1 Samuel 22 - Eipomek

Ninye deiyoknye unamuknye, Daud birye, ‘Ninye deiyoknye, Raja Saul birye opnilyak’ tenen, keil deiya pum bisik, duknulbiyuk yupu

¹ Ninye deiyoknye, aminyan talak Raja unamuknye, Daud bira, mutuku si Kat mutuku, ulamuka ani, amutuku batakuka, Adulam mutuku dam keil deiya pum bisik duknulbiyuk. Ara, ‘Raja Saul birye opnilyak’ tenen, duknulbiyuk. Ulamuk talak ara, Daud el du yapu koproba ap, tonda, el li, el mapu silip nirya ap kekebikce, Daud yanuka duknubuka, unmokakuk, sik nirya el dam biyik.

² Tonda atalak ara, ikin kanye bomik nang ap, tonda ‘Raja Saul bira nun like,’ tenelamikce, malye kanye bolamik nang ap, yuk nang yo bok weik arye, tia ati areamnilyam nyabuka, ubula dolamik bukni, tuba aminyan tamubuka, kum punulamik nang ap, sik nirya ara, Daud el tam kilolamik. Winilamikba, Daud bira, sik deiyoknye ulamuk. Sik anang yupa ara, empat ratus nang (400) ulamik.

³ Daud akeil deiya, aulamuka ani batakuka, Moab tam noutamak bukni, Mispa mutuku biyuk. Amutuku akunum biyukopura, Moab mutuku talibuka ulamuk deiyoknye, Raja Moab biti, binuka morobukce, nyabuk. “Naio, ance na ni ap, na nin ap, an taliplum mutuku ayana uptiring do? An mutuku noutamak aulamdice ani, Allah arye, na melina ati tenepnuk ning ara, ‘Yatato wiripnamnil do?’ tenen, kel biknyopura, sikda na dam, tamubuka yatiringe. Aning ati, yanuka moropkine,” Daud birye, Moab mutuku taleamuknye biti nyabuk.

⁴ Akunum binuka morobukopura, Raja Moab birye, ‘Telebe, amutuku ur unamdake,’ nyabukopura, Daud tamubuka biyukura, el li ap, el lin ap dobuka, Moab mutuku ninye deiyoknye, talibuka ulamuknye dam deibukba, sik neika ulamik. Daud tuba keil deiya pum tam, tamubuka yanuka, ulamuk talak nirya ara, el li ap, el lin ap, Moab mutuku noutamak ulamdik.

⁵ Daud bira, tamubuka keil deiya pum tam biyukura, daulamuka ani, tonok sum ton, Allah el yupu laka nyananye, el si ara Gad, Daud dam yayuk. Yayukce, Daud biti nyabuk. “Anda keil deiya auna meme. Adiparyuk Yehuda yala nang, sik unyak mutuku binulyame,” nyabukba, Daud adiparyuk, Keret mutuku yo noutamak arye, duknulbiyuk.

Ninye deiyoknye Raja Saul birye, Allah el yupu lak len nang, Nob mutuku ulamik imam nang, obuk yupu

⁶ Ura, ton nang arye, kel bikikce, “Daud ap, el melin nang ap, sik duknubuka unyak sukum ara, akunum eipmabe,” nyabik. Nyabuka laka nyabikba, Raja Saul ton kekebuk. Ayupu kekebuk talak ara, Gibea mutuku kon deice bukni, yo si Tamariska yo amu bukmokce, ninye on yo taca keten kama bobuka bukmok. El bukmokak dana-dana tam, el amu tam pil dona deiyok nang arye, antanabuka kekenmek.

⁷ Sik nirya, el yupu kekebikba, Raja Saul birye, el amu tam pil don nang ati nyabuk. “Anggun Benyamin yala nango, na nyapnusin yupu ara, moubuka kekeplulume. Isai birye deibuk mi, Daud bira, anye birye anggun nirya ati, wa tuku ap, anggur wa ap nirya ara, talye urdemuk arepnamsil do? Tonda Daud bira, ninye deiyoknye, Raja kiptopura, elce anggunti erepdeipsiliba, yin nang talina deiyok nang unamlum do? Anggunda, yin nang yupa weik, seribu (1.000) nang talibuka, yin deiyok nang unamlum do? Ton nang ara, yin nang yupa weik seratus (100) nang talibuka, yin deiyok nang unamlum do? Anggun nirya ati, yin deiyok nang kina ati, erebuka deipnamsil do? Na kanye ara, kume, aning kum winipnamle tenepne.”

⁸ “Anggunda, ‘Daud birye, nun nirya weik yin talina deiyok nang kipdeipnamsil,’ tenepmalumce, nati yanipnamanulum do? Anggun nirya arye, ‘Raja Saul yanipnamabe’ tenen, aning nyanmalum arye do? Nyanmaluma anya arye, na deipse mi Yonatan ap, Isai birye deibuk mi, Daud ap arye, nyaprik. ‘Nunda, teleb ubuka, neika unaname. Nun kum olananame,’ nyapdeipdarik ning ara, ‘Tonoknye babye ton, na dam ton, lak kum nyalamnulume,’ tenepne. Tonda, ‘Nun ni koproba, Raja Saul bira, ikin upnamle do, yatato unamle do?’ tenen, moubuka kum tenelulume. Aning atonun, na mi koproba, Yonatan bira, Daud el tam kibukce, ‘Daud ance na ni Saul opnalyame,’ nyabuka, yupu talipdik ning ara, kum laka nyapnulume. Wini talak ara, Daud na melinanye ulamuk bukni, elce na opnamanila ati kalikinulule. Aning babye, anggunce kum laka nyalyanganululume. Anggun kan-kan ara, tonoknye babye ton, na dam kum nyalyanganululume. Winiluluma deice arye, na nyapmanye yupu ara, kekena kum unululume.” Raja Saul birye, el amu tam pil don nang ati nyabuk.

⁹ Nyabuk talak ara, tonok Edom yalanye, el si Doeg, elda Saul el amu tam pil don nang kan-kan, abinuka tikmokce, nyabuk. “Naio, Isai birye deiamuk mi Daud bira, eipse. El Daud bira, Ahitub el mi Ahimelek, Nob mutuku ululak yayukba, eipse. Ahimelek bira, Allah el yupu lak nyananye ulule.

¹⁰ Daud birye morobukba, anye imam Ahimelek birye, Daud el wininamuk ning melina ati, Allah el si Yahweh ati, ‘Daud bira, yata wiripnamle do?’ tenen, Allah morobuk. Winibukopura, Daud el bisik ban talak, dibuka bana ati, bisik ona din arebuk. Aninguk kum bukni, tonda minop talak Daud birye, Pilistin yalanye, nong mikip ap, nong cang ap, weiknye Goliat omuk ning ara, el bolamuk cang parang ya ara, Ahimelek birye, aparang dobuka, Daud biti arebuk. Aning ton eipse. Anye nirya, Doeg birye, Raja Saul biti, nyabuk.

¹¹ Anye birye nyabukopura, ninye deiyoknye Saul birye, el mapu ati nyabuk. “Bimunce, Ahitub birye deibuknye Ahimelek bira, Allah el si eren aik pum tam pil donanye, el ap, el mapu silip ap, sik nirya inibuka, na dam boyalulume. Anang nirya ara, Allah el si eren aik pum tam pil don nang, imam nang unyake,” nyapdeibukba, el mapu arye, binuka nyabikba, aimam nang nirya kekebikce, adiparyuk Saul dam yayik.

¹² Akunum yayikopura, Saul birye anang ati, asipdeyukce, nyabuk. “Ahitub deibuk mi Ahimelek, anda na nyapnukin yupu kekepnilyame,” nyabukba, Ahimelek birye, “Yo na deiyoknye, na kekenakuk, an tenepmalam yupu lak nyapnilyame,” nyabuk.

¹³ Nyabukura, Saul birye, Ahimelek biti nyabuk. “Anda, yata deiyok ati, Isai el mi Daud ap, an ap, ‘Saul yaniptabuka, opnamaname,’ tenen, yupu talipmarum do? Winiprumce, Daud el bisik bana ati din ning, roti kwaning ap, ninye on ning parang ya ap, arepluma ara, yata ati do? Tonda, ance Daud, el aminyan winipnamuk ning ati, Allah moroplum do? Winipluma deice arye, wini talak ara, Daud birye, na yupu yaninululce, ‘Saul opnamne’ tenen, kalikinulule. Winipluma ara, yata deiyok ati do,” nyabuka, Saul birye, Ahimelek biti, wenebuka asipdeyuk.

¹⁴ Nyabuka asibukura, Ahimelek birye, tamubuka nyabuk. “Na deiyoknye, Raja Saul, na kanye ara, an amu tam pil don nang weik daunyak bukni, dipkoprob pia teleb ululnye bira, Daud el uka. Daud birye, anti yaniptabuka, kum bataknamkile. Yuk nang arye, winipketing bukni, Daud bira, kum batakutue. Elda an yamal koproba ulule. Tonda, ‘Yuk malye nang arye, an opkicak’ tenen, yin bobuka kalikin nang, sik deiyoknye bira, Daud aulule. An mapu silip kan-kan ara, pia teleb nang weik daunyak bukni, yuk nang nirya arye, ‘Elda weik mambule, pia telebnye,’ tenenyaknye bira, el Daud binyuke.

¹⁵ Ance nyapmalam touk, diba narye Daud, el wininamle ning ati, Allah moropse. Bukni, aning ara, asumuk kum winipmase. Na min arye, winilamse touk, asum babye, el melina ati, ‘Daud el winipnamle ning ara, Allah arye laka nyapnamnil’ tenen, Allah moropse. Na nio, yuk-yuk sum babye winilamse touk, asum babye winipse. Ati na deiyoknye, yuk nang arye, an ona ati, yupu talinyak do, kum do? Anyapmakiyakba, kekepmalam ning ara, pia na walwale. Aning nirya ara, na ap, na mapu silip ap, nun walwale. Nara, an amu tamnye ununa ati ara, na ap, na ni el mapu silip ap, nun nirya ara, aning nirya ara, kekebuka kum kel bikupu. Nun ap, Daud ap, an yanina ati, malye yupu pia kum talibupue. Nun kume. Ati, ‘Anggunda, malye updeipmanulume,’ nyabuka, ‘Kum nyapnusilamʼ tenen, moropkine na nio.” Ahimelek birye, Saul biti nyabuk.

¹⁶ Ahimelek birye, Saul biti nyabuk bukni, ninye deiyoknye, Raja Saul birye nyabuk. “Kume, nyapmalam bukni, Ahimelek, an ap, an mapu silip ap, an ni birye deiamuk nang nirya ara, oplopnusine,” nyabuk.

¹⁷ Nyabukce, ninye deiyoknye birye, el mapu yin talin nang dam, awekmek nang ati, dinmokce, nyabuk. “Allah el si Yahweh, el si eren aik pum tam, pil don deiyok nang, awekmaka nirya oplululume. Sikda na ona ati, Daud ap, yupu talipnik nang atie. Tonda, Daud bira, na dam batakuka, kwarabuka bindobuk talak ara, anang akunum kel bikik bukni, sikce duknubikce, kum laka nyapnika ati, anang opdeipnululume,” nyabuk. Saul birye nyabuk bukni, el amu tam pil dona deiyok nang ap, el yin bon nang ap, el nyapmok yupu kekebik bukni, Ahimelek ap, el mapu silip nirya ap, kum obik. Ara, ‘Kume, Allah el si Yahweh, el si erena ati aik pum tam pil don nang, nun kum optibye’ tenen, ilil ubuka ati ara, kum obik.

¹⁸ Saul el amu tam nang arye, anang kum obikopura, Saul birye, yuknye el si Doeg biti nyabuk. “Ance, Allah, el si eren aik pum tam, pil don nang nirya oplyame,” nyapdeibukba, Edom mutukunye, Doeg birye, tamubuka anang nirya obuk. Asum Doeg ap, el melin nang ap, sikce obik nang yupa ara, delapan puluh lima (85) nang obikba dibik. Sik anang ara, Allah el si eren aik pum tam, pil dolamik nang anya arye, sikda pia teleb kurun kain baju, el si efod baju atotonye ongolamik.

¹⁹ Aninguk kum bukni, tonda Doeg birye, nyapdeibukba, el ap el mapsilip ap arye, Nob mutuku ulamik ninye nirya babye, obik. Ara, Allah, el si eren aik pil don nang ton, ulamik bukni, anang tenilena kumce, anang ap, sik kilapu ap, sik mapu kilmapu ap, milo mapu kilmapu ap, sik weilamik ning domba basam ap, sapi ap, keledai basam ap, aning-aning nirya, obuka sirya dakik.

²⁰ Anang nirya obik bukni, Ahimelek el mi Abiyatar tonok ara, adiparyuk, bai sakuka biyuk. Ara, Daud damuk minopce biyukce, Daud tam kiprobuk.

²¹ Biyukopura, adiparyuk Daud biti, “Raja Saul birye nyapdeibukba, el mapu arye, Allah el si Yahweh, el si eren aik pum tam, pil dona deiyok nang, weika arye akunum opmakce, sirya dakmake ati, nyalyakine,” nyabuk.

²² Nyabukopura, Daud birye, Abiyatar biti nyabuk. “Se, dipkoprob nyaplame. Minop talak ara, Ahimelek ap, na ap, yupu talipmanumu sum ara, Edom mutukunye, Doeg ton, dinmasukak eipmase. Anye eipse talak ara, akunum tenepse. ‘Anye bira, dipkoprob Raja Saul dam, laka nyalbinamlarya’ tenepse. Utenepse bukni, anye kum tomopsa anya arye, an ni koprop Ahimelek ap, el bona nirya ap, Saul birye nyapdeibukba opmaka ara, deiyok narye. Ati ara, sik aopmakba dipmak nang nirya ara, sik ining, na nong deice upmanile. Ati ara, narye sikti, yuk sum arye kwang daknamne,” nyabuk.

²³ “Wini talak ara, ance yupu teleb boyanilam ati ara, anda ilil upkiliba bana kume. Nun neika unaname. Saul birye anti, ‘Anye bira optinye’ tenen, an enmakile. Aning atonun, nati ton, ‘Anye bira opnaman’ tenen, enmasile. Ati, an ap, na ap, neika uk unamaname. Na dam yanmalam ning ara, teleb upmalame,” Daud birye nyabuk.