1 Samuel 7 - Eipomek

Samuel birye, Israel ninye ati, nyabuk yupu

¹ Minop talak, Allah arye nyalilamuk yupu dobuka, marikna pum bisik dadeiamik ning, el si ara Peti Perjanjian, sik Pilistin mutuku nang arye, dalubuka dopromikba, Allah arye sik kanye ikin ning, sik nong deice weik arelamuk ati, Israel nangak, tuba tamubuka boyanuka arebik. Winibikura, sik Kiryat-Yearim mutuku nang arye yanuka, Allah el Nyalin Yupu Marikna dobukabikce, tonoknye el si Abinadab, el aik pum tam deibik. Abinadab, el aik ara, mutuku taram deice domokba uamuk. Allah el si Yahweh arye, nyalamuk yupu deiamik marikna ara, Abinadab aik pum deibik ning ara, el mi Eleasar birye, ‘Aning Peti Perjanjian marikna ara, moubuka kalikinamle’ tenen, wipdeibik. Ara, sikce, Allah dinmokak arye, Eleasar wipdeibik.

² Allah nyalilamuk Nyalin Yupu Marikna pum bisik deiamik ning ara, mutuku si Kiryat-Yearim mutuku deiamika ani, keting tamun weik, dua puluh tahun (20) uamuk. Wamuk talak nirya ara, Israel ninye arye, ikin kanye bobuka, Yahweh biti, “Melipsilyame,” nyabuka, morolamikce, engelamik.

³ Engebuka morolamika ani, Samuel birye, Israel ninye ati nyabuk. “Ura, anggun kanye talima nirya bobuka, ‘Allah el si Yahweh deice deibibirye, el damuk tamubuka yanuyabe,’ tenepmunyopura, anggun adiparyuk winipnamlulume. Ara, yuk mutuku yala nang arye, si erenyak Isa Mutuku Dongonye, anggun babye aisa si erelulum ning ara, bataknamlulume. Tonda, aning atonun, isa el si Astoret, el urasin atonun memebuka deiamik ning ara, batakuka, el si ton kum erenamlulume. Aning nirya batakuka, anggun talima ap, nong ap, kanye ap nirya ara, Allah el si Yahweh ati arepmunce, Yahweh atibuk, el si erenamlulume. El amu tam bukuka, el piluk donamlulume. Winipmunyopura, Pilistin nang arye, anggun talipsikba, ikin kanye bobuka ululum ning ara, Allah arye lyepdopnamsile,” nyabuk.

⁴ Nyabuka ati, Israel ninye nirya arye, sik isa si, Bahal erelamik ning ap, isa kil Astoret, el si erelamik ning ap, aning nirya batakikce, Yahweh el siuk erelamikce, el amu tam bukuka ulamik.

⁵ Akunum winibik talak ara, Samuel birye, Israel ninye nirya ati nyabuk. “Anggun nirya mutuku si Misba mutuku, bulubuka yanuka weknamlulume. Yamunyopura, ‘Allah el si Yahweh arye, melibuka lyepnamsil’ tenen, narye Allah moropnamsine,” nyabuk.

⁶ Israel ninye nirya, Misba mutuku bulubuka, wekik talak ara, mek kwebuka kintinibikce, Allah el si Yahweh, el si erena ati, tukwak dikdeibik. Tonda asum ara, din dina kumce, bulang asa unmekce, ‘Allah namin kipnamsil’ tenen, sik malye winilamik ning ati, “Kume, nunce nun ni Allah, el si Yahweh yaniptabuka, dipkoprob pia malye winilamupu ning ara, aning ton, aning ton,” nyabuka, laka nyabikce, aning nirya batakik. Israel ninye nirya arye, Allah ati si erenmekce, nyanmek talak ara, Samuel birye, sik yupu lipsisikuka bokolina deiyoknye kina ati, deiyok kibukce, Allah morobuk.

⁷ Atalak ara, yuk nang arye, “Israel ninye nirya, Misba mutuku uk bulubuka wekmake,” nyabikba, Pilistin ninye taleamika deiyok nang kekebikopura, deiyok koubuka, sik mapu yin nang arye, Israel ninye ap olana ati, “Misba mutuku binuyabe,” nyabikce kintinibik. Kintinibikba, Israel ninye aning kekebikce, ilil weik ubuk.

⁸ Ati ara, Israel ninye arye, Samuel biti nyabik. “Ance nunti batakna kume. ‘Nun ni Allah, el si Yahweh arye lyepnamsil’ tenen, moronauk unusilame. Moropminba, Yahweh arye, Pilistin nang obuka sirya daksikirye, talisica deice arye, ikin ning weik, nun nong deice delisinyak noutamak lyepropnamsile,” nyabik.

⁹ Nyabikba, Samuel birye, domba basam pia mitik ning, moum tuba dilamuk ning ton obuka, Allah ati uku dabuka arebukce, ‘Nun ni Allah, Israel ninye lyepsilyame,’ nyabuka, Yahweh ati morobukba, Allah Yahweh arye kekebuk.

¹⁰ Samuel birye, Allah arena ati, amitik domba uku dapmokce, Allah ati tuba moronmok talak arye, Pilistin nang, ‘Israel ninye opnuyap’ tenen, sik dam akunum yayik. Yanmek bukni, Allah el si Yahweh arye, Pilistin nang deice, weik liman arebukba, liman onmokba, sik kanye walwal ubukba, dengkepdanin, ilil asa banmek. Ilil asa dengkepdanin, banmek talak arye, Israel nang yayikura, Pilistin nang ayanmek nirya obuka dakik. Winibikopura, Israel ninye arye, Pilistin nang obuka sirya dakikba, Pilistin nang ton bai sakuka, bikbik abuka biyik.

¹¹ Israel yin nang Misba mutuku unmikak arye, Pilistin nang dam bikbik abuka banmekbuk, sik bikbik abuka banmek bisik noutamak nirya, Israel nang arye, Pilistin nang weika arye, opnin banmeka ani, yuk mutuku Bet-Kar mutuku dam binuka batakik. Pilistin nang pia weika arye, obuka sirya dakik.

¹² Batakikba biyikopura, Samuel birye, keil tonok doprobukce, Misba mutuku ap, Yesana mutuku ap, amutuku wiliba noutamak binuka ikdeibukce, akeil deibuk ning ati, si dobuk. “Akeil si ara, Ebenhaser nyanamabe. Deiyok ara, amutuku asukum ara, Yahweh arye melipsuk atia,” nyabuk. Asisibuk ning ara, sik Ibrani yupu deice ara, ayupu deiyok ara, ‘Allah arye melipsuk ati, keil deibabe,’ nyanyake. Aning ati, asi sibuk.

¹³ Ati ara, atalak arye dipdongobuka, dotalak nirya ara, Pilistin nang arye ton, Israel ninye ulamikak noutamak ton, kum wekelyangalamik. Samuel kam ulamuk talak nirya ara, Allah el si Yahweh arye, sik Pilistin nang ati, bisik sekelongolamukba, talye diamuk ulamik.

¹⁴ Tonda, Israel ninye, sik mutuku bukni, minop talak, sik Pilistin nang arye dalubuka doprobik mutuku, Ekron mutuku arye dipdongobuka, Kat yala nang ulamik mutuku nirya ara, Israel nang arye, ila tuba ton doprobikce, amutuku noutam ulamik. Tonda, amutuku bitinye dam mutuku ton, Pilistin nang taleamika bukni, Israel ninye arye, ila tuba ton doprobik. Amutuku nirya ara, sik mutuku uka. Atalak arye deiyok koubuka, dotalak nirya ara, Israel ninye ap, sik Amori yala nang ap, kanye deibukabikce, olana kum arye, teleb kibuka neika ulamik.

¹⁵ Atalak arye dipdongobuka, Samuel kam ulamuk talak nirya ara, Israel ninye sik yupu lipsisikuka bokolina deiyoknye ulamukce, Israel ninye pia taleamuk.

¹⁶ Aketing tamun, aketing tamun nirya ara, Gilgal mutuku ap, Misba mutuku ap, Betel mutuku ap, amutuku nirya, Samuel dipdongobuka welepna arye, sik malye ulamik ning nirya ati, yupu bokdeipna arye, lipsisikuka, telebuk kililamuk.

¹⁷ Nirya banmana ani, aning akunum winipnopura, el mutuku koproba, Rama mutuku tamubuka yangalamuke. Amutuku babye, Samuel biryuk Israel ninye, sik yupu lipsisikuka bokolina deiyoknye ulamuk. Tonda, Allah el si Yahweh kibuka, el si eren ati, Samuel birye keil pala dobuka, Rama mutuku noutamak biyukce, keil pala lelebuka yangapdeibukce, kam ning obuka, akeil pala deice uku dalamukce, Allah ati arelamuk.