1 Samuel 4 - Eipomek

Pilistin nang arye, Allah el nyalilamuk yupu delilamik marikna, Peti Perjanjian, ubula doprobik yupu

¹ Atalak ara, Pilistin sik yin talin nang nirya mikip dobukabikce, Israel ninye sik olyangana ati kintinibuk. Kintinibikce, sik baju bol aik ara, Afek mutuku noutamak yanuka dobik. Aning atonun, sik Israel yin talin nang nirya arye, ‘Pilistin nang olbinamap’ tenen, mikip dobikce, sik baju bol aik ara, Eben-Haeser mutuku noutamakuk binuka dobik.

² Sik Pilistin yin talin nang nirya arye, ‘Israel mutuku ninye olbinamap’ tenen, akunum mikip dobuka, kintinibikopura, Pilistin nang ap, Israel ninye ap, mal olanmeka ani, Pilistin nang arye, Israel ninye nirya obuka, sirya dakik. Obuka sirya dakikce, Israel sik yin talin nang, yupa pia weik 4.000 nang obik. Ara, amal olanmeka deice arye oplobik.

³ Akunum obisibikce, sik Israel ninye yin talin nang, tuba batakik nang ara, sik asik koproba tamubuka yayikce, Israel ninye sik ninye deiyok nang ati nyabik. “Yata deiyok ati, Allah Yahweh el mikip ara, nun tam batakmasil do? Sik Pilistin nang tam kipmalba, nun obuka sirya daksiyak do? Ati nun nirya arye, Silo mutuku uk bibirye, Allah Yahweh, el nyalilamuk yupu deibupu marikna bobibirye, mal olan dam boyapyopura, Allah Yahweh arye, nunti melipsilya deice arye, Pilistin yin talin nang obuka, sirya daktibye,” nyabik.

⁴ Nyabikce, sik aninye nirya arye, “Allah Yahweh el nyalilamuk yupu donokupu marikna, el si ara Peti Perjanjian, Silo mutuku dolbilulume,” nyabuka, ninye ton wipdeibik. “Allah Yahweh elda, aning-aning nirya talibuka, mikip weik deice erebuka ululnye birye, amambul marikna deice tam bulul sukum dana-dana tam ara, Kerub bitinye tenerurake. Ara, ninye deiyok nang arye, weik buna ning deice bukikirye, ‘Winiplulume,’ nyabuka nyalamak touk winilule. Tonda, Allah el nyalilamuk yupu deibik marikna dam ara, Eli el mapu bitinye Hofni ap, Pineas ap ara, ayok marikna dam anyuk kalikidurake,” nyabik.

⁵ Allah Yahweh el nyalilamuk yupu deibik Peti Perjanjian, akunum dobuka yayikce, sik baju bol arye, aik domikakuk yana dobuka deibik. Deibikopura, Israel ninye nirya arye, yupu weik arye, nyanmikce mot senmek. Atalak sik Israel ninye nirya arye, mot nyanmekba, tukwak mutuku noutamak long-long anmok.

⁶ Mot senmek talak ara, sik Pilistin nang nirya kekenmekce, nyabuka asilanmek. “Se, sik Ibrani ninye arye, sik baju bol doltakna aik yanuka dopmakce, weik yupu arye nyanmaka ara, yata deiyok ati do?” nyabuka asipdayik. Asipdandeyikbuk, yuk nang arye, “Kume. Ara, Israel deiyok nang arye, sik ni koproba Allah Yahweh, el nyalilamuk yupu deibik marikna boyanuka deipmaka ati, weik yupu nyanamake,” nyabuka, laka nyabikba, kekebuka kel kibik.

⁷ Sik Pilistin ninye nirya arye, ayupu pia moubuka kekenmek talak ara, sik ilil weik ubuk. Sik ilil ubukba sikce nyabik. “Se, sik talibuka unyak Allah ara, sik baju bol doltakna tenda aik domiknye dam yanuka deipmakba unmale. Se, nun bicoe. Awinipmala atonun ning ton, minop talak arye, dipdongobuka wini talak ton, pia kum winilamsuke. Ati ara, aning nun dam yanmala ati, kanye imun upsile,” nyabuka, malye yupu nyabik.

⁸ Tonda, nyabik. “Se, dipkoprop, nun ikin upsile. Nunda yatanye birye lyepdopsutu do? Israel ninye arye, ‘Allah atonun ning, mikip weik ning arye, nun obuka sirya daksilyak’ tenen, yatanye birye lyepsutu do? Yuk isa mer nirya ara, ton kum lyepdopsitinge. Nun kele, minop talak ton, Mesir mutuku noutamak omukce, pata mutuku yangalamik talak ara, ninye nirya ati, wenepre yangalamuk Allah ara, nunce kum bisiptibye. Tonda, sik ni koproba Allah arye, Mesir mutuku ulamik ninye ati, kanye imun ning aning-aning nirya arelamuk ning ara, nun ton kekelamupe.

⁹ Ati ara, dipkoprob engopmasile. Ati, se, nun Pilistin ninye nirya ara, talima mikip kibuka unamabe. Mikip arye ninye olbalamaka atonunuk kibuka unamalulume. Anggun nirya arye, aning atonun kum winipmunyopura, Ibrani ninye arye obuka, sirya daksiceura, nun nirya anggun pil melin ninye atonun, kibuka unamabe. Ara, ‘Minop talak sik Ibrani ninye nirya nun amu tam ulamik touk, sikce obuka sirya daksicopura, nun babye atonun winibibyak’ tenen, nyapsiyabe. Ati ara, anggun babye sal anya arye, mal olan talak ara, mikip kibuka kintiniplulume,” sik Pilistin deiyok nang arye, sik amu tam yin talin nang ati nyabik.

¹⁰ “Winipnamabe,” nyabikba, sik nirya kintinibikce, Pilistin nang ap, Israel ninye ap, mal olanmeka ani, Pilistin nang arye Israel ninye nirya, obuka sirya dakik. Sik Israel ninye yin talin nang ara, pia weik, tiga puluh ribu (30.000) nang oplobik. Winibuka obikce, tuba batakdongobik nang nirya ara, tamubuka sik baju bol doltakna tenda aik yuk-yuk ulamik touk, bikbik abuka yandobik.

¹¹ Israel yin talin nang nirya, sik aik tamubuka baloyikce, Allah Yahweh el nyalilamuk yupu delilamik marikna, Peti Perjanjian batakikba, Pilistin nang arye, dalubuka doprobik. Atalak ara, Eli el mapu bitinye Hofni ap, Pineas ap ara obik.

Eli dibuk yupu

¹² Aning winibik talak ara, ninye Benyamin yalanye tonok bikbik abuka, Silo mutuku biyuk. Asum aniryuk, Silo mutuku bikbik abuka biyukopura, el ongalamuk baju nirya, kwiribuka kwiliklobukce, batakuk. Tonda, el kisok deice ara, tuku arye likdanmoka kipman biyuk. Ara, ‘Sik Silo mutuku unyak ninye arye, e ara weik mambul kanye bopmalce winipmale, tenepnamake’ tenen, el baju kwiribuka, kisok deice ara, tuku likmok touk biyuk.

¹³ Anye Eli bukmok buna ning deice bisik irikna ak yanuka bukmokce, kintinibuka dinmok. Tonda, ‘Se, Allah el nyalilamuk yupu deibupu Peti Perjanjian ara, Pilistin nang arye, dalubuka dopropmak do?’ tenen, ilil ubukba teniltona uk unmok. Silo mutuku laka nyalbiyuknye wininmok ani, amutuku ulamik ninye nirya ati, laka nyapmokba, amutuku ulamik Israel ninye nirya weik arye, engebuka ngalukunmek.

¹⁴ Amutuku ninye nirya arye, malye yupu nyabuka engenmekba, Eli kekebukce asipdeyuk. “Amutuku ninye ara, yata ati weik arye, malye yupu nyabuka engenmak do?” nyabuka asipdeyuk. Nyabukura, asum arye Silo mutuku yanmoknye birye, Eli el dam yayukce, amambul yupu yanuka laka nyabuk.

¹⁵ Eli bira, akunum wisi danamukce, ulamuk keting tamun yupa, pia weik 98 tahun ulamuka anya arye, el asing babye akunum kuna dakamuk. El asing winibuka kuamuk talak nirya ara, elce pia moubuka kum elilamuk.

¹⁶ Ayanmoknye, Eli biti nyabuk. “Nara, mal olanmangu noutamak arye, asumuk bikbik abuka yanganmana ani, ayanuka nyapne,” nyabuk. Nyabukura, Eli birye tamubuka nyabuk, “Na mio, anti asipdenune. Israel yin talin nang ap, na mapu ap nirya ara, yata wiripmak do?” nyabuk.

¹⁷ Eli birye nyabuka asibukba, ayupu bobuka yanmoknye birye nyabuk. “Se, Israel ninye nirya ara, ilil upmoba, Pilistin ninye sik dam anyuk bikbik abuka bindopmake. Winipmakba, sik Pilistin nang arye, Israel ninye weika arye obuka, sirya dakmanto upmasiaka ati, weik kanye ikin upmasile. Ara, ninye pia weika arye, opmasiyaka noutamak arye, na ni, an mapu bitinye Hofni ap, Pineas ap, opmakce, Allah el nyalilamuk yupu deibupu marikna, dalubuka dopropmake,” ayupu bobuka yanmoknye birye, Eli biti, ayupu laka nyabuk.

¹⁸ Tonda, ayupu bobuka yanmoknye birye, “Allah el nyalilamuk yupu deibupu Peti Perjanjian, akunum dalubuka dopropmake,” nyabuk talak aryuk, Eli el buna ning deice bukmok bublan dam tam, langaksakuka poulbiyukce, el ngang yok cepsakukba dibuk. Aning ara, Eli elda wisi deibukce, nong kalimna weik uamuknye binya arye, sakuka poulbiyukba, el ngang yoka adiparyuk cebukba dibuk. Eli elce Israel ninye, sik weik deiyoknye kibuka, yupu bokolilamuk keting tamun yupa pia weik, yupa tonok keba, obarye 40 deice arye taleamukce, yupu bokolilamuk bukni, asum arye dibuk.

Pineas el domuk kil, youwak kil dibuk yupu

¹⁹ Atalak ara, Eli el mi Pineas obikura, el domuk kil ara, youwak kil kibuk. Atalak ara, mi akunum bomuk. Mi bomuka ani, mi deipmanto talak dam akunum upmoka ati, asum aryuk ayupu kekebukce, ikin kanye bobuk. Ara, ayupu nyalyanmoknye birye, “Allah el nyalilamuk yupu deiamupu marikna, akunum dalubuka dopropmake,” nyabuk. Ayupu nyabuk ning ap, tonda, “An yamal koproba ap, an akanye ap, dipmarake,” nyabukba kekebuk. Ayupu kekebuka ati, ikin kanye bobuk. Atalakuk talye karin arye, mi deiyok dinmokce, uk weik dinmokce, dipmanto unmok.

²⁰ Mi deiyok donmoka ani, akunum dipmanto ubuk talak ara, el melina ati mining dam wekmekce, dinmek kilapu arye nyabik. “Ka kilo, an ilil una pia kume. An mi ara, sal mi deipnamalame,” nyabik. Nyabik bukni, akil el kanye pia kum ubuk ati, el kanye tenena ap, yupu tamubuka nyana ap, ton kum ubuk.

^21-22 ‘Ami deipnun’ tenen, akunum kintinibuk talak ara, el lin birye, ami el si ati Ikabod nyabuk. Ibrani yupu deice arye Ikabod nyalamika deiyok ara, ‘Nun Israel ninye noutamak Allah mikip meliamsuka deice arye, areamsuk mambul ning ara, sik Pilistin ninye arye, dalubuka dopropmasiaka ati, Allah el babye, batakuka bindopnamsile,’ tenen, ami el si ati Ikabod nyabuk. Ara, talye ati kum nyabuk bukni ara, ‘Allah el nyalilamuk yupu deibupu marikna, akunum dalubuka dopropmake,’ nyapmok ning ap, na akanye ap, na yamal koproba ap, dipmarunga ati, el deipnamok mi, el si ati Ikabod nyabuk. Aning ati ara, akil arye nyabuk. “Se, sik Pilistin ninye arye, Allah el nyalilamuk yupu deibupu marikna, el si ara Peti Perjanjian dalubuka dopropmasiaka ati, Allah el babye, batakuka bindopnusile. Ati ara, nunda urdemuk unmabe,” nyabuk.