1 Samuel 25 - Eipomek

Samuel dibuk yupu

¹ Samuel dibukba, Israel ninye nirya, bulubuka yanamikce, yanuka engelamik ani, Samuel el nong weibikak ara, el mutuku koproba, Rama mutuku weibik. Akunum weibikopura, aminyan talak Daud adiparyuk mek kum ati, ninye kum ulamik mutuku, mutuku si Paran mutuku biyuk.

Daud ap, malye yupu nyananye Nabal ap, el kil Abigail ap, winibik ning ati, nyabuk yupu

² Ura, ninye tonok, el si Nabal, Moan mutuku ulamukce, el bona weik talinanye ulamuk. El tuku ap, bon-bona ap ara, weika arye talilamuk. El taleamuk tuku ara, mutuku si Karmel mutuku uamuk. Nabal el domba basam yupa weik, tiga ribu (3.000) domba weilamuk. Tonda, Nabal el kambing basam ara, yupa weik seribu (1.000) kambing weilamuk. Winilamuk ani, Nabal el domba basam potong kon talak kibukura, Karmel mutuku yanuka unmokba, Daud amutuku yayuk.

³ Nabal bira, Kalep yala nang arye, deiamikba, Kalep yalanye ulamuk. Nabal el kil ara, el si Abigail, weik kel kil ulamuk. Tonda, akil el urasin ara, pia teleb kil ulamuk. Bukni, el akanye Nabal bira, el kanye tenibuka una ara, pia malye tenen ninguk, tenibuka ulamuk. Tonda, yu weiknye ulamuk.

⁴ Atalak ara, Daud Paran mutuku, mek kum ati, ninye kum ulamik mutuku, pata mutuku binuka, ulamuk talak ara, Nabal el domba basam potong konmok, yuk nang arye, aning eibikce, Daud el dam yanuka, laka nyabikba, Daud kekebuk.

⁵ Kekebukce, Daud el melilamik kam nang, Nabal dam Karmel mutuku bana ati, tagu barye nang (10) wipdeibukce, nyabuk. “Nabal dam binululume. Akunum bimunce, Nabal ap epdamunyopura, nyapnamalulume. ‘Anti nun ni koproba Daud birye, ‘Telebe,’ nyapmakile.

⁶ Tonda nyapnamalulume. Daud birye, ‘Anye bira, Nabal keting tamun weik kam unamle’ tenen, Allah moronamkile. Tonda, ‘Anda Nabal ap, an mapu silip ap, an weilyam ning nirya ap, an melin nang ap nirya ara, lo uk unamak. Tonda, ‘Telebuk unamak’ tenen, Allah morokunune. Nun ni koproba, Daud birye, nyapdeipkile.’ Ayupu ara, Nabal biti nyapnamlulume,” Daud birye, el wipdeibuk nangak, nyabuk.

⁷ Nyabukce, ayupu ton dukdongobuka nyabuk. “Anggun kam nang arye, Nabal ati nyapnamalulume. ‘Yuk nang arye, Nabal, el domba basam potong kolamak talak ara, akunum uple,’ nyapmaniyakba, na kekepmane. Ura, an domba basam wein nang ara, nun un dam, Karmel mutuku aunmek bukni, nunce sik ning ton, kum doprobupe. Tonda, sik ton kum mal pinyabe. Sik nong deice, ikin ning kum delilamupu. Aning ara, ‘An kekebuka kel kipnulam’ tenen, nyapmakine.

⁸ Anyapman ning ara, ance, ‘Dib do, tilila do?’ tenepmince, an domba basam wein nang ati, asipdeminyeba, sik anang aryuk, ‘Aning ara, dipkoprop,’ nyapnamakiyak ca. Aning nirya ati ara, narye anti, moropkine. Narye, wipdeipmana arye, an dam dopdeipman mapu ara, an ap, an tam nang ap arye, sikti, ‘Kanye deibuka melipnamlulum’ tenen, moropkine. Domba basam potong kolamak talak ara, kwalya kwalibuka, ululum talak ati, aning nyapne. Tonda, ance nun nirya ati, ‘Telebe,’ tenepniminyopura, nun ni koproba, Daud ap, el ap neika unyak nang ap, nun melina ati, ‘Teleb ning talye lukparabuka, arepsutume’ tenen, moropkine. ‘Nunda ikin usulula ati moropkine.’ Anggunce, Nabal biti, ayupu nyalbilulume,” Daud birye, el mapu tagu barye nang (10) ati, nyapdeibukce, dopdeibuk.

⁹ Nyabukba, el mapu arye, Nabal dam laka nyalbiyik. Nabal dam akunum biyikopura, Daud birye nyabuk yupu, laka nyabikba, Nabal kekebuk. “Ayupu nirya ara, nun ni koproba Daud, el si deice arye nyapkiabe,” nyabik. Nyabikopura, ‘Arepnamasilca’ tenen, asukumuk wekmekce, dinmek.

¹⁰ Teleb ubuka nyapmek bukni, Nabal birye, sik tagu barye nang, (10) ati, tamubuka nyabuk. “Anggunce, Daud si nyapmanulumnye bira, yatanye do? Tonda, Isai el deibuk mi ara, Daud, nyapmanulumnye bira, yatanye do? Anggun anyapmanulumnye bira, na walwale. Wini talak amutuku ara, sik pil dona deiyok nang arye arukliba, sik amu tam pil donyak nang ara, sik pil dona deiyok nang dam arye, batakuka banyake. Daud nyapnulumnye bira, aning atonun ubuknye do?

¹¹ Ati ara, narye, yata deiyok ati, na kum biksinye biti, na roti kwaning ap, mek ap, arepnamne do? Tonda, ‘Na domba basam potong konmaniyak nang arepnamne’ tenen, domba opmana arye, kintinipmanye domba tup ap, Daud biti arepnamne do? Aning ara, dan mutuku arye, yanmalum do? Anggunda, yatato nang do? Anggunda, na kel bikna kum nang anya arye, kum arepnamsine,” Nabal birye, Daud el mapu silip ati, nyabuk.

¹² Nabal birye, nyabukopura, Daud el pil don nang, adiparyuk tamubuka, Daud dam yayikce, Nabal nyapmok ning nirya, yanuka laka nyabik.

¹³ Aning nirya laka nyabikba, Daud kekebukce, el pil don nang nirya ati, “Anggun adiparyuk ninye on parang ya, deiyatinga deice kikiplulume,” nyabuk. Nyabukura, el mapu kekebikce, el nyabuk touk winibik. Sik deiyoknye, Daud babye, adiparyuk ninye on parang ya deiyatinga, deice kekebuk. Atalak ara, winipmanto ninye yupa ara, empat ratus (400) nang ara, ‘Nabal olbinuyap’ tenen, Daud melibikce, welebik. Bukni, ton bokuka batakikba, sik bona deiamik ning, kalikne nang ara, winipmanto ninye yupa ara, dua ratus (200) atonun batakikba, sik bona kalikinme.

¹⁴ Sik kintinibuka, bisik tuba banmek talak ara, Nabal el pil melin nang noutamak, tonoknye birye, Nabal el kil Abigail dam binuka laka nyabuk. Abigail dam binuka nyabuk yupu ara, ani. “Nongo, Daud ara, Paran mutuku, mek kumak ati, ninye kum unyakak, pata mutuku ulirye, el pil don nang dopreibukba, nun ni koproba Nabal biti, ‘Teleb yupu nyalbilulume,’ nyapdeibukba, nyalyayik bukni, Nabal birye, sikti, ‘Telebe,’ kum nyabukce, ayupu yanuka, nyapmasik nang ati, nun deiyoknye birye, derebuka wabukba, bindobike,” nyabuk.

¹⁵ Nyabukce, ayupu tabakuka nyabuk. “Nun ni koproba, Nabal birye, sikti, malye yupu uk nyabuk bukni, sik anang ara, nunti, moubuka dilmililamsike. Tonda, nunda sik ualamik dam, ulamupu talak ara, sikce nun ning ton, dopropsikba, ton kum tunim apsuke.

¹⁶ Sikce lukunyan babye, keting noutam babye, nun domba basam weilamupu ara, sikce melibuka kaliklamsike. Winilamsika deice arye, telebuk ulamupue.

¹⁷ Ati ara, anda el kil uminya anya arye, ance tenepmince, sik anang ati, yata ning wiriptumba, sikce nun kum olyanamsiyak do? ‘Aning tenepnamlyame’ tenen, nyalyakine. Ara, talye ati kum nyapkine. Sik anang arye, akunum yupu talipmakce, ‘Nabal ap, el kilapu mapu ap, kilmapu ap nirya ara, opnamabe’ tenen, kintinipmaka ati, nyalyakine. Nun deiyoknye, Nabal bira, pia yu weiknye ulirye, malye yupu uk nyalulnye ati ara, nunce nyaptibye yupu nirya, kum kekepsutue. Elda pia mikip weiknye,” Nabal el melinanye tonoknye birye, Nabal el kil Abigail biti, laka nyabuk.

¹⁸ Anye ayupu yanuka nyabukba, Nabal el kil Abigail, aning akunum kekebukce, ‘Aminyan talakuk winipnune’ tenena kumce, atalak aryuk, roti kwaning yupa weik, dua ratus (200) ap, anggur mek lin ning bitinye ap, domba basam toupdoba pamubarye ap, yakong atonun ning, gandum el ikin ara, tiga puluh liter (30) ap, anggur sesal lemuk ning dobuka, roti tabakuka, dapmok ning seratus (100) ap, tonda mitik din kwarang yo duk atonun arye, telebto ubuka, dalamak din ning, dua ratus ap, aning-aning nirya, adiparyuk kintinibuka deibukce, aning nirya keledai basam balye deice deibuka, bobinuyik ati, kintinip deibuk.

¹⁹ Akunum kintinip deibukopura, sik pil melin nang ati, “Anggun minopce bobuka, bamunbuk, nara, aminyan tam melibuka, yanganamasine,” nyabuk. Nyabukopura, abiyik talak ara, el akanye Nabal biti ton, “Nunda biyabe,” nyabuka, lak kum nyabuk.

²⁰ Abigail, el deiyok kouna keledai basam balye deice bukuka banmoka ani, mutuku dana-dana bukamukce, wamupdongamuk mutuku arye, koulukuka biyuk tam ara, tuku bisik Daud ap, el mapu silip ap, yanganmekak, epdayik.

²¹ Daud ayanganmok talak nyanmok yupu ara, ani. “Nabal taleamuk ning ati, narye melilamkise, nyapmek ning ara, Nabal kum kekebukce, na yupu talye batakmanua ati, na like. Narye, Nabal el domba wein nang ap, el domba ap, Paran mutuku mek kumak weilamikbuk, sikti, tuba kalikuka melilamse. Winilamsiba, sik anirya ara, ton tunim ana kume. Pia telebuk ulamike. Narye, winilamsibuk, Nabal birye, malye yupu nyapmanue. El ti teleb kibuka, melilamse ning ara, talye ati melilamse. ‘Elce nati, malye kipdeipmanile,’ tenepne. Ati ara, wini talak ara, binuka opnuna ati, yu weik upnile” nyapra banmok.

²² Daud tenipdeyukce, utenebuk. ‘Atalak arye, sik Nabal tam nang nirya, kum opnyopura, Allah arye, na wenebuka opnutue,’ tenebuk.

²³ Daud aninguk, tenebuka banmok talak ara, Abigail birye, Daud akunum eibuk. Eibukopura, el keledai basam balye deice bukmoka batakuka, tukwak koulukukce, ‘Daud si erepnun’ tenen, Daud tikmokak, binuka dipnin biyuk.

²⁴ Dipdeyukce, tikilbiyukura, Daud dam yayukce, akil arye, tuku deice kanupdongobuka, Daud biti si erebuk. Si erebukce, nyabuk. “Na deiyoknye, narye nyapnukin yupu kekepnilyame. Ance na kanye ululak yupu nyapdeipmomce, kekepmok bukni, kum arepmakuke. Amalye winipmok ning ara, na deice uk deipnutume. ‘Na nyapnukin yupu ara, kekepnunilyame’ tenen, moropkine.

²⁵ Na deiyoknye, ance yupu nyapdeipmombuk, ‘Nabal birye, kum kekepmaku ati,’ tenina meme. Ara, Nabal el ulul ning urasin ara, an kele. Yuk nang arye nyabice yupu ara, kekepmalye bukni, kum kekepmana atonun ulule. Aning ati, el si ara, Nabal nyanyake. Nun yupu deice, Nabal deiyok ara, ‘Walwalnye’ tenen, asi Nabal nyanyabe. El si ubuk touk, el dipkoprob walwalnye birye, malye ulule. Ance dopreipmom nang, adiparyuk na dam binuka, nyamnitingopura, dipkoprob aning nirya ara, arelamtinye bukni, anang na dam kum yayikba, na asing arye kum eipse,” nyabuk.

²⁶ “Ati ara, na deiyoknye, an ni koproba Allah, el si Yahweh arye, ‘Namin asa arye, ninye oplyak’ tenen, kalikmakilba, minopce ninye kum oplopmalame. Ara, ance teleb yupu, na akanye biti nyapmomba, elce dib kum tenepmakirye, malye yupu uk, nyapmakua ati ara, an taruk koproba arye, anye kwang dakuka, kum oplopmalame. Nun ni Allah, el si Yahweh ara, dipkoprob Kam Una Deiyoknye ulule. An babye, tuba kam ulyame. Ayupu bitinye, dib nyapman atonun, anyapnukin yupu, ‘Dipkoprop winipnamle’ tenen, Allah moronune. Ara, yata nang do nirya, ‘Daud optibye,’ tenenyak nang nirya ati, ara, ‘Allah arye wenepnamle’ tenen, ‘Se,’ tenepne. Ara, na akanye Nabal biti, Allah arye, Nabal wenepnamle touk, anti yaniltakinyak nang babye, ‘Allah arye weneptu’ tenen, nyapkine.

²⁷ Wini talak ara, narye, anda na deiyoknye ulama ati, an amu tam kil unirye, aning-aning memebuka, boyanmasin ning ara, ance dokuka, an amu tam pil don nang ap, anggun nirya ap arye, dopropnamalume. Na nio, anggunti boyanmasin ning, doproplulume,” Abigail birye, Daud biti nyabuk.

²⁸ Nyabukce, ayupu ton nyabuk. “Na akanye birye, an dam malye winipkuk ning ara, ‘Namin kiptum’ tenen, moropkine. Nun ni Allah, el si Yahweh arye, tenelye touk, an ap, ance deipmalam nang nirya ap, malye nang olbilulume. Ati ara, Allah el si Yahweh arye, anda na deiyoknye Daud biti, melipkilya deice arye, pia kam unalame. Tonda ninye weik ap, aning-aning weik ap, arepkiliba, ‘Ance aning nirya talibuka, ninye deiyoknye analam’ tenen, Allah moronamkine. Tonda, an kam unalam talak noutamak nirya ara, ‘Malye winin ning tonok babye, kum winipnalam’ tenen, Allah moronamkine.

²⁹ Winipmanto yuk nang arye, na deiyoknye anti, ‘Opnuyap’ tenen, yanamak nang ara, dipkoprob an ni Allah, el si Yahweh arye, melibuka kalikliba, sik anang arye, kum opnamkiyake. Allah arye moubuka, kalikuka melipkilya deice arye, pia kam unalame. Bukni, akeil deice arye, keil duk deipdongobuka, yukak erebuka dolamak touk, ‘Allah arye, an mal olan nang ati, yukak dopkweteplirye, oplopnamle’ tenen, Allah moronamkine.

³⁰ Tonda, nun ni Allah, el si Yahweh arye, anda na deiyoknye ati, ‘Winipnamkine,’ nyapdeiamkuk yupu nirya, akunum winipkilyopura, ereipkilirye, sik Israel ninye ati, ninye deiyoknye kina ati, wipdeipnamkile.

³¹ Ninye deiyoknye kina ati, akunum erepdeipkilyopura, ‘Atalak ara, ikin kanye bobuka, kum unalam’ tenen, nyapkine. Ara, yuk nang arye, anti malye winipkicopura, adeiyok ati, ninye weik opminyopura, ‘Aminyan talak ikin kanye bobuka unalam’ tenen, nyapne. ‘Ninye weik ona ati, kanye ikin kum upnamkil’ tenen, nyapkine. Ara, talye ati kum nyapkine. Ninye weik olamak nang ara, aminyan talak, sik kanye weik ikin ulule. ‘Aning ara, atonun winipkilyak’ tenen, nyapkine. Ati ara, Allah el si Yahweh arye, anti erepdeipkiliba, ninye deiyoknye Raja akunum uminyopura, ance nati kum bataknamnilyame. Ara, ‘Akil arye melipnukba, malye kum upsirye, ninye kum opse’ tenen, nati tenenamnilyame,” Abigail birye, Daud biti morobuk.

³² Abigail birye, aning nirya, Daud dam yanuka nyabukba, akunum kekebukopura, Daud birye tamubuka nyabuk. “Israel ninye ati, pia kalikuka melilul Allah, el si Yahweh ati, telebe nyapne. Anda Allah arye dopreipmakuba, arup ara, na dam yanmalamce, teleb yupu nyapmanilama ati, telebe nyapkine,” Daud birye nyabuk.

³³ “Ance dipkoprop, moubuka tenepmalamce, na dam yanuka, teleb yupu nyapmanilam ati, weik arye telebe nyapkine. Ara, na tenepmanua ara, ‘Nabal ap, na yupu yaniptapnik nang nirya ap, malye winipmaniaka ati, opnune. Anang malye winipmaniaka ati, na taruk koprop arye, anang nirya oplopnamle,’ tenepmanue. Utenepmanubuk, an yanmalamce, teleb yupu nyapmanilam deice, na teneipmanu ning ara, akunum batakne. Anang kum opnamane. Ati ara, anang ara, sik ining, na taruk deice kum upnamnile.

³⁴ Aning ara, dipkoprob na ni koproba Allah, el si Yahweh arye, ‘El malye uplyak’ tenen, talipmanil deice arye, dopdeipmakilba, na dam lak nyalmanilame. Ance kum yanuka, nyapmanutumopura, an ap, Nabal ap, el yala nang nirya ap, asum noutamak ara, akunum obuka sirya daksitinye. Na ni Allah, el si Yahweh kam pia ulule. Allah arye, Israel ninye pia kalikuka, melisulule. Ayupu dib nyapman touk, ayupu ton nyapkine. An yanmalamce, ateleb yupu nyapmanilama ati, ‘Ninye weik opnaman,’ tenepmanua ara, akunum batakne. An kum yanmatumce, aning kum nyapmanutumopura, dipkoprob Nabal ap, el yala nang nirya ap, akunum obuka, sirya dakmatinye. Ara, arup aniryuk, anang nirya obuka, sirya dakmatinirye, ambusum beren tam ara, tonoknye babye, kam kum uptue,” Daud birye nyabuk.

³⁵ Daud ayupu nirya, akunum nyabukopura, Abigail boyanmok ning, binuka doprobuk. Akunum doprobukopura, Daud birye tamubuka, Abigail biti nyabuk. “Ance na dam yanuka, nyapmanilam ning ara, ‘Daud birye wiripnamnil do, kum do?’ tenen, an ilil kanye bona meme. Ance moropmanilam ning ara, dipkoprob winipnamkin ati ara, teleb kanye deibuka, ur an asik tamubuka dabilyame,” nyabuk.

³⁶ Nyabukopura, Abigail adiparyuk tamubuka, Nabal dam, sik asik koproba biyuk. Sik asik biyuk talak ara, ninye deiyok nang, Raja weik kwalya kwalilamak touk, Nabal birye kwalya kwalipmok. Nabal dina yupmokce, yu mek anggur dipmoka anya arye, kanye wangapmokba, talye kanye uk bobuka, unmok. Winipmoka ati, Daud birye nyapmokba, Abigail kekepmok yupu ara, alukunyan ara, Nabal biti, lak kum lebuk.

³⁷ Anggur mek kanye, wangalamak mek dipmokba, kanye wangapmok anya arye, mapmoka ani, berekukura, beren tam ara, el akanye kanye teleb ubukopura, el kil arye kekepmok yupu nirya, laka lebuk. Lak nyabukba, adiparyuk Nabal el mambul kanye bobukce, el talima noutamuk, weik uk dibukce, el nong ara, biti bungabuka darabukce, dibukura, lulukmanto kum ubuk.

³⁸ Winyamukba daunmoka ani, like tagu barye sum, akunum mabukopura, Allah el si Yahweh arye wenebuka, Nabal, el nong deice weikuk arebukba, adiparyuk dibuk. Ara, talye kume. Allah arye, weik mambul uk, Nabal el deice arebukba, adiparyuk dibuk.

³⁹ Yuk nang arye, ‘Nabal akunum dipmale,’ nyabikba, Daud kekebuk. Aning kekebukce, nyabuk. “Na ni Allah, an si Yahweh arye, ‘Na opnamne,’ tenepsinye bira, lyepropmanilame. Elce nati, malye kipnukbuk, ance anye opmalam ara, melibuka kwang dakmanilame. Ati, narye teleb nyapkine. Nabal, elce nati, yu kanye bomnukce, malye yupu nyapnuk ning ati ara, ‘Anye bira opnamne,’ tenyamse bukni, na ni Allah, ance lyepmanilama deice arye, narye, malye kum winipne. Ati telebe nyapkine. Tonda Nabal, el malye ubuk ning ara, el deice uk ikin ning, akunum dopropmale,” nyabuk. Nyabuk talak ara, Daud birye, el pil don nang bulupdeibukce, nyabuk, “Anggun adiparyuk, akil Abigail dam bimunce, nun ni koproba Daud bira, ‘Anti na dopnamane,’ nyapmakil yupu, laka nyalyakiyabe, nyapnamalulume.” Daud birye, el melin nang ati, nyabuk.

⁴⁰ Nyabukura, Daud el pil don nang adiparyuk Abigail dam, Karmel mutuku ulamikak, binuka nyalbiyik. Akunum el dam biyikopura, Daud nyapmok yupu nirya, yanuka nyabik. “Anda nun ni koproba, Daud birye, ‘Na dopnamakine,’ nyapdeipmakile. Ati, ‘Telebe,’ tenepminyopura, anda nun ap, neika binamabe,” nyabik.

⁴¹ Nyabikbuk, Abigail ayupu akunum kekebukopura, nong kanupdongobuka, tukwak dinmokce, adiparyuk sik anang ati, nyabuk. “Diba, nara anggun ni koproba Daud, el melin kil atonun unune. Elce tenepmal touk, winipnamane. Tonda, anggun el amu tam pil don nang ati, melinamsine. Anggunce, ‘Winiplyame,’ nyapmalum touk, anggun melina ati winipnamane,” nyabuk.

⁴² Aning akunum nyabikopura, Abigail bira minopce adiparyuk, bobuka binuyuk ning nirya ara, kintinibuka deibukce, el keledai basam balye deice welebuka bukukce, anang ap neika biyik. Kintinibuk talak ara, el ap melibuka banuyik kilapu ara, pamubarye kilapu arye melibikba, Daud un dam biyik. Ara, Daud birye, Abigail dopnamuka ati biyik.

⁴³ Daud bira, min yuma talak arye, Abigail kum domuk talak ara, min yuma Yezreel mutuku kil, yuk kil, el si Ahinoam, akunum domuk. Ati ara, Ahinoam ap, Abigail ap, domuka ati, sik akilapu bitinye ara, Daud el kilapu ulamdik.

⁴⁴ Minop talak ara, Daud birye Raja Saul, el kilmu Mikael domuk bukni, anoutamak ara, Saul birye, akil dobuka yuknye bak, kapdeiamuk. Kapdeiamukba, akil domuknye bira, el si Paltiel. Paltiel, el li koproba si ara, Lais ulamuk. Paltiel el mutuku ara, Galim mutuku ulamuk.