1 Samuel 8 - Eipomek

Israel ninye arye, “Ninye deiyoknye tonok, Raja arepsiminyeba, elce talipnamsile,” nyabuka, morobik yupu

¹ Samuel akunum wisi dayuk talak ara, el mapu arye, Israel ninye talina ap, yupu lipsisikuka bokolina deiyok nang kina ati, wipdeibuk.

² Samuel mi dunye, el si ara Yoel. Weik mi, el si ara, Abia. Sik bitinye ara, Bersyeba mutuku talibuka, yupu lipsisikuka bokolina deiyok nang ulamdik.

³ Bukni, sikda sik ni birye, pil teleb kibuka dolamukce, diksukumuk ulamuk touk kum ulamdik. Yuk nang arye, “Malye winibibye ning ara, wenena kum diparyuk, namin kipsurumunyopura, dengna arepnusiyabe,” nyabuka morolamik. Winilamikba, Yoel ap, Abia ap arye, kekelamdikce, yo bok dololamdika deice arye, amalye un nang kum wenelamdik. Tonda, tilila yupu nyana ap, tenepce arye, duknuna yupu nyana ap, yupu kekelamdikce, dekna ning duknubuka dololamdikce, Israel ninye ati, teleb kibuka kum talilamdik. Tilila ninguk talibuka ulamdik.

⁴ Winilamdika ati ara, Israel ninye talibuka, ulamika deiyok nang nirya yanuka, Rama mutuku bulubuka, Samuel ulamukak biyik. Amutuku yanuka, yupu talibikce, nyabik. “Nai, Samuelo, nun patan ning ton moropnukiyabe,” nyabik.

⁵ “Nun patapsil ning ara, ani. Nun ni, anda akunum wisi dalume. Ance diksukum kibuka, taleamsuluma atonun, an mapu kum winisururaka ati, ance yuknye tonok ton, nun ninye deiyoknye Raja kina ati, nyapdeipsilyame. Tonoknye wipdeipsiminba, yuk mutuku nang, sik ninye deiyok nang, Raja arye talibuka, ulamak atonun unamsile. El amu tam buknamabe. Aninguk, ‘Se,’ tenenyabe ati, moropkiyabe,” nyabuka morobik.

⁶ Nyabuka morobik bukni, Samuel birye, sik anyabik ning ati, malye kanye bobuk. Ara, ‘Teleb ning nyabake,’ kum tenebuk ati, mambul kanye bobukce, ‘Yata wiripnaman do?’ tenen, Allah el si Yahweh ati morobuk.

⁷ Nyabuka morobukba, Yahweh arye Samuel biti nyabuk. “Israel nang arye, nyapmakiyak yupu ara, kekepnulyame. Dipkoprop, sikce na Allah ati, ‘Nun weik deiyoknye el uka,’ kum teneninyaka ati ara, anti kum batakike. Dipkoprop nati batakmaniyake,” nyabuk.

⁸ Nyabukce, ayupu ton nyabuk. “Aning ara, sik Mesir mutuku arye boyanamsibuk, sikce natibuk talibuka, nati kum si erelamnikce, na batakuka, talye Isa Mutuku Dongonye siuk erelamik touk, tuba wininyake. Ati, sikce na bataklamnik touk, wini talak ara, anti batakmakiyake.

⁹ Ati ara, sik nyapmace yupu ara, kekepnulyame. Bukni, dipkoprob ance tamubuka sikti, ‘Ikin ning yanamsile,’ nyabuka, mikip asa arye wenepnulyame. Tonda, sik deiyok talipnamlanye birye, aminyan talak winipnamle ninguk, laka nyapnamlyame,” Allah arye nyabuk.

¹⁰ Nyabukba, Samuel kekebukce, Israel ninye, ‘Nun deiyoknye wipdeipsilyame,’ nyanmek nang, sik dam binuka, Yahweh nyapmok yupu nirya ara, laka nyapdeibuk.

¹¹ Samuel birye nyabuk yupu ara, ani. “Dotalak ara, anggun ninye deiyok kibuka, talipnamsilanye birye, winipnamsil ning ara, ani. Anggunce deipnamlum mapu ara, ‘Yin bon nanguk kiplulume,’ nyapnamsile. Winiplyopura, ton yin nang ara, kuda basam balye deice bukuka, ban nang biknamake. Ton yin nang ara, kuda basam libuka, tuku deice balamle ning, kereta deice banamake. Ton ning ara, el mal olan nang olbinamle talak, sik mapu menekuka bakibuk, el aminyan binamle. Sik mapu ara, sik ninye deiyok kipnamlanye, Raja arye, el yin talin nang kipnamaka ati, nyapsine,” Samuel birye nyabuk.

¹² Nyabukce, ayupu ton nyabuk. “Anggun mapu ton nang ara, sik deiyoknye, el yin talin nang deiyok nang kibikirye, yuk talye yin nang, yupa seribu (1.000) nang talipnamake. Ton nang ara, yupa lima puluh nang (50) talipnamake. Anggun mapu ton nang ara, anggun deiyok kibuka talipnamsilanye, Raja arye, pil pia aruklamliba, el wa winamake. Ton nang ara, el din ning min yuma libikce ning ara, aminyan talak, el din ning ati delilbinamake. Ton nang ara, el ninye ona ati mal ap, yin ap, topnong ap, parang ya ap, memen nang upnamake. Ton nang ara, el kuda libuka, tuku deice balamle kereta ati, memen nang ap upnamake. Sik ninye deiyoknye, Raja arye el amu tam bikikirye, ikin ning, sik nong deice deipnamle ati nyapsine.”

¹³ Nyabukabukce, ayupu ton nyabuk. “Ura, sik kilmapu ara, dopropliba, el pil melina ati, donamake. Ara, ton kilapu ara, nong bol liknaba, nintong teleb lelamle mek memenamake. Ton nang ara, el din ning yupla dapmana kinamake. Ton nang ara, el roti memebuka danamake.

¹⁴ Aninguk kum bukni, anggun wa tuku ap, talye tuku ap ton, Raja birye dopropnamsile. Ara, anggun kwaning wa ap ara, yo duk wa ap, anggur tapu duk wilamlumak weinye ning ara, pia teleb ning wibuka doproplirye, Raja el aik pil don nang ati arenamle. Raja arye, anggun mapu ara, pil dilamsiliba, pil donamake nyapsine.

¹⁵ Tonda, anggun gandum wa ap, anggur tapu duk wa ap, wilamunyeba, nong akunum uplyopura, awiplum ning ati, Raja arye, ton bokuka, seper sepuluh dalubuka dopropnamsile. El ti arepnamlume. Arepmunba, Raja arye, el amu tam pil dona weik deiyok nang ap, el dam melin nang ap ati arepnamle.

¹⁶ Aninguk kum bukni, tonda, sik pil melin nang babye, sik pil melin kilapu babye, pia teleb nang ara, Raja arye dopropliba, el piluk donamake. Aning atonun, anggun sapi basam do, kambing do, keledai basam do, pia teleb ning babye, el Raja arye dolonamsile.

¹⁷ Tonda, anggun weilulum ning aning-aning nirya ara, maka arye ayala nirya weilamlum ning ap, yuk yala kam ning weilamlum ning ap, noutam bokuka, seper sepuluh (10%) wilibuka, el Raja arye, el ning ara, dolonamsile. Aninguk kum bukni, anggun kekenmanulum nang babye, pil dilamsiliba, anggunda Raja, el talye pil don nang unamlume.

¹⁸ Alaka nyapmasin ning nirya, winipnamsil talak ara, anggunce wipmunyeba, deiyoknye kibuka, talipnamsil Raja ati, malye kanye bobuka, weik arye engepnamlume. Anggunce nyapnamlume. ‘Se, nun ni Allah, anye birye ikin ning, nun nong deice delisulula ati, lyepsilyame,’ nyabuka, malye yupu nyanamlume. Bukni, Allah el si Yahweh arye, amalye nyanamlum ning ati, kum kekepnamsile,” Samuel birye, Israel ninye nirya ati, laka nyabuk.

¹⁹ Samuel birye, aning nirya laka nyabukba, sik Israel ninye arye, Samuel nyanmok ning ara, kum kekebikce, “Talye nyanmasila ati, awaplye babye, teleb uka. Nun patapsil ning ara, ninye deiyoknye Raja arepsutumba, elcuk talipnamsile,” nyabik.

²⁰ “Nun tenenyaba ara, yuk mutuku nang nirya, sik deiyok nang, Raja arye talinyaka atonun uptibye. Ninye deiyoknye, Raja talipsuturye, nun wininamap ning nirya, laka nyapsutuba, kekebuka unamabe. Tonda, sik mal olan nang yace talak, ‘Nun ninye deiyoknye, Raja menekuka biturye, el ap, el yin talin nang ap arye, anang optingce, lyepnamsiyake’ tenen, ‘Aninguk se,’ tenebabe,” nyabik.

²¹ Ura, Samuel birye, sik nyanmek ning nirya akunum kekebukce, anyanmek ning nirya, Allah el si Yahweh, el dam binuka, laka nyabuk.

²² Nyabukba, Allah el si Yahweh arye nyabuk. “Telebe, sik nyanmak yupu kekepnulyame. Sik tenenyak ning atonun, sik deiyoknye kibuka, talinamlanye Raja wipdeipmince, sikti, arepnulyame,” Allah arye Samuel biti, nyabuk. Ayupu nyabuk talak ara, Samuel birye Israel ninye ati, “Anggun aik yuk-yuk bindoplulume,” nyabukba bindobik.