1 Samuel 15 - Eipomek

Allah arye, Saul Raja tikamuk ning, bataknamuka ati, nyabuk yupu

¹ Samuel birye, Saul biti nyabuk. “Nara, Allah el si Yahweh arye wipdeipnukba, narye, an ninye deiyoknye, Raja erebuka tikeipkise. Winipkisiba, ance Israel ninye talibuka ulamlume. Ati ara, Allah el si Yahweh arye, nyapdeipkuk yupu, kekepse ning ara, nyapnukin ati, ance kekebuka unamlame,” nyabuk.

² “Ura, aning-aning nirya, deice tam ulirye, aning nirya talilula deiyoknye, Allah el si Yahweh arye, nyapmakile. ‘Narye Amalek ninye nirya, wenebuka opnamane. Ara, urdem ati kum bukni, sik apu yapu Mesir mutuku arye, bisik yayik talak ara, Amalek nang arye, duknupdopmekba, sik Israel ninye mangkau kanye bobuka yanganmikce, Amalek nang arye obika ati, anang wenebuka opnamane.

³ Ati wini talak ara, anggun nirya bimunce, ‘Bico,’ tenena kum diparyuk, Amalek ninye nirya opnamlulume. Tonda, sik talibik ning nirya ara, tonok ning babye, ton kum bataknamlulume. Aning nirya obuka, sirya daknamlulume. Sal ap, kilapu ap mapu ap, kilmapu ap, moum din mapu, aling pum lin mapu ap opnamlulume. Tonda, Amalek nang, sik sapi ap, domba ap, unta basam ap, keledai basam ap, nirya obuka, sirya daknamalulume,’ Allah arye nyapmakile,” Samuel birye nyabuk.

⁴ Nyabuka ati ara, Saul birye, ninye yin talin nang yukubukba, bulubikopura, elce nirya dipdeyuk. Dipdebuka nukukce, Israel yin talin nang ara, dua ratus ribu (200.000) ap, sepuluh ribu (10.000) nang ap kibik. Ara, Yehuda yala nang ara, sepuluh ribu nang bulubik bukni, yuk yala nang ara, dua ratus ribu nang bulubik.

⁵ Akunum bulubikopura, Saul ap, el yin talin nang ap, Amalek ninye ulamik mutuku dam biyik. Biyikopura, Amalek nang, sik olana ati, mekin tam lu mutuku binuka warikmek.

⁶ Akunum kintinibikopura, Saul birye, sik Keni mutuku ninye ati nyabuk. “Anggun nirya, Amalek mutuku nang noutamak arye, leibuka binululume. Anang ap ansinipmunyopura, na yin talin nang arye, ‘Anggun ap, talye arye kirikuka opsicak’ tenen, nyapsine. Minop talak, anggun apu yapu nang ara, Israel ninye, Mesir mutuku noutamak arye, bisik yangalamik talak, sikti, teleb kanye bobuka, nun apu yapu miliamik. Ati ara, anggun Keni nang ara, Amalek ninye kan-kan ululumak arye, leibuka yukak binululume,” nyabuk. Nyabukba, Keni nang adiparyuk biyik.

⁷ Sik akunum leibuka biyikba, atalak ara, Saul ap, el yin talin nang ap arye, Amalek ninye nirya, obuka sirya dakik. Ara, Hawila mutuku arye, deiyok koubukabikce, Syur mutuku ap, otam keting yangan tam, Mesir mutuku dam, anoutamak nirya Amalek ninye olbiyik.

⁸ Atalak ara, Saul birye, Amalek nang, sik weik deiyoknye, Raja Agag ara, kum obikce, talye urdemuk dobuka deibik. Bukni, sik Amalek ninye, el amu tam ninye nirya ara, Saul el yin talin nang arye, sik parang ya dobukabikce, anang nirya obuka, sirya dakik.

⁹ Bukni, Saul ap, el mapu ap arye, Raja Agag bira, urdem tongobik. Aning atonun, atam ninye, sik pia teleb domba ap, sapi ap, kambing ap, sapi mi nong pia teleb weik ning ap, domba mi urasin teleb ning nirya ap, yuk yala ning, dekna weik ning teleb ning nirya ara, kum obik. Aning-aning nirya, urasin malye ning ap, mikip kum ning ap ara, obik bukni, urasin pia teleb ning ara, doprobik.

¹⁰ Winibikopura, Allah el si Yahweh arye, Samuel biti yanuka nyabuk.

¹¹ “Se, narye Saul biti, ‘Yata ati do?’ tenen, malye kanye bopmane. Ara narye, ‘Saul bira, ninye deiyoknye Raja unamle’ tenen, erepdeipse bukni, elce tuba tamubuka, malye kipdeipmanilce, batakmanile. Narye elti, ‘Wininamlyame,’ nyapdeipse yupu, na nyapse touk, kum winipmanile ati, el bataknune,” nyabuk. Nyabukopura, Samuel el talima pia uk dibukba, Allah ati lukunyan noutamak nirya, pia malye yupu nyanmokce, moronmok.

¹² Moronmokce, mapmoka ani, berekukopura, Samuel birye, ‘Beren tam talak Saul ap, epdanamaname’ tenen, el dam binmok bukni, Saul asukum kum unmok. Yuk nang arye nyabik. “Kume, Saul bira, Karmel mutuku akunum bindopmoe. Elce, ‘Na si Saul tuba pia tenenamniyak’ tenen, weik keil dobuka, Karmel mutuku ikdeipnamale. Winiplyopura, anirye, Gilgal mutuku binmale,” nyabik. Nyabikba, Samuel kekebukce, adiparyuk Gilgal mutuku biyuk.

¹³ Biyukba, Gilgal mutuku akunum yayukopura, sik bitinye epdarikce, Saul birye, Samuel biti nyabuk. “Ura, Allah arye, ‘Winiplyame,’ nyapnuk touk, akunum pil dopmane. Tonda, ‘Allah arye anti, teleb kibuka melinamkil’ tenen, Allah moropnukine,” nyabuk.

¹⁴ Nyabuka ati, Samuel birye, tamubuka nyabuk. “Ura, ance, ‘Allah nyapnuk touk, akunum winipmane,’ nyapmanilam bukni, wini talak ara, yata yupu nyanmalba kekenman do? Domba yupu ap, sapi yupu ap, weik arye nyanmakba, kekenmana ara, arando?” nyabuk.

¹⁵ Nyabukura, Saul birye tamubuka nyabuk. “Na yin bon nang arye, aning bulubuka deipmakba, yupu nyanmaka ara, Amalek ninye, sik taleamik ning, domba ap, sapi ap, urasin pia teleb ning. Aning nirya ara, ‘Nun ni koproba Allah ati arenamabe’ tenen, boyanmap atie. Bukni, weik tam ara, yuk-yuk ning nirya ara, obuburye, sirya dakupe,” Saul birye nyabuk.

¹⁶ Nyabukba, adiparyuk Samuel birye, tamubuka Saul biti nyabuk. “Ayupu nyanmalama ara, bataklyame. Aning ara, akunuma. Allah arye, lukunyan noutamak nyapmo yupu ton, laka nyapkiniba kekepnulame,” nyabuk. Nyabukura, Saul birye, “Telebe ur nyapnilyame,” nyabuk.

¹⁷ Anyabuk touk, Samuel birye, Saul biti nyabuk. “Ura, minop talak ara, ance an bidamang ati, ‘Se, nara talye urdemnye,’ tenelalalum bukni, Allah arye, erebuka tikeipkukba, Israel ninye ayala-ayala nirya, sik ninye deiyoknye, Raja min wipdeipkuk do, kum do? Allah arye, ninye deiyoknye tikeipkukba umince, Israel ninye unyak mutuku nirya, talibuka ulyame.

¹⁸ Winilamnya ani, aminyan talak Allah arye, ‘Sik pia malye wininyak ninye, Amalek nang nirya ati, obukapmince, sirya daknamlyame,’ nyapdeipkuke. Ara, ‘Amalek ninye binuka, obuka sirya daknamle’ tenen, dopdeipkukba bilum bukni, akum winiplume.

¹⁹ Ati, ance yata ati, Allah nyabuk yupu moubuka kum kekeplum do? Tonda, yata ati amutuku ninye, talilamik ning dobuka, duknupluma deice arye, Allah batakuka kum kekeplumce, el dinak malye winipdeiplum do?” Samuel birye, Saul biti nyabuk.

²⁰ Nyabuk bukni, Saul birye, tamubuka Samuel biti nyabuk. “Diba. Nara, nimalyap asa arye, Allah nyamnuk touk bisirye, Amalek ninye nirya, obuka sirya dakse. Winipse bukni, Amalek ninye, sik ninye deiyoknye, Agag bira, bataksirye, dobuka boyase.

²¹ Tonda, na yin talin nang arye, Amalek ninye talilamik ning nirya, obuka sirya kum dakikce, urasin pia teleb domba babye, sapi babye doprobik. Aning ara, urdem ati kume. Ara, ‘Gilgal mutuku noutamak yanuka ubirye, Allah el si erena ati, el arepnamap’ tenen, aning boyanmabe. Tonda, ‘Allah ati uku dapnamap’ tenen, winibike,” Saul birye nyabuk.

²² Nyabuk bukni, Samuel birye, tamubuka nyabuk. “Allah el birye, ‘Aning winiptinge,’ tenesilye ning ara, namin asa arye, el amu tam una teleb do? Akam ulul ning dobuka, Allah ati uku dalbana teleb do? Pia weik teleb ning ara, dan do? Allah arye nyasilye yupu, kekebuka dobolbana ara, pia teleb ning atie. Mitik teleb ning ara, anggun malye winin ning, namin kina ati, kam ning obuka, uku dalbana uka. Aning atonun, mitik teleb ning ara, domba basam meta dobuka, uku dalbana bukni, weik teleb ning ara, Allah arye nyasilye yupu kekebuka, dobolbana uka.

²³ Ara, urdem ati kume. Allah el kanye ara, malye winin ning aupmalebuk, Allah ati batakna ara, malye weik un ninge. Deiyok ara, Allah yupu batakna ara, ninye kirdona atonun winin ning atie. Aning atonun, kanye talima pum tam erepdace nang ara, sik wininyak ning ara, Isa Mutuku Dongonye si eren nang, winilamaka atonun unyake. Ati ara, anda Allah arye, ‘Wininamlyame,’ nyapdeiamkuk ning, yanipmoma ati ara, Allah arye anti, ‘Ninye deiyoknye unamle’ tenen, erebuka tikeipkuk ning ara, akunum batakile,” Samuel birye, Saul biti nyabuk.

²⁴ Nyabukura, Saul birye tamubuka nyabuk. “Kume, ance dipkoprob yupu nyapmanilame. Nara, malye upse. Allah arye, ‘Wininamlyame,’ nyapnuk yupu yanipse. Aning atonun, ance nyapnulum yupu babye yanipse. Winipse ning deiyok ara, na amu tam unyak ninye ati, ilil upnukce, sik nyapnik yupu kekepse. Adeice arye, malye upse.

²⁵ Wini talak ara, narye moropkine. Na nio, na malye upse ning ati, namin kipnutumce, na ap, tamubuka bitinimnyopura, nun ni Allah, el si Yahweh ati, el si erepnamne,” nyabuka morobuk.

²⁶ Saul birye nyabukura, Samuel birye tamubuka nyabuk. “Kume, an ap tamubuka kum binaname. Deiyok ara, Allah arye, ‘Wininamlyame,’ nyapdeipkuk yupu yanipluma ati, Allah el si Yahweh arye, anti akunum batakile. Ati, na ap kum binamaname,” nyabuk.

²⁷ Nyabukce, Samuel bira, ‘Adiparyuk binun’ tenen, tamubuka baloyuk bukni, Saul birye yukubuka, Samuel el deice ongopmok baju talipdongobuk. Winibukba, el deice baju adiparyuk kwelikuk.

²⁸ El baju kwelikukopura, Samuel birye, Saul biti, tamubuka nyabuk. “Ura, ance na baju kwilikmanilama atonun, wini talak ara, Allah arye an pil don ning, Israel ninye, sik ninye deiyoknye, pil dona ati areamkuk ning ara, wini talak Allah arye dobuka, yuknye deice deipnamale. Ara, an dam ululnye bukni, elda pia telebnye ulule. Anda malye weik ulyamnye ulyame.

²⁹ Ara, urdem ati kume. Israel ninye talibuka ululnye Allah ara, pia weik mambulnye ulule. Elda pia telebuk ululnye ati ara, Israel ninye nirya ara, el si erenyake. Tonda, ‘Winipnamne, winipnamne,’ tenelye ning nirya ara, teniltona babye pia kumnye. Elda, ninye arye tenelamak atonunye kume. Elda, tilila yupu, pia ton kum nyalule. Dipkoprop yupu uk nyalule. Tonda, ninye arye, ton ning tenebuka, aning batakuka, yuk ning tenelamak touk, pia kum winilule. El tenelye touk, aninguk winilule,” Samuel birye nyabuk.

³⁰ Nyabukura, Saul birye, tamubuka nyabuk. “Diba, na malye winipmase ati, ance melipniminba, tamubuka binimirye, narye talipse ninye ap, sik deiyok talibuka unyak wisi nang ap, dinmasicak arye, si sipnamnilyame. Ara, an ap, na ap neika, Allah el si erepnaname. ‘Winipnimnyopura, na mutuku nang arye, teleb tenepnamniyak’ tenen, moropkine,” Saul birye, nyabuka morobuk.

³¹ Nyabuka akunum morobukba, Samuel birye tamubuka, Saul melibuk. Melibukopura, Saul birye, Gilgal mutuku binuka, Allah siuk erebuka kibuk.

³² Akunum winibikopura, Samuel birye nyabuk. “Amalek ninye, anggun ninye deiyoknye, el si Agag, na dam boyalulume,” nyabuk. Nyabukba, Saul el mapu arye, Agag inibuka boyayikba, Agag bira, Samuel dam yanuyuk talak ara, utenebuk. ‘Kume, na ap, na amu tam nang ap arye, Israel ninye obupu ning ara, min arye winibupa ati ara, akunum luba kibik ati, teleb yupu uk nyapnamaniyake,’ tenebukce, adiparyuk yayuk.

³³ Yayukopura, Samuel birye nyabuk. “An ninye on ning, ya dobukaplumce, kilapu sik mapu weika arye, olamlum touk, an nin babye el mi kum upnamle,” nyabuk. Nyabukopura, Samuel birye, Gilgal mutuku noutamak aryuk, Agag obuk. Elce obuk ning ara, Allah el dam anya arye, Allah arye eibuk.

³⁴ Winibukopura, Samuel adiparyuk, Rama mutuku biyuk. Bukni, Raja Saul bira, el asik koproba, Gibea mutuku uk tamubuka biyuk.

³⁵ Atalak arye, deiyok koubuka, doketing tamun noutamak nirya ara, Samuel el yuk daulamuk. El kam tuba ulamuk talak nirya, tuba tonap tamubuka, Saul el dam kum balamuk. El dipnamuk talak babye, Saul ap ton kum elilalamdik. Bukni, Samuel birye, Saul biti, pia tenelamukce, engelamuk. Tonda, Allah arye Saul biti, ‘Se, anye wipdeipsiba, Israel ninye talibuka, sik weiknye Raja ulamuk ara, na kanye malye upnile,’ tenebuk.