1 Samuel 19 - Eipomek

Saul birye, ‘Daud opnamne,’ tenelamukce, Daud biti, dobolamuk yupu

¹ Saul birye, el mi Yonatan ap, el aik pil don nang nirya ap ati, “Daud bira, opdeipnululume,” nyabuk. Bukni, el mi Yonatan bira, el kwit Daud ap, tonok kanye bobuka ulamdika ati, Yonatan birye, Daud biti, ‘Pia moupnamlyame,’ nyabuk.

² Yonatan birye Daud biti, nyabuk. “Kume amio, anda na ni birye, ‘Anye Daud bira, dan talak arye optinye’ tenen, pia tenenmakile. Na ni birye, ‘Daud opnamane,’ nyapmakila anya arye, ambusum beren tam talak ara, pia moubuka kalikdamince, duknubuka unamalyame.

³ Unmaminya ani, ambusum ara, na ni birye ‘Daud opnaman’ tenen, an unmaminye mutuku dam bilye talak ara, na ap binamaname. El ap, na ap, unmanimnye talak ara, anti ara, na ni biti, ‘Yata tenepmalam do?’ nyabuka, asipdenamane. Elce nyapnilye yupu ara, laka nyapnamkine,” Yonatan birye Daud biti, nyabuk.

⁴ Nyabukura, mapmeka ani, berekukopura, Yonatan birye, el kwit Daud biti, yupu teleb ning, el li koproba Saul biti nyanmok. “Naio, an pil donanye Daud biti, ‘Optinye’ tenena kume. Na nio, Daud bira, an dam ton malye kum ukulule. El pil teleb ubuka dokiliba, anti weika arye melikulule. Teleb ubuka, pil dokulule.

⁵ Ara, urdem ati kum nyapne. Daud birye, Goliat opnuyuk talak ara, ‘Pilistinye birye, na onilyak,’ tenena kumce, malye kibuka, talye biyukce, Goliat obuk. Daud birye, anye obuka deice arye, Allah el si Yahweh arye, Israel ninye ati, weika arye meliamukba, sik Pilistin nang weika arye obuka, sirya dakik. Daud ap, Allah ap arye aning winipsirikba, na ni an babye, aning eiplumce, kanye deiamlume. Winyamlum bukni, wini talak ara, yata deiyok ati, ‘Daud opnun,’ tenepmalam do? Daud birye, an dam ton malye kum winikulula anya arye, yata wiripmala ati, opnaman tenepmalam do?” nyabuka asipdeyuk. Yonatan birye, el li Saul biti nyabuk.

⁶ Nyabukura, Saul bira Yonatan nyapmok yupu kekebukce, ayupu nyapdeibuk. “Kume, Daud kum opnune. Nun ni koproba Allah, el si Yahweh kam ulirye, dinmasila anya arye, el si deice arye nyapkine. Anye kum opnune,” nyabuka, nyalin yupu nyabuk.

⁷ Nyapdeibuka ati, Yonatan birye, Daud yukubukba, yayukura, sik nyaprik yupu nirya Daud biti laka nyabuk. Akunum nyabukopura, Yonatan birye, Daud dobuka, el li Saul dam tamubuka boyayukba, Daud bira, min arye ulamuk touk, Saul dam ulamukce, melilamuk.

⁸ Winibuka daulamika ani, aminyan talak ara, sik Pilistin nang arye tuba tonap, ‘Israel nang opnuyabe,’ tenen, deiyok koubikce, sik ap, Israel ninye ap, olanmek. Sik olanmek talak ara, Daud mikip weik deice arye, sik Pilistin nang nirya, opra banmokba, anang nirya kwarabuka, bikbik abuka, bai sakuka bindobik.

⁹ Winilamik ani, atalak ara, tonok keting noutam ton, Saul bira tace kama bobuka, el aik koproba bukmok. Bukmokbuk, Allah el si Yahweh arye, el wenena ati, talye karin arye, Isa Mutuku Dongonye dopreibukba, kanye talima noutamak, yanuka wekukce, nyabuk. Wekuk talak ara, Daud min arye winilamuk touk, bilkong nyana el si kecapi, talipmokce nyanmok.

¹⁰ Nyanmokbuk, Saul birye, cang kama taice dobukabukce, ‘Daud opnaman’ tenen, donokuk bukni, Daud memepdobukba, abilinga ak bikilbiyuk. Winibukba, alukunyan noutamak Daud adiparyuk Saul aik batakuka, bai sakuka biyuk.

¹¹ Biyukopura, Saul birye el melin nang dopdeibukba, Daud el aik dam binuka warikik. Ara, ‘Beren tam talak arye, Daud opnuyap’ tenen, warikik bukni, Daud el kil Mikhael birye nyabuk. “Amio, anda alukunyan aryuk dungnul binulyame. Kumopura, ambusum beren tam ara, yanuka opnamakiyake,” nyabuk.

¹² Nyabukce, atalak aryuk Mikhael birye, jendela bisik pum tapu kirikuka, dopkwetebukba, Daud bira, atapu deice koulukukce, adiparyuk yuk mutuku duknulbiyuk.

¹³ Akunum biyukopura, el kil Mikhal bira, sik ap neika ulamik ninye arye, isa si erena ati, ninye atonun kibuka, memepdeiamik ning, patung dobukce, Daud el malamukak deibuk. Tonda, apatung el kisok deice ara, kambing potong arye wiamik ning dobukce, ‘Aning eibikirye. E aning ara, Daud atuba mapmale, tenepnamakʼ tenen, aning deibuk. Winibukopura, patung nong lelina ati ara, selimut amsuna arye, sinipdongobuk.

¹⁴ Atalak ara, Daud tomona ati, Saul birye, ninye dopdeibukba yayik. Yayikopura, Daud el kil Mikhal bira, anang ati, “Kume, Daud bira, uk talipmale,” nyabuk.

¹⁵ Ayupu nirya bobinuka, Saul dam binuka, lak nyabikba, kekebukopura, Saul birye, anang ati, tamubuka nyabuk. “Kume, wini talak ara, tamubuka bimunce, anggun asing arye, el nong dipkoprob ebuka bikmunyopura, Daud eluk dinmalba mapmalye amsuna amapmalibuk, akipman tomobuka boyanamlume. Winipmunyopura, narye anye opnamne,” nyabuk.

¹⁶ Nyabukura, Saul birye, ninye wipdeipmok nang biyikce, Daud el aik wekukabikce, Daud el malamukak dipdeyikba, ninye urasin atonun ning, Mikhal birye apatung deipmok ning ara, el kisok deice, kambing potong arye wiamik ninguk, upmokba, binuka eibik.

¹⁷ Eibikce, awinipmuk ning tamubuka, lak nyalyayikba, Saul bikukce, Mikhal biti nyabuk. “Diba ance, nati kwinisa dopmanilama ara, yata ati do? Na mal olan nang ara, ance melipmalamba, bindopmale. Yata deiyok ati, tilila yupu deice arye, duknupmanilam do?” nyabuk. Nyabukba, Mikhal birye tamubuka, Saul biti nyabuk, “Kume na nie, na kanye birye nyapmanue. ‘Ance kum melipniminba, kum moupniminyopura, dipkoprob anuk opnamakine,’ nyapmanuba, narye namin kipmanuba binmale,” nyabuk.

Daud birye, Samuel dam Ramah mutuku biyuka ati, sekik yupu

¹⁸ Daud akunum bindobukopura, adiparyuk Rama mutuku, Samuel asik ulamukak biyuk. Biyukopura, Saul birye, elti, mal piamukce, winilamuk ning nirya, lak nyabuk. Aning akunum lak nyabukopura, Samuel ap, Daud ap neika, Nayot mutuku birik. Birikce, sik neika amutuku uk binuka ulamdik.

¹⁹ Birikce, daulamdika ani, aminyan talak ara, ninye ton Saul dam biyikce, “Daud bira, Rama mutuku dam buk mutuku ara, Nayot mutuku ulamle,” nyabikba kekebuk.

²⁰ Nyabikba, Saul bikukopura, ‘Daud tomopnamakʼ tenen, ninye dopdeibukba, Nayot mutuku dilbiyik. Sik anang biyikce dinmekba, Allah yupu lak nyan nang, ara nabi-nabi nang ton bulubukabikce, Allah el Pia Teleb, Lek Dip Kanye, mikip arebuk deice arye, mot senmek. Ara, nabi Samuel birye, deiyok koupmokba, yupu weik tonun nyanmekce, mikip arye senmekba eibik. Aning eibik talak ara, adiparyuk Saul elce, dopdeiamuk nang babye, Allah el Pia Teleb, Lek Dip Kanye, el mikip sik dam yanuka wekukba, sik anang babye, neika mot senmekce, yupu weik tonun nyanmek.

²¹ Yuk nang arye, aning eibikce, Saul dam lak nyalyayikba, Saul ayupu kekebukopura, ninye ton dopdeibukba dilbiyik. Sik anang babye biyik bukni, amutuku akunum yayikopura, Allah el Pia Teleb, Lek Dip Kanye, el mikip arebuka deice arye, sik kayapu wininmeka atonun ubuka, mot senmekce, yupu weik tonun nyanmekce unmek. Aning babye, Saul bikukopura, like wililye ning ton, ninye dopdeibukba biyik. Abiyik nang babye, atonun winibik.

²² Atonunuk wininmeka ati, Saul adiparyuk, Rama mutuku bana ati, bisik banmoka ani, weik mek kwen lokamik dam ara, Sekhu mutuku biyuk. Biyukce, amutuku ulamik ninye ati, Saul birye, “Samuel ap, Daud ap, urikce mutuku ara, dan do?” nyabuka asipdeyuk. Asipdeyukura, amutuku ninye arye tamubuka, “Sikda Nayot mutuku urudake,” nyabik.

²³ Nyabikura, ayupu kekebukce, Saul bira amutuku batakuka, tuku bisik banmoka ani, Rama mutuku biyuk. Biyukba el babye, Allah el Pia Teleb, Lek Dip Kanye wekukba, Nayot mutuku binamoka ati, bisik tuba banmok talak ara, mot sebukabukce, yupu weik tonun nyapnin banmok.

²⁴ Bisik banmoka ani, akunum biyukopura, Saul baju kwiriplobuka, Samuel dam mot senmokce, yupu weik tonun nyanmok. Nyanmok talak ara, baju nong banang tukwak deice poulbinuka mapmokce, lukunyan ap, keting noutam ap nirya, asukumuk unmok. Winibuka ati, atalak arye dipdongobuka, doulamuk talak ara, ninye arye, winipmanto yupu arye, deiyok bikikce, nyalamik. “E, Saul el babye, Allah yupu lak nyalamlanye, nabi ulul do, kum do?” nyabuka, asipdeiyik.