1 Raja-Raja 2 - Eipomek

Daud min kum dipmok talak ara, el mi Salomo biti, yupu sirya nyabuk yupu

¹ Raja Daud dipna dam akunum ubuka ati, el mi Salomo biti, ayupu nyapdeibuk.

² Na akunum wisi dase. Ati ara, tukwak nang nirya diplamak touk, na babye dipnamnarya. Ati ara, an moubuka tenepmince, mikip aryuk unalame. Mikip nang ulamak touk, an babye unamlyame.

³ Nun ni Allah, el si Yahweh arye, “Wininamlume, aning ara ton kum wininamlume,” nyapdeiamsuk yupu, moubuka talipmince unamlyame. Allah arye, Musa dam nyapdeiamukba, Musa birye, ayupu nirya sekuka arelamsuk ning atonun, ayupu nyasilye touk, aninguk wininamlyame. Winipmince, moubuka eipmince, diba tenebuka winipminyopura, an wininamlam ning nirya ara, teleb nonguk upra banamkile. Aning atonun, an binamlamak nirya ara, telebuk unamkile.

⁴ Aning nirya winipminyopura, aminyan talak Allah el si Yahweh arye, ‘Winipnamkine,’ nyalin yupu nyapdeiamnuk touk wininamle. Ara, Allah arye nyapnuke. “Ance deipminba, dadeipdanin banamak ninye ara, sik wininamak ning pia moubuka dipdemince, malye una kum aryuk, nati kum bataknikirye, sik kanye pum tam ap, sik nong ap, na deiceuk deibikcopura, narye pia kalikuka dinamsine. Ara, an yala nang kan-kan arye, ninye ton dopnirye, Israel ninye sik ninye deiyoknye Raja kina ati, wipdeipniba, Israel ninye pia talinamake. Na Allah arye nyapdeiamse touk, winibicopura, an deipkerekdop nang noutam arye, Raja pia upnamake.” Allah arye, Daud biti nyalamuk touk, Raja Daud birye, el mi Salomo biti laka nyabuk.

⁵ Nyabukce, ayupu ton nyabuk. “Zeruya el mi Yoab birye, nati malye winipnuk ning ara, Salomo an akunum bikamlume. Ara anye birye, Israel sik yin talena deiyok nang bitinye, ninye si Nera, el mi Abnar ap, tonda Yeter el mi Amasa ati, winibuk ning ara, an kele. Ara ninye oldan talak kume. Talye kanye bobuka, ulamupu talak noutam bukni, ninye oldan talak atonun Yoab birye, abitinye nang oplobuk. Obukura, sik ining biyuka ara, el deiatinga deice poubuk. Tonda, sik ining el sendal deice sakuka poubuk.

⁶ Aning ara, an weik kelenye binya arye, tinipdemince, ‘Teleb ning ani, malye ning ani’ tenen, tenepminyopura, el Yoab biti, wenen ning arepnamlame. Bukni, el Yoab bira, ‘Wisi daliba, el kul potong akunum tiklyopura, aminyan talak el kanye deibuka, urdem dipnamlarya,’ tenena kume. Aning ara kum bukni, anye el malye ubuk ning ara, an kum lupakipnamala anya arye, wenebuka opnamlyame,” Raja Daud birye, el mi Salomo biti nyabuk.

⁷ Nyabukce ayupu ton nyabuk. “Bukni, Gilead mutuku ulamuknye, el si Barsila, elce deiamuk mapu ara, teleb ubuka melinamlyame. Ara, an aik pum tam, neik meja dam bukmunce, an ap neika din dilulum ninye ap, anang ap din neika dinamake. Deiyok ara, an du koproba Absalom birye, ‘Na ni koproba opnamne,’ tenelamnuk talak, bai sakuka bikbik abuka binamse talak ara, Barsila el mapu arye, melilamnika ati, ance anang ton melinamlyame, nyapkine.

⁸ Tonda, Gera el mi Sime ton, an dam aulule. Anye bira, Benyamin yala nang bukni, elda mutuku si Bahurim mutuku ulamuk. Minop talak, narye Mahanaim mutuku bana ati, bisik noutam balamsibuk, anye Sime birye malye yupu weik, na deice nyapnuke. Ara, ‘Allah arye Daud biti, malye kipdeipnamle’ tenen, supnukce, malye yupu na deice nyapnuk. Nara, ‘Yordan mek koubuka otam binun’ tenen, Yordan mekin dam bise talak ara, anye Sime ton yayukba, narye elti, nyapse. ‘Allah Yahweh, el si deice arye nyapkine. Nara, parang ya arye kum opnamkine,’ nyapse.

⁹ Nyapse bukni, Salomo anda, anye Sime biti, ‘Dauplye, elda malye kum ubuk,’ tenena meme. El kul potong akunum fabuk bukni, ‘El talye kanye bobuka dipnamlarya,’ tenena kume. El malye kipdeiamnuka ati ara, el wenena ati, opminba el ining bilyopura, dipnamle. Salomo anda weik kelnye ulyama anya arye, ance tenepnamlam touk winipnalame,” Raja Daud birye, el mi Salomo biti nyabuk.

¹⁰ Raja Daud birye ayupu akunum nyabukce, daulamuka ani, aminyan talak dibukba, Daud el taleamuk mutuku, Yerusalem mutuku uk bobinuka, tuku palibikce, el nong weibik.

¹¹ Raja Daud bira, Israel nang taleamuk keting tamun ara, empat puluh (40) keting tamun deice taleamuk. Ara, Hebron mutuku ara, tekbarye keting tamun deice arye taleamuk. Tonda, Yerusalem mutuku ara, keting tamun tiga puluh tiga (33) deice arye, Israel ninye taleamuk.

¹² Salomo bira, el li koproba, Daud ninye deiyoknye Raja ulamukce, weik nang bun ning deice bulamuk touk, el mi Salomo babye, amutuku nirya mikip arye taleamukba, amutuku nang nirya, el amu tamuk ulamik.

Adonia dibuk yupu

¹³ Tonok sum Adonia bira, Salomo el lin Batsyeba dam biyuk. Biyukopura, Batsyeba birye Adonia biti asipdeyuk. “An ayanmalama ara, kanye teleb deice arye yalam do? Akumopura, ‘Opdanamabʼ tenen, yalam do, kum do? nyabuka asipdeyuk. Asipdeyuk ati,” Adonia birye tamubuka nyabuk. “Kume, dipkoprob teleb kanye aryuk yanmane,” nyabuk.

¹⁴ Nyabukce, tonap tabakuka nyabuk. “Na moron ning tonok ton patapmanila ati, aning ara laka nyapkitinye do? Nara, patanmanil ati yanmane nongo,” nyabuk. Nyabukura, Batsyeba birye, “Aning ara, yate ning patapmakil do?” nyabuka asipdeyuk.

¹⁵ Nyabukura, Adonia elce tamubuka nyabuk, “Nongo, anda akunum min talak arye bikamlume. Dipkoprop ninye deiyoknye, Raja kina ati ara, natia. ‘Na akuk erepdeipnamniake,’ tenyamubu. Aning ara, sik Israel mutuku noutam unyak ninye nirya arye, “Akunuma, eluk unamle,’ tenyamik. Bukni, dipkoprob aning ara, akunum tamupmale. Wini talak ara, na weit koproba Salomo, eluk ninye deiyoknye Raja tikuke. Aning deiyok ara, Allah Yahweh arye akunum tenelamuk touk, wipdeiamnuke.

¹⁶ Ati wini talak ara, narye tonok ning ton moropnukine. Amoropnukin ning ara, na nin ance ton, ‘Kume,’ kum nyapnunilyame,” nyabuk. Nyabuk ati, “Baitsyeba birye, “Adonia ance yate ning moropnunilam do?” nyabuk.

¹⁷ Asipdeyuk ati, Adonia birye tamubuka nyabuk. “Nongo na moropman ning ara, ninye deiyoknye Raja Salomo birye, an yupu kekepkilyopura, anti, ‘Kume,’ kum nyapkutue. Ati, ance elti, moroptumba, elce, ‘Telebe,’ tenepnutuba, Abisag boyanuka arepnutuba, akil na dopnamne. Ara, Sunem mutuku wel kil atia. Narye tenepman ning ara, na nin ance Salomo biti binuka moropminyopura, ‘Kume,’ kum nyapnamkile,” nyabuk.

¹⁸ Adonia birye, ayupu nyabuk ati, Batsyeba birye, “Yo,telebe. Ura, narye Adonia an melina ati, an tenepmalam ning ara, Raja Salomo el dam nyapdenamkine,” nyabuk.

¹⁹ Nyabukopura, Batsyeba aning kekebukce, Adonia nyapmok ning ati, Raja dam biyuk. Biyukopura, Raja Salomo minop tikukabukce, kutam tuku dipdongobuka, el lin yanganmok ati, si erebuka kibuk. Kibukopura, Salomo adiparyuk, el buknamok ning, el si takta deice bulbiyuk. Winibukopura, Salomo birye nyabukba, el pil melin nang arye, el lin buknamok ning ati, el si takta dobuka, el sirik tam delilyayik ura, asukum bukuk.

²⁰ El lin Batsyeba akunum bukukopura, nyabuk, “Na an nin birye, ‘Mitik yupu ton an ap nyapnimirye, moropnamakinʼ tenen, patanmanila ati, yanmane,” nyabuk. “Na nin birye tenepmana ara, ance na nyapnun yupu ati, ‘Kume,’ nyana ara, pia meme tenepmane,” nyabuk. “Ati nongo, yata tenepmalam do?” nyabuka, Salomo birye asipdeyuk. “Narye, ‘Kume,’ kum nyapnamkine,” nyabuk.

²¹ Nyabukba, el lin Batsyeba birye, tamubuka nyabuk, “Ance an du Adonia biti,’ Yo ur dopdoplule,’ nyapminba, Adonia birye, Sunem mutuku kil, el si Abisak dopnamle,” nyabuk.

²² Nyabukba, Salomo birye, “Yata ati na nin ance ayupu ara, na dam yanuka moropnilam do?” nyabuka, Salomo birye asipdeyuk. “Na nin, aning ara, dipkoprob ance na weik bulamak ning, tahkta kerajaan ap, na talinun ning nirya ara, morobuka Adonia dobuka arena ati, yanuka moropmanilame,” nyabuk. Adonia bira, dipkoprob na du kuma do? Kume, na du ulula ati, akil moropmanilama deice arye, na talinun mutuku nirya ansinibuka, akunum moropmanilame. Tonda, imam Abyatar ap, Zeruya el mi Yoab ap, sik anang ara, Adonia tam kiprik nang ududake. Sik melina atibuk moropmanilame,” nyabuk.

²³ Ayupu nirya akunum nyabukopura, Salomo birye nyabuk. “Dipkoprop Allah Yahweh, el si deice arye nyapne. Ara, na nyapnun yupu dipkoprob kum uplyopura, Allah arye na nyapnukin atonun, ikin ning ara, na nong deiceuk dadeipnamnile. Ara, Adonia birye nati, moropmanil ning ara, tamubuka el deice ikin ning deipnirye, wenebuka opniba, diplyopura, Allah Yahweh arye teleb tenepnamnile.

²⁴ Allah Yahweh dipkoprob pia aulye touk, na Salomo birye, ayupu dipkoprob nyapkine. Allah Yahweh arye, akunum nati, ‘Israel ninye nirya talena ati, Salomo el li Daud, el bulamuk ning, el si tahkta deice buknamleʼ tenen, kintinipnuke. Tonda, Allah arye nati, ‘Elce aning wininamle. Elce deipliba, dadeipdanin banamak ninye ara, weik upliba, mikip unamake,’ nyapdeiamuk ning ara, anyapdeiamik atonun, atalak winipnule. Ati ara, ninye deiyok kibuka talena ati ara, na deice ap, narye deiamniba, dadeipdanin banamak nang deice ara, akunum arepsuke. Ati ara, Allah el si deice arye, na Salomo birye nyapne. “Adonia bira, arup aryuk wenebuka opniba, dipnule,” Salomo birye nyabuk.

²⁵ Anyabuka ati, Raja Salomo birye, Benaya biti, “Aning ara, winipnulyame,” nyapdeibukba, Benaya birye, Adonia binuka obukba, dibuk.

Imam Abyatar el pil dona batakik ning ap, Yoab dibuk ning ap ati, nyabuk yupu

²⁶ Aning nirya akunum winibukopura, ninye deiyoknye, Raja Salomo birye, imam Abyatar biti nyabuk. “Abyatar an deiamkik mutuku Anatot, tamubuka binulyame. Arup ara, an babye opkitinye sum bukni, batakina ati, nyapkine. Deiyok ara, an ap, na ni koproba ap, anggun neika tuba udurume. Neika ulamdumce, na ni ikin ning yanaba, imun kanye bobuka, ikin ulamuk talak ara, an babye kanye imun ulamkuke. Tonda, Allah elce nyapdeiamuk yupu sekuka deiamik yo marikna, Peti Perjanjian yo pum, mambul weik ning kalekina deiyoknye ulalum atia,” nyabuk.

²⁷ Raja Salomo birye, Abyatar el imam pil dolamuk ning ara, “Ila tonap apil pia kum donamlame,” nyabuka, apil dona ara, yupu sekuk. Ara, min talak Allah elce, ‘Imam Eli birye deibukba, dadeipdanin banamak nang, Silo mutuku unamak nang ara, sik imam pil dona ara, kum daneipnamne,’ nyapdeiamuk touk, Salomo birye, apil dobuk deice arye, Allah anyapdeiamuk ning ara, nong laka kibuk.

²⁸ Raja Salomo birye, aning winibukopura, yuk nang laka nyalbiyikba, Yoab birye awinipmuk ning nirya akunum kekebuk. Kekebukce, ‘Se, Salomo birye, na ton opnamanilʼ tenen, Yoab el ilil pia weik ubuk. Deiyok ara, Yoab birye, ‘Elda Adonia, Raja kipsutue,’ tenebukce, el tamnye kipmoka ati, ilil pia weik ubuk. Minop talak ara, Adonia tamnye ulamuk bukni, Yoab elda, Absalom birye, el li koproba ati, ‘Malye kipnune,’ tenebuk talak ara, Yoab bira Absalom tamnye kum ulamuk. Bukni, Adonia el tamnye kibuka ati, Yoab bikbik abuka biyukce, Allah Yahweh el si eren aik dam, Allah arena ati, uku dongolamik ning, aning deice tam, sapi basam kisok deice yang atonun ning, deiamikak, aning binuka talibuk. Ara, ‘Na malye upse ning, namin kipnilirye, min kum opnamnilʼ tenen, binuka talibuk.

²⁹ Awinibuk ning ara, ninye deiyoknye Raja Salomo, el dam akunum laka nyabikba kekebuk. ‘Yoab bira, Allah arena ati, uku dongonyakak, el si mesba deice yang atonun ning talilbinmaue,’ nyabuka, laka nyabikba, Salomo ayupu akunum kekebukopura, Raja Salomo birye, Benaya biti nyabuk. “Yoab unmalak ara, bimince, wenebuka olbinulyame,” nyabuk.

³⁰ Nyabukba, Benaya minopce, Allah Yahweh el si eren aik dam biyukce, Yoab biti nyabuk, “Ninye deiyoknye Raja Salomo birye, ‘Anda asukum ara, batakuka yanulyame,’ nyapmakile,” nyabuk. Nyabukba, Yoab birye, “Kume, nara asukum dipnamne,” nyabuk. Nyabukba, Benaya kekebukce, adiparyuk tamubuka, Raja Salomo dam yayukce, Yoab birye winibuk ning ap, nyabuk ning ap ati, laka nyalbiyuk.

³¹ Ayupu laka nyabukba, Salomo aning nirya, akunum kekebukopura, nyabuk. “Yo, aning ati ara, tamubuka bimince, an dam, ‘Winipnamlyame,’ nyapdeipmakil touk winipnulyame. Ara, an adiparyuk, Yoab unmalak asukum arye opmince, el nong bobinuka, weipnulyame. Winipminya deice arye, na ap, na ni birye deipsuk nang, na kwitcapu ap, nunce deilinamap ninye nirya ap, nun deice ikin ning deipsiliba, kum dopropnamabe. Ara, talye ning ati kum nyapne. Deiyok ara, ‘Minop talak, anye Yoab birye, malye una kumnye omuka ati, anye el ining deice arye, ikin ning nun dobipyakʼ tenen ati, nyapne.” Raja Salomo birye, Benaya biti nyabuk.

³² Nyabukce, ayupu ton dukdongobuka nyabuk. “Anda Yoab opminya deice arye, Allah Yahweh arye, Yoab malye ubuk ning ara, kwang dakna ati, aning dobuka, Yoab el nong deiceuk tamubuka deipnamle. Allah Yahweh arye, Yoab el yuk wenepnamle ara, na ni koproba Daud, el min kel bikmokbuk, ninye bitinye nang, malye kum upmarikbuk, Yoab birye anang bitinye omuka atia. Ara, Abnar Israel mutuku yin talen nang, sik yupa ulamika deiyok kiamuknye ap, tonda Yehuda mutuku ulamik yin talen nang, sik yupa nirya ati, deiyok kiamuknye Amza ap, Yoab birye omuka atia. Sik abitinye nang ara, malye una kum buk omuk. Bukni, Yoab el tonok ara, malye weik ulamukbuk, sik malye kum wamdirikce, telebuk ulamdik nang omuke.

³³ Yoab birye yin talen ati, ninye deiyok nang, bitinye omuka ati, amalye ning kwang dakna ati dengna ara, na tam nang deice ikin ning yanganamsutue. Bukni, wini talak ara, ance anye, Yoab biti opminyopura, Yoab ap, elce deipliba, dadeipdanin banamak nang ap, sik deiceuk, ikin ning yaliba, pia dolonamake. Bukni, Yoab opminyopura, na ni koproba Daud elce deipsukba, dadeipdanin banamap nang arye, ninye deiyok kibuka talinamap ninye ap, mutuku ap ara, Allah arye teleb kilinamsile. Winipsiliba, nun wininamap ning nirya ara, weik upnin banamsile. Tonda, nun oldana ati, yu nang arye, nun dam kum yanganamsiyake.” Raja Salomo birye, Benaya biti nyabuk.

³⁴ Nyabuka ati, Benaya bira, Allah Yahweh el si erena ati, domik aik dam biyukce, Yoab biti binuka oplobuk. Obukopura, Yoab el nong dobuka, bai tam bobiyukce, amutuku noutam Yoab birye, el mining dolamuk aik dam binuka, tuku lukik.

³⁵ Aning akunum winibukopura, ninye deiyoknye Raja Salomo birye, Yoab el punupnamuka ati, Yoyada birye deiamuknye, el si Benaya bira, ‘Israel ninye, sik yin talen nang, sik deiyoknye unamleʼ tenen, Benaya erepdeibik. Tonda, imam pil dolamuknye, Abyatar el punupnamuka ati, anye bira, imam Zadok wipdeibuk.

Simei dibuk yupu

³⁶ Aning akunum winibikopura, ninye deiyoknye Raja Salomo birye, ninye si Simei biti, “Yanulyame,” nyabuka yukubukba, yayukopura, nyabuk. “Simei an asik ara, Yerusalem asik noutamuk dopmince, amutuku uk unamlyame. Amutuku arye batakuka, yuk mutuku ton, kum banamlyame.

³⁷ Aning ara, talye kum nyapkine. Anda moubuka tenipnamlyame. An kanye aryuk tinipmince, ‘Kume dabinuneʼ tenen, pi dobuka Kidron mek mitik tam bokuka, biyuk mek koubuka biminyopura, anda pola opnamkiyake. Tonda, aning ara, an bidamnye arye opdanalam ati, an ining ara, an nong deiceuk upnamkile.

³⁸ Nyabukopura, Simei birye, ninye deiyoknye Raja biti nyabuk. “Yo, na deiyoknye, weik si erenanye, dipkoprob anyapmanilam atonun winipnamne. Ance aning nyapdeipmanilam ning ara, ‘Malye,’ kum nyaptinye. Teleb uka nyapmanilame,” nyabuk. Nyabukopura, Simei bira ouku weik tonun, Yerusalem mutuku noutamuk ulamuk.

³⁹ Winibuka daulamuka ani, keting tamun winilye, akunum mabukopura, Simei birye, ‘Na aik pil melibuka donamniyak,’ tenen, yo bok deice arye, dekamuk nang bitinye ara, anang bitinye ton, bikbik abuka, Kat mutuku birik. Ara ninye si Maakha, el mi ninye deiyoknye, Raja Akhis, el dam birik. Awiniprik ning ati, Simei dam laka nyabikba, ayupu akunum kekebukopura, ‘E, anang bolbinune,’ tenebuk.

⁴⁰ Utenebukopura, Simei adiparyuk, Keledai basam balye deice bukuka, ban ning, el si pelana kintinibukopura, aKeledai basam balye deice deibukce, aning deice bukabukce, ninye deiyoknye Raja Akhis, Kat mutuku ulamukak biyuk. Ara, el melin nang bitinye ati, ‘Anang eipnirye, tamubuka boyanamneʼ tenen, biyuk. Winibukce, anang akunum eibukopura, tamubuka boyayuk.

⁴¹ Atalak ara, Simei birye winipmok ning nirya ara, yuk ninye arye, laka nyabikba, Salomo birye kekebuk.

⁴² Kekebukopura, Salomo birye, Simei yukubukba, el dam yayukopura, ayupu nyabuk. “Min talak ara, narye anti, ‘Allah el si deice arye, akunum nyamnulume. Ara, ‘Anda Yerusalem mutuku noutam arye batakuka, yuk mutuku kum binamlame,’ nyamkise. Tonda, narye, an moubuka tenena ati, akunum nyamkise. ‘Winipmanto ara, Yerusalem mutuku ance batakuka biminyopura, an adiparyuk dipnamlame,’ nyamkise. Ati ara, ance, ‘Allah si deice arye, dipkoprob anyapmanilam touk, aning ara winipnamne,’ nyamnulume. Tonda, ‘Dipkoprop narye aning ara, kum bataknamne. Aning ara, bita nyapnilama ati, aning winipnamne nyamnulum ning aran do?

⁴³ Bukni, yate deiyok ati, ance, ‘Allah Yahweh si deice arye nyapne. Aning ara, dipkoprob winipnamne. Tonda, an Raja arye, nyapdeipmanilam yupu ara, aninguk winipnamne nyabuka,’ nyalin yupu deice arye, nyapdeiamnulum bukni, wini talak ara, yata ati ayupu yanipmalam do?

⁴⁴ An dipkoprob akunum biklume. Na ni, el deice malye kipdeiamlum ning nirya ara, an kanye pum tam, tuba tenilyame. Ati, Allah Yahweh arye, an malye wamlum ning tamubuka, an dam ikin ning deipnamkile.

⁴⁵ Bukni, Allah el teleb ning ara, na Raja Salomo dam arepniliba, na pia telebuk unamne. Winipnirye, na ni elce taleamuk mutuku ap, el taleamuk ninye ap ara, Allah el mikip weik deice arye, melibuka talipliba, pia telebuk unamle. Allah Yahweh el damuk pia aupyeba, elcuk pia kalikinamsile.

⁴⁶ Ayupu nirya akunum nyabukopura, ninye deiyoknye Raja Salomo birye, Benaya biti, “Aning ara, winipnulyame,” nyabukba, Yoyada el mi Benaya, adiparyuk biyukce, Simei obukba dibuk. Atalak noutam nirya ara, Salomo elce amutuku noutam nirya talibuka telebuk ulamuk.