1 Samuel 2 - Eipomek

Hana birye, Allah morona ap, mot sena ap, ubuk yupu

¹ Ura Hana bira, Allah ati morobukce, nyabuk. Allah Yahweh elcuk, na kanye pia teleb kipdeipmanilba, na talima pum tam kanye deipmane. Apil elce dopmanila deice arye, na kanye malye ulamnuk ning ara, teleb kipdeipmanile. Adeice arye, na kanye deipnarye, na tenepmana ara, ani. Na kanye ara, ‘Allah Yahweh elce, mikip kipdeipmanil,’ tenepmane. Adeice arye, yu teneninyak nang ati, malye nyapnamne. Na mal olan nang ati, na si bambol deice arye, malye nyapnirye, ‘Na lik,’ tenepne. Deiyok ara, na akunum bikmane. Dipkoprop Allah arye nati, akunum melipmanile.

² Tonda, Allah Yahweh el lek koprop, pia teleb ulye touk, yuk nang ton atonun, pia kum unyake! Aning ara, Allah elcuk, nati melin ning ara, pia tuba arenulule. Ninye arye, ‘Nun mal olan nang arye opsikcakʼ tenen, weik mutuku bulamle keil dam, keil deia pum, binuka duknunyak touk, Allah elcuk erebuka deice tam ulirye, el mikip deice arye kalikisiliba, el amu tamuk unyabe.

³ Ati ara, anggun malye ululum ning ara, talye nyalulum yupu nirya ara, adiparyuk bataknamlume! Anggun erelan yupu deice arye nyalulum yupu babye, asukumuk deipnamlume! Ara, Allah Yahweh elda, dipkoprob aning-aning nirya ati, weik kel bikina deiyoknye ulule. Ati ara, Allah Yahweh elcuk, ninye nirya arye, sik unyak ning nirya ati, ‘Malye ning ani, teleb ning ara, aniʼ tenen, dipdebuka bikilisulule.

⁴ Allah elce tenelye touk, aning-aning nirya tamultolirye, teleb kililule. Winipmanto ara, ninye ona weik bikikirye, mikip weik unyak nang ara, sik mal nirya ara, adiparyuk Allah Yahweh arye, akunum bulakuka batakmale. Bukni, sik mikip kumce, mitang upliba, amu tam ulamik nang ara, elce akunum mikip kipdeipmale.

⁵ Minop talak arye, sik din weik uamukba, sik din weik tonun akunum dilamikba, boulamuk nang ara, wini talak sik din ton kum daneibukba, sikda din bulanguk ukirye, ‘Se, yata wiribuka diptibye do?’ tenen ati, yuk nang dam binuka, “Pil ton aruksumunba, pil doptibye deice arye, din ton dekuka diptibye do?” nyabuka, morolbanyake. Minop talak, yuk ninye ara, din patalamuk ninye ara, wini talak Allah arye, din ton weik arepliba, akunum, sik din ton weik tonun dibikiba bouplyopura, kanye deibikirye, darabuka unyake. Tonda, minop talak, el mi delina kumce, you uk ulamuk kil ara, akunum el mapu tekbarye deibuk ati, weik tonun kanye delilule! Bukni, minop talak yuk kilapu ton, sik mapu pia weik deiamik kilapu ara, wini talak ara, sik mapu ton, delina kum diparyuk unyaka anya arye, mi kum deipmanto ukirye, ‘Seʼ tenen, malye kanye bobuka unyake.

⁶ Allah Yahweh, elcuk kam bulina ap, dibina ap, delina ap, anirya ara, elcuk winililule. Ara, Allah Yahweh elcuk ninye ati, ‘Kam unamle,’ teneplyopura, anye bira kam unamle. Tonda atonun, yuknye biti, ‘Elcuk dipnule,’ teneplyopura, adiparyuk dipnule. Tonda, Allah elcuk, diplinye bira, dibin ninye unyak dam, asukum el si ara Sheol mutuku dolkwetelule. Atonun, elcuk, ‘Kam buknamle,’ teneplyopura, tonye bira, weik kanye imun uk dipliba, dipmanto upmalya babye, Allah aryuk teleb kibuka wetepdeipliba, kam tuba pia unamleʼ. Dipmalya babye, kam bukeipliba, tamubuka telebuk unamleʼ.

⁷ Aning atonun ton, ninye tonoknye ton, Allah Yahweh elcuk anye biti, ‘Ikin upliba, aning-aning nirya kum talinamle,’ teneplyopura, anye biti, talye bona talina kumnye kililule. Tonda, pia bon utotoa kum ninye ati, ‘Bona talin nang unamake,’ teneplyopura, elcuk aninye ati, teleb kipdeiplyopura, bona talin nang kililule. Tonda talima lamapdongobuka unanye ton, Allah Yahweh arye erepdeiplirye, teleb kipdeipliba, kanye deibuka unamle. Atonun, el talima erebuka ulamlinye biti, Allah arye, anye bira ton, amu tam kipdeipliba, imun kanye bobuka unamle.

⁸ Aning atonun, ninye ton imun kanye weik bobuka, atu butbuta deice uk ulamlirye, aning-aning nirya kumnye ulamliba ani, Allah Yahweh aryuk, anye erepdeiplyopura, telebuk ulule. Atonun ton, ‘Seʼ tenen, kanye imun deice uk ulamlirye, ninye arye pia malye ning uku dongolbanakuk, ‘Nun like,’ tenena uk ulamliba, Allah Yahweh arye, anye erepdeipliba, ninye deiyoknye Raja, el mi ap burudake. Tonda, Allah Yahweh arye, aninye nirya ati, ‘Pia teleb unamakʼ tenen, weik deiyok nang atonun kipdeiplyopura, yuk ninye arye, anang ati, si erenamake. Apil nirya dolula ara, talye ati kume. Allah Yahweh arye, mutuku-mutuku nirya ara, Allah el ning uka. Ninye arye, aik dopnamikce talak ara, kat ayukumna yo ikikirye, anyaik teleb ubuka dolamak touk, Allah Yahweh arye, tukwak mutuku kwepdeibukce, ‘Apia unamleʼ tenen, mikip arye, teleb ubuka kwepdeibukce, aning-aning nirya ara, lilipdeibuk.

⁹ Ninye ton, Allah ati, ‘Nun ni koproba ani,’ tenekirye, batakna kumce, el yupu moubuka talibikirye, dobolbanyak ninye ara, sik pia namin kanye bobuka ulamak ninye ara, Allah Yahweh arye, sikti, kalikilirye, pia teleb ubuka melinamle. Bukni, malye un ninguk, pia talibuka unyak ninye ara, amu tam deipliba, sikda kuna sukumuk pia unamakeʼ. Aning kum kipdeiplyopura, ninye arye kum elinamake. Aning ara, talye ati kume. Ninye nirya ara, sik mikip deice aryuk, teleb ubuka kum unamakeʼ. Allah arye melisilya deice arye, teleb unamabe.

¹⁰ Allah Yahweh ati, ‘Nun like. El yupu kum kekenamabe,’ tenebikirye, el yupu yaninyak ninye nirya ara, elce obuka, atu atonun kinamle. Aninye sik ilil una ati, im deice arye, weik liman nyaplirye, lelim pia weik tonun nyalamle touk, el yupu nyanamle. Allah Yahweh elcuk, mutuku-mutuku unyak ninye nirya ati, aning ara, “Teleb ning ara ani, malye ning ara ani,” nyabuka, lipsisiklirye, bokdeiplirye, wenepnamlarya. Winiplyopura, Allah Yahweh elce, ninye deiyoknye Raja una ati, wipdeibuknye biti, mikip weik arepnamle. Tonda, awipdeiplye ninye deiyok Raja ati, weik tonun mikip kipliba, mikip weik ton ap tabakuka upnin banamle. Hana elce ayupu nyabukce, akunum nyabukopura, yupu ton nyana kumce bukuk.

¹¹ Winibukopura, Elkana ap, sik mapu silip nirya ara, amutuku batakuka, sik mutuku, Rama mutuku tamubuka bindobik. Bukni, sik mi Samuel bira, asukumuk batakuka, Silo mutuku imam Eli, el amu tamuk ulamukce, el pil ati melilamuka deice arye, Allah Yahweh si erebuka kina ati, pil dolamuk.

Eli el mapu arye, malye winilamik yupu

¹² Eli el mapu arye, malye-malyeuk ulamikce, Allah el si Yahweh ati, ‘Elda mambule’ kum tenelamdikce, el si kum erelamdik. ‘Elda dauplye, nun like,’ tenelamdik.

¹³ Atalak ara, Israel ninye arye, ‘Nun ni Allah, el si erena ati, kam ning obuka arepnuyabe,’ tenelamikce, arelbalamik. Atalak nirya ara, aning dobuka, Allah el aik pil dona deiyok nang ati arelalamikba, anang arye abasam tup dobuka, uku dongolamik. Ton ning ara, bokna arye makau pum bisik yulamik. Abasam tup ap, yuk ning ap, yun makau arye yupman talak ara, Allah el aik pil dona deiyok nang, sik melina nang arye, yanuka cang karpu atonun ning bukni, el kwa ara, winilye leklamle ning arye, amakau pum bisik noutamak arye, lukuka tup ning potokuka dolamik.

¹⁴ Ura, acang karpu talibuka, tup ning yupman makau pum bisik dolkwetelamikce, karpu takce arye, potokdongopbuka dololamikce, Allah el aik pil dona deiyoknye ati arelamik. Ara, ‘Pia teleb ninguk dopropnuyap,’ tenena kum bukni, lukuka dopropne ninguk ara, dololamikce, Allah el aik pil dona deiyok nang ati, arelalamikba, sik dilamik. Yata nang do nirya, sik Israel ninye arye, ‘Allah si erena ati arepnuyabe,’ tenelamikce, Silo mutuku yangalamik nang nirya babye, aning atonun winilamik.

¹⁵ Winilamik bukni, Eli el mapu ara, pia malye ulamik. Sikce nyaprikba, sik amu tam pil melibuka dolamik nang arye winilamik. Israel ninye Allah arena ati, kam ning opna arye, tup bobuka yanabuk, uku arye meta ning, min kum dapman talak arye, Eli el mapu, sik melina pil dona nang arye, “Kume, tup teleb ning ton dobuka, Allah el aik pil donanye biti, imbik tup ton areplulume. Elce uku deice dapnamala atia. Tup ning makau pum bisik arye yulamlum ning ara, kum arepsulume. Makau arye, yulamaka ning ara, kum bukni, imbik tupuk arepsumunyeba, el dipnamal atia,” nyabuka, yanuka nyalamdik.

¹⁶ Yanuka nyapnopura, Israel nang arye nyalamik. “Kume, teleb ning ara, uku dongobibyeba, uku arye meta teleb ning nirya ara, uku arye akunum diplirye, sekdoba tuba batakdongoplye ning noutamak arye, anggunda tup ninguk, dopropmunce, dinamluma,” nyabuka, anang ati, weik arye pia dobuka, nyalamdik. Eli el mapu bitinye nyalamdik bukni, “Anang ara kume, adiparyuk, imbik tup arepsululume. Kum arepsumunyopura, nun adiparyuk ubula dalubuka dopropnuname,” nyalamdik. Nyalamdikce, yanuka ubula dobuka dilbalamdik.

¹⁷ Eli el mapu bitinye nyalamdika ati, sik melina nang nirya arye, winilamika ati ara, Allah ati arelyangalamik nang ara, mambul kanye bolamik. Tonda, Eli el mapu bitinye arye, aning winilamrika deice, Yahweh arye yu weik ulamuk. Ara, sik malye weik winilamdik ning elilamukce, ‘Aning ara, na like,’ tenelamukce, lik kanye bobukce, yu weik ubuk. Deiyok ara, atup ning ara, Israel nang arye, ‘Yahweh el si erena ati arepnuyabe,’ tenelamik bukni, abitinye nang arye, ‘Dauaplye. Ara, talye-talye tup ning uka,’ tenelamdikce, ‘Aning ara, Allah el ‘Naʼ tenen ning, anya arye, mambul pia weike,’ kum tenelamdik.

¹⁸ Ura, Eli el mapu bitinye arye, malye weik winilamdik bukni, atalak babye, Samuel el nong nena kum bukni, Allah el aik pum tam, pil melinanye ulamuk. Atalak ara, Allah el aik pil don nang, ongolamak baju, pia teleb kurun baju ongobuka, apil dolamuk.

¹⁹ Dolamuk talak nirya ara, el lin birye, baju cang ning, el kiklip ning ati, wililamukba, tuba-tuba el akanye ap, Allah arena ati, kam ning dobuka, Allah el si erena ati arelbalamuk talak nirya, abaju babye bobuka arelbalamuk. Ara, tonok talak bukni, aketing tamun, aketing tamun nirya, acang baju bobuka, Samuel biti arelbalamuk.

²⁰ Winilamdikba, Allah el aik pil dona deiyoknye Eli birye, ‘Anye bira, Elkana ap, el kil Hana ap ati, kanye teleb kipdeipnamle’ tenen, Allah arye, anang bitinye nang ati, taruk sik nong deice deibukce, Allah ati morobukce, nyalamuk. “Yahweh arye, an kil ati, mapu tonap arepnamkile. Ara, an kil, el mi min yuma mi, el si Samuel biti morobukba, Allah el si Yahweh arye arebukba, akunum deiamuk bukni, ila tamubuka, Allah ati arebuka anya arye, ami el delil pununa ati, mapu ton arepnamkile,” nyabuka, Allah morolamuk. Nyabukopura, sik tamubuka, Rama mutuku balamrik.

²¹ Ati ara, Allah Yahweh arye, Hana biti teleb kipdeibuk. Teleb kipdeibuk ati ara, atalak aryuk, Allah arye, mapu weik arelamukba, Hana birye, sal mapu winilye ap, kilmapu bitinye ap, deiamuk. Winilamuk talak babye, Allah el si Yahweh, el si eren aik yangalamuk talak ara, Samuel bira, anyaik dam bukni, Elia melibuka, moubuka pil dolamukce, el nong tonap nepnin balamuk.

²² Eli akunum wisi dayuk talak ara, el mapu bitinye, pia malye ulamrik ning ara, Israel ninye arye, aning nirya nyalamikba, kekelamuk. Tonda, Allah el si eren aik, tonda ninye ap, Allah ap, ansinilina nyalamik aik bublan dam melina kilapu, el mapu bitinye arye, akilapu dobuka, sik ap neika malamikba, yuk nang arye eibuka, laka nyalamik. Nyalamikba, Eli kekelamukce, kel kiamuk.

²³ Aning ati ara, Eli el mapu bitinye, sik dam binuka, sikti, nyabuk. “Anggun pia malye winirurum ning nirya ara, yata ning deiyok ati winirurum do? Israel nang arye, na dam laka nyalyanganinyak anya arye, yata ning ati anggunti, aning winirurum do?” nyabuka wenebuk.

²⁴ Tonda, nyabuk. “Kume na mapu. Allah el si Yahweh, el ‘Naʼ tenen nang nirya arye, anggun winirurumunye ning ati, ‘Nun like. Aning ara, anggun malye winirurum ning,’ tenesinyake adeice arye, malye yupu nyasinyake. Ati, tonap winina meme,” nyabuka wenebuk.

²⁵ Tonda nyabuk. “Winipmanto, ninye tukwak nang ati, malye winilina ara, Allah arye dipkoprop, ‘Aning ara, malye wininyake’ tenen, bico tenebuka, namin kipturye lyepsutue. Bukni, Allah el si Yahweh ati, malye winibibye ning ara, yatanye birye lyepsutue do? Yatanye birye, amalye winin nang ati, Allah ap, ansinilina deiyoknye upturye, pil doptuba, teleb kibuka, neika uptibye do?” nyabuka wenebuke. Nyabuka wenebuk bukni, el mapu sik bitinye arye, anyamuk yupu ton, pia kum kekelamdik. Sik kum kekelamrik deiyok ara, Allah el si Yahweh arye, abitinye nang ati, ‘Anang wenebuka oplopnamne,’ akunum tenebuka atia.

²⁶ Bukni, awinilamrik talak ara, Samuel bira akunum nemukce, kanye akunum wisamuk. Tonda, Israel ninye ap, Yahweh ap arye, el Samuel biti, ‘E, elda telebnye,’ tenelamikce, kanye el deice delilamik.

“Allah arye, Eli el mapu deice wenena ning arepnamle,” nyabuka, laka nyabuk yupu

²⁷ Tonok sum ton, Allah el yupu laka nyananye, aminyan winipnamuk ning, laka lenanye bira, Eli dam yayukce, Allah nyapdeipmok ning ati nyabuk. Allah el si Yahweh arye nyapkile. “Mesir mutuku noutamak, Firaun birye, sik apu yapu nang ati, ikin pil dilamukba, ikin weik ulamikbuk, narye lyepromsa deice arye, kel bikamnike. Allah ara, na uka,” nyabuk.

²⁸ “Israel ninye yala-yala weik, aulamik bukni, naryuk, ‘Anye bira, Allah ap, ninye ap, ansinilina deiyoknye pil donamle,’ tenepsirye, an apu koproba wipdeipse. Anye, akunum akwamsirye, ‘Na aik talibuka, pil donamle. Elda, na si dona ap, Israel ninye malye winina ning namin kina ap ati, pala keil lelebuka yangapdeibika deice, kam ning arelyangana ati, apil donamle,’ tenelamse. Tonda, ‘Siltong teleb ning dobuka, uku seklirye arenamnile,’ tenelamse. Tonda, ‘Na aik pil donamice nang, ongonamak sung-sunga kum baju ton ongoplirye, na dam yanuka pil donamle,’ tenelamse. Tonda, Israel ninye, ‘Allah arye, nun malye ning namin kibuka lyepnamsil’ tenen, kam ning obuka, na Allah arena ati, uku danamak ning, noutamak bokuka, an apu koproba ap, el yala nang nirya ap ati arelamse,” Allah arye nyabuk.

²⁹ Nyabukce, ayupu ton nyabuk. “Tonda, narye Israel ninye ati, ‘Ining ning obuka, na si eren aik pum tam, arenamnululume,’ nyalamse ning nirya ara, anggunce, ‘Aning ara, mambul kume, aning ara, talye ning uka,’ tenelulume. Awinimunye ning deiyok ara, yata ati do? Israel nang arye, aning dobuka yanuka arebikceba, eipmunce, ‘Nun dem aryuk dipnuyabe,’ teneluluma ara, yata ati do? Winiluluma deice arye, na Allah ati yaninululume. Tonda, yata ning ati, Eli an mapu malye winirikce ning ati, ance namin kilyam bukni, na nyalamsise ning ap, na bidamang nong ap ati, ‘Mambule,’ kum tenenilyam do? Winilyame nyapmakina deiyok ara, ani. Ara, ‘Naʼ tenen, ninye Israel nang arye, na si erena ati, yanuka areninyak ning, an mapu bitinye arye eipdikirye, teleb-teleb ninguk dobuka, sik ap dirikceba, sik nong galemna weik nerurake. Apia malyeuk winiminya ara, yata ati do? Winilyama deice arye, an mapu ati weik arye erelyam bukni, na ati ara, anggun amu tam kilinilyame. Winilyamce, malye wininilyame,” Allah arye, Eli biti nyabuka wenebuk.

³⁰ Nyabukabukce, ayupu ton dukdongobuka nyabuk. “Ati ara, nara Israel ninye anggun ni Allah, Yahweh, narye nyapkine. Minop talak arye nyalamse. ‘Eli an yala nang ap, sik mapu nirya ap, atalak-atalak nirya ara, na aik pum pil dokirye, natibuk si erenamniyake,’ nyalamse. Nyalamse bukni, wini talak ara, na Yahweh arye, aning batakuka, yuk yupu nyapkine. Wini talak ara, na kanye yuk upnile. Ara, yata nang do, nati kibuka, na si erenyak nang ati, narye sikti, erepdeipnamne. Bukni, yata nang do nirya, nati, ‘Elda mambul kume’ tenen kibuka, na si kum ereninyak ninye ati ara, narye sikti, ‘Dauaplye, sikda talye nang’ tenen, bataknamne. Sik ti pia kum melinamne.” Allah arye nyabuk.

³¹ Nyabukce, ayupu ton nyabuk. Dipkoprop, na tenepse talak akunum uplyopura, Eli an yala nang, kam nang nirya ara, obuka bataknamne. Winipnyopura, an yala nang nirya, sik mitang uplyopura, tonoknye babye, nebuka ulamica ani, wisi kum danamake. Wel talak aryuk dibinamake. An yala nang noutamak ara, wisi kum dananamake, wel talak aryuk dibinamake.

³² Israel ninye, yuk yala nang noutamak ara, teleb kipdeipniba, teleb unamak bukni, an yala nang nirya ara, ikin ning arepnyopura, an yala nang, wel nang nirya dibinamake. Tonoknye babye, wisi ton kum deipnamle. Winiplyopopura, eipmince, ‘Se’ tenen, pia ikin kanye bopnalame.

³³ Eli an yala nang ara, ance deipminba, deipdanin banamak nang ati ara, weik tam ara, na si eren aik pum tam, tuba tamubuka, pil kum donamake. Anang bataknamna atia. An yalauk bukni, ton nang ara, obuka sirya kum daknamne bukni, kam tuba ubikirye, teleb ubuka kum unamake. Anang arye, malye-malye weik winibicopura, an eipmince, weika arye engepnalame. Tonda, an kanye talima pia ikin weik upnamkile. Deiyok ara, an yala nang noutamak, kam nang nirya ara, tonoknye babye wisi kum delinamake. Wel talak aryuk dibinamaka atia. Aning nirya ara, narye anggun yala nang wenepnamsin atia. Allah arye, Eli biti nyabuk.

³⁴ Allah arye ayupu nyabukce, ayupu tonap dukdongobuka nyabuk. Aninguk kum bukni, tonda narye wenepneba, an mapu bitinye Hofini ap, Pineas ap ara, tonok sum aryuk dipnamdake. Sik bitinye dipnamdaka ara, talye ati kume. Ara ance, ‘Se, aning ara, Allah arye wenepmanila’ tenen, kel kipnamala ati, winipnamle.

³⁵ Winipyopura, na aik pil dona deiyoknye bira, yuknye ton wibuka erepdeipniba, nati moubuka pil donamnile. Na kanye talima noutamak tenenye touk, awinipnamnanye birye, aninguk moubuka wininamle. Tonok ning babye, kum bataknamle. Winiplyeopura, narye el yala nang ati, kalikuka melipnyopura, el deipkiridop nang nirya, telebuk unamake. Ereipnamnanye birye, na si eren aik pum tam, pil tuba donamlak ara, narye wipdeipniba, ninye deiyoknye dam unamle.

³⁶ Winibuka unamla anya arye, winiplyopura, Eli an yala nang arye, na wipdeipnye nang dam bikirye, el kina ati, gutam tuku dipdongobuka, moronamake. Sikce, ‘Se nun kwit, nun din patana weik anya arye, din ning dekuka diptibye’ tenen, dekna weik ning, perak ton arepsutumba, din ning dekuka diptibye. Akumopura, roti din ning, mitik kwal deipmatum ning babye, arepsutumba diptibye. Tonda, Allah el aik pil ton, bokuka arepsutumba, apil doptibya deice arye, dengna ning dobuka, nun din dekuka diptibye. Kumopura, ‘Urdemuk unmabe,’ nyabuka, moronamake. Ara, na wipnamnanye, el dam binuka moropnamna ati, nyapne. Allah arye Eli biti, nyabuka, laka nyabuk.