1 Samuel 9 - Eipomek

‘Saul ara, ‘Ninye deiyoknye Raja kipnamsil’ tenen, wibik yupu

¹ Benyamin yala nang bona weik talinanye tonok, el si ara Kish. Tonda, el li bira, Abiel. Abiel el li bira, Zeror, tonda el delilyangananye Bekhorat, Bekhorat el yalanya, Apiah. Sik nirya, Benyamin yala nang ulamik.

² Kish bira, sal mi tonok deiamukba, “El si ara Saul,” nyabuka, si dobukba, si silamik. Ami ara, el urasin ap, el winilamuk ning ap ara, pia telebnye ulamuk. Israel ninye aulamika nirya ara, el urasin atonun nang ton, pia kum ulamik. Tonda, Israel nang ara, bumang nang diamuka. El Saul bira, cang weiknye nemuka arye, el kisok ara, yuk nang kisok deice tam, bisibuka ulamuk.

³ Ura, tonok talak ton, Kish el weilamuk keledai basam walwalapmokba, el mi Saul biti nyabuk. “Nun pil donanye tonok ton, inibuka bobimince, na keledai basam elbinururume,” nyabuk.

⁴ Nyabuka ati, Saul ap, el pil donanye ap, Efraim mutuku taram bukamukak, dabinuka enmarika batakuka, Salisa mutuku dam binuka, enmarik bukni, walwalapmok keledai basam kum eipdik. Kum eiprikopura, mutuku si ton, Sahalim tam arye epre, banmarika ani, akeledai basam kum eipdik. Aminyan talak, Benyamin yala nang ulamik tam elbirik bukni, akeledai basam ton, pia kum eipdik.

⁵ Akeledai basam kum eipmarika ati, tuba aepra banmarika ani, sik adiparyuk, Suf yala nang mutuku birik talak ara, Saul birye, el melinanye biti nyabuk. “Amio, dauplye. Kum enamaname. Ouku weik abasam atibuk, pia enmanama ati ara, na ni birye, mambul kanye bobuka, ‘Yata deiyok ati, pia tunim apmarak do, tenepsilyak’ tenen ati, nun mutuku koproba tamubuka binuname,” nyabuk.

⁶ Nyabuk buk, Saul el melinanye birye nyabuk. “Yo telebe binamanam bukni, amutuku noutamak ara, Allah el pil donanye, tonok ululba, ninye yuk ninye nirya arye, elti, kanye delinyake. Tonda elce, ‘Aning winipnamle, aning ara, ton kum winipnamle,’ nyalul yupu nirya ara, dipkoprob el nyalul touk winilule. Ati ara, el aik dam binimirye, asipdeniminyebuk, nun keledai basam walwalapmasil ning ara, laka nyapsiliba, ‘Abisikuk elbirurume,’ nyapsutuba, elbitinimnye,” nyabuk.

⁷ Nyabuk buk, Saul birye tamubuka, el melinanye biti, asipdeyuk. “Nun bisikak dina ati lipmanumu din ning nirya ara, akunum nirya dipmaname ati ara, el dam binuka asipdeniminyopura, el dengna ati, yata ning areptinimnye do?” nyabuk.

⁸ Nyabuk buk, el melinanye birye, tamubuka nyabuk. “Naio, na dam upmanil ning ara, dekna weik ning perak keil uang, mitik ning tonok aupmanile. Ati ara, aninguk Allah el pil donanye arepnamaname. Winipnimnyopura, ‘Akeledai basam ara, asukum unmake,’ nyapnamasile,” nyabuk.

⁹ Ura, minop talak, Israel ninye, sik patanman ning ati, ‘Allah arye laka nyapsutue,’ tenepne talak nirya ara, Allah el yupu laka nyana deiyok nang damuk, binuka asilelamik. Winilamikba, tonoknye, elda laka nyalin deiyoknye, sik asipden ning ara, laka nyalamuk. Minop talak ara, laka nyalamik nang ati, asing eibikirye, laka nyana deiyok nang, tonda eipna arye, laka nyananye ‘pelihat’ nyalamik. Bukni, wini talak ara, Allah el yupu laka nyana deiyok nang ati, ‘nabi nang,’ nyanyake.

¹⁰ Ura, Saul birye, el melinanye ati nyabuk. “An tenepmalam ning ara, teleb ning anya arye, Allah el yupu laka nyana deiyoknye dam binuname,” nyabukura, el ulamukak birik.

¹¹ Birikopura, adiparyuk bisik banmarika ani, anye el asik ara, mutuku taram deice dolamika noutam welebuka banmarik talak ara, wel kilapu mek kwelyanganmekba, bisik noutamak epdayik. Epdayikce, akilapu ati asipderik. “Allah el yupu lak lena deiyoknye bira, amutuku aunmal do?” nyapdik.

¹² Nyabuka asipderikba, akilapu arye tamubuka nyabik. “Yo, anye bira aunmale. Anggun yangarum talakuk, el menekuka banmala ati ara, minopce aminyan binamdurume. Arup ara, Allah el si erena ati, nun mutuku nang arye, kam ning obuka, omutuku deice arepnuyaka ati, el winiryuk banmale. Ati, anggun minopce birurume.

¹³ Nun aik dam birumunyopura, asukumuk epdanamalume. Elda, kam ning opnuyakak, omutuku deice aik koproba dilbinul bukni, kum binaplye talak aryuk, minopce el epdanululume. Omutuku deice weleplirye, kam ning arepnuce ning ara, elce Allah moropliba, teleb kipdeipnamala atia. El moroplyopura, sik nirya dipnamak bukni, el min kum yanmalye talak ara, kum dipnamake. El kum yanmalye talak ara, talye unamake ati ara, elce Allah moropliba, dipnamake. Ati welebirurume. Welebirurumunyopura, el ap epdanamalulume,” nyabik.

¹⁴ Nyabikba, adiparyuk Saul ap, el melinanye ap, anyaik dam birik talak ara, Samuel ap epdayik. Ara, amutuku nang arye, Allah el si erena ati, kam ning obuka arepnuyikak, Samuel bayukbuk, abisik noutamak epdayik.

¹⁵ Ura, Saul ap, el melinanye ap, Samuel dam min kum yanmarik talak ara, Samuel dam Allah el si Yahweh arye, minopce yupu yanuka nyapmok.

¹⁶ “Ambusum aketing atonun akunum upliba, Benyamin yalanye ton nyapniba, an dam yanamale. Yalyopura, epdanamarume. Epdarumunyopura, anye biti Israel ninye, sik ninye deiyoknye kipnamla ati, wipdeipnamalame. Deiyok ara, Pilistin nang arye, na ninye, Israel ninye talibuka, sik nong deice ikin ning delinyakba, Israel nang arye, ikin kanye bobuka engenyake. Engenyaka ara, na ton kekenune. Ati, ayanamalanye Saul bira, ‘Israel ninye sik ninye deiyoknye, Raja kipnamal’ tenen, erepdeipminyopura, elce Israel ninye ikin asa unyak ati ara, lyepnamle,” Allah arye Samuel biti, laka nyabuk.

¹⁷ Allah arye Samuel biti, aning nirya akunum laka nyapmoka anya arye, Samuel ap, Saul ap, akunum epdarik talak ara, Allah el si Yahweh arye, Samuel ati nyabuk. “Ura, na mapu Israel ninye talipnamlanye bira, na nyapmakinanye bira, anye atia,” nyabuk.

¹⁸ Atalakuk Saul bira adiparyuk, ‘Asipdenunʼ tenen, Samuel dam biyuk. Ara, anyasik weik bisik bublan damuk, Samuel bukmokak biyukopura, Saul birye asipdeyuk, “Na nio, na ton asipdenukine. Aminyan winipnamle ning ati, bikilulce lak nyananye bira, el aik dan do?” nyabuka asipdeyuk.

¹⁹ Nyabuka asipdeyukura, Samuel birye tamubuka nyabuk. “Kume, aminyan winipnamle ning ati, lak nyana deiyoknye bira, na akunuma,” nyabuk. Ati, anda, minop menekukapmince, mutuku kon deice, Allah si erenyabauk, binuka unamlyame. Aunmaminyeba aruba uk, na ap neika din dipnamaname. Mapmapya, ambusum beren tam arye, an kanye pum tam arye, ‘Aning ara, yata ning deiyok ati do? Yata wiripnamne do?’ tenepmalam ning nirya ara, narye lak nyapkiniba, bikminyopura, tamubuka binamalyame.

²⁰ Tonda, an keledai basam walwalaplumba, like winilye sum arye, ‘Dan mutuku unyak do?’ tenen, pia emince, ‘Se, yata ning ati, upnuk do? Yata wiripnamne do?’ tenenmalamce, kanye bokoltokilye ning ara, tuba tenina kume. An keledai basam ara, yuk nang arye, akunum eipmaka atia. Tonda, sik Israel mutuku noutam unyak ninye arye, ‘Se, pia teleb ninye deiyoknye birye, talipsutuba, telebuk uptibyeʼ tenen, weik mambul ning bobuka, pia tenenyaka ara, anda akunuma. Deiyok ara, Israel mutuku noutam ubuk ning nirya ap, Israel ninye ap ara, an ap, an nin el mapu silip ap, anggun nirya arye, aning-aning nirya talinamlume. Anda ninye deiyoknye, Raja unalama atia.” Samuel birye Saul biti, laka nyabuk.

²¹ Nyabukura, Saul birye tamubuka nyabuk, “Se na nie, nara, Benyamin yalanye bitia. Ura, an kele, Israel mutuku noutam ara, ninye yala weik ton aunyak bukni, nun Benyamin yala ara, ninye mitik tonunuk unyabe. Nunda, weik mambul kume. Tonda, nun mapu silip ara, Benyamin yala ninye arye, tenesinyaka ara, ‘Sikda talye bona ton kum ninye mambul kume,’ tenesinyake. Ati na nie, aning ara, yata deiyok ati nyapnilam do?” Saul birye nyabuk.

²² Nyabuk bukni, atalakuk Samuel ap, Saul ap, tonok mutuku, Ei domik aik kon deice welepdikce, ei uamuk asik binuka, sik ap, yuk nang ap, biyik. Samuel birye, Saul ap, Saul el pil dona melinanye tonok ap ara, yukubukba, weik aik yupu wekena ati, kintinip deiamik sukum biyik. Biyikura, Samuel birye, weik deiyok nang, sik si erebuka kina ati, teleb bunak ton, kintinip deiamikak binuka, Saul biti, “Asukumuk buklyame,” nyapdeibukba, bulbiyuk. Winipdik talak ara, anyaik noutam ara, tiga puluh (30) nang ton, binuka bukmek bukni, sikda mitik tonun amu tam ulamak nang bukmekak bukik.

²³ Winibikopura, Samuel birye, el aik din dananye biti nyabuk. “Wini talak ara, din dapnulyame. Tonda, arup talak ara, narye anti, ‘Pia weiknye si erebuka kina ati, sapi basam tupa pia teleb ning dobuka, an dam kintinip deipnulyame. Aminyan talak ara, anye yalyopura, elti, arepnamne,’ nyapdeipmanu ninguk, asapi basam tup dobuka, asukum bukmalinye dam, boyanuka arepnulyame,” nyabuk.

²⁴ Nyabukopura, Samuel el din dana deiyoknye birye, asapi basam yan tup teleb ninguk, minop webukabukce dabuka, kintinip deipmok ninguk, bobinuka, Saul dam yanuka deibuk. Boyayukopura, Samuel birye, Saul biti nyabuk. “Asapi basam tup ara, an si erebuka kina ati, kintinipmanua ati ara, an ap, abukmak nang yuk ninye asik nang ap, neika dipnulume. Na min arye, akunum kintinip deipse talak ara, akunum winipmasila atia,” nyabuk. Nyabukura, Saul birye asapi basam tup, pia teleb ning dobuka dinmok. Tonda, asum arye Saul ap, Samuel ap, sik neika din diprik.

²⁵ Aning akunum winipdikopura, Allah si erenak mutuku kon deice bukmarikak arye, tamubuka koulukdikce, amutuku dam domik asik noutam, weik asik dolamikak yarik. Yarikopura, Saul bira, anyaik lyu kibuka domik aruma deice welebukce, amutuku nang arye, ‘Weiknye yalirye, asukumuk mapnamleʼ tenen, amsuna akunum kintinip deiamikak eibuk. Ati, anyaik lyu kibuka domik deice, dikdik sena ati, dobuka kintinip deiamikak, ‘Mapnunʼ tenen, amsuna deice mapmok.

²⁶ Mapmoka, akunum berekukopura, bukukce, keting min panabuka, tikilyangalamle keting arye, Samuel welebukce, Saul alip aik ara, lyu kibuka domik deice dikdik sena ati, kintinip deipmekba, mapmokak biyukce, “Winira, anda an mutuku tamubuka binulyame. Arup ara, binamalama ati ara, narye an bobinukine,” nyabuk. Nyabukura, Saul bukukopura, Samuel ap, sik neika alip aik arye, koulukuka tuku tam yarikce, bisik banmarik.

²⁷ Sik neika banmarika ani, weik asik dolamik noutam birikopura, Samuel birye, Saul biti nyabuk. “Wini talak an melipmakilanye, elti, nyapminyeba, elda adiparyuk minop bilule,” nyabuk. Nyabukura, Saul birye anye biti, nyabukba, minop menekuka biyuk. Menekuka biyukopura, Samuel birye, ayupu ton ap dukdongobuka nyabuk. “Winira asukumak mitik tonun dikdik sepdongaplyame. Narye anti, Allah arye nyapdeipmanil yupu ton lak nyapnukine,” nyabuk.