1 Tawarikh 13 - Eipomek

Allah arye, “Aning ara, wininamlume. Aning ara, pia kum wininamlume,” nyapdeiamukba, ayupu sekekuka, Peti Perjanjian pum deiamiknye ara, Kiryat-Yearim mutuku arye bobiyik yupu

¹ Ninye deiyoknye Raja Daud birye, sik el yin talina deiyok nang nirya, bulubuka deibukce, yupu talibuk. Ayin talin nang ara, ton nang arye deiyok kibuka, sik amu tam yin talen nang yupa weik, 1.000 nang talilamikce, yupu nyalamik. Ton deiyok nang ara, deiyok kibuka, sik amu tam yin talen nang 100 nang talilamikce, yupu nyalamik.

² Yupu talipmok talak ara, Daud birye el dam unmik Israel yala nang nirya ati, nyabuk. “Amapo, dipkoprob Anggun telebeʼ tenepnumunye touk, nun si erenyap Allah, nun ni koproba Allah Yahweh babye, ‘Telebe,’ tenepse touk, Wininamabe. Ara, nunce ninye wibuka dopkwetebibiba, nun kayapu nang tuba, Israel mutuku noutam daunmak nang nirya ati, ‘Nun yupu kekebuka, nun dam yanganamakʼ tenen, ninye wibuka deibibirye, anyapce yupu nyana ati, dopkweteptibye. Tonda, nuncuk, sik imam-imam nang dam ap, sik Lewi yala nang unyak mutuku noutam ap, weik asik ap, mitik asik unyak amutuku-amutuku nirya ap ati, yupu dopkwetebibiba, sik nirya nun dam yakirye, nun ap neika asukumuk yakceba, bulubuka unamabe. Atalak arye, yupu sisikinamabe.

³ Yupu talibipyopura, Allah arye, ‘Aning ara, wininamlume. Aning ara, pia kum wininamlume,’ nyabuka deibukba, sekekuka, deibik yo marikna, el si ara Tabut, tonda, Peti Perjanjian ara, aning daupmalyak arye dobuka, nun dam boyanamabe. Deiyok ara, ninye deiyoknye Saul taleamsukce, Raja ulamuk talak arye, amarikna ara dobuka, nun dam kum deiamupu ati, wini talak dolbinamabe. Saul taleamsuk talak ara, nunda, ‘Allah arye yate yupu nyapsilyeba, kekebibirye unamap do?’ tenen, aPeti Perjanjian marikna dam binuka, Allah Yahweh ati, pia kum asilelamuk.

⁴ Daud birye ayupu nyabukba, sik Israel yala nang, ayanuka bulubuka wekmek nang arye kekebikce, ‘Telebe, anyapmasilam touk, nun aning nirya winipnamabe,’ tenebikce, kanye pia deibuka unmek.

⁵ Sik Israel yala nang, aning bulubuka wekmek nang ara, ‘Telebe tenebika ati, ninye deiyoknye Raja Daud birye nyapdeipmok touk, yupu dopkwetebukba, Israel yala nang, dana-dana tam mutuku noutam ulamik nang nirya, bulupdeibuk. Ara, Mesir mutuku bisik wililonak, Sihor mek dam arye dukdongobuka, iknapye tam arye dipdongobuka, Hamat mutuku weik asik domik tam arye dukdongopra, amutuku nirya noutam ulamik nang ara, nirya bulupdeibuk. Ara, Allah arye, ‘Aning ara, wininamlume. Aning ara, pia kum wininamlume,” nyapdeibukba, sekekuka deiamuk ning, el si ara, Peti Perjanjian, mambul yo marikna pum tam deiamik ara, Kiryat-Yearim mutuku deiamik arye bobuka, Yerusalem mutuku boyangana ati, anang nirya ara, bulupdeibuk.

⁶ Ura, Kiryat-Yearim mutuku biyik noutamak ara, Yehuda yala nang, sik ulamik mutuku ara, Allah Yahweh arye, ‘Aning ara, wininamlume. Aning ara, pia kum wininamlume,’ nyapdeibukba, sekeiamik keil dobuka, Peti Perjanjian dongamik ning, bobana atibuk biyik. Ara, Raja Daud ap, elce, “Na dam yanuka melipnuso,” nyabuka deibukba, sik Israel yala nang kekelamik nang arye, mutuku si Bala asik dam biyik. Amutuku si bitinye ara, Kiryat-Yearim mutuku nyalamik. Ayo marikna, el si ati ara, Peti Perjanjian nyalamik ara, ayo marikna deice tam bukni, dana-dana tam pol dipdongamuk ning, el si Kerub dam ara, Israel nang nirya arye, ‘Aning Kerub bitinye memebuka deiamik ning, pol dukdongobuka ansinyamik noutam ara, Allah aulule. Asukum ara, Allah arye nun dam yangasulule,’ tenelamikce, dip tenelamik.

⁷ Allah arye nyapdeiamuk yupu, keil deice sekeibukba, anggunce aning dobuka, yo marikna pum tam deiamik ara, min talak ninye si Abinadab, el asik pum tam deiamik arye, sik Israel yala nang nirya arye doprobik. Abinadab el asik pum tam arye doprobikce, winiryuk tuku deice bana ati, dopmek ning, el si kereta sapi basam deice deibik. Ara, ‘Asapi bitinye ap arye, aikin ning libuka bobinamsiakʼ tenen, deibik. Deibikopura, akereta sapi basam libuka banmek talak ara, ninye bitinye, Abinadab deiamuknye, el mapu tonye, el si Uza ap, tonye el si Ahyo ap arye, ‘Akereta, abisik benamle, bisik dem benamleʼ tenen, akereta tapu talibuka minop banabuk, sik sapi basam ara abisik dem banmarik.

⁸ Banmarikopura, sik Daud ap, elce taleamukba, el ap neika amutuku yayik nang, sik Israel yala nang ap ara, mikip weik arye, kanye pia deipmek. Awinipmeka deiyok ara, ‘Se, amambul ning dobuka, nun mutuku deiyok noutam arye deipnamapʼ tenen, weik teleb kanye deibikce, Allah el si erebuka kina ati, mot nyanmek. Mot nyabuka yanganmek talak ara, bung-bung obuka, weika arye nyanmek. Aning ara, ani. Ara, kecapi ap, rebana ap, ceracap, el si ton simbal ap, tonda terompet ap, weik lelim nyanmekce, Allah el si eremekce, mot nyanmek.

⁹ Banmeka ani, ninye si Kidon, el gandum duk teikna dam biyikopura, asapi basam sik yan dum dukukba, sik libuka bobanmarik ning, el si gerobak ara, lulukukba, agerobak deice libuka bobanmarik marikna yo, sakmanto ubuk. Sakmanto ubuk ati, Uza birye, ‘Se, Allah el mambul yupu dongobik marikna, el si ara Peti Perjanjian, tukwak saklyak’ tenen, Uza birye, el mining taruk dopkwetebuka, amem yupu sekekuka deiamik yo marikna kup-kup tam talibuk.

¹⁰ An nin winibuka ati ara, atalak aryuk, Allah Yahweh arye, Uza ati yu ubukba, adiparyuk Uza oplobuk. Deiyok ara, amem ning ara, talye nang arye, pia kum talepmanto ning winibuka ati, winibuk. Allah arye anye Uza oplobukopura, abobanmarik mem ning damuk sakuka dibuk. Uza bira imamnye kume, elda talinye buk, amem ning talye mangkau talipmoka ati, el wenen ati ara, Allah arye obukba, asukumuk dibuk.

¹¹ Allah el si Yahweh arye, Uza obuk ning ati, Raja Daud birye, Allah ati pia malye kanye bobukce, mitik tonun ton yu ubuk. Aning ati ara, atalak aryuk amutuku ati, el si ton dobuk. “Amutuku el si ara, Peres-Usa mutuku nyanamabe,” nyabuka dobukba, tuba asi uk nyanyake. Sik Ibrani yupu deice arye, ayupu deiyok ara, ‘Yu deice arye, Uza obuk,’ tenena ati, asi nyalamik. Allah Yahweh arye Uza obukba, Daud birye Allah ati, malye kanye bobuk.

¹² Allah arye winibukba, Daud birye, ‘Se, Allah el si Yahweh arye, nun nirya ton opnusil do?’ tenen, ilil pia weik ubuk. Ilil pia weik ubukba, Daud birye nyabuk, “Se, yate winiptinye do? Yata kibuka Allah arye nyapdeibukba, sekekuka deibik yupu liamik marikna, na dam Yerusalem mutuku noutam boyatinye do? Kum boyatinye do?” nyabuka asipdeyukce, teniltonauk ubuk.

¹³ Daud el ilil pia weik ubuka ati ara, aboyangalamik marikna, el si Peti Perjanjian ara, aning dobuka Daud birye, “Na kintinibuka domsi aik, na unun mutuku Yerusalem aning kum bobuka binun bukni, tia talak ati, Kat mutukunye, el si Obet-Edom, el aik pum tam tia talak ati asukumuk deipnune,” nyabuk.

¹⁴ Nyabuka ati, Allah arye nyapdeiamuk yupu sekekuka deiamik yo marikna, el si ara Peti Perjanjian pum tam ning ara, aning dobuka balamika ani, Kat yalanye Obet-Edom, el aik pum tam deibikura, wala winilye deice arye asukumuk ulamuk. Awala winilye talak noutam nirya ara, Allah el si Yahweh arye, Obet-Edom ap, el aik noutam ulamik nang ap, el talilamuk ning nirya ap ati, pia teleb kipdeibuk.