1 Tawarikh 15 - Eipomek

Allah arye nyapdeiamuk yupu sekeiamik ning ara, Peti Perjanjian pum tam dongobuk ning bobuka, yukak delilbana ati, sekik yupu

¹ Raja Daud Yerusalem mutuku noutamak ara, ninye deiyoknye Raja Daud birye nyabukba, amutuku nang arye, Daud el aik ara, weika arye dobik. Tonda, Daud bira, ‘Allah arye nyapdeibukba sekeiamik yupu, yo marikna, el si Peti Perjanjian pum tam dongamik ning ara, teleb sukum deipnuneʼ tenen, tenda arye doltakna aik dolamik ning kintibukce, ‘Amambul yo marikna ning ara, aweik tenda aik pum tam dongopnamne,’ tenelamukce, atenda aik kintinibuka, dopdeibuk.

² Aweik tenda aik akunum kintinibuka deibukopura, Daud birye nyabuk. “Allah arye nyabuk yupu sekekuka, Peti Perjanjian pum tam deibik ning ara, Lewi yala nanguk erebuka bobanamnyake. Yuk yala nang nirya ara, apil kum doptinge. Deiyok ara, Allah Yahweh arye, ‘Sik Lewi yala nang ara, amem pil dona ap, aik ning bobuka bana ap, kalikna ap, moubuka deipnarye dina ap ara, Lewi yala nang aryuk pia tupa-tupa, na si eren pil talibuka donamakʼ tenen, Allah el si Yahweh arye, Lewi yala nang ati akunum wibuka deiamuk.” Daud birye nyabuk.

³ Ati ara, Daud bira, Allah el si Yahweh arye yupu nyabukce, keil deice sekeibukba, yo marikna, el si Peti Perjanjian pum tam deiamik. Aning bobuka delina ati, Daud birye, teleb tenda doltakna aik domukce, akunum kintinip deiamice sukumuk, ‘Amarikna bobuka bobinamakʼ tenen, yukubukba, Yerusalem mutuku noutamakuk ulamik nang nirya, bulubuka wekelyayik.

⁴ Atalak ara, Daud birye, “Anggun adiparyuk yalulume,” nyabuka, yukubuk nang, sik si ara, ani. Ara, Harun birye deibukba, dadeipdanin yanamikce, sikce delilamik nang nirya ap, tonda, sik Lewi yala nang, yuk nang ap ati, yukubukba bulubuka yayik.

⁵ Anang kan-kan noutam arye, anang ton bulubuka yanamik. Ara, Lewi birye deiamuknye, bitinye el si ara Kehat, elce deibukba, dadeipdanin yanamikce, sikce delilamik nang ap, tonda ayala nang, sik deiyoknye Uriel ap yayik. Uriel birye deiyok kibuka, el amu tam nang nirya ara, 120 yupa dumbarye arye kepdopye nakub dikin nang yayik.

⁶ Atouk, Lewi birye deiamuknye bira, winilinye el si Merari, elce deibukba, dadeipdanin yanamikce, sikce delilamik nang ap, sik duweit ap yayik. Merari yala nang kan-kan arye, tonoknye el si Asaya, elce deiyok kibukba, el amu tam nang ara, 220 yupa dumbarye kepdopnye, nakub dikin nang yayik.

⁷ Atouk, Lewi birye deiamuknye, minyuma dunye bira, el si Gerson, elce deibukba, dadeipdanin yanamikce, sikce delilamik nang ap, sik mapu silip ap yayik. Gerson yala nang kan-kan arye, tonoknye el si Yoel birye, deiyok kibukba, el amu tam nang ara, 130 yupa dumbarye kepdopnye, pamubarye nang yayik.

⁸ Tonda, tonoknye el si ara, Elsafan arye deibukba, dadeipdanin yanamik nang, sikce delilamik nang ap, sik mapu silip ap yayik. Elsafan yala nang kan-kan arye, tonoknye el si Semaya birye, deiyok talibuka, bulubuka kibukba, el amu tam nang ara, 200 yupa pinbarye nang yayik.

⁹ Tonda, tonoknye el si ara Hebron, elce deibukba, dadeipdanin yanamikce, sikce delilamik nang ap, sik mapu silip ap yayik. Hebron yala nang kan-kan arye, tonoknye el si Eliel birye, deiyok talibuka, deiyok kibukba, el amu tam nang ara, 80 yupa winilye kepdopnye, pamubarye nang yayik.

¹⁰ Utouk tonda, tonoknye el si Uziel birye, deibukba, dadeipdanin yanamikce, sikce delilamik nang ap, sik mapu silip ap yayik. Uziel yala nang kan-kan arye, tonoknye el si Aminadab birye, deiyok talibuka, deiyok kibukba, el amu tam nang ara, 112 yupa dumbarye kepdopye, obarye nang yayik.

¹¹ Anang-anang nirya, akunum bulubuka wekikopura, Daud elce imam Zadok ap, imam Abyatar ap, sik Lewi yala nang tekbarye nang ap ati, yukubuk. Anang sik si ara, ani. Ara, Uriel ap, Asaya ap, Yoel ap, Semaya ap, Eliel ap, tonda Aminadab ap ati, yukubukba yayik.

¹² Yukubuk nang yayikopura, Daud elce anang ati, nyabuk yupu ara, ani. “Anggun duweit tonok yala nang ara, Lewi yala nang, anggun duweit dem ululume. Ati, anggunce, ‘Allah Yahweh, el mambul pil dona ati, nun nong nirya ap, kanye noutam ap ara, pia teleb kibuka deipdabirye, Allah el si Yahweh arye nyabukba sekeiamuk yupu dobuka, dongamik yo marikna, el si Peti Perjanjianda, nun nirya arye, aning bobuka bana ara, teleb unamabeʼ tenen, kintinipnamlume. Ara, nun Israel nang arye, si erenyap Allah, nun ni koproba Allah Yahweh, elce yupu nyabukce, keil deice sekekuka arebukba, yo marikna pum tam dongobik ning bobuka, narye amambul ning delina ati, aik akunum kintipse sukumuk, delilbinamlume.

¹³ Minop talak ara, Allah arye mem yupu nyapdeiamukce, keil deice sekeibukba, aning dobuka, yo marikna pum tam deiamik ning ara, adiparyuk bobuka bana ati ara, anggun Lewi yala nang ton, amambul ning bobuka ban talak ara, ton pia kum ulamlume. Lewi yala nang kum bukni, yuk talye yala nang arye, aning bobuka bitibye bukni, aning ati ara, Allah el si Yahweh birye, nun ni koproba Allah ara, nun kan-kan noutam arye, ninye nirya wenepsuke. Deiyok ara, nunce nun ni Allah Yahweh ati, ‘Naie, nun babye winipmabe, tenebipye ning ara, winiptibye do, kum do? Dan yala nang arye, an yupu liamik marikna bobuka bobiting do?’ tenen, asibuka kum morolamupu. Winibupa ara, malye weik winibupuba ati, Allah arye wenepsuke,” Raja Daud birye nyabuk.

¹⁴ Raja Daud birye, ayupu nyabuka ati, sik Lewi yala imam-imam nang ap, sik yuk Lewi yala nang ap ara, ‘Pia malye ton winina kumce, teleb kibuka, lek nanguk unamabeʼ tenen, Allah arye nyapdeiamuk touk, pil dolamikce, sik yuk-yuk kintinibik. Apil dobik ning deiyok ara, ani. Ara, Allah arye mem yupu nyapdeibukba, pala keil deice sekdeiamukba, Musa birye dobuka, yo marikna, el si ara Peti Perjanjian pum tam deiamik ning ara, sikce, ‘Adiparyuk, amarikna bobuka, teleb kibuka bana ati ara, minop apil dobikce kintinip deibuka, unamabe,’ tenelamik. Allah Yahweh ara, el ‘Naʼ tenen, nang, sik Israel yala nang nirya arye, el si atibuk erebuka, kilamik. Elce, sik Israel nang kalikuka talilamukce, melilamuk.

¹⁵ Lewi yala nang arye, akunum kintinibikopura, Allah arye nyapdeibukba sekeiamuk yupu, yo marikna pum tam deiamik ning bobuka, yukak bobinamik talak ara, sik aLewi yala nang, cang yo ton dobuka, amarikna dana-dana tam memebuka dongobik. Winibik ati, acang yo erebikce, sik takunya yok deice arye deibuka banuyik talak ara, yo sirik kup-kup dana-dana tam talibuka bobiyikce, bana ati kintinibik. Awinibik nirya ara, Allah el si Yahweh arye Musa ati, “Winipnamlyame,” nyapdeibukba, Musa birye Israel nang ati, “Winipnamlume, amarikna erebuka bobanamlume,” nyapdeiamuk touk winibik.

¹⁶ Tonda, atalakuk Daud bira, Lewi yala nang, sik ninye deiyok nang ati nyabukba, sik yala nang ati, ninye ton pil bokuka, yuk-yuk arebik. Sik Lewi yala nang ati, deiyok kibuka bulubuka kiamik nang arye, ‘Apel dopnuyakʼ tenen, wipdeibik nang ara, apil talibuka dolamik. Apil dobik ning ara ani. Ara, ‘Allah el si erebuka don mot nyana ap, kanye pia teleb deice arye mot nyana ap, tonda mot nyan talak talin ning, el si kecapi ap, tonda weik lelim nyan ning, opnaba lelim weik nyalamle ning, el si simbal bukni, el si ton cera nyanyak ning ap, kanye deibuka, weik yupu deice arye nyanamapʼ tenen, memamik.

¹⁷ Raja Daud birye, sik Lewi yala deiyok nang ati, ‘Ninye wibuka deipnamlume,’ nyapdeibukopura, sik Lewi yala deiyok nang arye, ‘Nun tam nang si erebuka don mot nyanamakʼ tenen, ninye ton wipdeibik. Ara, Lewi yala nang, sik yalanye Yoel, elce deiamuknye Heman ap, el kayapu nang ap ati, “Tiklulume,” nyabuk. El kayapu nang ara, Berekhya, elce deiamuknye Asaf ap, tonda Kusaya elce deiamuknye Etan ap, wipdeibik. Etan bira, el apu koproba ara, Merari ulamuk. Anang nirya wipdeibikura, tikik.

¹⁸ Lewi yala nang, kong bitinye ning, ‘Sik neika ansinibuka mot nyanamak nangʼ, tenen, ati ara, sik Lewi yala nang arye, wipdeibik nang ton ani. Ara, Zakaria ap, Yaaziel ap, Semiramot ap, Yehiel ap, Uni ap, Eliab ap, Maaseya ap, tonda Benaya ap, Maaseya ap, Matica ap, Elifelet ap, Mikneya ap, wipdeibik. Anang ara, mot nyana ati kintinibuka deibik. Tonda, Daud birye Allah el si erena ati kintinip deiamuk tenda arye doltakna aik wekelban ati, bisik bublan kalikin nang ara, bitinye nang ton wipdeibik. Anang sik si ara, Obet-Edom ap, Yeiel ap ulamdik. Asukum deice tam si sekamupu nang nirya ara, ‘Allah el si erebuka, mot nyana ap, kanye pia teleb deice arye mot nyana ap, tonda mot nyan talak talin ning, el si kecapi ap, tonda simbal bukni, el si ton cera nyanyak ning ap, kanye deibuka, ‘Weik yupu deice arye nyanamakeʼ tenen, wipdeibik.

¹⁹ Sik Allah si eren ati, ‘Mot nyanamakʼ tenen, wipdeibik nang si ara, ani. Ara, Heman ap, Asaf ap, Etan ap ara, sikce kat ning el si tembaga arye memamik ning opnaba, lelim weik nyalamle ning ara, el si simbal, ton si ara, cera nyanyak ning ap, ‘Aning ara, winipnamakʼ tenen, wipdeibik.

²⁰ Ton nang ara, ‘Mot nyabikiba, anang arye, mitik tonun gitar atouk ning, tapu arye lelim nyabikiba, weik arye nyalamle ning, el si ara gambus ap, ‘Apel donamakʼ tenen, wipdeibik nang, sik si ara, ani. Ara, Zakaria ap, Asiel ap, Semiramot ap, Yehiel ap, Uni ap, Eliab ap, Maaseya ap, tonda Benaya ap ara, ‘Kecapi mot nyanamakʼ tenen, wipdeibik.

²¹ Ton nang ara, ‘Mot nyabikiba, anang arye, mitik tonun gitar atouk ning, pinbarye tapu arye lelim nyabikiba, el yupu pinbarye welepya kolukaplya kin mot nyana nang ati, kecapi arye, ‘Apel donamakʼ tenen, wipdeibik nang, sik si ara ani. Ara, Matica ap, Elifelet ap, Mikneya ap, Obet-Edom ap, Yeiel ap, tonda Asazya ap, tapu pinbarye kecapi deice arye, mot nyanamakʼ tenen, wipdeibik.

²² Ninye si Kenanya, elda mot nyan talak, ninye arye nyalamik ning ara, pia kel weiknye ulamuk. Winilamuka ati ara, elce Lewi yala nang, sik mot nyana ati, lelim nyan ning on talak ap, ninye yupu deice arye nyalamak talak ap ara, elda yupu nyananye lipsisikna ap, weik arye kel bikamuka ati, elce buluna deiyoknye kibuk.

²³ Berekhya ap, Elkana ap ara, Allah arye nyapdeiamuk yupu, yo marikna pum tam deibuka, tenda arye doltakna aik dolamik ning pum tam deibikura, ‘Anyaik wekelban ati, bisik bublan dam kalikinamakʼ tenena ati, ninye bitinye ton wipdeibik.

²⁴ Tonda, sik imam-imam nang, sik amu tam nang sik si ara, ani. Sebanya ap, Yosafat ap, Netanel ap, Amasai ap, Zakaria ap, Benaya ap, Elieser ap, Allah arye nyapdeiamuk yupu sekdeiamukba, yo marikna bublan dam tiknarye, weik lelim nyan ning, el si terompet, sik lelim nyana ati, anang wipdeibik. Tonda, sik Obet-Edom ap, Yehia ap ara, Allah arye nyapdeiamuk yupu, yo marikna pum tam deibuka, anyaik wekelban bisik bublan kalikna ati, sik ton wipdeibik.

Allah el si Yahweh arye nyapdeibukba, sekekuka deiamik ning, Peti Perjanjian dobuka, Yerusalem mutuku bobana ati, nyabuk yupu 2 Samuel 6:12-22

²⁵ Ati ara, ninye deiyoknye Raja Daud ap, Israel yala nang, sik mutuku noutam talibuka ulamik ninye deiyok nang nirya ap, tonda yin talin nang, kong yupa seribu (1.000) nang ati, deiyok kibuka ulamik yin nang ap, sik neika ansinibuka, Obet-Edom el aik biyik. Sik el asik biyik deiyok ara, Allah Yahweh arye, nyabuka sekdeiamukba, Peti Perjanjian yo marikna pum tam deiamik ning ara, ‘Aning bobuka, amutuku arye batakuka, Yerusalem mutuku boyanamapʼ tenen, biyik. Sik aning bobana ati biyik nang nirya ara, pia teleb kanye bobuka biyik.

²⁶ Winibikopura, sik Lewi yala nang arye, aning erebuka bobana ati, Allah arye anang sik pil dona ati meliamukba, Allah Yahweh, elce nyapdeiamuk yupu sekeiamikba, deiamik Peti Perjanjian, nyalin yupu liamik yo marikna bobuka, Yerusalem mutuku tamubuka yanganmek. Yanganmek talak ara, Allah el arena ap, el si eren ap ati, yim sapi basam tekbarye (7) ap, yim domba basam tekbarye ap obikce, weik kwalya kwalibuka, Allah el si erebik.

²⁷ Sik anang nirya, yanganmek talak ara, ninye deiyoknye Raja Daud, el cang baju ara, juba pia teleb namin baju, el si ara kain lenan, aning arye wiamik baju ongopmok. Tonda, el taram deice deibuka ongopmok ning ara, el si efod ton ongopmok. Aning efod babye, pia teleb namin baju, kain lenan arye wiamik. Sik deiyoknye ongopmok atouk, elce wipdeibukba, Peti Perjanjian bobuka, banmek Lewi yala nang ap, mot nyanmek nang ap, mot nyana ati, lelim nyana ning gambus ap, kecapi ap, terompet ap, bobuka nyanmek nang babye, sik nirya ara, abaju pia teleb namin lenan baju dem ongopmekce yanganmek. Aning atouk, ninye yupu deice arye mot nyan ning, weik arye kel kiamuknye, Kenanya, el mining baju uk ongopmok. Tonda, sik Lewi yala nang, Allah arye nyapdeiamuk yupu sekekuka deiamik yo marikna bobuka bana nang babye, abaju pia namin lenan ninguk ongopmek.

²⁸ Winipmekce banmeka ani, Daud ap, el mapu koproba ap, el mapsilip sik Israel yala nang nirya ap, kanye pia deipmekce, bung-bung ana ning, el si terompet ap, pereng nyan ning, el si Nafiri ap, weik lelim nyan ning simbal ap, tonda gitar ato ning kecapi ap, gambus ap, bobuka nyanmeka ani, mot nyapra banmeka ani, Yerusalem mutuku welebiyik. Abanmek talak ara, Allah arye yupu nyapdeibukba, Musa birye sekekuka, Peti Perjanjian yo marikna pum tam deiamuk ning bopmekce, banmeka ani, el ninye deiyoknye Raja Daud birye domuk aik dam bobiyik.

²⁹ Ura, Allah arye nyapdeiamuk yupu liamik yo marikna, bobuka banmeka ani, Daud birye, ‘Allah el si eren ati dopse tenda doltakna aik dam, aning ara anyaik pum tam deipnamapʼ tenen, anyaik domuk sukum dam wekik. Sikce asukum wekik talak ara, min arye Daud birye domuk kil, Saul el kilmu Mikhal bira, el aik jendela bisik pum arye dinmok. Dinmokba, ninye deiyoknye Raja Daud elda mot nyapra yanganmokce, erebuka lungnubuka, erebuka lungnubuka nyapra yanganmokce, Allah el si Yahweh ati weik arye kanye deipmokce, mot senmoka eibuk. Winipra yanganmokak eibuka ati, Mikhal el kanye noutam arye Daud biti, yu kanye bobukce, ‘Anye bira, na like’ tenebuk.