1 Samuel 16 - Eipomek

Allah arye nyapdeibukba, Samuel birye, ‘Daud bira, Israel ninye, sik weiknye Raja kipnamle’ tenen, wipdeibuk yupu

¹ Allah el si Yahweh arye, Samuel biti nyabuk. “Like yata barye atonun mapmince, Saul biti engenalam do? Ara, urdem ati kume. Saul birye, Israel ninye deiyok talina ati, weik Raja kiamuk ning ara, na akunum bataksa atie. Tonda, wini talak ance minyak zaitun mek kwebuka bopmince, Betlehem mutuku binulyame. Ara, ninye deiyok nang kina ati, bikilin ning ati ara, aminyak mek, sik kisok deice likibikirye, erenyake. Amutuku noutamak bukni, mutuku si Betlehem mutuku ara, tonoknye el si Isai, el dam binulyame. Deiyok ara, Isai el mapu noutamak, tonok mi ara, narye akunum wipdeipsa ati, ance ninye deiyoknye, Raja wipdeipnamlyame,” Allah arye, Samuel biti nyabuk.

² Nyabuk bukni, Samuel birye, tamubuka nyabuk, “Naio, narye yata wiribuka nyalbinun do? Aning ara, Saul kekeplyopura, dipkoprob na opnamanile,” nyabuk. Nyabukopura, Allah arye tamubuka nyabuk. “Ati ara, Saul biti nyapnulyame. ‘Sapi basam kil ning tonok, Allah el si Yahweh, el arena ati, kintinipmana ati, yanmane.’ Nyapminyopura, kekepnamakile.

³ Winipminyopura, awinipnuminye talak ara, Isai biti yukupminba yalyopura, aminyan winipnalam ning ara, narye laka nyapnamkine. Narye, ‘Wipdeipsinye bira, ani,’ nyabuka, moubuka laka nyapnamkinanye bira, bikmince, el kisok deice minyak zaitun mek dikeipnalame. Winipminyopura, Israel ninye nirya arye, ‘E, anye bira, Israel ninye deiyoknye, Raja upnamle ati, minyak mek kwebuka, el kisok deice dikeipmal atia’ tenen, biknamake.” Allah arye nyabuk.

⁴ Nyabukopura, Samuel birye, Allah nyabuk touk, winibuk. Winibuk talak noutamak ara, adiparyuk Betlehem mutuku biyuk. Biyukopura, amutuku ulamika deiyok nang nirya eibikce, ‘Se’ tenen, ilil ubukce, yok sirim talibuk. Yok sirim talibukba, nyabik. “Naio, nun mutuku ayanmalam ara, teleb kilina ati ton, nun malye kilina ati do?” nyabuka asipdeyik.

⁵ Nyabikbuk, Samuel birye, tamubuka nyabuk. “Diba. Narye, anggun teleb ulina ati yanmane. Tonda, na kam tuba ulamle ning dobuka, Allah el si erena ati arepnune. Ati, anggun malye ning nirya batakuka, anggun kanye talima kintinipmunce, mek kekmunce, teleb baju akunum ongopmunyopura, anggun ap, na ap, neika Allah ati kam ning obuka, elti, arebibirye, el si erenamabe,” nyabuk. Nyabukce, Samuel birye, Isai ap, el mapu ap, ‘Allah ati kam ning arepting’ tenen, teleb kipdeibukba, sik kanye talima noutamak ara, teleb tenen kintinibikce, sik yuk-yuk kintinibikopura, anang ati nyabuk. “Ura, anggun ap, na ap bulubukap, Allah el si erena ati, ining ulamle ning obuka, neika arepnuyabe,” nyabuk.

⁶ Nyabuka yukubukba, sik kekebikce, akunum yanuka wekikopura, Samuel birye, Isai el mi Eliab eibukce tenebuk. ‘E ami ara, Allah el si Yahweh arye, akunum wipdeipmal mi ara, atie,’ tenebuk.

⁷ Utenebuk bukni, Allah el si Yahweh arye tamubuka, Samuel biti nyabuk. “Ancuk eipmince, ‘Anye bira, el urasin teleb, el nong ara, cang weik ati, pia telebnye ulule,’ tenebuka, wibuka erelina kume. Narye, anye akunum batakmana ati, kum wipdeipnune. Deiyok ara, nyapnukine. Ara, na Allah arye, ninye nong ap, sik urasin ap, eipnirye kum erelinune. Ninye arye, nong bol deice ning eibikirye, ‘Aning mambule, anye bira telebe,’ tenelamaka atonun, kum tenenune. Tonda, ninye arye urasin ara, elilalulum bukni, nara Allah, na Yahweh arye, anggun talima pum tam moubuka elisunune,” nyabuk.

⁸ Nyabukopura, Isai birye, el mi Abinadab ati, yukubukopura, el mi ara, minopce Samuel dam yayuk. Bukni, Samuel birye nyabuk. “Kume, anye babye, Allah arye kum wipmale,” nyabuk.

⁹ Tonda atalakuk, Isai birye, el mi Syama biti, “Samuel dam yalyame,” nyapdeibukba yayuk. Bukni, Samuel birye, “Anye babye, Allah arye kum wipdeipmale,” nyabuk.

¹⁰ Aning atonun, tonap Isai el mapu tekbarye (7) nang nirya yukubukba, bulubuka yayikopura, Samuel dam yayik. Yayik bukni, tuba tonap, Samuel birye Isai biti, nyabuk. “Anang nirya ara, Allah arye kum wipdeipmale,” nyabuk.

¹¹ Anang nirya akunum biyikopura, Samuel birye, Isai biti asipdeyuk. “An mapu ara, nirya winibuka akunum deiplum touk, akunum unmak do? Daton tuba do?” nyabuk. Nyabukura, Isai birye tamubuka nyabuk. “Kume, kele siryanye tonok ara, daunmal bukni, anye bira, domba weinanye daunmale.” Nyabukopura, Samuel birye tamubuka, Isai biti nyabuk. “Ati ara, anye yukupminba, el min kum yanaplye talak ara, Allah el arin ning kum arepnuyabe. El yalyeura, el ap neika bulubukap aning dobuka, Allah el si erena ati, arepnamabe,” nyabuk.

¹² Nyabukura, Isai birye yukubukba, yuk nang arye nyalbiyikba, ami inibuka boyayikopura, Isai el mi yayuk. Awel mi Daud bira, el urasin ap, el nong ap nirya ara, pia teleb ubuk. Yayukopura, Allah el si Yahweh arye, Samuel biti nyabuk. “Winira, anye dobukapmince, bikilina ati, zaitun minyak mek kwebuka, el kisok deice dikeipminyopura, awekmak nang nirya arye, ‘E, elda nun weik deiyoknye unamsile’ tenen, kel biknamake. Tonda, weik deiyoknye kina ati, el wipdeipnulyame. Anye bira, na akunum wibuka deipne.” Allah arye nyabuk.

¹³ Nyabuka ati ara, Samuel adiparyuk minopce minyak zaitun mek doprobukce, el du yapu wekmek kan-kan noutamak, Samuel birye, Daud wipdeibuk. Asum arye, deiyok koubuka, dor upra balamuk talak nirya ara, Allah el Dib Kanye, Daud deice yayukce, mikip deice arye meliamuk. Samuel birye, Daud akunum wipdeibukopura, adiparyuk Rama mutuku tamubuka biyuk.

Saul ulamukak, Daud birye meliamuka ati, nyabuk yupu

¹⁴ Saul bira, Allah el Dib Kanye melibuka ulamuk ning nirya, lopdeibukba, atalak ara, ‘Isa el kanye uk, Saul talima pum tam weknamle’ tenen, Allah arye dopdeibukba, el talima pum tam wekukce, malye updeibukba, kanye malye bobuka ulamuk.

¹⁵ Kanye malye bobuka ulamukba, Saul el pil don nang nirya arye, nyabik. “Kume nun bikmaba ara, Allah arye, Isa Mutuku Dongonye dopdeipmala ara, an talima pum tam upkiliba, malye kanye bobuka unalame.

¹⁶ Tonda, ance nun deiyoknye atonun ulyame. An arye, teleb ur nyapsiminyopura, an melin nang arye, pong-pong ana, el si kecapi yupu nyana ati, kel weiknye dam bana ati dilbitibye. Kintinipmapya arye, an dam boyakitibye. Aning ara, urdem ati kume. Allah arye, ‘Isa el deice weknamle’ tenen, dopdeipmakil ning ara, anye birye pong-pong ana yupu nyakiliba, an kanye teleb unamkile,” nyabik.

¹⁷ Nyabika ati, Saul birye tamubuka, el melina nang ati, “Yo telebe. Anggun bimunce, bilkong nyana, el si ara kecapi, ona ati kel weiknye inibuka, na dam boyalulume,” nyabuk.

¹⁸ Nyabukopura, el pil donanye kekebukce, nyabuk. “Isai Betlehem mutuku ululnye, el sal mi ton ulule. Ami ara, na akunum eibuka, kel bikse. Ami ara, bilkong ona, el si ara kecapi (gitar atonun ning) talina ara, pia kel mi ulule. Tonda, elda mikip pia weiknye ulule. El ilil pia kum ululnye. Tonda, el yupu nyalula babye ara, teleb yupu uk nyalule. El urasin ara, urasin telebnye ulule. Tonda, Allah el si Yahweh arye, anye biti weika arye melilulce, el ap neika ulule,” nyabuk.

¹⁹ Nyabukura, Saul birye, Isai dam nyalbana ati, el pil don nang ton, wipdeibukba, Isai dam nyalbiyik. Sik yupu laka nyalbanmika ara, “Raja Saul birye nyapkile. An mi Daud, domba basam weinanye wibuka, ance nyapminba, na dam yanamale,” nyabuka, yupu nyalbiyik. Nyabikba, Isai kekebuk.

²⁰ Ayupu binuka nyabikba, Isai kekebukce, el keledai basam tonok dobukabukce, akeledai deice, roti kwaning ap, anggur du mek ning tonok ap, tonda, kambing basam kam kipman tapu koupmok ning ap, akeledai deice deibuk. Aning nirya kintinibuka dopreibukba, el mi Daud birye, aning bobuka, Saul dam bobiyuk.

²¹ Bobiyukopura, Daud bira, Saul dam binuka ulamukce, el pil melibuka dolamuke. Winilamukba, Saul birye, Daud biti, kanye deibuka, bico tenelamukce, ‘Ninye olanmakce talak melinamnil’ tenen, wipdeibuk. Wipdeibukba, Daud birye, Saul el yin bona ati, nong deice ongalamuk ning ap, parang ya ap, mal ap, kelapye ap, bobuka bananye ulamuk.

²² Winilamuk talak ara, Saul birye, Isai biti yupu dobukabukce, nyabuk. “Ami Isaio, ance teleb ur nyapminba, an mi Daud bira, na ap pia ulamnimirye, melinamnile. Ara, narye elti, kanye deipsa ati ara, na ap, el ap, una ara, pia teleb tenenune,” nyabuka, yupu nyapdeibuk.

²³ Nyabukba, Isai birye, ‘Telebe,’ ur nyabukopura, atalak arye deiyok koubuka, dotalak nirya ara, sik neika ulamdik. Atalak noutamak nirya, Allah arye, ‘Saul wenepnamana ati, winipnule,’ tenepne talak nirya, Isa Mutuku Dongonye, Saul deice wekelyangalamuk. Wekelyangalamukba, Saul bira, kanye malye bolamuk. Kanye malye bopne talak ara, Daud birye pong-pong ana, el si kecapi dobuka, bopna arye, mot selamukba, Saul kekelamuk. Winipnaba, Saul kanye lamapdongobuka ulamukce, tuba tonap, teleb kanye bobuka ulamuk. Winipniba, aisa el dam arye, kwarabuka balamuk.