, yanuka deiamiknye bira, Samir ulamuk.

²⁵ Mica el kwit koproba ara, Yisia ulamuk. Anye Yisia birye el mi Zakaria deiamuk.

²⁶ Merari birye min yuma deiamuk nang ara, Mahli ap, Musi ap, tonda Yaazia ap deiamukba daulamik.

²⁷ Yaazia birye deiamukba, dadeipdanin yangalamika ani, deibik nang ara, sik si ara, Beno ap, Zyoham ap, Zakur ap, tonda Hibri ap deiamuk. Yaasia birye el mapu ara, winilye ton deiamuk.

^28-29 Mahli elce deiamuk mapu ara, bitinye ton deiamuk. Ara, sik amapu si ara ani. Eliazar ap, Kish ap deiamuk. Anye Eliazar birye mapu ton kum deiamuk bukni, el kwit koproba Kish birye deiamuknye tonok, el si ara Yerameel ulamuk.

³⁰ Musi elce deiamuk mapu ara, winilye deiamuk. Ara, Mahli ap, Eder ap, tonda Yerimot ap deiamuk. Aning eitam sekupu nang nirya ara, sik Lewi yala ninye arye deiamikba, dadeipdanin yangalamika ani, yanuka deiamik nang sik yala ara, weik deiyok nang ulamik.

³¹ Sik anang ati, ‘Anye yata pil donamle do, anye bira apil ton donamle do? Aning ara aniʼ tenen, adiparyuk dukdongobuka, sik pil dona ati ara, sik adiparyuk kel bikna laka nyana ati lak kin ning, el si undi, dobik. Undi dobika ara, sik kayapu nang, Harun elce deiamuk nang nirya babye, atonun winilamikbuk sik babye, apiluk donmek. Undi dobika deice arye, ‘E anye ap, anye ap dipkoprob apil talibuka donamleʼ tenen, bikik. Undi donmek talak ara, Raja Daud ap, weik imam deiyoknye Zadok ap, Ahimelek ap, sik Lewi yala nang yuk nang ap, imam-imam nang sik yala yuk-yuk ulamik touk bukni, sik yala deiyok nang ap, anang nirya arye, dinmekba, undi donmek. Wininmeka ani, sikce deiamik mapu ulamik touk, min yuma deiamik nang ap, aminyan sirya talak deiamik nang ap, sikce wibuka arebik pil dona deiyok ning ara, atonunuk winibuk. ‘Keting tamun weik nelamik nang ara, mambul weik pil donamak bukni, mitik kanam atonun nelamak nang babye, mambul kum piluk donamakʼ tenena kumce, anang nirya ati, teleb piluk wibuka arebikba, talibuka dolamik.