1 Raja-Raja 4 - Eipomek

Israel ninye talena ati, Salomo birye, ninye deiyok nang ton, wibuk yupu

¹ Salomo bira, Israel mutuku noutam ulamik ninye nirya ati, Israel ninye sik deiyoknye, Raja akunum kibukce, amutuku ulamik ninye ap taleamuk.

² Israel mutuku taleamuk talak ara, Raja Salomo birye, el amu tam ulamikce, pil yala yuk-yuk el ap melipnarye, ninye deiyok kibuka talena ati, wipdeiamuk nang ara, sik si ara, ani. Allah arena ati pil don nang, sik deiyoknye bira, ninye si Zadok birye deiamuk mi, el si Asarya erepdeibukba, apil talibuka ulamuk.

³ Amutuku noutam si seken pil dona ati, deiyok nang ara, tonoknye el si Sisa birye, deiamuk nang ara, Elihoref ap, Ahia ap, wipdeibukba, apil talibuka ulamdik. Tonda, amutuku noutam yo bok deilinak nukna ap, kalekina ap ati, deiyok kiamuknye bira, Ahilut el mi Yosafat erepdeibukba, apil talibuka ulamuk.

⁴ Tonda, amutuku noutam yin talen nang, sik deiyoknye bira, ninye si Benaya, el mi Yoyada erepdeibukba, apil talibuka ulamuk. Tonda, Allah arena ati, pil dolamdik nang ara, sik bitinye Zadok ap, Abiatar ap, erepdeibukba, apil talibuka dolamdik.

⁵ Tonda, amutuku ninye deiyok kibuka ninye weik ati, sik yupu bokolinanye bira, Natan el mi Asarya erepdeibukba, apil talibuka ulamuk. Tonda, ninye deiyoknye Raja biti, ‘Teleb unamtibye ning ara, dan ning do?’ tenen, yupu sisikina deiyoknye bira, Natan el mi Zabud erepdeibik. Tonda, anye binyuk, imam pil ton talibuka pil dolamuk.

⁶ Atonun amutuku noutam ninye deiyoknye Raja, el ulamuk aik ap, el bona ati kalekina deiyoknye bira, Ahisar erepdeibukba, apil talibuka ulamuk. Tonda, ‘Sik anang ara, nun ikin pil talye donamsiyakʼ tenen, deklamik nang, apil dona deiyok kibuka, ninye pil dinanye bira, Abda el mi Adoniram erepdeibukba, apil talibuka ulamuk.

⁷ Raja Salomo birye, Israel mutuku noutam yuk-yuk bukni, ninye deiyok kin nang, Bupati-Bupati atonun deiyok nang ara, dua belas (12) nang wipdeibukba, apil talibuka ulamik. Sik anang pil dona ara, amutuku noutam nirya ara, din ning yala-yala nirya bulubuka, ninye deiyoknye Raja ap, tonda el ulamuk aik noutam pil dolamik ninye ap, el mapu koproba ap, sik dibuka una ati, kintinilin nang wipdeibuk. Awipdeibuk Bupati nang nirya ara, keting tamun tonok wala 12 aulye touk, aketing tamun nirya ara, tonok wala tonok ning ara, tonok Bupati birye, “Din bulubuka boyanganamnulume,” nyamuk touk, sik yuk-yuk, awala-awala nirya, tonye boyanmana, ton wala ara, tonye boyanmana kilamik.

⁸ Sik, adua belas (12) Bupati wipdeibuk nang, anirya deiyok kibuka talibukba, anang ara, el amu tam unamika ati ara, ninye deiyok nang kina ati, Bupati nang wipdeibuk. Sik adua belas Bupati nang, sik si ap, sikce taleamik mutuku si ap ara, ani. Ninye si Ben-Hur bira, Efraim mutuku tam taleamuk.

⁹ Tonye, el si Ben-Deker bira, Makas mutuku ap, Salbim mutuku ap, Bet-Semes mutuku ap, Elon-Bet-Hanan mutuku ap, awinilye mutuku taleamuk.

¹⁰ Tonye el si Ben-Heset birye, taleamuk mutuku si ara, Arubot ap, Sokho mutuku ap, Hefer mutuku ap, taleamuk.

¹¹ Tonye el si Ben-Aminadab bira, mutuku si Dor mutuku taleamuk. Anye bira, Salomo el kilmu Tafat domuk. Anye birye, Dor mutuku nirya taleamuk.

¹² Tonda, ninye si Ahilut, el mi Baana bira, elce Taanak mutuku ap, Megido mutuku ap, Bet-Sean mutuku ap nirya ara, taleamuk. Beth-Sean mutuku ara, Sartan mutuku dam bukni, Yisreel mutuku arye dipdongobuka, selatan tam ap, anirye dipdongobuka, mutuku si Abel-Mehola ap, amutuku arye dipdongobuka, otam mutuku asik ap, Yokmeam mutuku asik ap, domikak binuka, dipdongamuk mutuku taleamuk.

¹³ Tonda, mutuku si Ben-Geber ara, Gilead mutuku tam bukni, Ramot mutuku asik ap taleamuk. Anye birye, ninye si Manasye yala deiyoknye, el mi Yair birye, dolamuk asik ton taleamuk. Anyasik nirya ara, Gilead tam ulamuk. Tonda, anye binyuk, Argob mutuku tam bukni, Basan mutuku noutam nirya ara, weik asik ara, enam puluh (60) kota dolamik. Anoutam dolamikce, dana-dana tam antanapdongobuka, domikak ara, cang weik keil poka arye dolamik. Apoka bisik bublan wekelban sukum ara, perunggu aryuk kitibdongobuka, mikip kipdeipnarye dolamik.

¹⁴ Ninye si Ido, el mi Aminadab bira, Mahanaim mutuku tam taleamuk.

¹⁵ Ninye si Ahimas, el domuk kil kira, ara Salomo el kilmu Basemat domuk. El anye birye, Naftali yala ninye, sik mutuku taleamuk.

¹⁶ Ninye si Husai, el mi Baana bira, Asyer yala ninye sik mutuku ap, tonda Bealot mutuku arye, asik dolamik ninye taleamuk.

¹⁷ Tonda, Peruah el mi Yosafat bira, Isakar yala ninye sik mutuku taleamuk.

¹⁸ Ninye si Ela, el mi Simeai bira, Benyamin yala ninye sik mutuku taleamuk.

¹⁹ Ninye si ton Uri, el mi Gebe bira, Gilead yala ninye sik mutuku taleamuk. Amutuku min talak ara, Amori ninye ati taleamuk deiyoknye, Raja Sihon birye, Amori mutuku taleamuk. Atonun, amutuku noutam babye, Basan mutuku ninye taleamuk deiyoknye, Raja Og birye taleamuk mutuku, Geber birye aning nirya taleamuk.

²⁰ Atalak ara, Yehuda yala ninye ap, Israel ninye ap, yupa pia weik, mek dala arye mek wininga ulamle touk ulamik. Sik nirya din ap, mek ap, dilamikce teleb kanye uk bobuka ulamik.

²¹ Winibukopura, Salomo birye Efrat mek duman arye dipdongobuka, Pilistin nang mutuku ap, nirya talipra binamuka ani, Mesir nang mutuku wililonak binuka batakuk. Winibukopura, sikce dekna arelamak atonun, winibikce, “Ancuk nun talipnamsilame,” nyabik.

²² Salomo el kam ulamuk talak ara, Yehuda mutuku noutamak ulamik ninye ap, Israel mutuku noutamak arye dipdongobuka, Bersyeba mutuku noutamak ulamik ninye nirya arye, el din patapnopura, tonok sum ara, yupa tonok keba pangubarye (30) kwaning dapnamna ati, dongobuka pinin ning, el si ara tepung, pia teleb ning ap, atonun ning kwaning yupman talak, dongon ning pum dongobuka, pinilamak ning el si tepung, enam puluh (60) dobuka boyangalamik.

²³ Aning atonun, domba basam meta teleb ninguk, tagu barye (10) ap, tonda ninye arye weilamak ning, dua nakub dikin (20) ap, yupa dumbarye (100) domba basam ap nirya ara, sik aninye nirya arye dobuka, Salomo el damuk bobuka yangalamik. Bukni, ninye bukuka banyak ning, kijang ap, rusa basam ap, keil uang logam pia moubuka weilamik ning nirya, Salomo el dam bobuka yangalamik ning ara, kum nukeibik.

²⁴ Ati ara Efrat mek kin tam mutuku nirya ara, Tifasa mutuku arye diprongobuka, Gasa mutuku ap atam, Efrat mek kin tam unyak ninye nirya, elcuk amutuku nirya talipnamuka ati, dekne ning el deice deibuk.

²⁵ Ton ning ara, Yehuda yala ninye ap, Israel ninye ap, amutuku noutamak pia ulamikce, Salomo tuba ulamuk talak ara, Dan yala nang ap, Bersyeba mutuku nirya anggur tapu ap, Arah yo ap, amu tam yuk-yuk ulamik.

²⁶ Anoutam talak ara, Salomo el yin talin nang ara, yupa weik 12 ribu ulamik. Tonda, yin talin nang sik kuda deice bukuka bana ati, poka wilamak atonun wamik ning ara, empat puluh ribu (40.000) poka wilamik.

²⁷ Asum-asum nirya, ninye deiyoknye Raja Salomo, el din ati, wal tonok nirya ara, ninye deiyok kibuka un nang, bupati ap ara, el din bobuka arelyangalamik. Ara, ninye deiyoknye Raja Salomo, el din dabuka deipnopura, bukuka yuk nang ap dilamikak yo arye memepdeiamik ning deice dabuka, boyana delilamik. Winibuka arelyangalamik talak ara, yuk din ning nirya kum sukultalilamik.

²⁸ Raja Salomo el amu tam nang, sik bupati nang nirya, gandum ap, gandum sekuka delilamikba kolulamuk ning ap, ‘Salomo birye weilamuk ning, basam dinamle’ tenen, boyangalamik. Ara, Salomo el bukuka ban kuda basam ap, mal olan talak bukuka ban talak balamik kuda basam, sik din ati bobuka arelamik. Sikce bobuka yangalamikba, aning weina ati, yuk-yuk talibuka aweilamne touk, arelbalamik.

²⁹ Atalak noutamak nirya, Allah arye Salomo biti, kel bikna deiyok ning ap, ‘Aning ara, ani,’ tenepra bana deiyok ning ap, mikip arye bikda bana ap, pia weik arye arebukba, kel weik bikamuk.

³⁰ Salomo bira, keting panalyangan tam ulamik nang ap, Mesir mutuku ulamik nang ap, sik bikamik touk kume. Elda pia weik kel arye bikne ning bikamukce, ulamuk.

³¹ Salomo elda dipkoprob kele weiknye ulamuk bukni, Maol el mapu Etan, Ezrahi mutuku ulamuknye ap, Herman, Kalkol ap, Darda ap, sik anirya, Salomo ulamuk atonun kum bukni, Salomo bira pia kel weik kiamuk deice arye, amutuku ninye nirya arye, Salomo siuk bikamik.

³² Raja Salomo birye winipmanto ning ara, seribu (1.000) yupu nyalamuk touk, tonda mot babye seribu lima (1.005) mot ton nyalamuk.

³³ Winibukopura, koun ning ap, yo ap ati, ara Libanon mutuku palamle yo el si keipyal yo ap, keil poka tam palamle maning el si ara, Hisop ap, tonda maka ap, basam ap, tonda mek kin ulamak ning ap, tonda katoak ulamak ning ap nirya ati, nyabuk.

³⁴ Ati ara, amutuku-amutuku nirya ulamik ninye nirya arye, “Salomo kel bikna deiyok ning ara, pia weik yuk nang kum bikmanto ning bikilule,” nyabikba, yuk mutuku daulamik nang ninye deiyok nang, Raja nang kekebikce, sikce Salomo un dam kekelyayik.