1 Raja-Raja 3 - Eipomek

‘Kel weik bikina deiyok ning arepnutue’ tenen, Salomo birye Allah ati, morobuk yupu

¹ Israel ninye sik weik deiyoknye, Raja Salomo birye Mesir ninye sik deiyoknye Firaun biti yupu nyabuk. Ara, nun mutuku nang ap, an mutuku nang ap, ‘Olana kumce, neika telebuk ubuka neika unamap’ tenen, yupu taliprik. Tonda, ‘Kanye deibuka teleb unamap’ tenen, Salomo birye, Firaun el kilmu dobuk. Dobukce el li Raja Daud taleamuk mutuku, Yerusalem mutuku boyayuk. Sikda amutuku ulamdika ani, el Salomo birye nyapdeibukba, el amu tam ninye, el ninye deiyoknye aik ap, Allah Yahweh el si eren aik ap, tonda Yerusalem dana-dana keil poka domik ning ap nirya ara, pil dolamik ani sirya dakik.

² Ura, Allah el si Yahweh, el si eren aik donmek bukni, min sirya kum dakmek talak ara, Israel ninye nirya arye, Allah el si erena ati, mutuku dup deice domik aik welebikce, kam ning obuka uku dongopna arye, Allah ati aning arelamik. Ara, Allah el si eren aik min kum domika ati, talye mutuku deice welebanmekce uku dalamik.

³ Salomo bira el li koproba Daud dam Allah el si Yahweh arye, ‘Wininamlyame,’ nyamukba Daud birye winilamuk touk, el mi Salomo babye winilamukce, ayupu talibuka dobolbalamuk bukni, tonok ning ton winilamuk. Ara, el babye Allah el si erena ati, mutuku deice welelamukce, kam ning arelbalamuk. Tonda, anyaka ara Allah si erena ati, nintong teleb ning uku dongolbalamuk. Ara, asum-asum nirya welebinuka arelamuk.

⁴ Atalak ara, amutuku ulamik nang ara, ‘Allah ati arenamap ak ara, pia mambul ati, Gibeon mutuku deice uk arenamabe,’ tenelamik. Ati ara, Raja Salomo babye, ‘Allah si erena ati, kam ning arelbinun’ tenen, Gibeon mutuku uk welebalamuk. Gibeon mutuku deice, pala keil yangapdeiamik deice arye, kam ning yupa weik nong nirya ara, seribu obuka uku dongolamukce, Allah ati arelbalamuk.

⁵ Winilamuka ati, tonok lukunyan noutam ara, Salomo lengdar mabukba Allah el si Yahweh arye, Gibeon mutuku deice lak kibukba, Salomo eibuk. Atalak ara, Allah arye, “An tenepmalam ning nyapminba, dipkoprob arepnamkine,” nyabuk.

⁶ Nyabukba, Salomo birye, “Na ni Allah ance na ni koproba Raja Daud biti bico tenyamlumce, teleb ubuka meliamlumba, an amu tam ulamuk. Na ni biti meliamluma deiyok ara, Daud biti el dam nyamlum yupu uk talibuka pil dolamuk. Tonok ning babye, kum bataklamlum. Tonda el talimuk ara, diksukumuk ulamukce, ance ‘Aning telebe,’ tenyamlum ninguk, elcuk winilamuk. Minop arye, na ni Daud teleb ubuka meliamluma atonun, wini talak babye, el mi nati tuba melinilyame. An meliamluma deice arye, na ni koproba Raja bulamak ning deice bulamuk touk, na babye aning deice bunirye, Israel ninye nirya talinune. Na ni koproba dolamuk piluk talibuka donune,” nyabuk.

⁷ Nyabukce ayupu ton dukdongobuka nyabuk. “Na ni Allah, an si Yahweh ulyame. Ance meliamsuluma deice arye, na ni koproba Israel ninye taleamuka atonun, na babye Israel nang talibuka sik Raja unune. Bukni, na nio, ance melipnilyame. Nara, mitikop aryuk sik deiyoknye kipse. Ati ara, ‘Yata wiribuka pil doptinye do?’ tenen, pia walwal upnile. Ati ara, ance melipnilyame.

⁸ Nara an amu tam pil donanye unune. Tonda ance wibuka deiamlumba ninye, kum nukmanto pia weik unyaka noutamak talinune.

⁹ Ati na ni ance kel bikna deiyok ning arepniminba, na talimak weknutopura, an wiamlum ninye ati, ‘Sik winibice ara, malye ning ara ani, teleb ning ara ani,’ tenebuka, nyaptibye. Anyapmakin ara, talye ati kum nyapne. Yatanye birye, teleb ubuka an wiamlum ninye talipturye deiyoknye kiptu do? Na dem aryuk kum winiptinye,” Salomo birye Allah ati nyabuk.

¹⁰ Salomo birye nyabuka morobuk ning ati, Allah arye ‘Pia teleb nyapmale,’ tenebuk.

¹¹ Utenebukce, Allah arye Salomo biti nyabuk. “Ance nati, talye ning kum moropmanilame. Winipmanto ara, ‘Naie ance melipniminba, kam pia uptinye. Tonda, aning-aning weik arye arepnutumba, weik bona utoto talinanye uptinye. Tonda, ance melipnutumba, na oldan nang nirya diptinge,’ nyabuka kum moropmanilame. Aning kum bukni, ance, ‘Kanye tenen ning diksukum ninguk arepnutumba, narye an wiamlum ninye ati, teleb ubuka sik yupu bokeiptinirye, sik Raja telebnye unamne’ tenen, moropmanilame.

¹² Ati ara, an moropmalam atonun arepnamkine. Narye weik kel bikna deiyok ning ap, tonda ‘Teleb ning ani, malye ning ani,’ tenen, kel bikna deiyok ning ap arepnamkine. Winipkiniba an pil donalama ara, pia teleb unamle. Aminyan talak unamak nang ara, an pil donalama atonun kum donamake. Tonda, minop talak ulamik nang babye, an atonun kum ulamik. Anda pia teleb ubuka pil donamlama atia.

¹³ Tonda, aninguk kum bukni, ance kum moropmanilam ning ara, aning babye arenamkine. Ara, aning-aning dekna weik ning arenamkine. Tonda, ninye nirya arye, anti si erenamkiyake. Winibicopura, an kam unamlam talak noutam ara, yuk Raja nang ton unamak bukni, an atonun teleb nang ara, pia ton kum unamake. Pia dipkoprob telebnye bira, an uka,” Allah arye, Salomo biti nyabuk.

¹⁴ Nyabukce ayupu ton nyabuk. “An ni koproba Daud winilamuk touk an babye, wininamlyame. Ara, narye, ‘Aning ara wininamlyame, aning ara ton kum wininamlyame,’ nyapdeiamse yupu uk talibuka pil dopnin yangalamuk touk, an babye wininamlyame. An babye, apiluk dominyopura, narye melipkineba, an kam una ati ouku weik tonap arepnamkine,” Allah arye, Salomo biti nyabuk.

¹⁵ Nyabukura, atalak aryuk Salomo bukukce, ‘E aning nirya ara, lengdar mapmanu deice arye, eipmanue,’ tenebukce kel bikuk. Kel bikukce tuba tamubuka Yerusalem mutuku biyuk. Biyukopura, Allah arye ‘Wininamlyame, aning ara kum wininamlyame,’ nyapdeiamukba, sekeiamik ning dobuka dongolamik marikna dam tikilbiyukce, Allah ati si erebuk. Ara, ‘Allah ap na ap teleb ubuka neika unanam’ tenen, teleb ning dobuka Allah ati arebuk. Tonda, Allah el si erena ati, kam ulamle ning obukabukce uku dabuk. Aning nirya akunum winibuka dakdongobukopura, el amu tam pil dolamik nang ati, weik kwalina yubuka arebuk.

Kilapu bitinye, Salomo dam yanuka asilyarikba, kel weik bikna deice arye, nyabuk yupu

¹⁶ Aminyan talak ara, yuk nang arye talye yoltalamik kilapu bitinye Salomo dam yanuka, el urasin dam tikilyarik.

¹⁷ Akilapu Salomo dam yarikce, tonok kil arye, yanuka nyabuk. “Na nio, anda nun deiyoknye ulyama. Nunda tonok aik unyam kilapu bukni, na ka kil bira aunmo bukni, nara sal mi deipmanue.

¹⁸ Na mi deipmase ara, like bitinye ton akunum ubukopura, na ka kil el sal mi ton deibuke. Mi deibuk bukni, anyaik ara yuk sal ap, yuk kilapu ap, ton kum unyabe. Nun diamuk ulamnume.

¹⁹ Aulamnumu bukni, tonok sum lukunya ara, nun mapu yuk-yuk iribuka mapmanumu bukni, akil mangkau arye el mi deice mabukba, akil el mi dipmoe.

²⁰ Winibukba, alukunyan aryuk ami dipmoe. Na mi ara tuba mapmanumu talak ara, akil arye adipmok mi ara, na moum dam deipmanurye, na mi kam unmo mi ara, ubula dopropmorye, el moum dam deipmoe.

²¹ Winipmoba na alukunyan bukuka na mi ‘Moum arepnun’ tenen, dilenmasirye, ‘Se na mi akunum dipmanile,’ tenepse. Utenepmase bukni, adipmok mi ara, na mi urasin atonun kume. Berekukce, dirina ubuk talak ara bita dipdesirye, ‘Ami ara na mi koprop kuma’ tenen, kel bikse,” nyabuk. Tonok kil arye, yanuka nyabuk.

²² Nyabukura, el ka kil birye nyabuk. “Kume, tuba kam unmal mi ara, na mi uka. Akunum dipmal mi ara, ance deiplum mi adano,” nyabuk. Nyabuk bukni, minop yanuka nyapmok kil arye nyabuk, “Kume, akunum dipmal mi ara, ance deipmom mi bukni, kam tuba unmal mi ara, na mi koprop uka,” nyabuk. Nyapdarikce, Raja Salomo, sik yupu bokolina weik deiyoknye dam ati, sik bitinye yu yupu deice arye, yep-yep nyaldanmarik. Lyap-lyap nyapdarikce, kwepdarik.

²³ Nyaldanmerikba, sik weik deiyoknye Salomo birye nyabuk. Ton kil arye, “Kumde, tuba kam unmal mi ara, na mi koprop uka. Akunum dipmal mi ara, na ka kil deipmo mi adano,” nyanmok. Nyanmok bukni, el ka kil birye, “Kume, akunum dipmal mi ara, ance deipmom mi, bukni, kam tuba unmal mi ara, na mi koprop anya,” nyaldanmarik.

²⁴ Ati ara, Raja Salomo birye el pil don nang ati, “Ninye on ya boyalulume,” nyabukura, boyayik.

²⁵ Nyabukba boyayikura, elce nyabuk. “Akam tuba unmal mi dobuka yarumunce ami, noutamak tikdeipnulyame. Winipminyeura, ton kil dana tam arepnulyame. Ton kil ton dana tam arepnulyame,” nyabuk.

²⁶ Nyabukba kekeprikopura, kam tuba unmok mi, el lin koproba arye ami ati, bico tenebukce, Raja Salomo biti nyabuk. “Se, Na nio ami ona kume. Bataksiminba, na ka kil biryuk dopropnamsile. El ti arepnulyame,” nyabuk. Nyabuk bukni, ton kil ara, “Kume daoploplyame! Nun bitinye kilapu ara, tonok kil bitibuk kum doptue. Ati ami noutam seklobuka, daopnyake,” nyabuk.

²⁷ Nyabuk buk, Raja Salomo birye tamubuka nyabuk. “Winira akunum laka upsile. Nyapmala ati ara, ami ona kume. Min yuma yupu nyapmanu kil ara ami el lin koprop ati ara, ami dobuka akil uk areplulume. El lin birye dipkoprob nyanmale adano,” nyabuk.

²⁸ Aning winibuk ning ati, ninye arye nyanmekba, Israel ninye kekebikce utenebik. ‘Se, nun Raja Salomo wininmal ning ara, elcuk kum tenebuk. Nun ni Allah arye, weik kel kina deiyok ning arebukba, adeice arye Salomo birye, ‘Dipkoprop teleb winina ara ani, diksukum ning ara ani,’ akunum tenebukce, akilapu bitinye ati, yupu teleb ubuka bokipmale,’ tenen, kel kibik. Winibuka tenelamikce, ‘Se nun Raja Salomo bira pia weik mambulnye,’ tenelamikce ilil ulamuk.