1 Raja-Raja 1 - Eipomek

Ninye deiyoknye Raja Daud, wisi dayuk talak winibik ning ati, sekik yupu

¹ Atalak ara, Israel ninye, sik deiyoknye Raja Daud bira, akunum wisi danamuk. Wisi dayukce, baribuka bulamuka ati, el melin nang arye, ‘Bupu kiptuba, teleb arye maptue,’ tenebikce, el man amsuna selimut weik ning arye, tokdeiamikba, anyamsuna deice malamuk. Malamuk bukni, el nong ara, arukna pia ulamuk.

² Tuba aruklamuk ati, Raja Daud el pil dona ati melin nang arye nyabik, “Nun deiyoknye Raja, teleb ning ara, ‘An ap neika maprumunce, buppu pirinamkilʼ tenen, wel kil ninye dona kum kil ton, ebuka boyanamkiabe. Boyakipyopura, elce Raja anti kalikuka, melinamkil deice arye, nun deiyoknye Raja, an mapnuminye talak ara, el akil ap, maprumunyeba, an nong ara, buppu unamkile.

³ Nyabuka sik anang arye, Israel mutuku noutam nirya, kabunye kil urasin pia teleb kil ati elbiyik. Epra banmeka ani, Sunem mutuku kam kil, urasin pia teleb kil tonok, el si Abisag eibik. Eibikopura, Abisag adiparyuk boyanuka, Israel ninye deiyoknye Raja Daud el dam boyayik.

⁴ Winibikopura, Abisag birye, Raja Daud el melina ap, el kalekina ap ulamuk. Bukni, atalak nirya ara, Raja Daud birye, akam kil ton kum yolamuk.

Ninye tonok, el si Adonia birye, ‘Ninye deiyoknye Raja ara, na kiptinyeʼ tenen, nyabuk yupu

⁵ Min ara, Raja Daud birye, el mi Absalom akunum deibukura, aminyan ara, sal mi ton deibuk. Ati, Raja Daud aminyan mi, el si Adonia, el anye bira, Absalom el weit koproba ulamuk. Anye el lin si ara Hagit. Adonia elda, akunum nemuka anya arye, el bidamnye arye, maknya kitinipdayukce, “Narye, Israel ninye nirya talipnirye, sik weik deiyoknye unamnarya,” nyabukce, erepdayuk. ‘Nara ninye deiyoknye Raja ara, nauk kipnamne,’ tenelamuk. Utelemuka ati ara, mal olalban talak bukuka ban ning, el si kereta kuda ap, kuda basam deice bukuka, ban yin talen nang ap, tonda, Adonia el melina ati, yin talina lima puluh (50) nang nirya ap, kintinip deibuk. Anyapce, mikip arye aning nirya ara, wirik-wirik ananye ulamuk.

⁶ El li koproba Raja Daud, el mi Adonia birye, malye winipmana babye, el li birye ton, pia kum wenelamuk. Tonda, Raja Daud birye, Adonia biti, “Anda yata deiyok ning ati, aning winipnalam do?” nyabuka, wenena kumce, kum asilelamuk. Adonia birye, talye el tenepdone touk winilamuk. Tonda, Adonia bira, urasin pia telebnye ulamuk. El du bira, Absalom ulamuk.

⁷ Adaonia daulamuka ani, anoutam talak ara, Zeruya el mi Yoab ap, imam Abyatar ap, sik dam binuka, yupu talipmek. Yupu talipmeka ani, Yoab ap, imam Abyatar ap, sikce el Adonia tenelamuk ning ara, sik babye, ‘Aning ara pia telebe. Raja kipnamle, tenepmarik ning ara, nun ton melipnaname. El tam kipnaname,’ teneprik.

⁸ Sik bitinye arye, ‘Aning ara telebe,’ teneprik bukni, yuk nang ara, ‘Aning ara teleb,’ kum tenelamik. Ara, imam Zadok ap, Yoyada el mi Benaya ap, nabi Natan ap, yuk nang ton Simei ap, Rei ap, tonda, Raja Daud el melibuka, ban yin talen nang ap ara, Adonia el tam kum kibik.

⁹ Winibuka daulamika ani, tonok sum ara, mutuku si, Zohelet-Gel nyalamik mutuku dam ara, En-Rogel mek pu dam, Adonia birye, domba basam ap, sapi basam yim ap, sapi basam mi bol teleb ubuka nenmek ning nirya ara, obuka kintinip deibuk. Akunum kintinibukura, Raja Daud birye, deiamuk nang, el kwit capu yuk nang nirya ati, “Anggun ton akwalina dilyalulume,” nyabuka yukubuk. Tonda, Daud el aik koproba pil don nang, sik Yehuda mutuku deiyok kibuka taleamik nang ap, “Akwalin dilyalulume,” nyabuka, yukubukba, sik nirya biyik.

¹⁰ Sik anang nirya biyik bukni, Adonia el du Salomo ap, nabi Natan ap, tonda Benaya ap, tonye bira Raja Daud, ‘Yu nang arye, nun Raja obicakʼ tenen, Daud el kalikuka melinanye koproba ap ara, kum yukubuk.

Salomo ninye deiyoknye, Raja erepdeibik ning ati, nyabuk yupu

¹¹ Weik nang ton kum yukubuka ati, nabi Natan minopce, Salomo el lin Basyeba dam biyukce epdarik. Epdarikopura, nabi Natan birye, Batsyeba biti nyabuk, “Ninye deiyok kil anda, Salomo el lin ulyame. Anda ayupu ton min kum kekeplum do? Ara, Hagit el mi Adonia birye, ‘Ninye deiyoknye Raja kipnamne,’ tenen, kintinipmokba, ninye weik tonun arye, akunum erepdeibik. Tonda, ‘Raja kipnamle,’ nyanmak yupu ara, an ton kum kekepmalam do? Aning atonun, nun Raja Daud elce ayupu nirya ara, kum bikmale,” nyabuka, nabi Natan birye, Batsyeba biti, binuka asipdeyuk.

¹² Sisinanye Salomo ap, anda el lin Baitsyeba ap, ‘Nun lyepdanuname,’ teneptumopura, na nyapnusin touk winipnamrume.

¹³ Betsyeba, anda minopce, Raja Daud dam bimince, ayupu nyapnulyame. “Na deiyoknye Raja, nara an amu tamuk unirye, an piluk melikunune. Min talak ara, ance nati, anyalin yupu deice arye, nyapdeipnulum do, kum do? Ara, na Raja Daud pununa ati, deiyok kinanye bira, an mi Salomo bak, Israel ninye sik deiyoknye Raja kiplirye, ninye deiyok nang bunyakak ara, elce aning dobuka, asukum buklirye, Israel ninye talinamlule,’ nyabuka akunum nyamnulum atia. Ati ara, yata deiyok ati yuknye ninye si Adonia, elak Raja akunum kipdeipmalam do?” nyabuka, asipdenulyame. “Ara, an Batsyeba birye, Raja Daud, el dam binuka, asipdenulyame,” nyabuk.

¹⁴ Tonda, nabi Natan birye, ayupu ton dukdongobuka nyabuk, “Ninye deiyoknye Raja Daud dam binuka, anyapmakin yupu nyapminye talak aryuk, na babye aminyan talak Raja Daud, el dam yanirye, an nyapmaminye yupu ati, ‘Ara dib nyanmkila,’ nyabuka, narye ton tabakdongopnamne,” nyabuk.

¹⁵ Nyabukba, aminyan talak Batsyeba adiparyuk, Raja Daud, el man aik noutam wekelbiyuk. Atalak ara, Raja Daud bira akunum pia wisi danamuk. Tonda, winyamuk talak ara, Sunem mutuku kam kil, el si Abisag, elce Daud melilamuk.

¹⁶ Atalak ara, Batsyeba birye, Raja Daud el si erebuka kina ati, el dam binuka kutam tuku dipdongobuk. Winibukba, Raja Daud elce Batsyeba biti asipdeyuk, “Anda, ‘Se, na deiyoknye Daud birye, yata wiripnutueʼ tenen, patanmakil ati, na dam yanmalam do?” nyabuk.

¹⁷ Nyabuka asipdeyuk ati, Batsyeba birye tamubuka nyabuk, “Na deiyoknye Raja, nara, an amu tamuk unirye, an piluk melikunune. Na nio, anda Raja Daud, ance si erelyam Allah Yahweh, el si deice arye, nati, min talak ara, ance nati, anyalin yupu arye akunum nyapdeiamnulume. Ara, na Raja Daud pununa ati, deiyok kinanye bira, an mi Salomo bak, ‘Israel ninye sik deiyoknye Raja kiplirye, ninye deiyoknye bunyakak babye, elce aning dobuka asukum buklirye, Israel ninye talinamle,’ nyabuka, akunum nyamnulume.

¹⁸ Bukni atalak ara, ninye deiyoknye Raja, an kum bikmalum buk, an mi bitinye anye Adonia bira, ‘Ninye deiyoknye Raja unamneʼ tenen, el bidamnye erepdeipdanmoba, ninye weik arye, el tam kipmaka ati, elda Raja akunum unamle.

¹⁹ Tonda, Adonia birye, sapi basam yim ap, sapi basam mi bol teleb ubuka nebuk ning ap, domba basam ap nirya, Allah si erena ati arepmale. Winipmalce, an Raja arye deiamlum mapu nirya ap, imam Abyatar ap, tonda Raja Daud, an yin talen nang, sik deiyoknye Panglima Yoab babye, akwalina dina ati, yukupmauba yanmangue. Bukni, an amu tam ulinye, an mi Salomo bira, kum yukupmoa ati, kum binmoe,” Batsyeba birye Daud biti nyabuk.

²⁰ Nyabukce, aning ton dukdongobuka nyabuk. “Nun deiyoknye Raja, anda pia dipkopropnye, Israel mutuku noutam unyak ninye nirya ara, nun deiyoknye Raja Daud, an pununanye biti, ‘Daud birye, yatanye Raja tikeipsiliba, aminyan talak nun talipnamsil do? Yata nang arye, Raja Daud el, bululak binuka buklirye, nun talipnamsil do?’ tenen, dikinyake.

²¹ Ance, ‘Anye wipdeipsine. El anye birye, nati punuplirye, anggun Israel ninye talipnamsile,’ nyabuka, laka kum nyapdeipsiminyopura, aminyan talak nun deiyoknye Raja Daud, ance ayupu lipsisikuka kum nyapmaminye talak aryuk, dipminyopura, na ap, na mi Salomo ap, nunti, Adonia birye, ‘Sikda malye yupu nyamnirika ati, malye updike nyanamsile.” Batsyeba birye, Raja Daud biti nyabuk.

²² Batsyeba birye, Raja Daud dam binmokce, ayupu nirya nyanmok talak aryuk, nabi Natan babye, ninye deiyoknye Raja, el aik pum yayuk.

²³ Ayayuk ning ara, ninye yuk nang arye, Raja Daud el dam biyikce, “Nabi Natan bira, akunum yanmale,” nyabik. Nyabikura, Batsyeba minopce aik dam biyuk. Bai tam biyukura, nabi Natan punubuka, Raja Daud dam biyuk. Wekelbiyukopura, Daud el si erebuka kina ati, Natan el kutam tuku dipdongobuka, kisok kanupdongobukce, Raja dam bukuk.

²⁴ Winibukce, nabi Natan arye, Raja Daud biti asipdeyuk. “Na ni deiyoknye Raja Daud, anda pia dipkopropnye ulyame. Ance, Adonia biti, ‘Elda na Israel ninye deiyoknye unun ning ara, elce punupnilirye, ninye deiyok Raja kina ati, tiknamle. Elce na Israel ninye deiyok kina ati, na bununak ara, elak abuknamle,’ nyapdeamlum do, kum do?” nyabuka asipdeyuk.

²⁵ Asipdeyukce, tonap nyabuk. “Asipdenmakina ara, talye ati kume. Asum ara, Adonia elce, Allah si erena ati, domba basam ap, sapi basam yim ap, sapi mi teleb nebuk ning ap, weik tonun obuka arenmalce, si erenmale. Winipmalce, Adonia elce el kwitcapu, ance deiplum nang nirya ap, tonda, Raja an yin talen nang, sik deiyoknye Panglima Yoab ap, imam Abyatar ap ati, yukupmaue. Yukupmalba, wini talak sik Adonia ap, neika weik yuna kwalepmak ning dinmak talak ara, elti, si erenmakce nyanmake. Ara, ‘Raja Adonia anda pia talepnamsilama ati, anda kam pia unamlame,’ nyanmake.

²⁶ Bukni na nio, Adonia birye, na ton kum yukupmanue. Tonda, imam Zadok ap, Benaya ap, an amu tam ulinye, an mi Salomo ap, ton kum yukupmasue.

²⁷ Ati, asipdekine na nio. Aning nirya ara, dipkoprob na deiyoknye Raja, ance, ‘Adonia birye na punupnilirye, Raja unamleʼ tenen, ati nyaplumba, apil nirya donmal do? Tonda, an amu tam pil don nang nirya ati, ‘Na pununa ara, anye biryuk Raja unamle,’ nyabuka, laka kum nyapsulumbuk, aning wininmal do? El kanye aryuk, aning nirya wininmal do?” nyabuka asipdeyuk.

Daud birye, ‘Na mi Salomo bira, Israel sik ninye deiyoknye Raja kipnamle’ tenen, ati, wipdeibuk yupu

²⁸ Israel ninye, sik ninye deiyoknye Raja Daud birye, ‘Batsyeba yanamal’ tenen, “Akil ati yukuplulume,” nyabukopura, ninye biyikce yukubikba, Batsyeba kekebukce tamubuka Daud dam yanuka el urasin dam tikuk.

²⁹ Akil yanuka tikuk talak ara, aninye deiyoknye Raja Daud birye nyabuk. “Dipkoprop na mi Salomo birye Israel ninye sik deiyoknye Raja unamle. Anyapmana ara, ‘Pia dipkoprob kipnamle, tenenamlam’ tenen, Allah el si Yahweh, pia Kam Una Deiyoknye, el si deice arye nyapne. Na ikin ulamnuk talak nirya ara, Yahweh arye, na kanye imun ulamnuk noutam nirya, meilyamnuk deice arye lyepropnuke.”

³⁰ “Na kilo, anti mince, ‘Winipnamne,’ nyabuka nyalin yupu nyapkise touk, arup arye dipkoprob winipnamne. Ara, ‘Na dipnyopura, na pununa ati, an deiplum mi Salomo, elcuk Israel ninye sik ninye deiyoknye Raja kipnamle. Raja bulamak ning deice bulamsirye, ninye deiyoknye ulamse touk, wini talak ara, Salomo birye unamle. Winiplirye na punupnamle atia.’ Aning nyapkise ara, talye kum nyapse. Israel ninye ati, ‘Sik ikin kanye bobicak’ tenen, melibuka pia kalikilul Allah, el si Yahweh, el si deice arye, akunum nyapkisa ati, anyapmakin touk dipkoprob nong kipnamle,” Daud birye Batsyeba biti nyabuk.

³¹ Nyabukopura, Batsyeba birye Raja Daud si erena ati, kutam tuku diprongobuka, tukwak kanupdongobukce nyabuk. “Se, Raja Daud, anda na deiyoknye ulyame. Na patanilye ara nyapnukine. Ara, ‘Anda kam tuba pia unalam’ tenen, patanulule,” nyabuk.

³² Nyabukba, Daud birye tamubuka nyabuk. “Allah el si eren aik pum tam pil dolinye el si Zadok ap, tonda Allah el yupu lak nyana deiyoknye Natan ap, tonda Yoyada el mi Benaya ap ati yukuplulume. Sik dam binuka nyapdeiplulume,” nyapdeibuk. Nyabukba, ninye arye nyalbiyikopura, anang nirya Daud dam yayik.

³³ Sik anang nirya, el aik yayikopura, sik anang melina ati, el amu tam pil don nang ton kintinip deibukce, Daud birye ayupu nyabuk. “Anggun nirya na mi Salomo dam bimunyeba, na keledai basam balye deice bukliba, Gihon mutuku bobinamlume.

³⁴ Gihon mutuku bimunyopura, Allah el aik pum tam pil donanye Zadok ap, Allah el yupu lak nyananye Natan ap arye, Salomo bira Israel ninye sik ninye deiyoknye kina ati, minyak mek kwebuka el kisok deice likeipnamake. Winibuka akunum erepdeipdicopopura, sik yuk nang arye pong-pong ana ning el si terompet pong-pong nyanamake. Winibikiba, sik nirya arye, ‘Nun Raja Salomo bira, kam pia tuba unamle,’ nyabuka, elti, wipnamlume.

³⁵ Akunum ereipmunyopura, tamubuka na dam boyanamlume. Yalyopura, na pununa ati, Raja bulamak ning deice buklirye, ninye deiyoknye unamle. Ara, Israel yala ninye ap, Yehuda yala ninye ap ati, na taleamse touk, taliplirye anggun deiyoknye unamle. ‘Winipnamle’ tenen, narye Salomo akunum wipdeipne,” Raja Daud birye nyabuk.

³⁶ Nyabukba, Yoyada el mi Benaya birye Raja Daud biti nyabuk. “Dipkoprop Allah el si Yahweh arye, tenyamnuk touk akunum winipnamabe. Daud anda nun Rajanye, na deiyoknye ulyama ati ara, an amu tamuk unune. Allah arye, melikulule. Allah aryuk, ‘Solomo bira Raja Israel unamle,’ nyapnamlarya.

³⁷ Na Raja Daud, Allah el si Yahweh arye, meliamnukba, teleb aryuk pil dolamse atonun, Salomo babye melipliba, teleb ubuka nun talibuka unamsile. Allah melisilya deice arye, ance taleamsulum talak ara, teleb ulamupu bukni, ‘Salomo birye talinamsil talak, pia teleb unamsil’ tenen, nyapne,” Benaya birye, Raja Daud biti nyabuk.

³⁸ Ati ara Zadok ap, Natan ap, Yoyada el mi Benaya ap, Kereti yala nang ap, tonda Peleti yala nang ap, sik nirya arye, Salomo dam biyik. El dam biyikopura, Raja Daud, el keledai basam arebikba, Salomo akeledai basam balye deice bukikba, sik nirya neika Gihon mutuku biyik.

³⁹ Akunum biyikopura, Allah el aik pum tam pil donanye Zadok birye zaitun yo duk minyak mek, teleb cang makau arye libuka, Allah el yupu nyan aik deiamika arye dobuka, Salomo kisok deice dikeibuk. Winibuka deiyok ara, ‘Salomo nun Raja unamsil’ tenen, ‘Wipdeibabeʼ tenen ati, winibuk. Winibukura, ton nang ara, pong-pongan ning, el si terompet pong-pong anmek. Pong-pong anmek talak ara, awekmek ninye nirya arye, “Nun Raja Salomo pia tuba kam unamle,” nyabuka, weik yupu arye, nyanmekce winilinmek.

⁴⁰ Akunum erepdeibikopura, Salomo menekuka banmokba, sik atam nang nirya arye, el dong tam aminyan yanganmekce, pong-pong ana el si suling deice arye, pong-pong anmekba, yuk nang arye, mot teleb nyanmekopura, amutuku nirya ara, weik lelim nyapnin yanganmeka ati, atalak ara, mutuku nirya lelim weik ubuk.

⁴¹ Sik anang nirya awininmek talak ara, yuknye el si Adonia, ‘Na ninye deiyoknye unamne,’ tenelamukce, ‘Ereipniting’ tenen, el ap, el kwit capu nang nirya ap, weik kwalina yubuka deipmekce dinmek talak ara, asum weik arye nyanmek nang arye, Raja Salomo telebe nyana ati, weik arye nyanmekba, Adonia ap, el kayapu ap kekebik. Pong-pong an ning, el si terompet kekenmekba, tonoknye el si Yoab birye asipdeyuk. “Otam weik asik noutam ara, weik lelim nyanmaka ara, yata deiyok ati do?” nyabuka asipdeyuk.

⁴² Asipmok talak aryuk, Allah el si eren aik pum pil dona deiyoknye el si Abiatar, el mi Yonatan bira sik dam yayuk. Yayukba, Adonia birye, “Telebe, anyaik weklyame. Anda teleb wininanye binya arye, ‘Dipkoprop laka teleb yupu boyanmasilame,’ tenepkine,” nyabuk.

⁴³ Nyabukura, Yonatan birye tamubuka nyabuk. “Kume na nio. Nun ninye deiyoknye Raja Daud amu tam unyabe. Daud birye nyapdeibukba, ninye arye el mi Solomo bobuka, ‘Nun ninye deiyoknye, Raja unamsile’ tenen, erepdeibikba, nun winiryuk deiyoknye dipkoprob Raja unamsile.

⁴⁴ Raja Daud birye nyapdeibukba, Allah el si eren aik pum tam pil dona deiyoknye el si Zadok ap, tonda Allah el yupu lak nyana deiyoknye Natan ap, Yoyada el mi Benaya ap, tonda sik Kereti yala nang ap, Peleti yala nang ap, sik nirya arye Salomo bobuka, Daud el keledai basam balye deice bukikba, Gihon mutuku bobinmek.”

⁴⁵ “Gihon mutuku bobinmekopura, Allah el si eren aik pum tam pil dona deiyoknye el si Zadok ap, tonda Allah el yupu lak nyana deiyoknye Natan ap arye, ‘Salomo nun Raja unamsil’ tenen, wibuka deiprikce, zaitun yo duk minyak mek kwebuka Salomo kisok deice dikeiprik. Winiprika ati ara, abulupmek nang nirya arye, Daud dam akunum bulubuka wekelbanmekce, yupu lelim weik arye nyanmekce wininmaka ara, alelim kekenmalume,” Yonatan birye Adonia biti nyabuk.

⁴⁶ Anyabukopura, ayupu ton dukdongobuka nyabuk. “Aninguk kum bukni, ninye deiyoknye birye, weik nang bulamak ning deice bululak ara, Salomo akunum bukmale. Ara, Raja kina ati bukmale.

⁴⁷ Tonda, nun ninye deiyoknye Raja Daud, el amu tam pil dona deiyok nang, weik nang nirya arye, ‘El telebe,’ nyana ati akunum yanmake.” Yanmakce nyanmake. “Nun ni Daud, ance teleb ubuka taleamsulum bukni, wini talak ara, an mi Salomo birye talipnamsil talak ara, ‘Pia teleb unamsil’ tenen, Allah moronmabe. Tonda, Daud anda, mambul pil weik dolamluma deice arye, an si ara weik si upkukba, ninye weik arye, kel bikamkike. Bukni, ‘An mi Salomo el si ara, pia weik mambul pil doptuba, weik si upliba, ninye pia weik arye kel bikinamting’ tenen, Allah moronamabe,” nyapmake. Nyanmekba, nun ni koproba Raja Daud birye, Allah el si erena ati, el kisok kanupdongobukce nyabuk. “Se na ni Allah, an si Yahweh ati, ‘Pia telebe,’ nyapkine.

⁴⁸ Na ni Yahweh, ance nun Israel ninye ati pia kalikuka melisilyame. Ance meliamnulumba, min kum dipsa ati, wini talak ara, na pununa ati, Israel ninye talipnamle deiyoknye, Salomo akunum eipmane. Narye, Israel ninye taleamse talak, bulamse ning deice ara, Salomo buklirye, aninye talipnamlarya. Ati, ‘Telebe,’ nyapkine na ni.” Raja Daud birye, Allah ati nyabuk. Aning nirya ara, Yonatan birye Adonia ap, el kwit capu nang ap ati lak nyabuk.

⁴⁹ Yonatan birye nyanmok yupu noutam, Raja Daud birye, ‘Na pununanye akunum eipmane,’ nyabuk. Akunum lak nyabukopura, Adonia el kwit capu nang nirya arye, malye kanye bobikce, ‘Se’ tenen, ilil ubukba, tikukabikce, adiparyuk anyaik batakuka bikbik abuka yuk-yuk bindobik.

⁵⁰ Sik wininmek bukni, Adonia eluk ara, ‘Raja Salomo birye yata upnamle do?’ tenen, ilil weik ubukba, bikbik abuka biyuk. El biyuk aik ara, Allah el si eren aik pum tam bukni, anyaik deipmek ning binuka talibuk. Ara, Allah el arin ning deilinak, cang keil arye domik mesba bukni, dana-dana belyamuk ning binuka talibuk. Elce aning talipmoka deiyok ara, ‘Aning talipniba, mangkau kibuka kum opnikirye, bico tenebuka namin kipnamniyak’ tenen, binuka talibuk.

⁵¹ Winibukopura, yuk nang arye kel bikikce, Raja Salomo el dam binuka lak nyabik. “Nai Salomo, Adonia bira, ‘Raja Salomo birye na opnamanil do?’ tenen, ilil unmala ati ara, Allah el si eren aik pum tam bukni, el arin ning deilinak, yo lakase arye domik marikna bukni, dana-dana belyamuk ning talibuka unmale. Elce nyapkile, ‘Se, na ilil ati ara, Raja Salomo birye, ‘Anye Adonia, na amu tam ulinye bira, parang ya arye dobuka, dipkoprob anye kum opnamne,’ nyabuka, nyalin yupu mikip arye, nyapdeipnutuba diba teneptinye,’ nyabuk.” Sik anang arye Raja Salomo biti lak nyabik.

⁵² Nyabikba, Raja Salomo birye tamubuka nyabuk. “El winilul ning dipdebirye, malye una kum bukni, diksukumuk ulyopura, dipkoprob elti, kum opnamabe. Kum obibyeba, el kisok potong ara, tonok ning babye, tukwak kum saknamle. Bukni, elce malye winiplyopura, dipkoprob elti, oplobibiba, dipnamlarya,” Raja Salomo birye nyabuk.

⁵³ Nyabukabukce, ninye ton dopdeibukba, biyikopura, Adonia birye, Allah el si eren aik pum tam bukni, el arin ning delinak, yo lakase arye domik marikna bukni, dana-dana belyamuk ning talibuka unmok bukni, anang binuka eibik. Eibikce, anang arye Adonia bobuka Raja Salomo dam bobiyikopura, Adonia birye Salomo el si erena ati, kisok kanupdongobuk. Winibukura, Salomo birye, anye Adonia biti nyabuk. “Wini talak ara, an asik tamubuka bilyame,” nyabukura, biyuk.