1 Tawarikh 16 - Eipomek

Israel ninye arye, Peti Perjanjian dobuka, telebak deibik ati, sekik yupu

¹ Sik Lewi yala imam-imam nang arye, Allah nyapdeiamukce, keil deice sekuka Musa arebukba, sikce marikna pum tam, el si ara Peti Perjanjian deiamik ning ara, bobanmeka ani, ninye deiyoknye Raja Daud elce, ‘Aning ara teleb sukumak deipnamapʼ tenen, Allah el si erena ati, kintinibuka domuk doltakne tenda aik binuka wekik. Anyaik ara, Allah ap, ninye ap, ansinibuka una ati, domik aik binuka wekikopura, anyaik pum tam deibik. Anyaik noutam boyanuka deibikura, sik imam-imam nang ara, ‘Allah arye nun malye un ning kum daneipnusilʼ tenen, domba ato ning obuka uku dongobik. Tonda, ‘Allah ap, nun Israel nang ap, teleb kibuka neika dukdongobuka, tonok kanye bobuka, epdanuka unamapʼ tenen, teleb arin ning boyanuka Allah ati arebik.

² Atalak ara, Daud birye domba ato ning nirya obuka, uku dongobikce, yuk teleb arin ning akunum arebuka sirya dakdongobikopura, el adiparyuk Allah ati morobuk. Ara, “Nun Israel mutuku noutam unyap nang nirya ap, nun mutuku ap, na ni Allah, ance teleb kipdeipsimince melipsutume,” nyabuka morobukce, Allah el si deice arye, ‘Israel nang nirya ara telebuk unamakʼ tenen, elce teleb yupu nyabuk.

³ Nyabukopura, sik deiyoknye Raja Daud birye, Israel nang nirya ati, din ning mitik tonunuk bokuka arebuk. Sik asukum wekmek nang ara, sal babye kilapu babye, domba basam kalipdoba tonok-tonok ap, roti kwaning tonok ap, tonda toh kwaning atonun ning, el si kue kismis ap, anang ati bokuka arebukba, sik nirya doprobikce dibik.

⁴ Aning-aning nirya bokdeibukopura, atalak aryuk ninye deiyoknye Daud birye, sik Lewi yala nang noutam arye, yuk yupa ton wipdeibuk. Ara, Allah arye nyapdeiamukce, keil deice sekukba, Musa birye asekeiamuk yupu, Peti Perjanjian marikna pum tam deibuk ning ara, boyanuka, Allah el si erena ati, kintinip domuk aik, sapi bol arye doltakne tenda aik domuk ning kalikna ap, pil dona ap ati, pil talibuka unamik nang wipdeibuk. Winibuka deiyok ara, ‘Anang arye Allah Yahweh, Israel nang nirya kalikuka melilul Allah ara, el si eren deice arye moronamak ning ap, tonda, kanye pia deibikirye mot nyanamak ning ap, Allah el si erebuka kina ap, ‘Telebeʼ nyabuka, wininamak ning ap, apil nirya ara, anang aryuk talibuka unamakʼ tenen, ati, Lewi yala nang wipdeibuk.

⁵ Elce wipdeibuk nang sik si ara ani. Ara, Allah el si eren aik wekna ati min yuma deiyok kibuknye bira, Asaf ulamuk. El amu tam nang ara ani. Ara, Zakaria ap, Yeiel ap, Semiramot ap, Yehiel ap, Matica ap, Eliab ap, Benaya ap, Obet-Edom ap, tonda Yeiel bira, kitar atonun ning el si kecapi ap, tonda gambus ap dobuka, mot nyana deiyoknye ton wipdeibuk. Aning atonun, Asaf bira kat tembaga ning, el si simbal nyapnaba, lelim weik nyan ning nyanamuka deiyoknye biti, Asaf wipdeibuk.

⁶ Atonun ton, sik imam nang bitinye nang ara, Benaya ap, Yahasiel ap ara, pong-pong apnaba, lelim weik nyalamle ning, el si terompet ‘Aning lelim nyanamleʼ tenen, deiyok nang ati, abitinye nang ton wipdeibuk. Aimam nang bitinye ara, Allah arye nyapdeiamukce keil deice sekdeibukba, Musa birye asekeiamuk yupu dongobuk marikna boyanuka, ‘Allah el si eren aik bublan damuk tikdikirye, terompet dobuka pong-pong anamdakʼ tenen, wipdeibuk.

Raja Daud birye, Allah ati, ‘Telebe,’ nyabuka, sekuk yupu

⁷ Asum aryuk, ninye deiyoknye Raja Daud birye, Asaf ap, el kayapu nang ap ton, sik Lewi yala nang sik duweit ap ati, “Allah el si Yahweh si erebuka kina ati, mot nyapnumlume,” nyabukba, sikce tamubuka, “Telebe, winipnuyabe,” nyabikce, Allah ati si erebuka kibik. Sikce ayupu nyabuka, mot nyanmek ning ara ani.

⁸ Anggun Israel nang nirya kekepnululume. Anggun nirya arye Allah Yahweh ati, ‘Nun ni Telebe,’ nyapmunce, Allah arye mambul weik pil dolamuk ning ara, ‘Ninye mutuku sirya im sirya nirya unyak nang kekepnamakʼ tenen, ayupu bobuka, mutuku sirya, im sirya nirya, laka nyalbinamlume.

⁹ Allah Yahweh atibuk, kanye lon mot nyan deice arye, “Allah elda, ninye nirya arye kum winipmanto ning nirya, Elda apil dolulnye,’ nyabuka, el siuk eremunya deice arye, elti, ‘Telebe,’ nyanamlume.

¹⁰ Allah Yahweh elda, malye un ning tonok ning babye kum ulya ati, pia lek demnye, el tonok ulula anya arye, el mambul weik si ati, teleb yupu nyanamlume. Ati, “Nunda Allah Yahweh el ‘Naʼ tenen nang unyaba anya arye, nunda pin-pin kanye bobuka unamabe. Atonun, yata nang do nirya, Allah el si ati erebikirye, ‘Elcuk nun talisulule,’ tenen, el tibuk dobolbanyak nang nirya ara, kanye deibuka pin-pin asa arye unamake.

¹¹ Nun Israel yala nang nirya arye, Allah Yahweh el tibuk asum-asum nirya si erebibirye, Nun ni koproba Yahweh, an mikip weik ara, nun arepsimince, an babye nun dam tuba uminyopura, adeice arye nun mikip unamabe,” nyabuka, asum-asum nirya moronamabe.

^12-13 Se, nun apu koproba Yakub birye deiamsukba, dadeipdanin yanganyak nang ara, Allah el mambul weik yupu nyalamuk ning ap, elce ninye kum winipmanto ning pil dolamuk ning ara, lubakina kumce, aning nirya moubuka tenipmunce, ayupu peteren pil talipmunce, donamlume. Se anggunda, ‘Naʼ tenen, nang ululume. Anggun apu koproba Yakub, el si ara Israel birye deibukba, dadeipdanin yangalamikce, deiamsike. Allah arye wibuka akwamsuk nang, anggunda Allah arye anggun wininman ning eipnarye, kanye imun weik pil dolamlum ning nirya ati, pia moubuka tenemunce unamlume. Allah arye nyalamuk ning ap, pil dolamlum ning ap nirya ara, lubakina pia meme.

¹⁴ Allah el si Yahweh ara, nun ninye nirya, nun deiyoknye, nun ni Allah usulule. Allah arye, “Aning ara wininamlume, aning ara pia kum wininamlume. Teleb ning ara ani,” nyapdeiamsuk ning ap, tuba nyasulul ning ap, ayupu ara, tukwak mutuku noutam, mutuku sirya im sirya nirya unyak nang dam ara, pia daunamle. Sik nirya arye, aning nirya bikinyake.

¹⁵ Allah Yahweh arye nunti, “Wininamsine. Narye teleb kipdeipsinyopura, anggunce nati winibuka-winibuka wininamlume,” nyalin yupu deice arye nyapdeiamsuk yupu nirya ara, pia kum luba kipnamle. Bataklirye, pia kum luba kipnamle, tuba tenenauk unamle. Elce nyapdeiamsuk nyalin yupu ara, tonok ning babye kum bataknamle. Ayupu nirya ara, dipkoprob nong upnamle. Tonda, Allah arye, “Aning ara wininamlume, aning ara pia kum wininamlume,” nyabuka, sekeiamsuk yupu nirya ara, pia ati aunamle. Minop talak arye awinilamuk touk, atalak babye awininamle. Ninye arye deibikiba, dadeipdanin yangalamikca ani, delilamak atonunye kum ulule. Keting tamun yupa weik, seribu (1.000) nyalamak touk, atalak arye doyanamle talak babye, pia ati aunamle. Elce nyalul yupu ara, min kum kum danamle.

¹⁶ Aning ara yuk yupu ton kume. Ara, Allah el si Yahweh arye, “Winipnamsine,” nyalin yupu deice arye nyapdeiamuk ning ara, nun apu yapu Abraham ap, Isak ap, sik dam ara, ayupu nyapdeiamuk. Allah Yahweh arye, “Winipnamsine,” nyalin yupu ara, Abraham el dam nyapdeiamuk. Aning atonun ton, ayupu ara Abraham el mi Isak deice yanuka dukdongobuk. Ati ayupu ara, Allah arye apia tuba tenelule.

¹⁷ Tonda, anyapdeiamuk yupu dem, ‘Tuba aupnamleʼ tenen, kanye tenibuka, Allah arye nun apu koproba Yakub, el dam yayukce, “Min arye yanuka nyapdeipkise yupu ara, dipkoprob nong upnamle,” nyabuka, Ila tamubuka tonap nyabuk. Ara, Yakub birye deiamukba, dadeipdanin yangalamik nang, nun Israel yala nang nirya ati, elce, ayupu nyabuk. “Na yupu moubuka talipmunyeura, teleb kipdeipnamsine,” nyapdeipsuka ati, nunce ayupu pia moubuka tuba-tuba tenenamabe. Elce, ayupu ara pia tuba tenelule.

¹⁸ Allah arye ayupu nyabukura, sik Abraham ap, Isak ap, nun Israel nang ap ati, “Kanaan tam ubuk mutuku nirya arepsinyeba, anggun mutuku dem kipliba, anggunda amutuku talibuka unamlume. Ara tukwak nang arye, sik ni yapu dipnamice talak, sik taleamice ning nirya bulubuka, sik mapu ati, arelamaka atonun, narye Kanaan mutuku ubuk tuku nirya arepsinyeba, pia amutuku noutamuk talibuka unamlume,” nyabuk.

¹⁹ Minop talak, Allah el mapu Israel nang nirya, Mesir mutuku ulamik talak, ninye asik nang atonun kibuka ulamik. Sik Mesir mutuku ulamik talak ara, Israel yala nang nirya ara, sik ninye yupa mitik tonun diamuk ulamik. Ninye yupa weik kum ulamika anya arye, Mesir mutuku nang ap, sik dana-dana tam ulamik nang nirya ap arye, sikti, ‘Israel yala nang ara, daupmalye. Sikda dipkoprob weik nang kuma,’ tenelamik.

²⁰ Tonda, sik Israel nang nirya ara, Mesir mutuku batakuka, pia pata mutuku balamik talak ara, tonok mutuku uk kum ulamik bukni, amutuku-amutuku nirya ara, sikcuk langdamikce, ton mutuku unmana batakuka, ton yuk mutuku binuka unmana ani batakuka, amutuku arye batakuka, yukak babye, balkiriklamik. Winilamika anya arye, tonok mutuku dem darapdongobuka kum ulamik, talye balsusulamik.

²¹ Winilamik bukni, Allah arye sik Israel yala nang nirya ati, kum batakamukce, tuba tenelamukce, lo tuba areamuka ati, yuk mutuku ninye arye, sik Israel nang dam ikin ning ton pia kum delilamik arye, sik nong deice ati, malye kum kipdeiamik. Ikin ning kum talilamik arye, ikin weik pil ton kum dilamik. Tonda, ‘Yuk mutuku ninye deiyok nang arye, ‘Naʼ tenen, nang ara ikin ning ton, sik nong deice deibicakʼ tenen, sik ni koproba Allah Yahweh arye, dana-dana tam kibuka, ninye deiyoknye kibuka talilamik nang, Raja-Raja deiyok nang nirya ati, “Sikce na mapu ikin ning delina ara, pia kume,” tenebuka yupu seklamuk.

²² Allah arye yuk mutuku ninye deiyoknye Raja ati nyalamuk. “Sik Israel yala nang nirya ara, ‘Na tenen nang unamakʼ tenen, narye wipdeipsise nang ati ara, anggun anang ara, ton pia kum dibinamlume. Tonda, narye wipdeipsiba, na yupu kekebikirye, laka nyalbanamak nang, sik nabi-nabi nang babye, ikin ning sik nong deice pia kum delinamlume,” nyabuk.

²³ Tukwak mutuku noutam umumnye nang nirya ara, Allah Yahweh el si erena atibuk, winiruk kanye lon mot nyamunce, si erenamlume. Tonda, asum-asum nirya ara, el siuk eremunce, “Anda, ninye lyena ati, weik deiyok ulyame. Tonda, an pia teleb uminye ning ap, ninye winipmanto kum pil dominye ning ap ara, pia telebe,” nyabuka, mutuku sirya, im sirya unyak nang ati, laka nyalbinamlume. Ayupu nyapnin babiba, kanye deibuka si erenamaba ara, asum-asum nirya wininamaba atia.

²⁴ Ati, ‘Ninye mutuku sirya im sirya nirya kekenamakʼ tenen, Allah el pia teleb ulul ning ap, mikip weik arye mambul pil dolul ning ap ati, laka nyanamlume. Ara, yata nang do, yuk-yuk ning nirya arye, ‘Allah el mambul pia weik winilul ning ati kekenamakʼ tenen, Allah arye winilye ning nirya ati, ‘Yuk yala nang nirya arye kekenamakʼ tenen, lak deice arye yupu nyanamlume.

²⁵ Ayupu nyanamluma deiyok ara ani. Yuk nang mutuku sirya im sirya nirya kekepnamaka ara, talye ati kume. Deiyok ara, Allah el si Yahweh pia ilil weiknye ulula ati, el tibuk pia kanye deibuka, weik tonun winilinamabe. Yuk talye ning ap, isa si ap ati, ninye tukwak nang arye, ‘Nun ni koproba,’ tenebikirye mambul tenen, atalye ning ati, si erebuka unyak bukni, Allah ara aning-aning nirya deice tam talibuka ulul ati, ilil weik uliba, elti, si erenamabe. Ara talye ati kume, talye isa mer nirya ara, amu tamuk ulule. El Allah ara, aning nirya deice tam ulule. El tonok ara, mambul weiknye ulul ati, teleb aryuk el si dem erenamabe.

²⁶ Ninye mutuku sirya im sirya nirya arye, sik taruk deice arye puturubuka deibikirye, ‘Nun ni koprop ara aniʼ tenen, aninguk talibuka, elti, si erenyake. El si erenyak ning ara, tukwak mutuku noutam talibuka ukirye, isa si erenyak ning nirya ara, talye ninguk ulula ati ara, apil tonok babye pia kum doptinge. Bukni, nun ni koproba Allah Yahweh ara, mikip weik ululnye, elcuk im tam ulul ning nirya kwepdeiamuk.

²⁷ Allah elda, pia weik teleb ulirye, si erena ap, mambul weik pil ap, dolulnye ulule. Ati, ninye mutuku sirya im sirya nirya arye, elti, si erebuka kibikirye, el si erenyake. Tonda, el si eren aik pum tam ara, el aulula ati, wekuka dilamap talak nirya ara, ‘Se nun ni koproba Allah ara, dipkoprob mikip pia weiknye ulirye, disululeʼ tenen, pia weik tonun kanye deibuka unyabe.

²⁸ Ati ara, nun tukwak mutuku unyap nang yuk-yuk ning nirya ara, nun ni koproba Allah Yahweh el si ati, “Se nun ni Allah ara, pia telebuk ulule. Elda, dipkoprob mikip weiknye ulirye, elda pia mambul ulula ati, nyabuka, el siuk erenamabe.

²⁹ Allah el ap, el si ap ara, mambul pia weiknye ulula anya arye, nun tukwak mutuku noutam unyap nang nirya arye, el si erebuka kinamabe. Tonda, Allah el si erena ati, nun nirya arye, arena teleb ning dobuka, el si erebuka kina ara, el aren ning ap nirya ara, anyaik dam boyabirye, arenamabe. Nun tukwak mutuku sirya im sirya nirya unyap nang nirya arye, Allah Yahweh ati, “Se, nun ni koproba Allah ara, malye ning tonok ning babye, pia kum winilula ati ara, el siuk, weik tonun erenamabe,” nyabuka, unamabe.

³⁰ Nun tukwak mutuku sirya im sirya nirya unyap nang nirya, el dam yanamap talak ara, ‘Seʼ tenen, ilil upsilye ati, sirim talipnamsile. Yata ning do nirya, Allah elcuk kwepdeiamuk ati ara, tukwak mutuku ulye ning nirya ara, kum loknamle. El mikip aryuk nyapdeibukba, pia darabuka bukukak apia unamle.

³¹ Ati, im deice ulul ning ap, im noutam ulul ning ap, tukwak mutuku-mutuku sirya im sirya nirya ulul ning ap, ninye nirya ap arye, kanye pia deibuka si erebuka kinamlume. Ara, “Allah el si Yahweh ara, ninye deiyoknye kibuka, aning-aning nirya erebuka, deice tam ulirye, aning nirya talibukce, Raja ulule,” nyabuka, mutuku sirya, im sirya nirya, daunyak nang ati, ayupu laka nyalbanamlume.

³² Aning atonun, weik laut mekwen deibuk sukum babye, alaut mekwen noutam ulul ning nirya babye, aning nirya ara, Allah atibuk weik yupu nyapmunce si erebuka kinamlume! Aning atonun, mutmuta palamle mutuku ulamle ning nirya babye, ninye arye wa wibuka koulamak ning dam palye ning babye, aning yuk-yuk ning nirya arye, weik yupu deice arye nyabuka, Allah ati si erebikirye kinamake!

³³ Allah el siuk erepmunyopura, weik yo kan-kan tekamlyak, bai talye dapalamle ning nirya babye, aning yuk-yuk ning nirya ara, weik yupu deice arye, Allah ati si erebuka kinamake! Ara, nun nirya arye, Allah Yahweh el si atibuk erebibirye, kinamaba deiyok ara, Allah Yahweh arye tukwak mutuku tamubuka yanamle talak ara, nun nirya ati, ‘Teleb ning ani, malye ning ara ani,’ tenebuka, yupu bokeipsilirye, wilibuka deipnamsila ati, el siuk erenamabe.

³⁴ Ati ara, nun nirya arye, Allah el si Yahweh atibuk, ‘Telebe, anda pia teleb uka,” nyabuka, si erebuka kinamabe. Ara, elcuk nunti, pia weik tonun bico tenepsukce, tuba-tuba melisilya atia. Bico tenesilirye, elce nunti, ‘Wininamsine,’ nyabuka nyalin yupu deice arye nyapdeiamsuk yupu nirya ara, pia kum bataknamle. Aning nirya ara, dipkoprob yamubuka arenamsile. Pia kum bataknamsile.

³⁵ Tonda ayupu ton nyanamlume. Nunce, “Diba, nun ni koproba Allah anda, nun lyenanye, nunti bico tenepsimince, lyepsilyame. Nun yuk mutuku nang, sik dam unyap nang ap, tonda nun malye kipsikce, yuk pera mutuku noutam bok binamsikba, unyap nang ap, nun nirya bulupdeipsiminba, nun nirya arye an si ati, “Anda pia teleb leknye,” nyabuka si erebuka kinamabe. Tonda, winipsiminyopura, an siuk erebibirye, pia kanye deibuka, ‘Se,’ tenebibirye, anti si erebuka unamabe.

³⁶ Allah Yahweh ara, elda nun Israel nang, nunti pia kalikuka melisululnye ulule. El Allah ara, pia deiyok koun talak arye, dipdongobuka sirya daknamle talak babye, pia aulule! Winibuka ulyamnye ati ara, an ‘Naʼ tenen nang, nun Israel nang arye, “Nun deiyoknye Allah Yahweh ati, ‘Telebeʼ nyapkiyabe.” Raja Daud birye nyabuk. Nyabukura, sik abulubuka wekmek nang nirya arye, “Diba, ‘Anyapmasilam touk awininnamleʼ tenen, nun babye, ‘Telebe akunuma nyababe,” nyabik.

Yerusalem mutuku ulamik nang ap, Gibeon mutuku nang ap, Allah si eren pil dona deiyok arebuk ning ati, sekik yupu

³⁷ Raja Daud birye nyabukopura, Asaf ap, el mapu silip, sik Lewi yala nang ap, sik duweit nirya arye, Allah Yahweh elce nyapdeiamukce, keil deice sekeiamuk yupu, Peti Perjanjian marikna deiamika damak batakuk. Ara, ‘Sik aimam nang nirya ara, min arye pil areamsiba, talibuka dolamik ning ara, anyapdeiamse touk, asum-asum nirya patapsilyeura, apiluk dukdongobuka pil donamakʼ tenen, asukumuk deiplobik. Sik aunmekak ara, Yerusalem asik noutamuk unmek.

³⁸ Tonda, asukumuk melibuka pil donamuknye bira, Yedutun elce deiamuknye, si Obet-Edom, bira melibuka apiluk donmok. Tonda, el yala nang bukni, yuk nang el mapu silip ara, yupa weik, enam puluh delapan (68) nang ap, apil melibuka donmek. Tonda, Yedutun el mi Obet-Edom ap, Hosa ap ara, Allah Yahweh el si erena ati, domik tenda aik wekel ban bisik bublan dam kalikin nang ulamdik.

³⁹ Bukni, ninye deiyoknye Daud birye, imamnye el si Zadok ap, el mapu silip yuk imam-imam nang ap ara, Allah Yahweh el pia lek si eren aik, ara Gibea mutuku noutam deiamik ning ara, tuba awamuk. ‘Anyaik dam arye melibuka kalikne pil donamakʼ tenen, asukumuk deibuk.

⁴⁰ Sik donamak pil ara, beren tam ap, inilamle talak ap, asum-asum nirya ara, Allah Yahweh el si erebuka kina ati, kam ning obuka, uku dongonak ati, keil pala arye denebuka memamik ning el si mesba deice dalamikak asukumuk dolamik. Apil dolamik ning ara, Allah Yahweh arye, Winipnamlume, aning ara kum winipnamlume,’ nyapdeiamuk yupu atonunuk winibuka, apil dolamik. Aning babye, Allah Yahweh arye, sik Israel nang ati nyapdeiamukba, sikce sekeiamik touk winilamik.

⁴¹ Imam Zadok ap, sik aimam-imam nang ap nirya ara, tonda Heman ap, Yedutun ap, yuk Lewi yala nang ap, ara akunum min arye Allah Yahweh, el si erena ati, ‘Kanye lon mot, sik anang aryuk, amot senamdakʼ tenen, wipdeiamuk nang aryuk melilamik. Ara, Allah arye talye bico tenelamsukce, elce, Anggunda wininamlume. Winipmunyopura, narye winibuka-winibuka tenen biknirye, kalikuka melinamsine,’ nyabuka nyalin yupu deice arye nyalilamuk ning ara, pia aninguk winipnamsile. Kum bataknamsile. Utenebikirye, Allah el siuk pia erebikirye, elti, “Nun nie, telebe,” nyabuka, nyanamake.

⁴² Heman ap, Yedutun ap ara, sik terompet lelim lena ap, tonda lelim len ning, si ceracap ap, tonda simbal ap uk, aning lelim lena ati wiamuk. Tonda, sik Lewi yala nang, yuk nang arye, sik Allah si erebuka kin talak ara, mot sen ning yala-yala yuk ning babye, pia weik tonun nyalamik talak ara, Heman ap, Yedutun ap arye, alelim len ning ton nyalamdik. Tonda, Yedutun elce deiamuk nang nirya ara, Allah el si Yahweh, el si eren aik bisik bublan dam kalikin nang, sik ton kintinip deiamuk.

⁴³ Ura, aning-aning nirya akunum winibikopura, sik Israel nang nirya, adiparyuk tamubuka, sik asik yuk-yuk biyik. Winibik touk, ninye deiyoknye Raja Daud, el babye el mapu asik binuka dilbiyuk. Ara, ‘Na mapu silip nirya ati, Allah arye teleb kipdeipnamleʼ tenen, teleb yupu nyabuka, sik nong deice deipnamneʼ tenen, el aik tamubuka biyuk.