1 Samuel 12 - Eipomek

Samuel birye Israel ninye ati, “Na wisi akunum dasa ati, anggun noutamak arye, kisikdopnamne bukni, anggunce wininamlulume,” nyabuk yupu

¹ Samuel birye, Israel ninye nirya ati nyabuk. “Anggunce, na dam nyalyanganululum ning ara, kekepsirye, moropnulum touk, akunum winipsise. Ara, narye, anggun ninye weik deiyoknye, kibuka talipnamsilanye, Raja Saul akunum wipdeipsise.

² Ati ara, wini talak anggun ninye deiyoknye, Raja Saul birye talipnamsile. Nati ara, anyapnusine. Anggunce akunum elinululume. Nara, akunum wisi dase. Na kul potong akunum papnuke. Na min kum wisi danamse talak ara, wel talak arye, anggun taleamsise. Winira, na akunum wisi dasa ati, anggun kele, na deiamse mapu ara, akunum neprobike,” nyabuk.

³ “Ati, wini talak ara, na anggun dam atikmane. Tonda, nun ni koproba Allah, el si Yahweh arye, dinmasile. Tonda, nun ninye deiyok talina ati, Allah arye wipdeipmasilnye, Raja Saul ap arye dinmanile. Sik bitinye dinmasiraka ati ara, winipmanto, narye anggun dam malye winipse ning ton, auplyopura, adiparyuk laka nyapnamlulume. Winipmanto ara, narye yatanye sapi basam ubula dopromse do? Tonda, yatanye el keledai basam ton, ubula dopramsise do? Tonda, anggun dam tilila yupu ap, malye yupu ap, duknubuka nyapsisa deice arye, namin kilongona yo bok ap ton dopromsise do? Yatanye anggun nong deice, ikin ning deiamsise do? Tonda, malye nang ulamik ning, yupu lipsisikuka bokolina deiyoknye, ulamse talak noutamak ara, yatanye birye, yo bok arepnuka deice arye, malye nang ati kum wenepse. ‘Ninye arye, malye wininyak ning kum eipnamne’ tenen, na asing pia kum kuamnuke. Dipkoprop yupu bokolilamsirye, malye nang ati, wenelamsise. Anyapmasin ning tonok ning babye, winyamtinyopura, awinyamsa ati, anggunce ‘Aning ton winiplume,’ nyapnumunba, narye wini talak aryuk tamubuka punupnamasine,” nyabuk.

⁴ Samuel birye nyabukba, Israel ninye nirya arye, tamubuka nyabik. “Kume na nio, ance ton, nun dam anyapmalam ning, pia ton kum winyamsulume. Ikin ning, nun nong deice, pia kum deiamsulume. Kunusa don yupu deice arye, nun ning ubula pia kum dololamsulume. Tonok ning babye, yuk nang talilamik ning, ance ubula kum dololamsulume. Aning nirya ara, pia kume,” nyabik.

⁵ Nyabikba, Samuel birye, tamubuka nyabuk. “Ati ara, nun ni Allah, el si Yahweh ap, tonda elce wipdeipsukba, nun weik deiyoknye unamsilanye, Saul ap arye, sik bitinye kekenmasirake. Anggunce nati, ‘Malye winipsulum ning ara, pia kum upmasile,’ akunum nyapdeipmanulume,” nyabuk. Nyabuk buk, sik nirya arye, “Diba nyaplame, Allah arye dinmasilce, kekenmasile,” nyabik.

⁶ Nyabikba, Samuel birye, Israel ninye ati, ayupu ton nyabuk. Ura, nun ni Allah, el si Yahweh arye, Musa ap, Harun ap ara, wipdeiamuk. Winilamukba, nun apu yapu nang, Mesir mutuku arye bobuka yanamdik.

⁷ Ati ara, anggun atikmalumbuk, narye dipkoprob yupu nyapnusine. Nun ni Allah, el si Yahweh arye, dinmasilce, kekenmasile. Ati, elce pia diksukum pil, dolamsuka deice arye, anggun apu yapu ap, anggun ap ati, weika arye meliamsuk ning ati, laka nyapnusine.

⁸ Tonok ning ara, ani. Anggun apu koproba, Yakub ap el aik ninye ap, Mesir mutuku noutamak biyikba, Mesir ninye ary, ikin pil aruklamikba, dolamik. Aminyan talak, anggun apu yapu, ikin weik ulamikce, malye kanye bolamikba, ‘Allah arye melibuka lyepdopnamsil’ tenen, Yahweh ati morolamikba, kekebukce, Musa ap, Harun ap, wipdeibukba, sik bitinye arye, anggun apu yapu bobuka, Mesir mutuku noutamak arye, boyanamdik. Boyanamdikba, aunmab mutuku wekuka, aik dobuka, teleb ubuka aulamik.

⁹ Bukni, anggun apu yapu arye, nun ni koproba Yahweh ati, tuba tenena kumce, elti, luba kibuka, el si yanilamik. Winilamikba, elce sikti, batakukba, Pilistin yala nang, sik weik deiyoknye Hasor, el yin nang talina deiyoknye Sisera ap, Moab yala nang, sik Raja ap, sik deice mikip arebukba, yanuka obuka, sirya dakmanto ulamdikce, Israel ninye obuka, sirya dakmanto kibik.

¹⁰ Winibikba, anggun apu yapu arye, tamubuka, sik ni koproba, Yahweh ati, “Nun ni, nun an dam pia malye wininyabe,” nyabuka morolamik. “Nunda an batakuka, amutuku nang si erenyak Isa Mutuku Dongonye sik si Bahal ap, Asitoret ap, talibuka si erelamupe. Winilamupu bukni, wini talak nun mal olan nang arye, talipnusiyaka ati, ance lyepdopsiminyopura, an tamuk tamubuka yabirye, an tonok talibuka ubirye, an siuk erenamkiyabe,” nyabuka morolamik.

¹¹ Morolamikba, Yahweh kekebukce, sik melina ati, ninye deiyok nang ton wipdeibuk. Anang sik si ara, Yerubaal ap, Barak ap, Jepta ap, Samuel ap, dopdeibukopura, anang arye, Israel ninye lyeprobik. Sik mal olan nang dana-dana tam, weik daulamik bukni, Allah wipdeiamuk nang, meliamuka deice arye, anang arye, Israel ninye lyepdomikba, tuba tonap amutuku noutamak, talye kanye bobuka, telebuk ulamik. Anggun wini talak ululum nang babye, kanye lamapdongobuka, teleb asa arye, ulalume.

¹² Winilamlum bukni, Amon yala nang, anggun ninye deiyoknye, Raja Nahas, ‘Israel nang opnaman’ tenen, yangalamukak, anggunce nati, “Kume, nun ‘Se,’ tenepmap ning ara, ninye deiyoknye, Raja wipdeipsutumba, teleb uptibye,” nyapnulume. Dipkoprop, anggun ni koproba Allah, el si Yahweh arye, anggun weik deiyoknye, akunum talibuka ulamsuk bukni, anggunce, “Kume, ninye tonok ton wipdeipsilyame,” nyapnulume.

¹³ Ati ara, anggun elilulume. Anggunce morolalumce, wipdeiplum ninye deiyoknye, Raja Saul aulule. Anggun elilulume. Yahweh arye, anggun Raja ati, akunum wipdeipmasilaba, atikmale.

¹⁴ Ati ara, anggun ni koproba Allah, el si Yahweh ati, ilil weik usiliba, el siuk erepmunce, el amu tamuk umunba elce, ‘Aning ara, wininamlulume, aning ara, kum wininamlulume,’ nyabuka, nyalisilye yupu nirya kekebuka, dobol bimunyopura, aning nirya telebuk unamsile. Tonda, anggun Israel ninye nirya babye, anggun Raja babye, anggun ni koproba Yahweh, el siuk erepmunce, el yupu, kekebuka dobol bimunyopura, telebuk unamsile.

¹⁵ Bukni, anggun ni koproba Yahweh ati, el yupu kum kekepmunce, elce, ‘Aning ara, wininamlulume, aning ara, kum wininamlulume,’ nyabuka, nyasilye yupu batakuka yanipmunyopura, elce anggun apu yapu ati, dipkoprob wenelamukce, ikin ning sik nong deice delilamuk touk, anggun wini talak ululum ninye ap, anggunti talipnamsil deiyoknye ap ati ara, atonun wenepsilirye, ikin ning, anggun nong deice delinamsile. Anggun ti kum melinamsile. Samuel birye Israel ninye ati, nyabuk.

¹⁶ Nyabukce, ayupu dukdongobuka nyabuk. “Ati ara, anggun atikmamunce, dinamlulume. Anggun ni koproba Allah, el si Yahweh arye, weik mambul ning, ninye winipmanto kum pil doplyopura, adiparyuk elinamalulume. Deiyok ara, anggunce, ‘Raja arye telipsutue,’ nyabuka, moropluma deice arye, malye ning moropmaluma ati, nyapsine.

¹⁷ Ura, teneipdelulume. Wini talak ara, sun gandum wa lin talak akunum upsile. Gandum duk lin talak akunum upmasil bukni, narye nun ni Yahweh ati, moropnyopura, elce weik liman ap, mok ap, arepnusile. Aning arepsilya deice arye, anggunce moubuka tenenamlume. Ara, Allah aniryuk talibsutu bukni, anggunce, ‘Ninye deiyoknye Raja, se,’ tenenyabe ati, wipdeipsilyame,’ nyabuka, moropnulum ning ara, Allah el kanye ara, ‘Aning ara, pia malye,’ tenesulule. Aning kel biknamlulume.” Samuel birye nyabuk.

¹⁸ Nyabukabukce, adiparyuk Samuel birye, Allah el si Yahweh ati, morobukba, kekebukce, asum aniryuk Yahweh arye, weik liman ap, mok ap, dopkwetebukba, sik nirya dinmek. Winibuka ati ara, sik Israel ninye nirya, kel kibikce, el Yahweh ap, Samuel ap ati, ilil weik ubukba, sik nirya arye, ‘Se, sikda weik mambule,’ tenebik.

¹⁹ Akunum tenebikopura, sik Israel ninye arye, Samuel biti nyabik. “Se, Na nio. Ance nun ni koproba, Yahweh ati moroptumba, kekepkuturye, nunti kum opnamsile. Ara, talye ati kum nyababe. Nun malye winilamupu ning weik, awamuk ati, wini talak ara, tonok weik malye un ning ton, akunum tabakmabe. Ara, nunce, ‘Ninye deiyoknye Raja biryuk talipsutue,’ nyabuka, morobupu ning ara, dipkoprob malye winibupe,” nyabik. Nyabikba, Samuel birye, tamubuka nyabuk.

²⁰ Ilil una kume. Dipkoprop anggunda, malye un ning weika arye, akunum winilamlum bukni, wini talak ara, aning nirya batakuka, telebuk unamlulume. Ara, anggun ni Allah, el si Yahweh ati, batakna kum arye, el siuk erenamlulume. Anggun kanye talima nirya, Yahweh deice uk deipmunce, el amu tamuk ubuka, el yupu uk, moubuka kekepmunce, dobolbanamlume.

²¹ Tonda, talye Isa Mutuku Dongonye ap, ninye arye kat ning dobuka, ninye urasin atonun memebuka deibikirye, ‘Nun ni, sikce melipsitinge’ tenen, sik si erenyak ning, aning-aning nirya ara, kum talinamlume. Aning nirya ara, talye ning ati, kum melipsitinge. Isa ayala-yala nirya ara, dipkoprob kum melipsitinge. Isa nirya ara, mikip kum, nong kum danamle ning anya arye, anggun ikin usilye ning noutamak arye, kum lyepdopsitinge. Isa nirya ara, talye ning, kum danamle ning uka.

²² Anggun ni koproba Allah, el si Yahweh arye, minop talak anggun Israel ninye ati, akunum wipdeiamsukce, ‘Anang ara, ‘Naʼ tenen, ninye,’ akunum nyamsukce, tenesilya atia. Ati ara, anggun ni koproba, Yahweh arye, pia kum bataknamsile. El si pia weik mambul si ulula anya arye, ‘Yuk yala nang arye, na si malye kipnicak’ tenen, elce pia kum bataknamsile.

²³ Tonda, narye wininamne ning ara, nyapnusine. Narye anggunti, Allah kum moropnyopura, pia malye uptinye. Amalye winin ning, pia kum winipnamne,’ tenenuna ati ara, narye pia kum bataknamsine. Narye anggunti, tuba-tuba Allah moronauk unamsine. Tonda ‘Israel ninye arye, teleb diksukum una bisik anye, tenebuka, kel kinamlum’ tenen, narye diksukum winin ning, tuba peterenamsine.

²⁴ Wininamsin bukni, weik mambul ning ara, nyapnusine. Ara, anggun ni koproba Allah, el si Yahweh ati, pia ilil tenenamlulume. Anggun kanye talima nirya, Allah ati arepmunce, el tibuk si erebuka, dukdongobuka talipmunce, telebuk unamlulume. El ti batakna kum diparyuk, el amu tam ubuka, el yupu uk, pia moubuka kekenamlulume. Tonda, Allah arye, anggun melina ati, pia mambul pil ap, ninye winipmanto kum pil ap, dolamsuk ning nirya ara, tuba tenenamlulume. Aning nirya ara, batakana meme.

²⁵ Teleb ning akunum laka nyapmasin bukni, anggunce aning moubuka kum kekepmunce, tuba malye-malyeuk winilamunyopura, anggun babye, anggun Raja babye, kum upnamlume. Allah wenepsilirye, sirya daknamsile. Samuel birye, Israel ninye nirya ati, nyabuk.